1, 2. Ang’o momiyo ihero Jehova Nyasaye?

 BE IHERO Nyasaye? Nyaka bed ni ihere ahinya kendo mano e momiyo ne ichiworine. Nyalo bedo ni inene kaka Osiepni migeno ahinya. Kata kamano, Nyasaye to ne oheri ahinya kata ka pok nihere. Muma nyisowa kama: “Wanyiso hera nikech en e ma nokwongo herowa.”​—1 Johana 4:19.

² Par ane yore ma Jehova osenyisogo ni oherowa. Osemiyowa piny ma jaberni mondo wadagie kendo opong’e gi gik ma morowa ahinya. (Mathayo 5:43-48; Fweny 4:11) Odwaro ni wabed gi winjruok maber kode kendo osemiyowa yore ma wanyalo ng’eyego. Sama wasomo Muma, wawinjo ka Jehova wuoyo kodwa. To sama walemo, en e ma owinjowa. (Zaburi 65:2) Otayowa kendo otegowa kotiyo gi rohone maler. (Luka 11:13) Nooronwa Wuode mohero ahinya mondo ogonywa e tuech mar richo kod tho.​—Som Johana 3:16; Jo-Rumi 5:8.

3. Ang’o ma dwarore mondo osiep manie kindwa gi Jehova osik kotegno?

 ³ Par ane ni in gi osiepni moro ma osemakore kodi sama weche beyo kata weche tek. Kinda dwarore mondo osiep manie kindu osik kotegno. Mano bende e gima dwarore mondo osiep manie kindwa gi Jehova osik kotegno. Jehova e osiep maberie mogik ma wanyalo bedogo. Osiep manie kindwa kode nyalo siko nyaka chieng’. Mano e momiyo Muma nyisowa niya: ‘Ritreuru e hera mar Nyasaye.’ (Juda 21) Ere kaka wanyalo timo mano? Muma chiwo dwoko mar penjono. Owacho niya: “Nimar tiend hero Nyasaye e ma, ni waluw chikene; to chikene ok tek luwo.”​—1 Johana 5:3.

4, 5. Ere kaka ne ichako hero Nyasaye?

⁴ Jaote Johana nowuoyo e wi hera ma waherogo Nyasaye. Be iparo kaka ne ichako hero Jehova?

⁵ Par ane kaka ne iwinjo ka ne ipuonjori ni Jehova dwaro ni idag e piny manyien nyaka chieng’. Ne ipuonjori gik moko duto ma ne otimo mondo iyud ngimano kendo ne ifwenyo ni mich maberie moloyo ma Jehova osemiyowa en oro Wuode e piny ka mondo othonwa. (Mathayo 20:28; Johana 8:29; Jo-Rumi 5:12, 18) Ka ne ipuonjori kaka Jehova oheri ahinya, wachno nomulo chunyi kendo in bende ne ichako here.​—Som 1 Johana 4:9, 10.

6. Hero ng’ato oriwo ang’o? Hera miherogo Nyasaye nochwali mondo itim ang’o?

⁶ Kata kamano, winjo awinja ni ihero Nyasaye ne en mana chakruok. Kuom ranyisi, ka wahero  ng’ato, ok wanyise anyisa ni wahere to waweyo gi kanyo, hera ma waheregono miyo watimo gik ma miyo obedo mamor. E yo ma kamano, hera ma ne iherogo Jehova nochwali mondo itim gik ma more. Ka herano nomedore, nichiwori mobatisi. Chiwruok gi batisoni nyiso ni isingori tiyo ne Jehova nyaka chieng’. (Som Jo-Rumi 14:7, 8.) Ere kaka inyalo chopo singono?

7. Ka wahero Jehova wabiro timo ang’o? Moko kuom chikene gin mage?

⁷ Wahero Jehova to mano e momiyo ‘waluwo chikene’. Watimo kamano e yo mane? Ka wawinjo gik monyisowa. Muma puonjowa kaka Jehova dwaro ni wadag. Kuom ranyisi, Muma nyisowa ni ok en gima kare ka wamer, wakwelo, wawacho miriambo, waterore, kata lamo ng’ato kata gimoro.​—1 Jo-Korintho 5:11; 6:18; 10:14; Jo-Efeso 4:28; Jo-Kolosai 3:9.

8, 9. Ere kaka wanyalo ng’eyo gima Jehova dwaro ni watim ka onge chik moro sie e Muma ma wuoyo e wi gima wadwaro timono? Chiw ane ranyisi.

⁸ Kata kamano, mondo wamor Jehova, onego watim gik mang’eny moloyo mana luwo chikene. Ok omiyowa list ma rabora manyiso chike monego waluw e weche duto ma waromogo e ngima. Omiyo, nitie seche moko ma ok wabi bedo gi chik moro sie mowuok e Muma ma nyisowa gima onego watim. Ka wayudore e chalno, ere kaka wanyalo timo yiero mabeyo? (Jo-Efeso 5:17) Muma oting’o puonj ma gin adiera ma konyowa neno gik moko kaka Jehova nenogi. Kendo sama wasomo Muma, okonyowa  ng’eyo Jehova e yo matut. Muma konyowa ng’eyo pache, moriwo nyaka gik mohero gi ma osin-go.​—Som Zaburi 97:10; Ngeche 6:16-19; som Weche Momedore namba 1.

⁹ Kuom ranyisi, ang’o manyalo konyowa yiero gima wabiro neno e TV kata ma wabiro manyo e intanet? Jehova ok oketonwa chik ma achiel kachiel e wechego. Kata kamano, puonj ma omiyowa nyalo konyowa timo yiero mabeyo. Ng’eny yore mag manyo mor e kindegi opong’ gi timbe mag gero kod terruok. Muma nyisowa ni Jehova “osin gi ng’ato ang’ata mohero timbe gero” kendo ni ‘obiro ng’ado bura ne joterruok gi jochode.’ (Zaburi 11:5; Jo-Hibrania 13:4) Ere kaka puonjgo nyalo konyowa timo yiero mabeyo? Ka wafwenyo ni Jehova osin gi gimoro kata onene ka tim ma ok ler, onego wawere gi gino.

10, 11. Ang’o momiyo waluwo chike Jehova?

¹⁰ Ang’o momiyo waluwo chike Jehova? Be watimo kamano mondo kik kumwa kata nikech ok wadwar donjo e chandruok ma yudo ng’ato ka otimo yiero moro marach? (Jo-Galatia 6:7) Waluwo chike Jehova nikech wahere. Mana kaka nyithindo dwaroga ni wuonegi obed mamor kodgi, e kaka wan bende wadwaro ni Wuonwa manie polo obed mamor kodwa. Be nitie gima duong’ manyalo morowa moloyo ng’eyo ni Jehova mor kodwa? Onge!​—Zaburi 5:12; Ngeche 12:2; som Weche Momedore namba 2.

¹¹ Waluwo chike Jehova kinde duto, ok mana seche ma timo kamano yotnwa kata ni nikech onge  gimoro machielo ma wanyalo timo. Kendo ok wayier chike kod puonj ma wabiro luwo gi ma ok wabi luwo. (Rapar mar Chik 12:32) Waluwo chike duto mag Jehova kendo wawinjo e chunywa kaka jandik zaburi ma nondiko niya: “Amor luwo chikeni, nikech aherogi ahinya.” (Zaburi 119:47; Jo-Rumi 6:17) Wadwaro bedo kaka Noa ma nonyiso ni ohero Jehova kuom timo gik moko duto ma nonyise ni otim. Muma wacho ni Noa “notimo mana kamano.” (Chakruok 6:22) Be igombo ni Jehova owach weche ma kamago kuomi?

12. Ang’o ma wanyalo timo mondo wamor chuny Jehova?

¹² Jehova winjo nade sa ma waluwo chikene? Wamoro chunye. (Ngeche 11:20; 27:11) Parie apara wachno! Wamoro chuny Jachuech mar piny gi polo ka waluwo chikene. Kata kamano, ok ochunwa luwo chikene. Kar mano, omiyowa nyalo mar timo yiero. Mano nyiso ni wanyalo yiero timo gima ber kata gima rach. Jehova dwaro ni hera ma waherego e ma ochwalwa mondo watim yiero mabeyo manyalo miyo wadag e ngima maberie moloyo.​—Rapar mar Chik 30:15, 16, 19, 20; som Weche Momedore namba 3.

13, 14. Wang’eyo nade ni chike Jehova ok tek luwo? Ler ane.

¹³ To nade ka waparo ni chike ma Jehova oketonwa tek luwo kata ni oridonwa ngima? Muma wacho maler niya: “Chikene ok tek luwo.” (1 Johana 5:3) E dho Grik, wach molok ni “tek” tiende en “gima pek.” E ndiko mamoko, itiyo gi wachni kiwuoyo  kuom keto ne ng’ato chike ma ok ochuno kata kiwuoyo kuom joma temo chiko ji e yo marach ka gihinyogi. (Mathayo 23:4; Tich Joote 20:29, 30) Muma mar New English Translation keto ndikono kama: “Chikene ok turwa.” Chike Jehova ok “pek,” tiende ni, ok gitek luwo. Kinde duto, onyisowa mana gik ma wanyalo timo.

¹⁴ Par ane ni ikonyo osiepni moro dar. Osefundo gik moko duto moketogi e boksi mopogore opogore. Nitie moko mayot ma ng’ato achiel e ma nyalo ting’o, to nitie moko mapek ma ji ariyo e ma nyalo ting’o. Be osiepnino nyalo kwayi mondo iting’ boksi mapek kendi? Ooyo! Nikech ang’o? En nikech ok odwar ni gigo oturi. Mana kaka osiepnino, Jehova ok nyal kwayi ni itim gima tek timo. (Rapar mar Chik 30:11-14) Jehova ong’eyowa maber. “Ong’eyo kaka ochueyowa, ong’eyo maler ni wan mana buru.”​—Zaburi 103:14.

15. Ang’o momiyo wanyalo bedo gadier ni chike mag Jehova kelonwa ber?

¹⁵ Musa nonyiso oganda Jo-Israel ni chike ma ne Jehova oketonegi ne dhi miyo ‘ngimagi odhi maber’ kendo konyogi mondo ‘gibed mangima.’ (Rapar mar Chik 5:28-33; 6:24) Mano bende e gima timore e kindegi. Gimoro amora ma Jehova onyisowa ni watim kelonwa ber. (Som Isaya 48:17.) Kinde duto, Wuonwa ma Jehova ong’eyo gima ber kodwa. (Jo-Rumi11:33) Muma nyisowa niya: “Nyasaye en hera.” (1 Johana 4:8) Mano nyiso ni hera e ma tayo gimoro amora ma Jehova wacho kendo timo.

16. Wang’eyo nade ni wanyalo luwo chike Jehova kata obedo ni wan gi nyawowa wawegi kendo wadak e piny marach?

 ¹⁶ Kinde duto, ok yot luwo kaka Jehova chikowa. Wadak e piny marach ma itayo gi Jachien. Otemo wuondo ji mondo gitim gik maricho. (1 Johana 5:19) Bende wakedo gi nyawowa wawegi nikech ginyalo miyo wawe luwo chike Nyasaye. (Jo-Rumi 7:21-25) Kata kamano, hera ma waherogo Jehova miyowa teko mar timo gik makare. Oneno kinda ma watimo e luwo chikene kendo omiyowa rohone maler mondo okonywa. (1 Samuel 15:22, 23; Tich Joote 5:32) Roho maler konyowa nyago kido ma miyo bedonwa mayot luwo chike Nyasaye.​—Jo-Galatia 5:22, 23.

17, 18. (a) Bugni biro konyowa nade? (b) Ang’o ma wabiro nono e sula ma luwo?

¹⁷ Bugni biro konyowa ng’eyo kaka wanyalo dak e ngima mamoro Jehova. Wabiro neno kaka wanyalo tiyo gi puonj mag Muma kod chike makare e ngimawa. Par kinde duto ni Jehova ok chunwa luwo chikene. Ka wayiero luwo chikene, wabiro bedo gi ngima maber sani kod e kinde mabiro. To maduong’ie moloyo, wabiro nyiso ni wahero Nyasaye gadier.​—Som Weche Momedore namba 4.

¹⁸ Jehova osemiyo ng’ato ka ng’ato kuomwa chuny mar pogo ber gi rach mondo okonywa timo yiero. Ka watiege maber, onyalo konyowa ‘luwo chikene.’ Omiyo, chuny mar pogo ber gi rach en ang’o, to ere kaka wanyalo tiege? Wane ane wachno e sula ma luwo.