Donge inyalo paro kinde moko mabeyo ma ne ijabedogago chon ka in kanyachiel gi oganda Jehova? Nyalo bedo ni kindego ne gin ka un e chokruok moro mar kanyakla, e achiel kuom chokruogewa madongo, e tij yalo, kata e budho moro gi Jakristo wadu? Wiyi pok owil gi Jehova; to Jehova bende wiye pok owil kodi. Oparo maber kaka ne itiyone gi kinda. Kendo en gi siso mar konyi duogo ire.

Jehova wacho niya: “An awuon, anadwar romba, anadwargi nyaka ayudgi. Kaka jakwath odwaro rombe chieng’ono kobet ka ma rombe okee, e kaka anadwar romba; anagolgi e kuonde duto ka ma gisekee.”—Ezekiel 34:11, 12.