1, 2. Chiw ane nyinge jomoko ma Jehova ne neno ni gin osiepene.

INYALO hero mako osiep gi ng’at ma kite chalo nade? Nyaka bed ni diher ng’at ma pache, dwaro mage, kendo ma timbene ok opogore gi magi. Bende nyaka bed ni inyalo hero ng’at ma kite ber, mawacho adier, kendo mang’won.

² Kuom higini duto mosekalo, Nyasaye osebedo ka yiero jomoko kuom dhano mondo obed osiepene. Kuom ranyisi, Jehova ne oluongo Ibrahim ni osiepne. (Isaiah 41:8; Jakobo 2:23) Nyasaye ne oluongo Daudi ni “ng’ato ma chunye ka mara” nikech ne en ng’at ma Nyasaye ohero. (Tich Joote 13:22) Kendo Jehova ne oneno janabi Daniel kaka “ng’a moher ahinya.”—Daniel 9:23.

3. Jehova yiero dhano moko mondo obed osiepene nikech ang’o?

³ Ang’o momiyo Jehova ne neno Ibrahim, Daudi, koda Daniel kaka osiepene? Ne owacho ne Ibrahim niya: “Niwira isewinjo dwonda.” (Chakruok 22:18) Kuom mano, Jehova sudo machiegini gi jogo mabolore e timo gima owachonegi mondo gitim. Ne owacho ni Jo-Israel niya: “Winjuru duonda, mi anabedi Nyasachu, un bende unubedi  joga.” (Yeremia 7:23) Ka iluwo chike Jehova, in bende inyalo bedo osiepne!

4, 5. Jehova konyo joge gi tekone e yo mane?

⁴ Par ane ber manyalo bedoe nikech mako osiep gi Nyasaye. Muma wacho ni Jehova manyo thuolo mag nyiso ‘tekone ni jogo ma chunygi ni kare e nyime.’ (2 Weche mag Ndalo 16:9) Jehova nyalo konyi gi tekone e yo mane ? Yo achiel en ma ondiki e Zaburi 32:8 kama wasomo niya: ‘An [Jehova] napuonji kendo nyisi yo ma nidhiye: Nang’adni rieko ka wang’a oneni.’

⁵ To mano kaka Jehova nyisowa hera e yo maber miwuoro! Obiro nyisi yo ma onego iluw, kendo riti seche ma imedo luwo yorno. Nyasaye dwaro konyi seche ma itimo kinda e loyo tem duto mabiro e ngimani. (Zaburi 55:22) Kuom mano, ka itiyo ne Jehova gi chunyi duto, inyalo bedo gi geno mana kaka jandik Zaburi ma ne owacho niya: “Aseketo Jehova e nyima ndalo duto: Nikech en e bada korachwich, ok anayiengini.” (Zaburi 16:8; 63:8) Ee, Jehova nyalo konyi mondo idag e yo mamoro chunye. Kata kamano, kaka in bende ing’eyo, nitie jasik Nyasaye ma ok dwar mondo itim kamano.

6. Satan ne owacho ang’o kuom dhano?

⁶ Sula mar 11 ei bugni, lero kaka Satan Jachien ne okwedo loch mar Nyasaye. Satan ne owacho ni Nyasaye en ja miriambo, kendo ni Jehova ok ne ni kare e tamo Adam gi Hawa yiero timo gima gin giwegi ne giparo ni ber kata rach. Ka Adam gi Hawa ne oseketho ma koro piny ochako pong’ gi nyithindgi, Satan ne oriwo gi kiawa gimomiyo dhano tiyo ni Nyasaye ka owacho niya: “Dhano ok ti ni Nyasaye nikech gihero Nyasaye, miya thuolo, to analoki ng’ato ang’ata kik olam Nyasaye.” Sigand ng’at miluongo ni Ayub nyiso ni ma  e gima Satan ne paro. Ayub ne en ng’a, to ne ochung’ nade kaluwore gi weche ma Satan ne ohango kuome?

7, 8. (a) Ayub ne opogore e yo mane gi joma ne odak e ndalone? (b) Satan ne oriwo gi kiawa lamo mar Ayub e yo mane?

⁷ Ayub ne odak chiegni higini 3,600 mosekalo. Ne en ng’at maber nikech Jehova ne owacho kuome kama: “Onge ng’at moro machal kode e piny, ng’at mogik kare, modimbore, moluoro Nyasaye, kendo otang’ gi richo.” (Ayub 1:8) Ayub ne en ng’at maber e nyim Nyasaye.

⁸ Satan ne oriwo gi kiawa ka be Ayub ne tiyo ni Nyasaye gi chuny mar adier. Jachien ne owacho ni Jehova niya: “Ok niketo chiel molwore kuonde duto, en [Ayub] kod dalane, gi gik moko duto ma engo? isegwedho gi hawi tich mar luete, mi gige omedore e piny. To koro, rie lueti, imul gik moko duto ma engo, eka noyanyi e nyimi.”—Ayub 1:10, 11.

9. Jehova ne otimo nade kaluwore kod wach ma Satan ne ohango kuom Ayub, to notimo kamano nikech ang’o?

⁹ Kuom mano, Satan ne owacho ni Ayub ne tiyo ni Nyasaye mana nikech gik ma ne oyudo kuom Nyasaye. Jachien bende ne wacho ni ka Ayub oyudo tem, ne onyalo lokore ma owe lamo Nyasaye. Jehova ne otimo nade e wi wach ma Satan ne ohango kuom Ayub? To nikech ne idwaro mondo one ka Ayub lamo Nyasaye e yo madier, Jehova ne oyie mondo Satan otem Ayub. E timo mano, ne dhi nenore e yo malong’o—ka be Ayub ne ohero Nyasaye, koso ne ok ohere.

10. Gin tem mage ma ne oyudo Ayub, to ne otimo ang’o?

¹⁰ Satan ne ochako kelo ne Ayub tem e yore mopogore opogore. Moko kuom jamni mag Ayub ne okwal, kendo moko ne onegi. Ng’eny jotichne ne onegi. Mano ne okelo ne Ayub chandruok mang’eny e ngimane. Masira moro bende ne obiro kane nyithind Ayub otho e yamo maduong’. Kuom mago duto, “Ayub ne ok oketho, kata wacho ni, Nyasacha rach.”—Ayub 1:22.

11. (a) Wach mar ariyo ma Satan ne ohango kuom Ayub ne en mane, to ang’o ma Jehova ne otimo? (b) Ayub ne otimo ang’o kaluwore kod tuwone ma ne kelone rem?

 ¹¹ Satan ok ne ool gi kanyo. Nyaka bed ni Jachien ne paro ni kata obedo ni Ayub ne ochung’ motegno seche ma ne olalo mwandune, jotichne koda nyithinde, Ayub ne nyalo weyo Nyasaye ka dipo ni obedo matuwo. Jehova ne oweyo mondo Satan okel ne Ayub tuwo marach. Kata kamano, mano podi ok ne omiyo Ayub oweyo keto yie mare kuom Nyasaye. Kar timo kamano, Ayub ne owacho gi chuny motegno niya: “To nadi? Wanayud gi maber kuom luet Nyasaye, to ok wanayud gi marach koso? Kuom magi duto Ayub ok noketho gi dhoge.”—Ayub 2:10.

12. Gik ma Ayub ne otimo ne nyiso nade ni weche ma Jachien ne owacho kuome ne gin miriambo?

¹² Ayub ok ne ong’eyo ni Satan ema ne kelone chandruogegi. Ne oluor ni nyalo bedo ni Nyasaye ema ne kelone tem nikech ne ok ong’eyo kaka Jachien ne okwedo Loch mar Jehova. (Ayub 6:4; 16:11-14) Kata kamano, podi ne ochung’ motegno e nyim Jehova. To nikech Ayub nochung’ motegno, mano ne onyiso ni wach ma Satan ne owacho kuom Ayub, ni ne olamo Nyasaye mana nikech gik ma en-go, ne en miriambo!

13. Ang’o ma ne otimore kane Ayub ochung’ motegno e nyim Nyasaye?

¹³ Kane Ayub ochung’ motegno, mano ne okonyo Jehova e chiwo dwoko motegno kuom wach ma ne Satan ohango kuom Ayub. Kuom adier, Ayub ne en osiep Jehova, kendo Nyasaye ne ogwedhe kuom bedo ng’at maluwo yo makare.—Ayub 42:12-17.

14, 15. Ang’o momiyo wanyalo wacho ni weche ma Satan ne owacho kuom Ayub omako dhano duto?

¹⁴ Wach ma Satan ne owacho ok ne omako mana Ayub kende. In bende wachno omaki. Mani nenore ratiro e Ngeche  27:11 kama Wach Jehova wacho niya: “Wuoda, bedi mariek, kendo mi chunya mor; mondo aduok wach ni jalo makwera.” Wechegi ma ne ondiki higini mang’eny bang’ tho Ayub, nyiso ni Satan ne podi kwero Nyasaye, kendo wacho miriambo kuom jotichne. Ka wadak e yo mamoro Jehova, kuom adier wakonyo chiwo dwoko e wi weche ma Satan wacho, kendo timo kamano miyo chuny Nyasaye bedo mamor. Ineno nade kuom wachno? Donge nyalo bedo gima ber konyo chiwo dwoko e wi weche ma Jachien wacho, kata ka obedo ni timo kamano biro chuno ni mondo itim lokruok e ngimani?

¹⁵ Ne ni Satan ne owacho kama: ‘Gik moko duto ma dhano nigo nochiu ni kech ngimane.’ (Ayub 2:4) Kane owacho ni “dhano,” Satan ne oketo maler ni ok ne owuo mana kuom Ayub kende, to kata kuom dhano duto. Mano en wach maduong’ ahinya. Satan wacho ni kata mana in ok ihero Nyasaye e yo makare. Jachien nyalo neno maber ka ikwedo Nyasaye, kendo ka iweyo luwo yo makare seche miyudo chandruok. Satan nyalo temo timo mano e yo mane?

16. (a) Satan temo loko ji mondo owe Nyasaye e yore mage? (b) Jachien nyalo tiyo nade gi yore kaka mago kuomi?

¹⁶ Mana kaka osenyis e Sula mar 10, Satan tiyo gi yore mopogore opogore mondo otem golo ji kuom Nyasaye. E yo machielo, omonjo ji “ka sibuor ma goyo asumbi, kodwaro ng’a ma dongam.” (1 Petro 5:8) Kuom mano, teko Satan inyalo neno seche ma osiepe, wedeni kata mana jomoko geng’o kinda ma iketo e puonjruok Muma, ka gidwaro mondo kik iti gi gik ma isepuonjori. * (Johana 15:19, 20) E yo machielo, Satan owuon “timore ka malaika mar ler.” (2 Jo Korintho 11:14) Jachien nyalo tiyo gi yore mag rieko mondo  owuondi, kendo mondo ogoli kik iluw yore mag Nyasaye. Bende onyalo nyoso chunyi mondo ipar ni ok inyal mako chike mamoro Nyasaye. (Ngeche 24:10) Kata bed ni Satan timore kaka “sibuor ma goyo asumbi” kata nyisore kaka “malaika mar ler,” wechene to gin mana kaka chon: Owacho ni ka iyudo chandruok, ibiro weyo tiyo ne Nyasaye. Inyalo chiwo dwoko nade kuom weche ma ne Satan owacho mondo inyis adier ni in ng’at mohero Nyasaye mana kaka Ayub ne otimo?

17. Gima duong’ momiyo onego waluw chike Jehova en ang’o?

¹⁷ Inyalo chiwo dwoko e wi weche ma Satan ne owacho ka idak e ngima mamoro Nyasaye. Mano tiende nang’o? Muma dwoko niya: “Niher Jehova Nyasachi gi chunyi duto, gi paroni duto, kendo gi tekoni duto.” (Rapar mar Chik 6:5) Kaka imedo hero Nyasaye, ibiro bedo gi gombo mar timo gima odwaro. Jaote Johana ne ondiko kama: “Nimar hero Nyasaye en mako chikne.” Ka ihero Nyasaye gi chunyi duto, ibiro yudo ni “chikne ok tek.”—1 Johana 5:3.

18, 19. (a) Chike moko mag Jehova gin mage? ( Ne ite mar 122.) (b) Wang’eyo nade ni Nyasaye ok oketonwa ting’ mapek ahinya?

¹⁸ Chike Jehova gin mage? Moko kuomgi kwero timbe ma onego wawe. Kuom ranyisi ne ite mar 122, kama wacho ni “ Tamri Timbe ma Jehova Mon-godo.” Kanyo ibiro yudo ka ondiki timbe ma Muma kuong’o ratiro. Ka ing’iyogi mokwongo, timbe moko nyalo nenore ka gima ok gin timbe maricho ahinya. Kata kamano, bang’ paro e yo matut e wi ndiko ma oket kanyo, ibiro neno ber manie puonj mayudore e chike mag Jehova. Bedo gi lokruok e timbeni nyalo bedo gima tek timo ahinya e ngimani. Kata kamano, dak e ngima mamoro Nyasaye kelo ber koda mor mogundho. (Isaiah 48:17, 18) Kendo en gima in bende inyalo timo. Wang’eyo kamano nade?

¹⁹ Jehovah ok dwar gik mang’eny kuomwa moloyo gima  wanyalo timo. (Rapar mar Chik 30:11-14) Ong’eyo maloyowa gik ma wanyalo timo, kod gik ma ok wanyal timo. (Zaburi 103:14) Maloyo mano, Jehova nyalo miyowa teko mar luwo chikene. Jaote Paulo ne ondiko kama: “Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.” (1 Jo Korintho 10:13) Mondo Jehova okonyi chung’ motegno e tem, onyalo miyi kata “tekono maduong’ ahinya.” (2 Jo Korintho 4:7) Bang’ timo kinda mang’eny e tem ma ne oyudo, Paulo ne nyalo wacho ni: “Anyalo timo gik moko duto kuom en ma miya teko.”—Jo Filipi 4:13.

20. Gin kido mage mamoro Nyasaye ma dwarore mondo inyis e ngimani, to ang’o momiyo gin kido madwarore ahinya?

²⁰ Kuom adier, mondo wamor chuny Jehova, dwarore mondo watim gik mamoko bende mopogore gi weyo timbe ma Nyasaye mon godo kende. Hero gima Nyasaye ohero en gima dwarore. (Jo-Rumi 12:9) Donge ihero bedo gi osiepe man gi paro kaka magi, kendo jogo mohero gik mihero? Jehova bende timo kamano. Kuom mano, puonjori hero gik ma Jehova ohero. Moko kuom gigo ondiki e Zaburi 15: 1-5 kama wasomo e wi jogo ma Nyasaye kawo kaka osiepene. Osiepe Jehova nyago gima Muma luongo ni “nyak mar Roho.” Gin kido kaka “hera, mor, kuwe, horuok, miwafu, ng’wono, bedo adiera, muolo, ritruok.”—Jo Galatia 5:22, 23.

21. Ang’o mabiro konyi mondo ibed gi kido ma Nyasaye ohero?

²¹ Somo kendo puonjruok Muma pile biro konyi bedo gi kido mabeyo ma Nyasaye ohero. Kendo puonjruok gima Nyasaye dwaro biro konyi bedo gi paro kaka mar Nyasaye. (Isaiah 30:20, 21) Kaka imedo hero Jehova, e kaka gombo mari mar dak kaka Nyasaye dwaro biro medore.

22. Ang’o momiyo dak e ngima mamoro Nyasaye en gima ber?

²² Timo kinda en gima dwarore mondo idag e yo mamoro Jehova. Muma wacho ni loko kit ngimani chalo gi lonyo dhano machon gi timbene, kae to irwakri gi dhano manyien. (Jo Kolosai 3:9, 10) Kata kamano, kaluwore gi chike mag Jehova, jandik Zaburi ne ondiko kama: “Nitie pok maduong’ kuom ritogi.” (Zaburi 19:11) In bende ibiro neno ni dak e yo mamoro Nyasaye en gima ber miwuoro. Ka itimo kamano, ibiro chiwo dwoko e wi wach ma Satan ne owacho, kendo ibiro moro chuny Jehova!