KARE 4
Ka Chunyi Chandore Nikech Kethoni—“Pwodha Kuom Kethona”
Nyaminwa miluongo ni Martha wacho kama: “Tich manyien ma ne ayudo noting’o ngima familia marwa malo. Kata kamano, tijno ne omiyo adonjora e weche moko michichgo. Ne achako donjo e nyasi moko ma ok owinjore, donjo e weche siasa, to kata mana dhi e kanise mamoko. Kuom higni 40, ne abedo mana kaka ng’at ma ok en Janeno mar Jehova. Kaka kinde ne medo kalo e kaka ne amedo neno ni Jehova ok nyal weyona kethoga ngang’. An bende ne aneno ni aseketho e okang’ ma ok anyal duogo e yo kendo. Mano en nikech ne aseng’eyo adiera kata ka pok ne achako donjo e timbe marichogo.”
CHUNY ng’ato nyalo nyosore ahinya nikech ketho mosetimo. Ruoth Daudi nondiko kama: ‘Timna mamono oseimo wiya, kendo kaka ting’ mapek gihewa gi pek.’ (Zaburi 38:4) Nitie Jokristo moko mosebedo gi kuyo mokalo tong’ nikech kethogi ka giparo ni Jehova ok nyal weyonegi ngang’. (2 Jo-Korintho 2:7) Be paro ma kamano en paro makare adier? Kata kapo ni isetimo richo madongo ahinya, be iparo ni koro ibor ahinya gi Jehova ma ok onyal weyoni ngang’? Ooyo, kik ipar kamano kata matin!
“Wapor Wach Kaachiel”
Jehova ok nyal jwang’o joma otimo richo to giloko chunygi gadier. Adier en ni owuon okawo okang’ mar manyogi! E ngero mar wuowi ma ne olal, Yesu nopimo Jehova gi wuoro ma jahera ma wuode noringo dala mondo odhi odag e ngima mar anjawo. Bang’ kinde, wuowino nong’ado mar duogo pacho. ‘Ka wuowino pod ne nigi ka mabor, wuon-gi nonene, mi ne okeche, kendo noringo mokwako wuodeno kendo nonyodhe gi mor.’ (Luka 15:11-20) Be diher sudo machiegni gi Jehova to iwinjo ni in ‘mabor’ ahinya kode? Mana kaka wuoro ma Yesu wuoyoe e ngerono, Jehova bende kechi, oheri kendo odewi ahinya. Ogombo ahinya ni iduog ire.
To nade ka iparo ni richoni dongo kendo ng’eny ahinya ma Jehova ok nyal weyoni? Wakwayi ni inon ane weche ma Jehova gweligo mondo iduog ire ka luwore gi Isaiah 1:18. Ndikono nyisi niya: “Jehova owacho: ‘Biuru koro, wapor wach kaachiel; kata richou obet makwar ahinya, ginidok matar kaka theluji.’” Ee, kata ka richoni chalo gi rangi makwar ahinya momienore e law ma rachar, pod Jehova nyalo weyoni.
Jehova ok dwar ni mondo chunyi osik ka chandore nikech ketho ma ne itimo. Kare ere kaka inyalo ng’eyo ni Nyasaye oseweyoni gadier mondo mi chunyi okue mos ma ok ketni bura? Non ane okenge ariyo ma Ruoth Daudi nokawo. Mokwongo, Daudi nowacho kama: ‘Anahul ne Jehova timbena ma asebago yo.’ (Zaburi 32:5) Ng’e ni ka luwore gi Isaiah 1:18, Jehova osegweli ichopne e lamo mondo ‘ipor wach kaachiel’ kode. Ber mondo itim kaka osenyisino. Hul richoni ne Jehova kendo nyise e lamo kaka iwinjo e chunyi. Ka luwore gi gik ma Daudi noseneno e ngimane owuon, nonyalo lemo gi chir niya: “Pwodha kuom kethona. . . . Chuny motur kendo moregore, A Nyasaye, ok nicha.”—Zaburi 51:2, 17.
Mar ariyo, Nyasaye nooro ne Daudi janabi Nathan mondo okonye. (2 Samuel 12:13) E kindegi, Jehova oseketo jodong-kanyakla mosetieg mondo gikony joricho moseloko chunygi gadier obed gi winjruok maber gi Jehova kendo. Sama idhi ir jodongo, gibiro tiyo gi Ndiko kendo lamo kodi mondo giho chunyi. Gibiro konyi golo paro ma ok owinjore ma nyalo bedo ni in-go e chunyi mondo winjruokni gi Nyasaye obed maber kendo.—Jakobo 5:14-16.
Jehova dwaro ni in bende ibed gi chuny ma ok ketni bura
“Ojahawi Ng’atno ma Timne Marach Owene”
En adier ni samoro inyalo neno ni hulo ne Jehova Nyasaye richoni kendo dhi ir jodongo gin gik matek timo ahinya. Nenore ni Daudi bende ne nigi paro ma kamano. ‘Ne oling’’ ma ok ohulo richone kuom kinde. (Zaburi 32:3) Kata kamano, bang’e ne ofwenyo ni ber mondo ohul richone kendo orie yore.
Ber maduong’ ma Daudi noyudo bang’ hulo richone en ni nowinjo ka chunye ogonyore mi obedo mamor kendo. Nondiko kama eri: “Ojahawi ng’atno ma timne marach owene, ma kethone oum.” (Zaburi 32:1) Ne olemo bende niya: “A Ruoth, yaw dhoga, mi napaki e nyim ji.” (Zaburi 51:15) Chuny Daudi koro ne ok chandre. Bende, ne omor ni Nyasaye koro ne oseweyone. To mago nojiwe mopako Jehova e nyim ji.
Jehova dwaro ni in bende ibed gi chuny ma ok ketni bura. Odwaro bende ni inyis jomamoko berne kod dwache ka in gi chuny maler kendo gi mor mogundho, to ok gi chuny ma chandore nikech ketho moro. (Zaburi 65:1-4) Ng’e ni ogweli ni ibi ire ‘e ka richoni oruch, mondo Jehova owuon omiyi kinde mar duogo tekoni.’—Tich Joote 3:19.
Mano e kaka ne otimore ne nyaminwa miluongo ni Martha. Owacho kama: “Wuoda ne siko orona gasede mag Ohinga mar Jarito kod Amkeni! mondo asom. Mosmos ne achako hero Jehova kendo. Gima ne tekna ahinya timo ne en kwayo ng’wono nikech richo duto ma ne asetimo. Kata kamano, gikone ne awuoyo gi Nyasaye e lamo ka asaye mondo owena richogago duto. En gima iwuoro ni higni 40 nokalo ka pok aduogo ir Jehova. Ranyisinano nyiso maler ni kata kapo ni higni mang’eny osekalo, pod ng’ato nyalo duogo ir Nyasaye mi Nyasaye here kendo.”
Samoro Inyalo Hero Magi Bende
OHINGA MAR JARITO—GOCHO MAR PUONJRUOK
Jehova Weyo Ne Ji Richogi—Mano Onego Okonyi Nade?
SUD MACHIEGNI GI JEHOVA
Nyasaye ma ‘Oikore Weyo ne Ji Richogi’
Ka Nyasaye nigi paro makare chuth, ere kaka onyalo weyonwa richowa mi wiye wil kodgi?
VIDIO
Wuowi ma Nolal Oduogo
Gima lit en ni rowere inyalo wuondi ma giwe luwo timbe mabeyo ma osepuonjgi a e tin-gi kaka Jokristo. Ng’i vidioni mondo ine pek ma rowere romogo e kindewagi.
