E kinde mokalo, bugewa ne wachoga ni Jerusalem ma nong’anyo ochung’ ne dinde mag miriambo ma luongore ni Jokristo. Gik ma Jo-Jerusalem ma nong’anyo ne timo kaka lamo nyiseche manono kod mibadhi ma ne onya ahinya, paronwa gik ma timore e dinde ma luongore ni Jokristo. Kata kamano, e bugewa ma kindegi moriwo nyaka ma koro isomoni, ok wach ni gimoro ma okor ochung’ ne gimachielo mak mana ka Muma ochiwo gima nyiso kamano. Be nitie Ndiko moro ma nyiso e yo maler ni Jerusalem ochung’ ne dinde mag miriambo ma luongore ni Jokristo? Ooyo.

Par ane weche ma luwogi: Nitie kinde moro ma lamo madier nogurore Jerusalem; kata kamano, joma ne odak Jerusalem bang’e nong’anyo. Mopogore gi mano, dinde ma luongore ni Jokristo pok nobedoga e lamo madier. Chakre ne chak dinde mag miriambo ma luongore ni Jokristo e higni mag 300 B.K, gisebedo ka gipuonjo miriambo kinde duto.

E wi mano, bang’ ka Jo-Babulon ne oseketho Jerusalem, Jehova ne oduogo oyie kodgi mi oduoko lamo madier e dalano. To komachielo, Jehova pok oyiega gi dinde ma luongore ni Jokristo kendo ka ibiro kethgi e kinde masira maduong’, ok ginichak gibedie nyaka chieng’.

Kaluwore gi weche ma wasewuoyego, wanyalo wacho ang’o? Ka wanono weche mokor e Muma ma ne otimore ne Jo-Jerusalem ma ne ong’anyo, mano nyalo miyo wawach ni, ‘Gima kamae kata mae chal mana gi gik ma waneno ka timore e dinde ma luongore ni Jokristo e kindewagi.’ Kata kamano, nenore ni onge Ndiko moro amora ma wanyalo tiyogo e wacho ni Jerusalem ochung’ ne dinde mag miriambo ma luongore ni Jokristo.