SULA MAR 55

Kaka Inyalo Konyo Kanyaklau

TUGE

E piny mangima, ji milionde lamo Jehova ka gimor, kendo gitimo kamano ka gin e kanyakla mopogore opogore. Gimor gi kaka ichikogi kod kaka itayogi, kendo giikore konyo kanyakla e yore mang’eny. Be mano e kaka ineno kanyaklau?

1. Gin yore mage minyalo tiyogo gi tekoni kod thuoloni e konyo kanyakla?

Waduto wanyalo konyo e kanyakla. Kuom ranyisi, be dibed ni nitie joma oti kata ma tuore manie kanyaklau? Be inyalo konyogi chopo e chokruok? Kata, be inyalo konyogi e yore mamoko kaka dhi nyiewonegi gik moko kata konyogi timo tije mag ot? (Som Jakobo 1:27.) Bende, wanyalo chiwore e lwoko kendo rito Kingdom Hall. Onge ng’ato ang’ata ma chunowa timo gigo. Hera ma waherogo Nyasaye kod jowetewa e ma miyo ‘wachiwore.’—Zaburi 110:3.

Nitie yore mamoko momedore ma joma osebatis nyalo konyogo kanyakla. Owete ma chopo gik ma dwarore e ndiko, nyalo bedo jokony-tich kata jodong-kanyakla. Owete kata nyimine nyalo lendo kuom thuolo momedore ka gibedo jopainia. Moko nyalo konyo e gero utewa mag lamo kata ginyalo dar mondo gidhi gikony kanyakla mamoko ma dwaro kony.

2. Ere kaka wanyalo tiyo gi mwanduwa e konyo kanyakla?

Wanyalo miyo ‘Jehova duong’ gi mwanduwa mabeyo.’ (Ngeche 3:9) Wabedoga mamor golo pesa kata gik mamoko ma wan-go mondo okony kanyakla kata tij lendo mitimo e piny mangima. (Som 2 Jo-Korintho 9:7.) Chiwo ma wagologa bende itiyogago e konyo joma oyudo masira. Ji mang’eny ‘ketoga gimoro tenge’ ma ginyalo chiwo kinde ka kinde. (Som 1 Jo-Korintho 16:2.) Wanyalo golo chiwo ka watiyo gi sanduk ma yudore e utewa mag lamo kata ka watiyo gi websaitwa mar donate.pr418.com. Wanyiso ni wahero Jehova kuom tiyo gi mwanduwa e tiyone. Mano en thuolo makende ma omiyowa.

TIM NONRO

Non ane yore mamoko minyalo konyogo kanyakla.

3. Wanyalo tiyo gi mwanduwa

Jehova gi Yesu ohero joma chiwo gik moko ma ok ochun-gi. Kuom ranyisi, Yesu nopwoyo chi liel moro ma ne nigi pesa matin to pod nogolo chiwo. Som Luka 21:1-4, kae to uwuo e wi penjo ma luwogi:

Be ochuno ni wagol pesa mang’eny eka wamor Jehova?
Jehova gi Yesu neno nade chiwo ma wagolo gi chunywa duto?

Mondo ing’e kaka itiyoga gi chiwo ma wagolo, tug VIDIO kae to uwuo e wi penjo ma luwo.

VIDIO: ‘Mich Miting’o e Lwedo Kichiwo ne Jehova’ (4:47)

Ere kaka itiyoga gi chiwo ma wagolo e konyo kanyakla manie piny mangima?

4. Wanyalo chiwore mondo wakony

E kinde Muma, jotich Jehova ne timoga kinda mondo girit kuonde mag lamo. Kata kamano, ne ok gichiw mana pesa kende. Som 2 Weche mag Ndalo 34:9-11, kae to uwuo e wi penjo ma luwoni:

Ere kaka Jo-Israel duto ne konyo e rito od Jehova, kata kuonde mag lamo?

Mondo ine kaka Joneno mag Jehova luwo ranyisigino, tug VIDIO kae to uwuo e wi penjo ma luwoni:

VIDIO: Rito Utewa mag Lamo (3:31)

Ang’o momiyo Kingdom Hall onego obed maler kendo ma nenore maber?
Gin yore mage mamoko ma inyalo konyogo?

5. Owete nyalo timo kinda mondo giyud migepe momedore

Ndiko jiwo owete ma Jokristo mondo gitim duto ma ginyalo e konyo kanyakla. Mondo ine kaka owete nyalo konyo e kanyakla, tug VIDIO kae to uwuo e wi penjo ma luwo.

VIDIO: Owete—Temuru Matek Mondo Uyud Tich Maber (5:23)

Ere kaka Ryan notemo matek mondo omed konyo kanyakla?

Muma nyisowa gik ma dwarore ni owete otim eka gibed jokony-tich kata jodong-kanyakla. Som 1 Timotheo 3:1-13, kae to uwuo e wi penjo ma luwogi:

Ang’o ma dwarore kuom owete ma temo matek mondo gibed jokony-tich kata jodong-kanyakla?
Joodgi onego obed gi kido kaka mage?—Ne kwan matindo 4 kod 11.
Sama owete temo matek mondo gichop gik ma dwarorego, ere kaka mano konyo ji duto e kanyakla?