JI DUTO moriwo nyaka jo Nyasaye bedoga gi parruok. Kata jandik-zaburi bende nondiko ni ne en gi ‘weche mang’eny moparo’ e chunye. (Zaburi 94:19) Yesu bende nowacho ni e ndalo mag giko, “parruok mag ngima” ne dhi miyo tiyo ne Jehova obed matek ne ji. (Luka 21:34) In to in gi paro mane? Be dibed ni weche mag pesa chandi, kaachiel gi tungni mag joot kata tuoche? Ere kaka Jehova nyalo konyi mondo inyagri gi chandruogego?

Ok wanyal loyo parruok gi tekowa wawegi. Jaote Paulo nondiko niya: “Idiyowa matek e yore duto, . . . wadhier nono. . . ; igowa piny.” Kata kamano, pod nowacho bende ni “ok odinnwa chuth” ‘ma onge yo chuth mar wuok,’ kendo ni “ok tiekwa.” En ang’o ma nyalo konyowa nano? En “teko mokalo mapile”—tiende ni teko ma wuok kuom Jehova Nyasachwa ma en Nyasaye ma nyalo duto.—2 Jo-Korintho 4:7-9.

Par ane kaka ne iyudo “teko mokalo mapile” kinde mokalo. Be iparo twak moro ma nyalo bedo ni ne ojiwi mimedo ng’eyo kaka Jehova oheri gadier? Donge yie ma in-go kuom singo mag Jehova nomedo bedo motegno e kinde ma ne ipuonjo jomoko e wi geno mar Paradiso? Sama wadhi e chokruoge mag Jokristo kaachiel gi yalo wach maber ne jomamoko, wayudoga teko ma konyowa nano sama wan gi parruok mag ngima. Mano miyo pachwa bedo mokue kendo watiyo ne Jehova gi mor.

Adier en ni inyalo bedo gi weche modhuro ma dwarore ni itim te dichiel. Kuom ranyisi, Jehova dwaro ni waket Pinyruoth obed mokwongo e ngimawa kendo wamakre gi chenrowa mag chopo ting’ ma wan-go e tij Nyasaye. (Mathayo 6:33; Luka 13:24) To nade kapo ni akwede, tuoche, kata chandruoge mag familia nyoso chunyi kendo weyi ka iol? To nade kapo ni tiji mar yuto chamo secheni kod tekoni ma dine itiyogo e weche mag kanyakla? Nikech weche mang’eny nyalo diyi to koni ionge gi thuolo kod teko mar timogi, inyalo winjo ka piny obembi. Samoro inyalo paro ni mita gik ma Jehova dwaro ni itim e ma ng’eny mohewi.

Ber ng’eyo ni Jehova ong’eyo chalwa. Omiyo, ok ochikwa ni watim gik mohingowa. Kendo ong’eyo ni kapo ni tekrewa odok chien kendo pachwa ool, nyalo kawowa kinde mondo mi tekrewa oduog kendo.—Zaburi 103:13, 14.

Kuom ranyisi, ne ane kaka Jehova nokonyo janabi Elija. Nitie kinde ma chuny Elija ne onyosore ahinya kendo luoro ne omiyo oringo migape modhi nyaka e thim. Be Jehova ne orogo ne janabino kochike ni odog e migawone? Ooyo. Kar mano, Jehova ne ooro malaika ir Elija nyadiriyo mondo ochiewe mos kendo omiye chiemo ma docham. Kata kamano, ndalo 40 bang’e, Elija pod ne nigi parruok kod luoro. Ang’o ma Jehova notimone kendo mondo okonye? Mokwongo, Jehova notimone gima nyiso  ni ne en gi nyalo mar rite. Mar ariyo, Jehova ne ohoyo Elija kojiwe gi ‘dwol matin mokue.’ To mogik, Jehova nofwenyo ne Elija ni pod ne nitie ji alufe mamoko ma bende ne tiyo ne Nyasaye ka gichung’ motegno. Mano nomiyo Elija ochako bedo janabi ma nigi kinda kendo. (1 Ruodhi 19:1-19) Ang’o ma wapuonjore e wachno? Kane parruok ohewo Elija, Jehova ne ohore kode mos kendo ne okeche. Kata sani Jehova pok olokore. Okonyowa mana e yo ma chalo kamano.

Sama iparo kuom gik minyalo timo ne Jehova, kik iparri ahinya kuom gik ma ionge gi nyalo mar timo. Kik ipim nyalo ma ne in-go chon gi nyalo ma in-go sani. Par ranyisini: Jang’wech ma ne oweyo tiegore kuom dweche kata higni mogwaro ok nyal chako achaka ng’wech dichiel e rang’iny ma noringogo chon. Kar mano, obiro chako tiegore matin tin mondo tekone oduog kendo. Jokristo bende gin kaka jong’wech. Gitiegore ka gin gi gimomiyo gitimo kamano. (1 Jo-Korintho 9:24-27) Donge nyalo bedo maber ka in bende ichako mana gi gigo minyalo timo gie sani? Kuom ranyisi, inyalo chako gi dhi e chokruoge mag kanyakla. Gima chielo en kwayo Jehova e lamo mondo okonyi chopo gima idwaro. Kaka imedo bedo gi teko mar loso winjruokni gi Nyasaye kendo, e kaka ibiro bilo kendo neno ni “Jehova ber.” (Zaburi 34:8) Ng’e ni gimoro amora mitimo kinyisogo kaka ihero Jehova, kata bed ni gino en gima tin ma rom nade, pod Jehova morgo.—Luka 21:1-4.

Ere kaka Jehova nomiyo nyaminwa ma June teko mar duogo ire kendo? June wacho kama: “Nasiko alemo ka asayo Jehova mondo okonya. Kae to chieng’ moro chi wuoda ne onyisa wach chokruok moro ma ne idhi tim e taon ma wadakie. Nang’ado mar dhi e chokruogno odiechieng’ achiel kende. Mano kaka ne chunya oil bedo kanyachiel gi jo Jehova kendo! Chokruogno e gima ne ochiera kendo. Koro sani atiyo ne Jehova gi mor kendo. Ngimana koro ochomo ka mowinjore kendo. Sani koro asefwenyo ni ok anyal dhi nyime gi tekrena awuon ma ok ariwra kanyachiel gi owete gi nyiminena. Amor ni thuolo pod ne nitie moroma duogogo ir Jehova.”