1, 2. (a) En yiero mane ma waduto nyaka watim? (b) Malaika moro ma noluoro Nyasaye notimo ang’o ka ne idwaro lame?

 NG’ATO ka ng’ato kuomwa nyaka dwok penjo maduong’ni: En ng’ano ma abiro lamo? Ji mang’eny nyalo wacho ni mano en wach ma kore tek kendo ma nyalo bago ng’ato. Kata kamano, dwoko mar penjono yot kendo ok ogajore. Wanyalo yiero mar lamo Jehova kata Satan Jachien.

² Satan gombo ni olame. Mano nonenore maler e kinde ma notemo Yesu. Mana kaka ne waneno e Sula Mokwongo mar bugni, Satan nonyiso Yesu ni odhi miye mich moro maduong’ ma en bedo gi loch e wi pinjeruodhi duto mag piny. To Jachien ne dwaro ni Yesu otimne ang’o? Nonyiso Yesu niya: “Go chongi piny mondo ilama.” (Mat. 4:9) Mopogore gi mano, malaika ma ne omiyo jaote Johana fweny notamore ni kik lame. (Som Fweny 22:8, 9.) Ka ne jaote Johana temo lamo malaikano, malaika ma noboloreno nonyise niya: “Kik itim kamano!” Kar mondo malaikano owach ni, ‘Lama,’ nowachone ni, “Lam Nyasaye.”

3. (a) Ang’o momiyo nolos bugni? (b) Ang’o ma koro wadwaro nono?

 ³ Nolos bugni mondo okonywa timo gima malaikano nowacho, tiende ni lamo Jehova kende. (Rap. 10:20; Mat. 4:10) We wanon ane machuok, moko kuom gik ma Ezekiel nokoro ma wasepuonjore e wi lamo madier. Kae to ka watiyo gi Ndiko, wabiro nono gik ma biro timore e kinde ma ng’ato ka ng’ato biro romo gi tem mogik. Temno biro nyiso ka be wabiro tony mondo wane ka Jehova duoko lamo madier.

4. Gin weche mage adek madongo miwuoye e bug Ezekiel?

⁴ Bug Ezekiel konyowa ng’eyo ni lamo madier oriwo gik mang’eny to ok mana luwo chike. Oriwo (1) lamo Jehova kende, (2) siko ka wan gi kuwe kod winjruok e lamo madier, kae to mar (3) hero jomamoko. We wanon ane kaka weche mokor e bugni kod fweny manie iye, konyowa ng’eyo weche adek madongogo.

5-9. Ang’o ma wapuonjore e wi lamo Jehova?

⁵ Sula mar 3: a Fweny ma nyiso kaka Jehova olwor gi lihudu kendo ni en e wi chuech mag roho man gi teko konyowa ng’eyo gimoro achiel maduong’, ni Ng’at Mamalo Chutho kende ema onego olam.​—Eze. 1:4, 15-28.

⁶ Sula mar 5: To mano kaka ne en gima rach ahinya neno fweny ma nyiso kaka ne idwanyo hekalu mar Jehova! Fwenyno konyowa ng’eyo ni onge gima opondo e wang’ Jehova. Oneno gik maricho ma ji timo, kaka sama joge ochako lamo nyiseche manono, kata ka gitimo kamano aling’ ling’. Timbe ma kamago chwanye kendo okumo joma timo timbego.​—Eze. 8:1-18.

⁷ Sula mar 7: Kum ma nomi ogendni ma nolworo Jo-Israel kendo ma ne jarogi nyiso ni Jehova kumoga joma sando joge. (Eze. 25:6) Kata kamano, nitie gimoro machielo ma wapuonjore e wi gik ma notimore e kind Jo-Israel gi ogendnigo: Jehova e ma nyaka wamakrego moloyo ng’ato ang’ato. Ok dwaher mbeko chike mana ni mondo wamor wedewa ma ok lam Jehova; bende ok dwaher keto genowa e mwandu mag pinyni kata riwo lwedo sirkande mag pinyni kar keto genowa kuom Jehova.

⁸ Sula mar 13 kod 14: Fweny ma ne Ezekiel oneno e wi hekalu man e wi got puonjowa ni nyaka wadag kaluwore gi chike makare mag Jehova, ka waketo e paro ni en e ma en malo moloyo nyiseche mamoko.​—Eze. 40:1–48:35.

 ⁹ Sula mar 15: Weche ma nokor ma lero Israel kod Juda kaka jochode paronwa kaka Jehova osin ahinya gi lamo nyiseche manono.​—Eze., sula mar 16, 23.

10-14. Ere kaka osebed kijiwo wach kuwe kod winjruok?

¹⁰ Sula mar 8: Weche ma nokor ma wuoyo e wi kaka Jehova ne dhi keto “jakwath achiel” ma rito jotichne, nyiso kaka onego wabed gi kuwe kod winjruok e bwo loch mar Kristo.​—Eze. 34:23, 24; 37:24-28.

¹¹ Sula mar 9: Weche ma Ezekiel nokoro e wi kaka ne idhi gol jotich Nyasaye e tuech mar Babulon kendo duokogi thurgi oting’o ote moro ne joma dwaro moro Jehova e kindewagi. Jotich Jehova onego opogre chuth gi dinde mag miriambo kendo lamogi osik ka ler. Kata obedo ni ne wawuok e dinde mopogore, ne watimo tije mopogore, kata ne wapon e yore mopogore, nyaka warit kuwe kod winjruok manie kindwa nikech mano e ma ifwenyowago kaka jotich Nyasaye.​—Eze. 11:17, 18; 12:24; Joh. 17:20-23.

¹² Sula mar 10: Fweny mar choke motwo ma nobedo mangima nojiwo ahinya wach kuwe kod winjruok. To mano kaka en thuolo makende bedo e kind jotich Nyasaye mosepwodhi kendo ma tiyo kanyachiel kaka jolweny manie kueth achiel!​—Eze. 37:1-14.

¹³ Sula mar 12: Weche ma nokor e wi ludhe ariyo ma noriw mobedo luth achiel, nojiwo ahinya wach kuwe kod winjruok. To mano kaka yiewa medo bedo motegno sama waneno kaka Jokristo mowal kod rombe mamoko ka chopo weche ma nokorgo! Kata obedo ni wadak e piny ma weche din kod siasa osepoge ji, wan to wan gi kuwe kod winjruok nikech waherore kendo wamakore gi Jehova.​—Eze. 37:15-23.

¹⁴ Sula mar 16: Fweny mar ng’at moting’o gir ting’o wino mar jagoro kod chwo ma nigi ligangla miyowa siem ma luwoni: Mana joma biro chopo e “masira maduong’” komakore gi Jehova e ma ibiro ketnegi alama mar tony.​—Mat. 24:21; Eze. 9:1-11.

15-18. Ang’o momiyo onego wadhi nyime nyiso hera, to ere kaka wanyalo timo kamano?

¹⁵ Sula mar 4: Fweny ma wuoyo e wi gik mangima ang’wen nopuonjowa kido mag Jehova, to kido maduong’ie mogik ma en-go en hera. Sama wawuoyo kendo timo gik moko e yor hera, wanyiso ni Jehova en Nyasachwa.​—Eze. 1:5-14; 1 Joh. 4:8.

 ¹⁶ Sula mar 6 kod 11: Hera ma ne Nyasaye oherogo jotichne nochwale mondo oket jorit kaka Ezekiel. Nikech Nyasaye en hera, ok odwar ni oketh ng’ato ang’ato e kinde ma obiro kethoe loch mar Satan. (2 Pet. 3:9) Wan gi thuolo mar nyiso hera kaka mar Nyasaye kuom riwo lwedo tich ma jorit timo e kindewagi.​—Eze. 33:1-9.

¹⁷ Sula mar 17 kod 18: Jehova ong’eyo ni nitie ji mang’eny ma biro tamore ng’wono mare kendo gibiro temo tieko jotichne momakore kode. Hera biro miyo Jehova oked ne joge momakore kode e kinde ma “Gog mar piny Magog” biro monjogi. Hera ma waherogo ji bende jiwowa mondo wachiw siem ne ji mang’eny kaka nyalore ni Jehova biro tieko joma sando joge.​—Eze. 38:1–39:20; 2 The. 1:6, 7.

¹⁸ Sula mar 19, 20, kod 21: Hera ma Jehova oherogo joge bende nenore maler e fweny ma nyiso aora mamol ma miyo gik moko bedo mangima kod fweny mar pogo lowo. Fwenygo lero ber ma wayudo nikech hera maduong’ ma Nyasaye nonyisowa ka nochiwo Wuode mondo owenwa richowa kendo wabed gi ngima makare chuth kaka jood Jehova. Achiel kuom yo maberie mogik mar nyiso ni wahero ji, en kuom nyisogi geno maber ma Jehova oiko ne joma nyiso yie kuom Wuode.​—Eze. 45:1-7; 47:1–48:35; Fwe. 21:1-4; 22:17.

19. Ang’o ma Yesu biro timo e kinde Loch mar Higni Aluf Achiel? (Som sanduk ma wiye wacho ni “Tem Mogik.”)

¹⁹ E kinde Loch mar Higni Aluf Achiel, Yesu biro chiero ji bilionde kendo tieko lit ma “jasigu” mogik ma “en tho” osekelo. (1 Kor. 15:26; Mar. 5:38-42; Tich 24:15) Chakre chon, ngima dhano osepong’ gi kuyo kod chandruok mang’eny. Kata kamano, kaka ibiro med chier ji, Yesu biro rucho gik maricho mosebedo ka timore kendo miyo joma ochier thuolo mar dak e ngima maber kendo. Yesu biro tiyo gi misangone mar rawar e tieko chandruoge ma tuoche, lwenje, kod kech osekelo. To maduong’ie moloyo, obiro konyowa golo gima osekelonwa lit ahinya ma en richo ma ne wayudo koa kuom Adam. (Rumi 5:18, 19) Yesu biro ‘ketho tije duto mag Jachien’. (1 Joh. 3:8) Ang’o ma biro timore bang’ mano?

20. Ere kaka Yesu kaachiel gi ji 144,000 biro nyiso bolruok e okang’ malach? Ler ane. (Ne picha manie chak sulani.)

²⁰ Som 1 Jo-Korintho 15:24-28. E kinde ma dhano duto biro bedo makare chuth kendo ka koro piny duto osebedo Paradiso kaka Jehova ne dwaro, Yesu gi ji 144,000 biro nyiso bolruok e okang’ malach ahinya; gibiro duoko Pinyruoth ne Jehova. Bang’ higni aluf achiel, gibiro duoko loch ne  Jehova ma ok ochun-gi e yo moro amora. Gik moko duto ma ne gitimo ka gin e loch biro siko nyaka chieng’.

21, 22. (a) Piny biro chalo nade e giko higni aluf achiel? (b) Ang’o momiyo Jehova biro gonyo Satan kod jochiendene?

²¹ Bang’ mago duto, Jehova biro timo gimoro makende ma biro nyiso kaka ogeno jotichne duto manie piny. Obiro chiko mondo ogol Satan kaachiel gi jochiendene e bur matut ma onge giko kama osebed kotuegie kuom higni aluf achiel. (Som Fweny 20:1-3.) Ngima e piny biro bedo mopogore ahinya gi ngima ma ne ging’eyo. Ka pok Har–Magedon otimore, ji mang’eny e piny ne iwuondo gi Satan kendo kuwe kod winjruok ne onge nikech sigu kod buono ji ne onya ahinya. (Fwe. 12:9) Kata kamano, bang’ higni aluf achielgo, dhano duto biro bedo ni lamo Jehova kanyachiel kaka joot. Piny duto biro bedo Paradiso, kama nitie kuwe mang’eny.

 ²² Ang’o momiyo Jehova biro gonyo Satan gi jochiendene ma gin jo mahundu kendo yienegi donjo e piny maber kamano? Nikech ng’eny joma nobed mangima e giko higni aluf achielgo biro bedo joma pok notemga yiegi e yo moro amora. Ng’enygi notho ka ok ging’eyo Jehova to nochiergi e Paradiso. Jehova nomiyogi ngima kaachiel gi gige ringruok kod chiemb chuny. Biro yudo ka onge gimoro amora marach ma giseromogo. Ji duto molworogi biro bedo joma ohero Jehova kendo ma tiyone. Samoro Satan biro donjo ne joma ochiergi gi weche ma nodonjonego Ayub ni gitiyo ne Jehova nikech oritogi kendo oguedhogi. (Ayub 1:9, 10) Omiyo, ka pok Jehova ondiko nyingewa chuth e bug ngima, obiro miyowa thuolo mar nyiso gadier ni wamakore kode kaka Wuonwa kendo Wuon Loch Duto.​—Fwe. 20:12, 15.

23. En chal mane ma ng’ato ka ng’ato biro romogo?

 ²³ Kuom kinde machuok, ibiro mi Satan thuolo mar wuondo dhano mondo giwe tiyo ne Nyasaye. Temno biro chalo nade? Onge kiawa ni ng’ato ka ng’ato biro romo gi chal ma ne Adam gi Hawa oromogo, tiende ni gibiro bedo gi thuolo mar yie gi chike makare mag Jehova, ka giriwo lwedo lochne kendo lame, kata ng’anyo ne Nyasaye kendo riwo lwedo Satan.

24. Ang’o momiyo joma ong’anyo ibiro luong ni Gog kod Magog?

²⁴ Som Fweny 20:7-10. Joma biro ng’anyo e giko higni aluf achiel ibiro luong ni Gog kod Magog. Timbegi biro chalo gi mag joma ne ong’anyo ma Ezekiel nokoro ni biro monjo jotich Nyasaye e kinde masira maduong’. Grup mokwongo miluongo ni “Gog mar piny Magog,” ne olos gi pinje ma ne kwedo loch Nyasaye. (Eze. 38:2) E yo ma kamano bende, joma biro ng’anyo e giko Loch mar Kristo mar Higni Aluf Achiel iluongo ni “ogendni.” Bedo ni iluongogi ni ogendni en gima kende ahinya. Ang’o momiyo? En nikech e kinde Loch Kristo mar Higni Aluf Achiel, pogruok mar pinje biro bedo ma onge; kendo ji duto biro bedo gi sirkal achiel ma  en Pinyruodh Nyasaye. Waduto wabiro bedo oganda achiel. Bedo ni weche mokorgo luongo joma ong’anyogo ni Gog kod Magog kendo ni “ogendni,” nyiso ni Satan biro pogo moko kuom jotich Nyasaye. Onge ng’at ma ibiro chun mondo oriw Satan lwedo. Ng’ato ka ng’ato biro timo yierone owuon.

25, 26. Gin ji adi ma biro riwo Satan lwedo, to ang’o ma biro timorenegi?

²⁵ Gin ji adi ma biro riwo Satan lwedo? Joma biro ng’anyo nobed “kaka kuoyo manie nam.” Wechego koro ok nyis ni ji mang’eny biro ng’anyo. Wang’eyo mano nade? Ne ane singo ma ne omi Ibrahim. Jehova nowacho ni nyikwa Ibrahim ne dhi bedo mang’eny “ka kuoyo manie dho nam.” (Cha. 22:17, 18) Kata kamano, nyikwaye duto ne gin mana ji 144,001. (Gal. 3:16, 29) Kata obedo ni kwanno neno maduong’, otin ahinya kopime gi kwan mar ji duto manie piny. E yo ma kamano bende, kwan mar ji duto ma biro riwo Satan lwedo nyalo bedo mang’eny, kata kamano, ok gibi bedo mang’eny ahinya. Joma biro ng’anyogo ok notiek jotich Jehova.

²⁶ Ibiro tiek joma ong’anyogo mapiyo ahinya. Ibiro kethgi kaachiel gi Satan gi jochiendene kendo ok gibi bedo  mangima kendo. Ji biro paro mana yiero maricho ma ne gitimo kod rach ma ne giyudo nikech yierogo.​—Fwe. 20:10.

27-29. En ang’o morito joma biro kalo tem mogik?

²⁷ To komachielo, joma okalo e tem mogik ibiro ndik nyingegi e“bug ngima” kendo ok bi ruch nyingegigo. (Fwe. 20:15) Kae to yawuot Jehova kod nyige biro riwore kanyachiel kaka joot mondo gilame.

²⁸ Parie apara kaka ngima biro chalo e kindeno. Wabiro mor gi tijewa kendo bedo gi osiepe mabeyo. Ok nwachak wachandre kendo. Wabiro chung’ e nyim Jehova ma onge jagach nikech wabiro bedo ma onge richo. Onge gimoro amora ma biro monowa bedo osiepe Nyasaye. To maduong’ie moloyo, lamo madier biro betie e piny gi polo. Mano e kinde ma ibiro duokie lamo madier chuth!

²⁹ Be ibiro betie e kindeno? Inyalo mana betie e kindeno ka itimo gik madongo adek ma yudore e bug Ezekiel ma gin: lamo Jehova kende, siko gi kuwe kod winjruok e lamo madier, kod hero jomamoko. Weche ma ne Ezekiel okoro miyowa puonj moro achiel mogik. Puonjno en mane?

30, 31. Weche ma wacho ni “gibiro ng’eyo ni an Jehova” biro mulo nade (a) jowasik Nyasaye? (b) jotich Nyasaye?

³⁰ E bug Ezekiel, weche ma wacho ni “gibiro ng’eyo ni an Jehova” otigo nyadinwoya. (Eze. 6:10; 39:28) Kuom joma ok ti ne Jehova, wachno nyiso ni gibiro bedo gi lweny kendo gibiro tho. Biro chunogi ng’eyo ni Jehova nitie, kata kamano, weche ok bi rumo gi kanyo. Biro chunogi ng’eyo tiend nying maduong’ mar Nyasaye ma en ni “Omiyo Gima Odwaro Timore.” “Jehova Nyasach ogendni mag lweny” biro bedo “jalweny ma ratego” ma kedo ne joge. (1 Sa. 17:45; Wuok 15:3) Gibiro ng’eyo adiera moro maduong’ e wi Jehova, ni onge gimoro amora ma nyalo tame chopo dwache. Kata kamano, weche biro bedo ka osekethore.

³¹ Kuom jotich Nyasaye, weche ma wacho ni “gibiro ng’eyo ni an Jehova” biro kelo kuwe kod ngima. Jehova biro konyowa mondo wabed yawuote gi nyige ma nyiso kido mage e yo maber chuth mana kaka nodwaro ni wabed chakre chon. (Cha. 1:26) Jehova osebedo ka en Wuoro ma jahera kendo Jakwath maber. Machiegnini, obiro bedo Ruoth ma kedonwa. Ka pok kindeno ochopo, weuru mondo wadhi nyime tiyo gi weche ma ne Ezekiel okoro. Wechewa kod timbewa onego onyis ni wang’eyo Jehova kendo wang’eyo gima nyinge ochung’ne. Ka watimo kamano, to ok wabi bedo maluor e kinde ma ibiro yaw yembe mag masira maduong’. Wabiro ting’o wiwa malo nikech wang’eyo ni resruokwa chiegni. (Luka 21:28) To ka pod warito, we mondo wakony ji duto kamoro amora ma giyudoree mondo ging’e kendo giher Jehova, ma en Nyasaye achiel kende mowinjore olam kendo ma nyinge duong’ moloyo nyinge duto.​—Eze. 28:26.