E Ezekiel sula mar 23, inyisowa kaka jotich Nyasaye noyudo kum nikech timbegi maricho. Nitie kaka sula mar 23 mar bug Ezekiel chalre e yore mang’eny gi sula mar 16. Mana kaka sula mar 16, sula mar 23 bende tiyo gi ranyisi mar terruok. Inyisowa ni Jerusalem e nyako matin to Samaria, e nyamin-gi maduong’. Sula ariyogo duto nyiso kaka nyako matinno noluwo timbe nyamin-gi maduong’ kendo nodonjo e timbe mag terruok moloyo kata nyamin-gi maduong’. E sula mar 23, Jehova miyo nyimine ariyogo nyinge: Ohola e nyako maduong’ kendo ochung’ ne Samaria, ma ne en taon maduong’ mar dhoudi apar mag Israel; to Oholiba e nyako matin kendo ochung’ ne Jerusalem, ma ne en taon maduong’ mar Juda. a​—Eze. 23:1-4.

Nitie weche moko ma bende chalre e sula ariyogo. Moko kuomgi gin: Nyimine ma jochodego bedo monde Jehova kae to bang’e gindhoge. Bende, nitie weche ma chiwo geno. Sula mar 23 wuoyo matin e wi resogi, kata kamano, ochalre gi weche ma yudore e sula mar 16 kama Jehova wachoe niya: “Abiro tieko timbeni mag anjawo kod terruok.”​—Eze. 16:16, 20, 21, 37, 38, 41, 42; 23:4, 11, 22, 23, 27, 37.

E kinde machon, bugewa ne wacho ni nyimine ariyogo ma gin Ohola gi Oholiba, ochung’ ne dinde ma luongore ni Jokristo to ahinya ahinya din mar Katholik kod mar Protestant. Kata kamano, bang’ lamo kendo timo nonro matut e wi wachno, nitie penjo moko madongo ma betie. Be dinde ma luongore ni Jokristo osegabedo chi Jehova e yo moro amora? Be Nyasaye osegatimo singruok moro amora kode? Ooyo ngang’. Dinde ma luongore ni Jokristo ne onge ka ne Yesu chako “singruok manyien” gi Israel mar roho; kendo ne ok gin e kind Jokristo mowal. (Jer. 31:31; Luka 22:20) Dinde ma luongore ni Jokristo nochako betie bang’ tho joote. Ne gichako betie e higni mag 300 B.K. kaka Jokristo mong’anyo, ma ne Yesu opimo gi “ogolo,” e weche ma nokoro e wi ngano gi ogolo.​—Mat. 13:24-30.

Pogruok machielo maduong’ en mae: Jehova nosingo ni ne odhi reso Jerusalem gi Samaria ma ne ong’anyone. (Eze. 16:41, 42, 53-55) Be Muma wacho ni ibiro res dinde ma luongore ni Jokristo? Ooyo! Mana kaka Babulon Maduong’, dindego onge gi geno moro amora ni ibiro resgi.

Omiyo, Ohola gi Oholiba ok ochung’ ne dinde ma luongore ni Jokristo. Kata kamano, gikonyowa winjo tiend wach moro maduong’: gikonyowa ng’eyo kaka Jehova neno joma ketho nyinge kendo ma ok luw chikene ma tayo lamo madier. Dinde ma luongore ni Jokristo biro yudo kum nikech thoth dindego wacho miriambo e wi Nyasaye kod Muma. To e wi mano, giwacho ni Wuod Jehova ma miderma ma en Yesu Kristo, e jatendgi. Kata kamano, gin giwegi gikwedo wachno ka giwacho ni en achiel kuom nyiseche adek kendo ok giluw chik ma Yesu nomiyo jolupne ni kik ‘gibed mag piny.’ (Joh. 15:19) Dinde ma luongore ni Jokristo osebedo ka riwo lwedo lamo mar sanamu kod siasa mag pinyni, to mano nyiso maler ni en bende en “jachode maduong’.” (Fwe. 17:1) Onge kiawa ni en bende ibiro kume e kinde ma ibiro kethie dinde duto mag miriambo!