Onge kiawa ni Ezekiel ne oseneno sanambe madongo mogorie ruedhi ma nigi buombe kod sibuoche ma nigi wiye dhano koket e nyim hekalu kod ute ruodhi. Sanamu ma kamago ne yudore e alwora duto mag Asuria kod Babulon. Mana kaka jomoko, nyaka bed ni Ezekiel bende ne wuoro ahinya ka noneno sanamugo, ma moko ne borgi romo mita 6 ka dhi malo. Kata kamano, kata bed ni sanamugo ne dongo ma romo nade, ne gin mana kite mopa kendo ma onge ngima.

Mopogore gi mano, gik moko ang’wen ma Ezekiel noneno e fweny ne gin “gik mangima.” To mano doko pogruok maduong’! Wachno nomulo chuny Ezekiel ahinya to mano e momiyo nowuoyo kuom ‘gik mangimago’ nyadi 11 e chak weche ma nokoro. (Eze. 1:5-22) Yo ma ne gik mangimago ringogo kanyachiel e bwo kom-loch mar Nyasaye ne okonyo Ezekiel bedo gadier ni Jehova e ma tayo chuech duto. E kindewagi bende, fwenyno konyowa ng’eyo teko kod duong’ malich miwuoro mar loch Jehova.​—1 We. 29:11.