Hekalu ma ne Ezekiel oneno e fweny ne oting’ malo “e wi got mabor ahinya.” (1). Be wating’o lamo madier malo kendo kete obed motelo e ngimawa?

Ohinga (2) ma nolworo hekalu kendo ma nokwako kama lach (3), paronwa ni ok onego wayie mondo gimoro amora ochid lamowa. Ezekiel 42:20 wacho ni nitie ohinga ma nopogo “ka maler” gi “kuonde mamoko.” Ka “ka maler” ne opog gi “kuonde mamoko” kata obedo ni onge gima rach ma ne itimo ‘kuonde mamokogo’, donge mano nyiso ni jotich Jehova onego obed mabor ahinya gi timbe mochido kendo modwanyore?

Aora moro mol koa kama ler komiyo gik moko bedo mangima kendo miyo piny nyak maber (4). Wabiro puonjore e wi guethgo e Sula mar 19 mar bugni.

Rangeye maboyo ma oko (5) kod rangeye ma iye (9) paronwa ni Jehova dwaro ni ji duto ma riwo lwedo lamo madier oluw chikene makare ma wuoyo e wi bedo gi timbe mabeyo. Par ni rangeye ma oko gi ma iye ne romre. Mano en gima ber nikech Jehova dwaro ni ji duto oluw chikene makare bed ni gin gi migepe mage kata gitiyone e okang’ ma romo nade.

Ute chiemo (8) paronwa ni e kinde machon, ji ne nyalo chamo kanyachiel misengni ma ne gikelo e hekalu kendo kuom timo kamano, ne gichalo ka gima gichiemo gi Jehova. Mano opogore gi gima timore e hekalu mar ranyisi, kama Jokristo lamoe Nyasaye e kindegi, nikech osechiw “misango achiel.” (Hib. 10:12) Kata kamano, pod wachiwo misengni mag pak.​—Hib. 13:15.

Samoro kaka ne ipimo hekalu ma ne Ezekiel oneno nyalo kawi gi wuoro. Kata kamano, yo ma nopimgo hekaluno puonjowa wach moro maduong’: Opuonjowa ni wanyalo bedo gadier ni dwach Jehova mar duoko lamo madier biro chopo kare kendo ni dwacheno ok bi lokore. Ezekiel ok lernwa ni noneno dhano moro e fweny ma ne onyise, kata kamano, owacho kaka Jehova nochiwo siem mager ne jodolo, jotelo, kod oganda. Jotich Jehova duto nyaka luw chikene makare.