1-3. (a) Ler ane gik ma Ezekiel noneno kendo winjo. (Ne picha manie chak sulani.) (b) En ang’o ma ne okonyo Ezekiel neno fweny, to mano nomiyo owinjo nade?

 EZEKIEL oting’o wengene malo kong’iyo pap motimo kuoyo. Omiyo wang’e, kae to oyarogi mondo onen maber. Owuoro ahinya gima oneno. Nitie yamo moro ma kutho matek, to ok en aena yamo mapile. Sama yamo mager moa yo nyandwat fwadho yie wiye kod lepe, oneno bor polo moro maduong’. Nitie ler moro mar mach ma menyo bor polono. To kaka bor polono rieny parone mana chuma moro makende. a Sama bor polono sudo mapiyo ir Ezekiel, owinjo dwol moro maduong’ machal gi jolweny makedo.​—Eze. 1:4, 24.

² Ka ne Ezekiel jahigni 30 kama, nochako neno weche ma wiye ok nyal wil-go. Nowinjo ka lwet Jehova obiro kuome, ee, mana roho maler mar Jehova. Gima rohono ne dhi miyo Ezekiel one kendo owinj ne dhi bedo gimiwuoro moloyo gimoro amora ma joma loso sinembe ma kindegi osegaloso.  Fweny ma Ezekiel ne dhi nenono ne dhi miyo opodh piny auma kowuoro ahinya.​—Eze. 1:3, 28.

³ Kata kamano, Jehova ne ok dwar nyiso Ezekiel fwenyni mana ni mondo omiye luoro. Fweny ma Ezekiel nokwongo neno kod mamoko manie bug Ezekiel oting’o puonj mang’eny ne Ezekiel kod jotich Jehova ma kindegi. Omiyo, we wanon ane gik ma Ezekiel noneno kod ma nowinjo.

4, 5. Weche ne chalo nade e kinde ma ne Ezekiel oneno fweny?

⁴ Som Ezekiel 1:1-3. We wakwong wanon ane kaka weche ne chalo. Ne en higa mar 613 K.K.P. Mana kaka ne wapuonjore e sula mokalo, Ezekiel ne ni Babulon, kendo nodak kanyachiel gi joma notergigo e tuech but aora Kebar. Kebar ne en aora ma ne obar koa kuom aora Yufrate, kae to bang’e noduogo oriwore gi aora mar Yufrateno.

⁵ Jerusalem, kama joma ne oter e tuech ne wuokie, ne ni kilomita ma dirom 800. b Hekalu kama wuon Ezekiel ne tiye kaka jadolo, nosechid gi lamo mar miriambo. Kom-loch ma ni Jerusalem, ma ne Daudi gi Solomon oloche, koro ne en mana gima kelo wich-kuot. Ruoth Jehoyakin, ma ne en ruoth maonge yie, bende ne nie tuech Babulon kanyo. Zedekia, ma ne okawo kare, ne en ng’at marach, kendo ruodh Babulon e ma ne chike.​—2 Ru. 24:8-12, 17, 19.

6, 7. Ang’o momiyo Ezekiel ne nyalo neno ni odak e kinde matek ahinya?

⁶ Nyaka bed ni mano ne en kinde matek ahinya ne Ezekiel, ma ne en ng’at ma nigi yie. Samoro joma ne en-go e  tuech ne nyalo penjore niya: Be Jehova biro weyowa nyaka chieng’? Be loch marach mar Babulon kaachiel gi nyisechene manono dhi tieko lamo madier mar Jehova kod lochne e piny ngima?’

⁷ Ka in gi wechego e pachi, donge inyalo chako nono fweny mokwongo ma ne Ezekiel oneno sama itimo puonjruok ma mari iwuon? (Eze. 1:4-28) Sama itimo kamano, tem ketori e chal ma Ezekiel ne nitie, kineno gik ma noneno kendo winjo gik ma nowinjo.

8. Ezekiel noneno ang’o e fweny, to gima ne onenono ne ochung’ ne ang’o?

⁸ Ezekiel noneno ang’o? Ne oneno gari moro malich miwuoro. Garino ne nigi tielo madongo ang’wen kendo ne en gi gik mangima ang’wen ma bang’e ileronwa ni ne gin jokerubi. (Eze. 10:1) E wi gik mangimago, ne nitie gimoro malich machal gi kor lwasi mopedhore, kendo gino ne chalo gi pe. E wiye kanyo, ne nitie kom-loch mar Nyasaye kama Jehova owuon obetie! Kata kamano, garino ne ochung’ ne ang’o? Fweny ma Ezekiel ne onenono ne nyalo mana chung’ ne gimoro achiel, ma en bad riwruok mar oganda Jehova  manie polo. Ang’o momiyo wawacho kamano? Ne ane weche moko adek momiyo wanyalo wacho kamano.

9. Ere kaka winjruok manie kind Jehova kod chuech manie polo winjore maber gi yo ma ilerogo garino?

⁹ Winjruok ma nitie e kind Jehova kod chuechne manie polo. Par ni e fwenyni, kom-loch mar Jehova nie wi jokerubi. Bende, kuonde mamoko e Muma, ilero ni Jehova obet e wi jokerubi kata e kind jokerubi. (Som 2 Ruodhi 19:15; Wuok 25:22; Zab. 80:1) Mano koro ok nyis ni obet e wi jokerubigo ka gima nyaka ting’e gi gik mangimago kata bet e wi gari. Kata kamano, jokerubigo riwo lochne lwedo kendo onyalo orogi kamoro amora e piny kata e polo mondo gitim dwache. Mana kaka malaike mamoko mag Nyasaye, gin bende gitimo dwach Jehova kaka jotichne kata jootene. (Zab. 104:4) E yo ma chalo kamano, Jehova obet e wigi giduto nikech otayogi kaka jalochgi kendo chalo ka gima gin e gari achiel maduong’.

10. Ang’o ma nyiso ni gach polo ok oting’o mana jokerubi ang’wen kende?

¹⁰ Garino ok ochung’ ne jokerubi kende. Ezekiel noneno jokerubi ang’wen. E Muma, namba ang’wen itiyogago kiwuoyo kuom gima romre kata mokwako ji duto. Kuom mano, jokerubi ang’wen-go ochung’ ne yawuot Nyasaye  duto manie polo kendo momakore kode. Par bende ni tiende mag garino kaachiel gi jokerubigo opong’ gi wenge, ma nyiso ni ok jokerubi ang’wen-go kende e ma ng’icho. Yo ma Ezekiel lerogo garino nyiso kaka en gima duong’ ahinya ma jokerubigo koro nenore ka gik matindo ahinya. (Eze. 1:18, 22; 10:12) E yo ma chalo kamano, bad riwruok mar oganda Jehova manie polo duong’ kendo ok oting’o mana jokerubi ang’wen-go kende.

11. Daniel noneno fweny mane ma chalo gi mar Ezekiel, to mano miyo wang’ado wach mane?

¹¹ Daniel bende ne oneno fweny ma chalo kamano. Janabi Daniel nodak kuom higni mang’eny e tuech Babulon, kendo en bende nomiye fweny ma nyiso kaka polo chalo. Gimiwuoro en ni, en bende noneno kom-loch mar Jehova ma nigi tielo. Fweny ma ne Daniel oneno wuoyo e wi kaka jood Jehova manie polo ng’eny ahinya. Daniel noneno yawuot Nyasaye ‘milion achiel kod milion mia achiel’ ka gichung’ e nyim Jehova. Ne gibet ka joma nie Od Bura, ka ng’ato ka ng’ato obet kare. (Dan. 7:9, 10, 13-18) Donge owinjore wawach ni fweny ma ne Ezekiel oneno bende wuoyo kuom yawuot Nyasaye manie polo?

12. Ang’o momiyo ber nono weche kaka ma ondik e bug Ezekiel ma wuoyo e wi gach polo?

¹² Jehova ong’eyo ni wayudo ber sama waketo pachwa e gik ma jaote Paulo nowacho ni gin “gik ma ok ne.” Nikech ang’o? Nikech wan dhano morem, waketoga pachwa ahinya e “gik mineno,” kata dwarowa mag ringruok, to mago gin gik ma ok sik. (Som 2 Jo-Korintho 4:18.) Satan tiyoga gi nyawo ma wan-gono kodwaro ni waket pachwa e gige ringruok. Mondo wakwed parono, Jehova osemiyowa weche kaka ma ondik e bug Ezekiel mondo oparnwa kaka bad riwruok mar oganda Jehova manie polo duong’ miwuoro!

13, 14. (a) Ezekiel lero nade tiende gari ma noneno? (b) Ang’o momiyo en gima owinjore ka gach Jehova obedo gi tielo?

¹³ Mokwongo, Ezekiel noketo pache e jokerubi ang’wen, to e Sula mar 4 mar bugni, wabiro neno kaka chuech ang’wen-go chalo kod gik ma ginyalo puonjowa e wi Jehova. Kata kamano, Ezekiel ne oneno tielo ang’wen-go e bath jokerubi, kendo nenore ni ne giloso konde ang’wen. (Som Ezekiel 1:16-18.) Ne chalo ka gima olos tielogo gi krisolait, ma en kidi ma rieny ma rangine ratong’ kata ratong’ mokikore gi majan. Kidino ne rieny miwuoro!

¹⁴ Fweny ma ne Ezekiel oneno wuoyo ahinya ahinya e wi tielo mag gari. Donge gima Ezekiel ne onenono ok en gima pile? Par ane wachno: Kom-loch ma nigi tielo! Sama wawuoyo  e wi kom-loch, gima biroga e pachwa en gima ogur kamoro achiel, to mano e kaka onego obedi nikech loch mag dhano niga gi tong’ margi. Kata kamano, loch mar Jehova to opogore gi loch moro amora mar dhano. Mana kaka Ezekiel ne chiegni puonjore, loch mar Jehova onge gi tong’. (Neh. 9:6) Adiera en ni lochne nyalo kwako kamoro amora!

15. Ezekiel nofwenyo ang’o e wi kaka ne olos tiende gari kod kaka tielogo ne rom?

¹⁵ Ezekiel nowuoro ahinya kaka tielogo ne dongo. Nondiko niya: “Tielogo ne dongo kendo lich.” Wanyalo temo paro kaka Ezekiel ting’o wiye malo kendo oneno tielo madongo ma rieny ma ringo e kor lwasi. Kae to nomedo wacho niya: “Wenge ne olworo tielogo duto.” Gimiwuoro ahinya en kaka tielogo ne chalo. Olero kama: “Ne chalo ka gima oso tielo achiel e i nyawadgi.” Mano tiende ang’o?

16, 17. (a) Ere kaka ne oso tiend gari achiel ei nyawadgi? (b) Ere kaka tielo mag gach Jehova konyowa ng’eyo ni garino nyalo dhi kamoro amora?

¹⁶ Nenore ni tielo ka tielo ma Ezekiel noneno ne nigi tielo moro ma oso e iye, kendo tielo achiel ne kalo ariwa ei nyawadgi. Mano konyowa neno gimomiyo Ezekiel ne owuoyo kuom tielogo kowacho niya: “Ka ne giringo, ne ginyalo ringo koni gi koni ma ok gilokre.” Tielogo nyisowa ang’o e wi gari ma Ezekiel noneno?

¹⁷ Tielogo ne dongo ahinya ma ka giwirore dichiel to ne gikwako kama duong’. Bende, inyisowa e fwenyno ni garino ne ringo matek mana ka mil polo! (Eze. 1:14) E wi mano, tielogo ne ringo e yo miwuoro ma kata injinia ok nyal loso gima kamano. Garino ne nyalo dhi kamoro amora modwaro ma ok olokore kata weyo ringo matek. Kata kamano, ok oring aringa ma ok ong’eyo kama odhiye. Wenge mopong’o tielo mag garino nyiso maler ni garino ong’eyo gimoro amora ma timore kendo ong’eyo kamoro amora modhiye.

18. Bedo ni tielo mag garino dongo kendo opong’ gi wenge puonjowa ang’o?

¹⁸ To kare en ang’o ma Jehova ne dwaro puonjo Ezekiel gi jotichne duto momakore kode e wi bad riwruok mar ogandane ma nitie polo? We wanon ane gik ma wasepuonjore. Garino duong’ kendo lich miwuoro, mana kaka tielo marieny kendo madongogo nyiso. Garino neno gik moko duto, mana kaka wenge mang’eny manie tielogo nyiso. Wenge Jehova neno gimoro amora. (Nge. 15:3; Jer. 23:24) Bende, Jehova nigi malaike mang’eny ahinya ma onyalo oro kamoro amora, kendo ginyalo nono gimoro adimba kae to gidwokone wach.​—Som Jo-Hibrania 1:13, 14.

19. Bedo ni garino ringo matek kendo ni onyalo dhi kamoro amora puonjowa ang’o e wi Jehova kod bad riwruok mar ogandane manie polo?

¹⁹ E wi mano, wasepuonjore ni garino ringo matek ahinya kendo onyalo dhi kamoro amora. Par ane pogruok mantie  e kind bad riwruok mar oganda Jehova mantie polo kod sirkande kata riwruoge mag dhano! Sirkande mag dhano ok ong’eyo kaka ginyalo tieko chandruoge mag pinyni kendo ok gitim lokruok ma dwarore, to mano e momiyo gik moko ok dhinegiga maber. Kata kamano, gach Jehova to nyiso maler kaka Jehova owuon e ma riembe, ochike maber, kendo oikore timo lokruok. Mana kaka nyinge nyiso, onyalo bedo gimoro amora ma dwarore mondo ochop dwache. (Wuok 3:13, 14) Kuom ranyisi, onyalo bedo Jalweny ma kedo ne joge kendo onyalo lokore mapiyo mobed Jal ma ng’wono ne joricho moloko chunygi kendo jiwogi sama chunygi onyosore.​—Zab. 30:5; Isa. 66:13.

20. Ang’o momiyo gach Jehova onego okawwa gi wuoro?

²⁰ Chop sani, fweny ma Ezekiel noneno nyalo miyo ipenjri niya: ‘Be ahumga sama aparo matut e wi gach Jehova?’ Onego wapar ni garino ochung’ ne gima nitie adier kendo en e ng’wech. Ok onego wapar ni Jehova, Wuode, kaachiel gi malaike duto ok ong’eyo pek moko ma wakaloe ma nyalo nyoso chunywa. Bende, onego wabed gadier ni Nyasachwa biro konyowa mapiyo sama wan gi chandruok kendo ni riwruok mare biro timo lokruoge ma dwarore sama weche olokore e pinyni. Onego wapar kinde duto ni riwruok mar oganda Jehova tiyo kendo en e ng’wech. Ezekiel nowinjo dwol moro ma wuok e polo ka wacho niya: “Tielo ma wirore!” Mano nyiso ni ne ogol chik ni garino ochak ringo. (Eze. 10:13) Donge paro matut e wi kaka Jehova tayo riwruokne kawowaga gi wuoro ahinya? Kata kamano, Jehova owuon e ma onego wami duong’ moloyo.

21, 22. Wanyalo lero nade gima omako garino kanyachiel?

²¹ Ezekiel nogolo pache e tielogo kendo nong’iyo malo moneno ‘gimoro machal gi kor lwasi ma ne mil mana kaka pe.’ (Eze. 1:22) E wi jokerubi, ne nitie gimoro ma chalo kor lwasi moyarore kendo ma mil gi duong’. Chop kae, jasomo mong’eyo maber kaka masinde tiyoga nyalo bedo gi penjo mang’eny ahinya e wi garino. Kuom ranyisi, jomoko nyalo penjore niya: ‘En ang’o momako gima chalo kor lwasino e wi tiende garino? Ere kaka tielogo nyalo ringo to onge gima omakogi kanyachiel?’ Ket e paro ni garini ok chik gi teko mapile, nikech en mana ranyisi ma nyiso kaka polo chalo. Par bende weche madongogi: “Roho ma ne nie gik mangimago e ma ne nie tielogo.” (Eze. 1:20, 21) En roho mane ma ne tayo jokerubigo kaachiel gi tielogo?

 ²² Onge kiawa ni mano ne en roho maler mar Jehova. Onge teko minyalo pim kode e piny gi polo. Rohono e ma mako garino kanyachiel, omiye teko, kendo ochiko kaka oringo e yo mochanore. Ka wan gi wachno e paro, we wane ane kaka Ezekiel koro keto pache kuom Jal ma tayo garino.

23. Gin weche mage ma Ezekiel tiyogo e lero kaka Jehova chalo, to nikech ang’o?

²³ Som Ezekiel 1:26-28. Sama Ezekiel lero gik moneno e fweny, otiyo gi weche kaka “ne chalo gi,” “gima chalo,” “gimoro ma ne chalo gi ,” kod “gimoro ma chalo gi.” Kata kamano, e ndikogo, omedo tiyo gi wechego ahinya. Chalo ka gima otemo manyo weche ma onyalo tiyogo e lero gik monenogo. Ne oneno “gima chalo kidi mar safir, kendo gino ne chalo gi kom-loch.” Par ane kom-loch ma olos gi kidi mar safir ma rambulu ahinya. Ne nitie kido moro mobet e kom-lojno. Kidono ‘ne chalo gi dhano.’

24, 25. (a) Lihudu molworo kom-loch mar Jehova paronwa ang’o? (b) Jotich Nyasaye machon ne owinjo nade bang’ neno fweny kaka mago?

²⁴ Kidono ne ok nen maler ahinya nikech duong’ mar Jehova ne rieny ka mach chakre nungone nyaka tiende kendo chakre e nungone nyaka e wiye. Samoro Ezekiel ne temo geng’o wang’e gi gimoro sama nong’iyo gima ne rienyno.  Gikone, Ezekiel noneno gima ber miwuoro e fwenyno: “Ler marieny ne olwore koni gi koni mana ka lihudu manie kor polo sa ma koth chue.” Be isegabedo mamor sama ineno lihudu kata ndanya? Mano kaka oparonwa duong’ miwuoro mar Jachuechwa! Bende, lihudu maberno nyalo paronwa singruok mar kuwe ma ne Jehova otimo bang’ Ataro. (Cha. 9:11-16) Kata obedo ni Nyasaye Manyalo Duto nigi teko mang’eny, en Nyasach kuwe. (Hib. 13:20) Kuwe opong’ e chunye kendo ochiwe ne ji duto ma lame gadier.

²⁵ Ezekiel nowinjo nade bang’ neno fweny ma nyiso duong’ mar Jehova Nyasaye? Ezekiel nondiko gima notimore. Nowacho niya: “Ka ne anene, ne apodho piny auma.” Ezekiel nopodho piny nikech luoro ne omake. Nitie jonabi mamoko ma bende ne obwok mana kamano ka ne gineno fweny mowuok kuom Jehova. Nyaka bed ni gik ma ne ginenogo nomiyo gibedo gi luoro kendo ginenore ka joma ni piny ahinya. (Isa. 6:1-5; Dan. 10:8, 9; Fwe. 1:12-17) Bang’ kinde, gik ma Jehova nofwenyo ne jotichnego nomedo jiwogi. Gik ma ne Ezekiel oneno bende nojiwe ahinya. Wan bende somo Ndiko kaka mago nyalo jiwowa.

26. Ere kaka fweny ma ne Ezekiel oneno nojiwe?

²⁶ Ka dine bed ni gik ma notimore ne jotich Nyasaye e piny Babulon ne chando chuny Ezekiel, nyaka bed ni fwenyno nojiwe ahinya. Nenore maler ni gima duong’ ne ok en kama jotich Nyasaye nitie. Gach Jehova ne ok nyal weyogi oko bed ni ne gin Jerusalem, Babulon, kata kamoro machielo. Onge gimoro amora ma ichiko gi Satan ma nyalo kwedo Nyasaye ma e Jal ma tayo riwruok mar ogandane. (Som Zaburi 118:6.) Ezekiel bende noneno ni gach Jehova ok ni mabor gi dhano. Nikech ang’o? En nikech tiende garino ne chopo nyaka e piny! (Eze. 1:19) Omiyo, Jehova nogeno ahinya joge momakore kode ma ne nie tuech. Nikech ne en Wuon-gi ma jahera, ne odhi ritogi kinde duto!

27. Fweny ma ne Ezekiel oneno mulowa nade e kindegi?

²⁷ Be fweny ma Ezekiel noneno mulowa e kindegi? Ee, omulowa! Par ni Satan pod chano mar medo monjo lamo madier mar Jehova. Odwaro ni wapar ni wan kendwa, ojwang’wa, kendo ni Wuonwa manie polo kod riwruok mar ogandane ni mabor kodwa. Kik irwak paro mag miriambogo e chunyi! (Zab. 139:7-12) Mana kaka Ezekiel, wan bende nitie gik mathoth ma Jehova timo ma nyalo kawowa gi wuoro.  Samoro ok wabi podho piny auma kaka Ezekiel notimo. Kata kamano, wan bende onego wawuor ahinya kaka riwruok mar oganda Jehova manie polo nigi teko, oringo matek, onyalo dhi kamoro amora, onyalo timo lokruoge ma dwarore, kendo kaka en gi duong’ miwuoro!

28, 29. Ang’o ma nyiso ni gach Jehova osebedo ka ringo kuom higni mang’eny mosekalo?

²⁸ Par bende ni nitie bad riwruok mar oganda Jehova manie piny. Riwruogno oting’o dhano morem. Kata kamano, par ane gik ma Jehova osetimo e piny kae! E piny duto, Jehova osemiyo dhano morem otimo gik ma gin giwegi ok ginyal timo gi tekogi. (Joh. 14:12) Somo bug Pinyruodh Nyasaye Locho! nyalo paronwa kaka tij lendo osebedo ka dhi nyime e higni mang’eny mosekalo. Bende, samoro wanyalo paro dongruok ma riwruok mar oganda Jehova osetimo e puonjo Jokristo madier, yalo kes e kot, kod e tiyo gi teknoloji ma nyasani e timo dwach Nyasaye!

²⁹ Ka wanono gik moko duto ma osetim mondo oduok lamo madier e kinde mag gikogi, waneno gadier ni gach Jehova osebedo ka ringo. Mano kaka wan gi thuolo maber mar bedo e riwruok ma tiyo ne Jaloch kaka mano!​—Zab. 84:10.

30. Ang’o ma wabiro wuoye e sula ma luwo mae?

³⁰ Kata kamano, fweny ma Ezekiel noneno puonjowa gik momedore. E sula ma luwo mae, wabiro wuoyo e wi ‘gik mangima’ ang’wen kata jokerubi. Ang’o ma jokerubigo nyalo puonjowa e wi Jehova Nyasaye ma en Jalochwa?