Jokristo madier ok yie mondo gimoro amora kata ng’ato ang’ata omon-gi lamo Jehova. Onge kiawa ni in be iwinjo kamano. Jehova ogeni nikech imakori kode. (Som 1 Weche mag Ndalo 28:9.) Gin gik mage ma nyalo moni makori motegno gi Jehova, to en ang’o ma nyalo konyi loyogi?

1. Ere kaka jomamoko nyalo monowa makore motegno gi Jehova?

Nitie joma nyalo temo tamowa tiyo ne Jehova. Gin jomage ma nyalo timo kamano? Jomoko moseweyo adiera nyalo temo wacho miriambo e wi riwruok mar oganda Jehova mondo giketh yiewa. Mago gin joma ong’anyo ne adiera. Bende, nitie jotend dinde moko ma wachoga miriambo e wiwa mondo joma ok otang’ owe adiera. En gima rach ahinya ka wamino wach kodgi, wasomo bugegi, wadhi e websait margi kata neno vidio ma giloso. Yesu nowacho kama e wi joma temo tamo jomoko mondo kik gilam Jehova: “Wereuru kodgi. Gitayo jomamoko, to gin giwegi gin muofni. Ka muofu tayo muofu wadgi, giduto gibiro lwar e bur.”​​—Mathayo 15:14.

To nade ka ng’at moro ma wang’eyo oramo ni odwaro weyo bedo Janeno mar Jehova? Wachno nyalo nyoso chunywa, to ahinya ahinya ka en watwa kata osiepwa. Onyalo chunowa ni wayier makore kode kata makore gi Jehova. Nyaka wang’ad ni wabiro siko ka wamakore gi Nyasaye moloyo gimoro amora kata ng’ato ang’ata. (Mathayo 10:37) Omiyo, waweyo tudore gi joma kamago mana kaka chik Jehova jiwowa ni watim.​​—Som 1 Jo-Korintho 5:​11.

2. Ere kaka yiero ma watimo nyalo nyiso ni wamakore gi Jehova?

Ka wahero Jehova, wabiro were gi gimoro amora motudore gi dinde mag miriambo. Omiyo, tijewa, riwruoge ma wantiere, kata gik mamoko ma watimo, ok onego otudre kata matin gi dinde mag miriambo. Jehova siemowa kama: “Auru kuome, [tiende ni Babulon Maduong’], un joga.”​​—Fweny 18:​2, 4.

 TIM NONRO

3. Tang’ gi jopuonj mag miriambo

Ang’o monego watim sama wawinjo ka ji wacho weche maricho e wi riwruok mar oganda Jehova? Som Ngeche 14:​15, kae to uwuo e wi penjo ma luwoni:

• Ang’o momiyo wabedoga motang’ mondo kik wayie ayieya gi gimoro amora ma wawinjo?

Som 2 Johana 10, kae to uwuo e wi penjo ma luwogi:

• Onego wane nade joma ong’anyo ne adiera?

• Kata obedo ni ok watudre achiel kachiel gi joma ong’anyo mi oweyo adiera, gin yore mage ma pod nyalo miyo watudre kodgi?

• Iparo ni Jehova nyalo winjo nade ka wachiko itwa ne weche maricho ma ji wacho kuome kod riwruok mare?

4. Sik kimakori gi Nyasaye sama Jakristo wadu otimo richo

Ka wafwenyo ni ng’at moro e kanyakla otimo richo moro maduong’, ang’o monego watim? Non ane puonj ma wanyalo yudo kuom chike ma ne Jehova omiyo Jo-Israel machon. Som Tim Jo-Lawi 5:1.

Ndikono konyowa ng’eyo ni ka wafwenyo ni ng’ato otimo richo moro maduong’, onego wanyis jodongo gima wang’eyo e wi wachno. Kata kamano, ka pok watimo kamano, nyalo bedo maber ka wajiwo ng’atno mondo en owuon odhi onyis jodongo gima rach motimono. Ka ok otimo kamano, wabiro nyiso jodongo weche ma wang’eyo e wi wachno mondo wanyis ni wamakore gi Jehova. Ang’o momiyo timo kamano nyiso ni wahero . . .

• Jehova Nyasaye?

• ng’at motimo richono?

• jomamoko manie kanyakla?

 5. Wuog e Babulon Maduong’

 PUONJ MADUONG’

Mondo wasik ka wamakore gi Jehova, onego wawe tudore gi joma ong’anyone. Bende, nyaka wawere chuth gi dinde mag miriambo.

Ang’o ma ipuonjori?

• Ang’o momiyo ok onego wane, wawinj, kata wasom weche mag joma ong’anyo ne adiera?

• Onego wane nade joma oseng’ado ni koro giweyo bedo Joneno mag Jehova?

• Ere kaka wanyalo luwo chik ma wacho ni wawuog e dinde mag miriambo?