PENJO MAR 5
Be Yie Kuom Weche Manie Muma En Gima Owinjore?
Be isagabedo gi paro moro e wi ng’ato, kae to bang’e ifwenyo ni pachino ne ok ni kare? Samoro niwinjo ka jomoko wuoyo kuome. Ne idhi chako sin kode, en mana ni bang’ kawo thuolo mondo ing’eye maber, ifwenyo ni kare weche ma ne iwinjo kuomeka ne ok gin adier. Mano e gima osetimore ne ji mang’eny kodok korka paro ma gin go e wi Muma.
Nitie ji mang’eny mosomo ma ok nigi paro mowinjore e wi Muma. Be ing’eyo gimomiyo? Kinde mang’eny, ji wuoyoga e wi Muma e yo mamiyo onenore ka gima en buk moting’o weche ma ok kare kendo otek winjo, kata buk ma ok riw lwedo weche sayans. Be dibed ni ji e ma pok ong’eyo gima Muma puonjo kuom adier?
Sama ne isomo brosuani, be nibwok ka ne ifwenyo ni weche manie Muma winjore gi sayans? Ji mang’eny bwokga kamano. Bende, giwuoro ahinya ka gifwenyo ni Muma ok wach weche ma dinde mang’eny puonjo ni yudore e Muma. Kuom ranyisi, moko kuom dindego wacho ni Muma puonjo ni Nyasaye nochueyo piny gi polo kod gik mangima duto kuom odiechienge auchiel, ma moro ka moro oting’o seche 24. Onge kamoro amora e Muma ma kwedo higni ma josayans temo pimo ni pinyni osebetie. a
E wi mano, nikech Muma lero mana e yo machuok kaka Nyasaye nochueyo ngima e piny, mano chiwo thuolo mar yudo weche momedore kuom nonro mag josayans kod weche ma giwacho. Muma wacho ni Nyasaye nochueyo kit ngima duto kod gik mangima “kaka kothgi obet.” (Chakruok 1:11, 21, 24) Wechego nyalo tuomore gi weche ma josayans moko wacho, kata kamano, weche sayans mosetimnegi nonro maber to ok kwed wechego. Ka inono histori mar sayans, ibiro fwenyo ni weche ma josayans wachoga lokorega kendo moko lalga, kata kamano, nonro ma gitimo maber e ma dong’ga.
Nitie jomoko ma ok dwar nono weche manie Muma nikech gik ma din timo. Gineno kaka din opong’ mana gi wuondruok, mibadhi, kendo giriwo lwedo lweny. Kata kamano, be onego wakwed weche manie Muma mana nikech gik mitimo gi jomamoko ma wacho ni puonjo Muma? Josayans mang’eny ma chunygi ber osebwok ka gineno kaka jomoko ma ohero mahundu, tiyo gi puonj mar ni gik moko nosieko kendgi e kwedo ogendni moko. Be en gima kare kwedo puonj ma kamano mana nikech gik ma jogo timo? Kuom adier, en gima ber ka onon puonjno kae to opime gi nonro ma nitie ma siro puonjno.
Wajiwi mondo itim kamano gi Muma be. Ibiro wuoro kaka weche manie Muma opogore ahinya gi weche ma dinde puonjoga. Muma ok jiw ji mondo gibed jolweny kata gisin gi ogendni moko, kar mano, Muma puonjo ni onego watamre lweny kod sigu ma kelo lweny. (Isaya 2:2-4; Mathayo 5:43, 44; 26:52) Muma ok jiw ji mondo obed abeda gi yie ma onge kore, kar mano, Muma puonjo ni yie madier nyaka bed gi gik ma sire kendo jogo ma tiyo ne Nyasaye nyaka ti gi nyalogi mar paro. (Jo-Rumi 12:1; Jo-Hibrania 11:1) Muma ok wach ni bedo gi penjo en gima rach, kar mano, Muma jiwowa mondo wamany dwoko mag penjo madongo ma wanyalo bedogo.
Kuom ranyisi, be isegapenjori penjoni, ‘Ka kuom adier Nyasaye nitie, ang’o momiyo oweyo mondo gik maricho otimre?’ Muma chiwo dwoko maber mar penjono kod penjo mamoko ma inyalo bedogo. b Wajiwi mondo idhi nyime manyo adiera. Inyalo yudo dwoko mabeyo ma mori, ma winjore maler, kendo mosir gi weche madier. To mano ok en gima timore atima kende.
a Mondo iyud weche momedore, som brosua ma wiye wacho ni Uhai—Ulitokana na Muumba? mogo gi Joneno mag Jehova.
b Som sula mar 11 e bug Gima Muma Puonjo, mogo gi Joneno mag Jehova.
Samoro Inyalo Hero Magi Bende
DWOKO PENJO MA JI NIGO E WI MUMA
Be Weche Sayans Winjore gi Muma?
Be nitie weche moko ma Muma wacho e wi sayans ma ok gin adier?
