KINDE mang’eny, Jehova pimorega gi jakwath sama owuoyo gi joge. Osingonwa e Wachne ma en Muma kama: “An awuon, anadwar romba, anadwargi nyaka ayudgi.”—Ezekiel 34:11, 12.

Ng’a gini ma gin rombe mag Jehova? Kokete e yo mayot, rombe mag Jehova gin jogo mohere kendo ma lame. Muma wachonwa niya: ‘Walam, wakulre; wago chongwa piny nyim Jehova Jachuechwa. Nimar en Nyasachwa, kendo wan ji mag lege gi rombe mag lwete.’ (Zaburi 95:6, 7) Mana kaka rombe ma rombe ma luwo bang’ jakwadhgi, jogo ma lamo Jehova oikore luwo Jakwadhgi. Be mano nyiso ni rombego onge ketho? Ooyo. Nitie kinde ma jotich Nyasaye osebedo kaka ‘rombe moke,’ “rombe molal,” kendo “kaka rombe mobayo yo.” (Ezekiel 34:12; Mathayo 15:24; 1 Petro 2:25) Kata kamano, sama ng’ato obayo yo, Jehova ok jwang’e ka ng’at ma ok nyal lokore mi duog ire.

 Be pod ineno Jehova kaka Jakwath ma riti in bende? Gin yore mage ma Jehova nyisogo ni en Jakwath maber e ndalowagi? We wanon ane yore adek:

Opidhowa gi chiemb chuny. Jehova wacho kama: ‘Anakwagi e lege mabeyo. Gininind e kul maber, kendo ginichiem e i lege moloth maber.’ (Ezekiel 34:14) Kinde duto Jehova osebedo ka pidhowa gi kit chiemb chuny mopogore opogore e kinde mowinjore. Be inyalo paro wach moro ma ne isomo e bugewa ma ne okonyi ahinya, kata ma ne iwinjo e twak moro, kata ma ne ineno e vidio? Donge mano nomiyo ineno ni adier Jehova dewi ahinya?

Oritowa kendo osirowa. Jehova singo niya: ‘Anaduok mano mope, anatue mano ma otur, anathiedh mano matuo.’ (Ezekiel 34:16) Jehova tego jogo ma chunygi onyosore kendo mopong’ gi parruok. Mana kaka jakwath ma tueyo bandej ne rombo motur mondo ochang, Jehova bende jiwo joge ma chunygi onyosore, kata ma nyalo bedo ni ochwany gi Jokristo wetegi. Bende, oduoko ire jogo mosebayo yo kendo ma dibed ni chunygi chandore nikech ketho moro ma dipo ni ne gitimo.

Okawowa kaka joma en gi ting’ mar rito. Jehova wacho kama: ‘Anagolgi kuonde duto ma gisekee.’ Kae to Jehova medo wacho ni, “anadwar mano moselal.” (Ezekiel 34:12, 16) E wang’ Jehova, ok okwan rombo molal kaka rombo modhi chuth. Ong’eyo ni sama rombo olal, onego omany rombono kendo obedo mamor ahinya bang’ yude. (Mathayo 18:12-14) Kendo en kamano nimar oluongo joma lame gadier niya: ‘Romba, mana romba ma akwayo.’ (Ezekiel 34:31) To in bende in achiel kuom rombenego.

Iparo ni ang’o momiyo Jehova manyi kodwaro ni iduog ire? Mano en nikech odwaro ni ibed mamor e ngimani. Osingo ni guethne biro o ka ‘koth mang’eny ma kelo hawi’ ne rombene. (Ezekiel 34:26) Mano ok en mana singo manono. En adier ni in bende iseneno gueth mag Jehova e ngimani.

Par ane kinde ma e ka ne ichako ng’eyoe Jehova. Kuom ranyisi, ne iwinjo nade e chunyi kane ipuonjori adiera e wi nying Nyasaye kod dwarone ne dhano? Be inyalo paro kaka ne imor riwori gi Jokristo weteni ka un e chokruogewa madongo? Par ane kinde ma ne in e tij lendo to ng’ato orwako wach maber gi chunye duto, donge ne ijadok pacho ka imor sidang’?

Nitie gima inyalo timo mondo ichak ibed gi kinde mag mor kaka mago. Jotich Nyasaye machon nolemo kama eri: “A Jehova, miwa walokreni, mi wanalokre; miwa mondo wabedi kaka ne wabet ndalo machon.” (Yuagruok 5:21) Jehova nodwoko lamogino kendo joge ne oduogo ire mondo gitine gi chuny mamor kendo. (Nehemia 8:17) Kamano e kaka Jehova biro timoni in bende.

Kata kamano, duogo ir Jehova ok yot ayota kamano. Non ane pek moko ma nyalo chando ng’at ma dwaro duogo ir Jehova kod kaka inyalo nyagori kodgi.