1, 2. Ang’o ma wanyalo timo mondo wasik e hera mar Nyasaye?

 WADUTO wagomboga bedo gi ngima maber. Mano e momiyo watemoga ahinya mondo wachiem maber, warie dendwa kinde ka kinde, kendo warit dendwa e yo maber. Kata obedo ni timo gigo duto ok yot, ber ma wayudo miyo chunywa ok ol. Kata kamano, nitie yo moro machielo monego waritrego.

² Kata obedo ni waseng’eyo Jehova e okang’ moro, pod dwarore ni wadhi nyime tego winjruokwa kode. Ka ne Juda jiwo Jokristo mondo ‘giritre e hera mar Nyasaye,’ nolero kaka ginyalo timo mano. Nonyisogi niya: “Gerreuru uwegi e yieu maler chuth.” (Juda 20, 21) Omiyo, ere kaka wanyalo gero yie marwa?

3-5. (a) Satan dwaro ni ine nade chike mag Jehova? (b) In iwuon ineno nade puonj kod chike mag Jehova?

³ Dwarore ni ibed gadier chuth ni yore Jehova beyo kinde duto. Satan dwaro ni ipar ni chike mag Nyasaye tek luwo kendo ni inyalo bedo mamor ka in iwuon e ma iyiero gima ber kata marach. Satan osetemo matek mondo omi ji obed gi parono chakre  chon. Nochako timo kamano e puodho mar Eden kendo pod otemo matek mondo otim kamano e kindegi.​—Chakruok 3:1-6.

⁴ Be paro ma Satan nigono ni kare? Be chike mag Jehova tek luwo? Ooyo. Wawach ni iwuotho e puodho moro ma jaber kae to ineno ka nitie kamoro mochiel. Samoro inyalo penjori e chunyi ni, ‘Ang’o momiyo chiendni odinona yo?’ Sano sano, iwinjo ka sibuor moro ruto matek e tok chiendno. Donge koro ineno ber mar chiendno? Ee, imor ni chiendno ogeng’i mondo sibuor kik chami! Chike mag Jehova chal gi chiendno, to Jachien chal gi sibuorno. Wach Nyasaye siemowa kama: “Sikuru ka urito pachu, kendo nenuru! Jasiku ma en Jachien wuotho koni gi koni kaka sibuor ma ruto komanyo ng’at ma dongam.”​—1 Petro 5:8.

⁵ Jehova dwaro ni wadag e ngima maberie mogik. Ok odwar ni Satan owuondwa. Mano e momiyo osemiyowa puonj kod chike ma ritowa kendo ma miyo wabedo mamor. (Jo-Efeso 6:11) Jakobo nondiko niya: “Ng’at ma nono i chik kendo osiko ei chikno, ma en chik malong’o chuth ma miyo ji bedo thuolo, . . . bedo mamor kuom time.”​—Jakobo 1:25.

6. Ang’o manyalo konyowa bedo gadier ni yore mag Jehova ni kare?

⁶ Ka waluwo kaka Jehova chikowa, ngimawa bedo maber ahinya kendo winjruok manie kindwa kode medo bedo motegno. Kuom ranyisi, wan e ma wayudo ber sama walemo pile ka pile. (Mathayo 6:5-8; 1 Jo-Thesalonika 5:17) Wabedo mamor sama waluwo  kaka Nyasaye chikowa ni wadhi e chokruoge mondo walame kendo wajiwre. Bende wabedo mamor sama watimo duto ma wanyalo e tij lendo. (Mathayo 28:19, 20; Jo-Galatia 6:2; Jo-Hibrania 10:24, 25) Ka waparo kaka gigo osekonyowa kendo tego yiewa, wamedo bedo gadier ni yore Jehova ni kare.

7, 8. Ang’o manyalo konyowa mondo kik waparre e wi tembe ma wabiro romogo e kinde mabiro?

⁷ Wanyalo bedo gi parruok ni e kinde mabiro wabiro yudo tembe mabiro hewowa. Ka in be wachno chandi, par weche Jehova manie Isaya 48:17, 18 ma wacho niya: “An Jehova Nyasachi ma puonji mondo iyud ber, ma tayi e yo monego iwuothie. Mad niwinjie chikna! Dine ibedo gi kuwe kaka aora kendo timni makare dobedo kaka apaka manie nam.”

 ⁸ Ka wawinjo Jehova, kuwe marwa biro bedo mang’eny kaka aora ma ok duon kendo timwa makare biro bedo kaka apaka ma siko lwoko dho wath. Kata ang’o ma timre e ngimawa, pod wanyalo siko ka wachung’ motegno. Muma nyisowa kama: “Bol ting’ mari kuom Jehova, to obiro konyi. Ok obi weyo ng’at makare opodhi.”​—Zaburi 55:22.

9, 10. Bedo Jakristo motegno tiende en ang’o?

⁹ Ka imedo tego winjruokni gi Jehova, mano biro konyi ‘kedo matek mondo ibed ng’at motegno.’ (Jo-Hibrania 6:1) Bedo Jakristo motegno tiende en ang’o?

¹⁰ Higni ma wan-go ok e ma mi wabed Jokristo motegno. Mondo wabed Jokristo motegno, Jehova e ma nyaka bed Osiepwa maduong’ kendo nyaka watem neno gik moko kaka onenogi. (Johana 4:23) Paulo nondiko niya: “Jo ma ringruok chiko keto pachgi kuom weche mag ringruok, to jo ma roho tayo keto pachgi kuom weche mag roho.” (Jo-Rumi 8:5) Jakristo motegno ok ket pache e mwandu kata mor mag piny. Kar mano, oketo pache e tiyo ne Jehova kendo otimo yiero mabeyo e ngimane. (Ngeche 27:11; som Jakobo 1:2, 3.) Ok oyie mondo owuonde motim gik maricho. Jakristo motegno ong’eyo gima kare monego otim kendo oikore time.

11, 12. (a) Paulo nowacho ang’o e wi ‘nyalo mar ng’eyo tiend weche’ ma Jakristo nigo? (b) Ere kaka bedo Jakristo motegno inyalo pim gi bedo jang’wech?

¹¹ Kinda dwarore mondo wabed Jokristo motegno.  Jaote Paulo nondiko kama: “Chiemo motegno en mar jo mosetegno, jo mosetieg nyalogi mar ng’eyo tiend weche kokalo kuom tiyo gi nyalono, mondo gipog gik makare kod gik ma ok kare.” (Jo-Hibrania 5:14) Wach motigo ni “mosetieg” nyalo miyo wapar tiegruok ma jang’wech timoga.

¹² Sama waneno jang’wech mang’ula ka ringo, wang’eyo ni osetiyo gi thuolone e timo tiegruok mang’eny mondo obed molony. Ne ok onyuole ka en jang’wech. Sama onyuol nyathi, ok ong’eyoga kaka onyalo tiyo gi tiendene kata lwetene. Kata kamano, bang’ kinde ong’eyo kaka onyalo mako gik moko kendo opuonjre wuotho. Koyudo tiegruok maber, onyalo bedo jang’wech. E yo ma kamano, nyaka wakaw thuolo kendo wayud tiegruok mang’eny eka wabed Jokristo motegno.

13. Ang’o mabiro konyowa mondo pachwa owinjre gi pach Jehova?

¹³ Bugni osekonyowa ng’eyo kaka wanyalo bedo gi pach Jehova kendo neno gik moko kaka onenogi. Waseneno kaka wanyalo hero puonj mag Jehova. Sama wadwaro timo yiero moro, onego wapenjre niya: ‘Gin chike kata puonj mage manie Muma manyalo konya e wachni? Ere kaka anyalo tiyo kodgi? Jehova diher mondo atim ang’o?’​—Som Ngeche 3:5, 6; Jakobo 1:5.

14. Ang’o monego watim ka wadwaro ni yiewa obed motegno?

¹⁴ Nyaka wasik ka wagero yie marwa kuom Jehova. Mana kaka chiemo gero dendwa e kaka puonjruok e wi Jehova miyo wabedo gi yie motegno. Ka ne wachako puonjore Muma, ne wang’eyo puonj moko  mag mise e wi Jehova kod yo motimogo gik moko. Kata kamano, kaka kinde medo kalo, onego wamed ng’eyo weche matut e wi Jehova. Mano e gima Paulo ne temo wacho ka nondiko niya: “Chiemo motegno en mar jo mosetegno.” Wabedo gi rieko sama watiyo gi gik ma wapuonjore. Muma nyisowa niya: “Rieko e gima duong’ moloyo duto.”​—Ngeche 4:5-7; 1 Petro 2:2.

15. Ang’o momiyo dwarore ni waher Jehova kod Jokristo wetewa gi chunywa duto?

¹⁵ Ng’ato nyalo bedo gi ngima maber, kata kamano, mondo osik kamano, nyaka odhi nyime rito dende. E yo ma kamano, Jakristo motegno ong’eyo ni nyaka otim kinda mondo winjruokne gi Jehova osik kotegno. Paulo paronwa niya: “Sikuru ka unonoru mondo une ka be un e yie; sikuru ka unyiso gadier gima un uwegi.” (2 Jo-Korintho13:5) Kata kamano, bedo gi yie motegno kende ok oromo. Nyaka wamed hero Jehova gi Jokristo wetewa. Paulo nowacho kama: “Ka an gi . . . ng’eyo duto, kendo an gi yie motegno ma anyalo kata mana daro gode, to aonge gi hera, ok an gimoro.”​—1 Jo-Korintho 13:1-3.

16. Satan dwaro ni wabed gi paro mane?

¹⁶ Satan dwaro ni wapar ni ok wanyal moro Jehova. Odwaro ni chunywa onyosre kendo wapar ni chandruogewa ok nyal rumo. Ok odwar ni wagen Jokristo wetewa kendo ok odwar ni wabed mamor. (Jo-Efeso 2:2) Satan ong’eyo ni paro maricho nyalo hinyowa kendo ketho winjruokwa gi Nyasaye. Kata kamano,  Jehova osemiyowa gimoro manyalo konyowa kedo gi paro ma ok kare. Gima osemiyowano en geno.

17. Bedo gi geno konyowa nade?

¹⁷ E ndiko mar 1 Jo-Thesalonika 5:8, Muma pimo geno ma wan-go gi ogudu ma geng’o wi jalweny sama okedo e lweny kendo ndikono luongo oguduno ni “geno mar warruok.” Geno singo mag Jehova nyalo rito pachwa kendo konyowa kwedo paro maricho.

18, 19. Geno ma Yesu ne nigo notege e yo mane?

¹⁸ Yesu ne obedo motegno nikech ne en gi geno. E otieno mogik ka en e piny ka, ne okedo gi chandruoge moluwore oluwore. Osiepne machiegni kode nondhoge, moro nokwer ni ok ong’eye, to mamoko noringo moweye. Jothurgi nokwede ka gidwaro ni onege kigure e yath. Ang’o ma ne okonye mondo onan? Jo-Hibrania 12:2 wacho kama: “Nikech mor  maduong’ ma ne oket e nyime, ne onano e yadh-sand ka ochayo wich-kuot, kendo osebet piny e bat korachwich mar kom-loch mar Nyasaye.”

¹⁹ Yesu nong’eyo ni ka ochung’ motegno, ne odhi miyo Wuon mare duong’ kendo nyiso ni Satan en jamiriambo. Mano e momiyo nobedo gi mor maduong’. Nong’eyo bende ni ochiegni dok ir Wuon mare e polo. To ng’eyo mano nomiyo onano. Mana kaka Yesu, nyaka waket pachwa e geno ma wan-go nikech mano biro konyowa nano kata ang’o ma timre.

20. Ang’o manyalo konyi mondo chunyi kik tho?

²⁰ Jehova neno sinani kod yie ma in-go. (Isaya 30:18; som Malaki 3:10.) Osingo ni “obiro miyi gik moko duto ma chunyi gombo.” (Zaburi 37:4) Omiyo, dhi nyime keto pachi e geno ma in-go. Satan  dwaro ni chunyi otho kendo ipar ni singo mag Jehova ok bi chopo. Kata kamano, ok onego iyie ni gima kamano otimreni! Ka ifwenyo ni geno ma in-go dok chien, kwa Jehova mondo okonyi. Par weche ma yudore e Jo-Filipi 4:6, 7. Ndikono wacho kama: “Kik uparru e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou; eka kuwe mar Nyasaye ma loyo ng’eyo duto biro rito chunyu kod pachu kokalo kuom Kristo Yesu.”

21, 22. (a) Ang’o momiyo Nyasaye nochueyo piny? (b) Ing’ado mar timo ang’o?

²¹ Kinde ka kinde, kaw thuolo mar paro matut e wi gik mabeyo mabiro timore e kinde mabiro. Machiegnini, ji duto biro lamo Jehova. (Fweny 7:9, 14) Par ane kaka ngima biro chalo e piny manyien. Obiro bedo maber moloyo kaka iparo! Satan, jochiende, kod gik moko duto maricho ok nobedie. Ok ibi bedo matuo kendo ok ibi tho. Ibiro chiewo pile ka pile ka itegno kendo imor. Ji duto biro tiyo kanyachiel mondo gilok piny obed paradiso. Waduto wabiro bedo gi chiemo kod kuonde dak mokuwe. Ji ok nobed makwiny kata mager, kar mano, gibiro bedo mang’won. Bang’ kinde, dhano duto manie piny biro bedo mamor nikech giniyud “thuolo ma nigi duong’ mar bedo nyithind Nyasaye.”​—Jo-Rumi 8:21.

²² Jehova dwaro ni ibed osiepne. Omiyo, tim duto minyalo mondo iwinje kendo imed sudo machiegni kode pile ka pile. Ee, mad waduto wasik e hera mar Nyasaye nyaka chieng’!​—Juda 21.