Ne Joma Ohero Jehova:

E higa mar 1971, joma ne odhi e Chokruok mar Distrikt ma wiye wacho ni “Divine Name” ne mor ahinya yudo buge mang’eny manyien. Ji nowacho ni bugego “ne beyo mokalo apima.” Owadwa moro nowuoyo e wi achiel kuom buge ma ne ogolgo kowacho niya: “Mano kaka bugni oleronwa gik ma biro timore e kinde ma biro e yo ma pok nolerga nyaka nene!” En buk mane ma ne owuoye? En buk miluongo ni “The Nations Shall Know That I Am Jehovah”​—How? To ang’o momiyo ji nohero bugno ahinya? En nikech nochiwo ler momedore e wi weche mokor ma yudore e bug Ezekiel ma gin weche ma mulo ngima dhano e kinde ma biro.

Chakre ne gol bug ‘Know Jehovah,’ jotich Nyasaye osemedore ahinya. Ne gin milion achiel gi nus, to sani gisemedore ma koro gin ji mokalo milion 8. (Isa. 60:22) Jotich Jehova mang’enygo wacho dhok mopogore opogore mokalo 900. (Zek. 8:23) Ng’enygi pok ne oyudoga thuolo mar nono buk ma lero adimba weche mokudh gi much Nyasaye ma ne janabi Ezekiel ondiko.

Bende, chakre higa mar 1971 ka dhi nyime, osebed kilero puonj mang’eny mag Muma kaluwore gi kaka ler medo rieny. (Nge. 4:18) E higa mar 1985, ne wachako neno ayanga ni “rombe mamoko” ikwano kaka joma kare kendo gibedo osiepe Nyasaye. (Joh. 10:16; Rumi 5:18; Jak. 2:23) Kae to e higa mar 1995, ne wafwenyo ni kare ibiro ng’ad bura mogik ne “rombe” kod “diek” e kinde “masira maduong’” ma biro. (Mat. 24:21; 25:31, 32) Lokruogego osemulo kaka ilero weche moko e bug Ezekiel.

E higni machiegnigi, ler osebedo ka medo rieny. Kuom ranyisi, nitie puonj moko ma yudore e ngeche ma ne Yesu ogoyo kendo ng’eny puonjgo koro winjorenwa maler. Ng’eny ngechego lero gik ma chiegni timore e masira maduong’ ma koro okayo machiegni. E yo ma chalo kamano, moko kuom weche ma ne okor e bug Ezekiel oseler e yo maber moloyo. Mago oriwo weche mokor e wi Gog mar Magog (sula mar 38 kod 39), gima ng’at moting’o gir ting’o wino mar jagoro ne dhi timo (sula mar 9), hoho mopong’ gi choke motwo, kod kaka ne idhi riw ludhe ariyo mag ranyisi (sula mar 37). Weche duto momed lergo koro loko tiend weche moko ma ne ondik e bug ‘Know Jehovah.’

Mano e momiyo ok kawwa gi wuoro ka ng’eny jotich Jehova penjo ni, “En karang’o ma wabiro yudoe buk ma leronwa weche mosebed ka inyisowa e wi gik mokor e bug Ezekiel?” Bug Jehova Oseduoko Lamo Madier! e buk ma leronwa wechego. Sama isomo sula 22 manie bugni kendo paro matut ranyisi mabeyo motigo, ibiro wuoro kaka ne onon weche manie iye adimba sama ne ilose. Ne walemo kendo paro matut gimomiyo Jehova ne omiyowa bug Ezekiel. Ne onon adimba penjo kaka: Gin puonj mage ma bug Ezekiel nigo ma ne okonyo joma ne odak e ndalone kendo ma nyalo konyowa e ndalowagi? Gin weche mage mokor ma wuoyo e wi gik ma biro timore e kinde ma biro? Be onego wamany gik ma weche ma ondik e bug Ezekiel ochung’ne koso onego wakawgi akawa kaka ondikgino? Dwoko mag penjogo osemiyo wayudo ler momedore e bug Ezekiel, ma en buk ma wahero somo.

 Sama isomo bug Ezekiel, are chakne nyaka gikone, ibiro wuoro ahinya kaka bad riwruok mar oganda Jehova manie polo chalo. Onge kiawa ni ibiro mor ahinya ng’eyo kaka Jehova oketo chike makare ne joma nie polo kod joma dwaro lame e yo moyiego e pinyka. Bug Lamo Madier biro konyi ng’eyo kaka inyalo medo goyo erokamano kuom gik ma Jehova osetimo ne joge kod mago ma obiro timonegi e kinde ma biro. Ibiro fwenyo ni bugni wuoyo nyadinwoya e wi weche ariyo madongo. Mokwongo, mondo wamor Jehova, nyaka wang’e kendo wayie ni en e Wuon Loch Duto. Mar ariyo, nyaka walam Jehova e yo moyiego kendo dak ka waluwo chikene makare.

Wagombo ahinya ni bugni ojiwi mondo imed lamo Jehova e yo ma miyo nyinge maler duong’. Bende, wageno ni obiro jiwi mondo imed rito gi siso kinde ma ogendni duto nong’e ni Jehova e Nyasaye.​—Eze. 36:23; 38:23.

Jehova, Wuonwa ma jahera, mondo oguedh kinda mitimo e winjo tiend weche manie buk ma Ezekiel nondiko ka itaye gi roho maler.