JOKRISTO omi chik ni mondo gitim Rapar mar tho Kristo. Raparno bende iluongo ni “Sawo [“Chiemb Odhiambo,” NW ] mar Ruoth.” (1 Jo Korintho 11:20) Ang’o momiyo en rapar maduong’ ahinya? Onego otime e odiechieng’ mane, kendo onego otime e yo mane?

Yesu Kristo ne ochako nyasi mar raparni e otieno moro mar Pasaka mar Jo-Yahudi e higa mar 33 E Ndalowa. Pasaka ne en nyasi ma ne itimo mana dichiel kende e higa, e odiechieng’ mar 14, e dwe mar Jo-Yahudi miluongo ni Nisan. Mondo giyud tarigno, Jo-Yahudi nenore ni ne rito chieng’ ma odiechieng’ gi otieno ne romre e borgi. Mano tiende ni, odiechieng’ ma chieng’ rienyie kuom seche 12, to mudho bende bedoe kuom seche 12. Dwe ma ne kwongo wuok e kor polo ka odiechiengno pok ochopo, ema ne bedo chakruok mar dwe mar Nisan. Odiechienge 14 bang’e, Pasaka ne chakore ka chieng’ osepodho.

Yesu ne otimo nyasi mar Pasaka gi jootene, bang’e ne ogonyo Judas Iskariot mondo odhi, eka bang’ mano, ne ochako  nyasi mar Chiemb Odhiambo mar Ruoth. Nyasini ne okawo kar Pasaka mar Jo-Yahudi, kuom mano, onego otime mana dichiel e higa.

Injili mar Mathayo nyisowa kama: “Yesu nokawo makati, noguedho, mong’ingo; nomiyo jopuonjre, kowacho niya, ‘Kawuru, chamuru; ma e ringra.’ Nokawo kikombe bende, nogoyo erokamano, momiyogi, kowacho ni, ‘Madhuru uduto; nikech ma e remba mar Muma [“singruok,” Luo NT 2003], mochuer ni ji mang’eny mondo owenigi richogi.’ ”—Mathayo 26:26-28.

Jomoko puonjo ni Yesu ne oloko makate mobedo ringre mare madier, kendo divai obedo rembe madier. Kata kamano, ringre Yesu podi ne nitie duto kane ochiwo makateno. Be joote Yesu ne chamo ringre Yesu owuon, kendo madho rembe kuom adier? Ooyo, nikech mano dine obedo tim mar chamo ring dhano, kendo ketho chik Nyasaye. (Chakruok 9:3, 4; Tim Jo-Lawi 17:10) Kaluwore gi Luka 22:20, Yesu ne owacho kama: “Kikombeni e muma [“singruok,” Luo NT 2003] manyien kuom remba, mochuernu.” Be kikombeno ema ne obedo “singruok manyien” kuom adier? Mano ne en gima ok nyalre, nikech singruok en winjruok, ok en gimoro ma ng’ato nyalo mulo.

Kuom mano, makate gi divai gin mana ranyisi. Makate en ranyisi mar ringre Kristo makare chuth maonge richo kata matin. Yesu ne otiyo gi makate ma ne onwango’ odong’ bang’ chamo chiemb Pasaka. Makateno ne otedi ma ok oti gi thowi kata matin. (Wuok 12:8) Muma tiyo gi thowi kaka ranyisi mar richo kata gima tow. Kuom mano, makate ochung’ ne del mar ringruok makare chuth ma ne Yesu ochiwo kaka misango. Ne en del ma onge richo moro amora.—Mathayo 16:11, 12; 1 Jo Korintho 5:6, 7; 1 Petro 2:22; 1 Johana 2:1, 2.

Divai makwar ochung’ne remb Yesu. Remono ema miyo singruok manyien tiyo. Yesu ne owacho ni rembe ne ochwer mondo ‘oweni ji richogi.’ Kuom mano, dhano koro nyalo bedo maler e wang’ Nyasaye, kendo donjo e singruok manyienno gi Jehova. (Jo Hibrania 9:14; 10:16, 17) Singruok, kata winjruokni, miyo Jokristo makare 144,000, thuolo mar dhi e polo. Gibiro  tiyo kuro kaka ruodhi, kendo jodolo mondo dhano duto oyud gweth.—Chakruok 22:18; Jeremia 31:31-33; 1 Petro 2:9; Fweny 5:9, 10; 14:1-3.

Gin jo mage ma onego ocham makate, kata madho divai ma itiyogo e Raparno? Gin mana jogo manie singruok manyien—tiende ni, jogo ma nigi geno mar dhi e polo—gin ema onego gicham makate, kendo madho divai. Roho maler mar Nyasaye miyo gibedo gi yie motegno ni oseyiergi mondo gibed ruodhi mabiro locho ka gin e polo. (Jo-Rumi 8:16) Gin bende okwan-gi e singruokno mar Pinyruoth kaachiel gi Yesu.—Luka 22:29.

To nade jogo ma nigi geno mar dak nyaka chieng’ e Paradis e piny ka? Giluwo chik ma Yesu ne ochiwo mawacho ni onego wadhi e nyasi mar Chiemb Odhiambo mar Ruoth. Kata kamano, gibiro kaka joneno mamiyo raparno luor, to ok kaka joma biro chamo makate, kendo madho divai. Dichiel e higa, e dwe mar Nisan tarik 14, ka wang’chieng’ osepodho, Joneno mag Jehova timo nyasi mar Chiemb Odhiambo mar Ruoth. Kata obedo ni ji gana manok kende ema nigi geno mar dhi e polo, raparni en gima duong’ ni Jokristo duto. En kinde ma waduto wanyalo paro matut kuom hera mamalo moloyo duto, ma Jehova Nyasaye kod Yesu Kristo nyisowa.—Johana 3:16.