CHAKO MBAKA
SULA MAR 5
Ti gi Rieko
Puonj: “Kinde duto, wecheu mondo obed mang’won.”—Kol. 4:6.
Gima Paulo Notimo
1. Ne VIDIO, kata isom Tich Joote 17:22, 23. Bang’ mano, non penjo ma luwogi:
-
Paulo ne neno nade timbe motudore gi lamo nyiseche manono ma noneno kitimo Athens?—Ne Tich Joote 17:16.
-
Ere kaka Paulo notiyo gi gik ma Jo-Athens noyiego mondo olandnegi wach maber kar kwedogi?
Ang’o ma Wapuonjore Kuom Paulo?
2. Ji nyalo winjo wach ma walandonegi ka wayiero wechewa e yo maber, wang’eyo kinde ma onego wawuoye, kod kaka onego wawuo.
Luw Ranyisi mar Paulo
3. Yier weche ma moro ji. Kuom ranyisi, sama iwuoyo gi ng’at ma ok en Jakristo, nyalo dwarore ni ilok yo miwuoyogo e wi Muma kata Yesu.
4. Kik irikni rieyo paro mar ng’at miwuoyogo. Yiene mondo owach pache ka en thuolo. Ka ochiwo paro moro mopogore gi puonj mag Muma, tem matek mondo kik iywari kode. (Jak. 1:19) Kichikone iti adimba, mano biro konyi ng’eyo gik moyiego kod gimomiyo oyie kodgi.—Nge. 20:5.
5. Pwo ng’at milendone ka thuolo mar timo kamano oneno. Onyalo paro ni gik moyiego gin adier. Tem wuoyo e wi wach moro ma uduto uyiego, kae to bang’e inyalo konye mos mos mondo ong’e gima Muma puonjo.
