1, 2. (a) Ang’o momiyo ng’eyo nying ng’ato ok nyis ni ing’eye maber? (b) Nitie paro mage mopogore opogore e wi Yesu?

NITIE ji mang’eny mong’ere ahinya. Moko kuomgi ong’ere e anyuolagi, e gwenge ma gidakie, kata mana e pinjegi. Moko kuomgi to ong’ere e piny mangima. Kata kamano, ng’eyo nying ng’ato ok nyis ni ing’eye maber. Ng’eyo nyinge ok nyis ni ing’eyo gik moko duto e ngimane, kendo ni ing’eyo kite.

² Ji mang’eny e piny mangima osewinjo wach Yesu Kristo, kata obedo ni Yesu ne odak e piny higini madirom 2,000 mosekalo. To ema podi jomoko ok ong’eye e yo maber ni Yesu ne en ng’a kuom adier. Jomoko wacho ni ne en mana ng’at maber. Moko wacho ni ne en mana janabi. To jomoko to wacho ni Yesu en Nyasaye, kendo ni onego olame. Be onego olam Yesu?

3. Ang’o momiyo ng’eyo adiera e wi Yesu en gima dwarore?

³ Dwarore ahinya ni mondo ing’e adiera e wi Yesu. Nikech ang’o? Nikech Muma wacho kama: ‘Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.’ (Johana 17:3) Ee, ng’eyo Jehova Nyasaye kod Yesu Kristo e yo makare, nyalo miyo ng’ato oyud ngima mochwere e paradis e piny ka. (Johana 14:6) Yesu bende ne oketo ranyisi maber manyiso kaka ji onego odag, kendo kaka ji onego  otim ne jowetegi. (Johana 13:34, 35) E sula mokwongo mar bugni, ne wapuonjore adiera e wi Nyasaye. Koro we wane gima Muma puonjo kuom adier, e wi Yesu Kristo.

4. “Mesia” kod “Kristo” tiendgi en ang’o?

⁴ Chon ka Yesu ne podi ok onyuol, Muma ne okoro biro mar jal ma Nyasaye ne dhi oro kaka Mesia, kata Kristo. “Mesia” (e dho Hibrania) kod “Kristo” (e dho Grik), gin weche manyiso gimoro achiel, tiende ni “Ng’a Mowir.” Jal ma ne okor wach kuomeni ne idhi wir, tiende ni ne idhi miye migawo makende gi Nyasaye. E sula mamoko mag bugni, wabiro puonjore  mang’eny kuom migawo makende ma Mesia nigo mar chopo gik ma Nyasaye osingo. Wabiro puonjore bende kuom gweth ma Yesu nyalo kelonwa kata mana gie sani. Kata kamano, ka ne podi ok onyuol Yesu, nyaka bed ni ng’eny ji ne penjo ni, ‘En jal mane ma dhi bedo Mesia? ’

5. En ang’o ma jopuonjre Yesu ne ong’eyo kuome ma onge kiawa?

⁵ Jopuonjre mokwongo mag Yesu Ja-Nazareth ne oyie ma onge kiawa ni ne en Mesia ma ne okor wachne. (Johana 1:41) Achiel kuom jopuonjrego miluongo ni Simon Petro, ne owacho ne Yesu ayanga kama: “In e Kristo.” (Mathayo 16:16) Kata kamano, ere kaka ne jopuonjrego—kata mana wan—ne nyalo yie kuom adier ni Yesu e Mesia ma ne okor wachne?

6. Chiw ane ranyisi manyiso kaka Jehova osekonyo jotichne madier e fwenyo Mesia?

⁶ Ka Yesu ne podi ok obiro, jonabi mag Nyasaye ne okoro weche mang’eny e wi Mesia. Wechegi ne dhi konyo ji fwenyo Mesia. Wanyalo chiwo ranyisi kama: Wawach ni oori mondo idhi irom ne ng’ato e stesen mar bas kata mar gach reru, to en ng’ama pok ne iromogo nyaka nene. Donge en gima nyalo konyo ahinya ka ng’ato omiyi weche moko manyalo konyi ng’eyo ng’atno? Jehova bende kokalo kuom jonabi mag Muma, ne ochiwo weche mang’eny kuom gik ma Mesia ne dhi timo kod gik ma ne dhi timorene kobiro. Neno weche ma ne okor e wi Mesia ka timore, ne dhi konyo jotich Nyasaye madier mondo gifwenye e yo makare.

7. Weche ariyo mage ma ne okor ma notimre e ngima Yesu?

⁷ Par ane ranyisi ariyogi. Mokwongo, higini mokalo 700 ka podi ne ok onyuol Yesu, janabi Mika ne okoro ni Jal ma ne okor wachne, ne idhi nyuol e Bethlehem e dala mar Juda. (Mika 5:2) To Yesu ne onyuol kanye kuom adier? Ee, e dala mar Bethlehem! (Mathayo 2:1, 3-9) Mar ariyo, higini mang’eny ka Mesia pok obiro,  weche mondik e Daniel 9:25 ne onyiso ratiro higa ma Mesia ne dhi fwenyore—tiende ni higa mar 29 E Ndalowa. * Weche ma ne okorgi kaachiel gi mamoko ka ne timore, ne gichiwo ranyisi maber ni Yesu e Mesia ma ne okor weche kuome.

8, 9. En ang’o ma ne otimore ka ibatiso Yesu manyiso ratiro ni ne en Mesia?

⁸ Gima chielo ma ne onyiso ni Yesu ema ne en Mesia, ne otimore ka higa mar 29 E Ndalowa ne chiegini rumo. Mani e higa ma Yesu ne odhi ir Johana Jabatiso mondo obatise e Aora Jordan. Jehova ne onyiso Johana ni ne odhi miye ranyisi ma ne dhi konye fwenyo Mesia. Johana ne oneno ranyisino kane obatiso Yesu. Muma wacho kama kuom gima ne otimore: “To kosebatis Yesu, gikanyono nowuok oa e pi, kendo polo noyaworene, mi noneno Roho mar Nyasaye ka lor kaka akuru, kobiro kuome; to dwol moa e polo nowacho ni, ‘Jali en Wuoda mahero, chunya mor kode.’ ” (Mathayo 3:16, 17) Bang’ neno, kendo winjo gima ne otimore, Johana ne onge gi kiawa ni Yesu ne oor gi Nyasaye. (Johana 1:32-34) Seche ma ne oolne roho mar Nyasaye, Yesu ne obedo Mesia kata Kristo, jal moyier mondo obed Jatelo kendo Ruoth.—Isaiah 55:4.

⁹ Weche mokor ei Muma ma ne otimore kuome kod neno mar Jehova Nyasaye owuon, nyiso ratiro ni Yesu e Mesia ma ne okor. Kata kamano, Muma chiwo dwoko e wi penjo moko ariyo kuom Yesu Kristo: Ne oa kanye, to ne en ng’ama chalo nade?

10. Ang’o ma Muma puonjo kuom ngima Yesu ka podi ne ok obiro e piny?

¹⁰ Muma puonjo ni Yesu ne odak e polo ka podi ok  obiro e piny. Mika ne okoro ni ne idhi nyuol Mesia e Bethlehem, kendo ne owacho ni “kar chakruokne obedo ma nyaka nene.” (Mika 5:2) Kuom kinde ka kinde, Yesu owuon ne wacho ni ne odak e polo ka podi ne ok onyuole kaka dhano. (Johana 3:13; 6:38, 62; 17:4, 5) Ka en chwech mar roho e polo, Yesu ne nikod winjruok makende kod Jehova.

11. Muma nyiso nade ni Yesu en Wuod Jehova mohero ahinya?

¹¹ Wuod Jehova mohero ahinya en Yesu—kendo nitie gimomiyo ohere kamano. Iluongo Yesu ni Wuod Nyasaye “ma nokwongo betie,” tiende ni en ema Nyasaye ne okwongo chweye. (Jo Kolosai 1:15) Nitie gima chielo momiyo Yesu en wuowi makende. En Wuod Nyasaye “ma miderma.” (Johana 3:16) Tiende ni Yesu ema ne Nyasaye owuon ochweyo achiel kaachiel. Bende Yesu kende ema Nyasaye ne otiyogo kane ochweyo gik mamoko duto. * (Jo Kolosai 1:16, Bible in Luo 1976) Yesu bende iluongo ni “Wach.” (Johana 1:14) Mani nyisowa ni en ema ne owuoyo e lo Nyasaye, ka ochiwo weche kata chike ne nyithind Wuoro mamoko, gibed mag roho kata dhano.

12. Ere kaka wang’eyo ni Wuowi makayo ok rom kod Nyasaye?

¹² Be Wuowi makayo romre gi Nyasaye, kaka jomoko puonjo? Muma ok puonj kamano. Mana kaka onyis e paragraf motelo ne mae, Wuowi en ng’at ma ne ochwe. Kuom mano, nenore ratiro ni Yesu ne nikod chakruok, to mopogore gi mano, Jehova Nyasaye onge gi chakruok kata mana giko. (Zaburi 90:2) Onge chieng’ moro amora ma Wuowi ma miderma ne otemo kata mana paro ni orom gi Wuon mare. Muma puonjo ratiro ni Wuoro duong’ moloyo Wuowi. (Johana 14:28; 1 Jo  Korintho 11:3) Jehova kende e “Nyasaye Manyalo duto.” (Chakruok 17:1) Kuom mano, onge ng’ama rom kode. *

13. Ang’o momiyo Muma wacho ni Wuowi “en kido mineno mar Nyasaye ma ok ne”?

¹³ Jehova kod Wuode makayo ne nikod winjruok maber kuom higini tara gi tara—kata ka polo gi piny podi ok ne ochwe. Nyaka bed ni ne giherore ahinya! (Johana 3:35; 14:31) Wuowi moherni ne chalo mana gi Wuon mare. Mano e momiyo Muma wacho ni Wuowi “en kido mineno mar Nyasaye ma ok ne.” (Jo Kolosai 1:15) Ee, mana kaka wuowi nyalo chalo gi wuon mare e yore mang’eny, Wuod poloni bende chalo gi Wuon mare e kido kod timbene.

14. Ere kaka Wuod Jehova ma miderma ne onyuol kaka dhano?

¹⁴ Wuod Jehova ma miderma ne oyie a e polo mondo obi odag e piny kae kaka dhano. Kata kamano, inyalo penjo ni, ‘Ere kaka ne inyalo nyuol chwech mar roho mondo obed dhano? ’ Mondo mani otimre, Jehova ne otimo hono. Ne odaro ngima Wuode makayo wuok e polo nyaka ei Mariam, nyar Jo-Yahudi ma ne pok ong’eyo dichwo. Omiyo wuon nyathi ma ne idhi nyuol ne ok en dhano. Kuom mano, Mariam ne onyuolo wuowi ma onge gi richo moro amora, kendo ne omiye nying ni Yesu.—Luka 1:30-35.

¹⁵ Gik ma Yesu ne owacho kendo timo ka en e piny, konyowa ng’eye maber. Bende kokalo kuom Yesu wanyalo medo ng’eyo Jehova maber. Ang’o momiyo mani en kamano? Ng’e ni Wuowi en kido makare mar Wuoro. Mani  e momiyo Yesu ne onyiso jopuonjre ni: “Ng’a mosenena, oseneno Wuoro.” (Johana 14:9) Buge Muma mong’ere kaka Injili—Mathayo, Mariko, Luka, kod Johana—nyisowa gik mang’eny kuom ngima Yesu Kristo, gik ma ne otimo kod kido ma ne en-go.

16. En wach mane maduong’ ma Yesu ne puonjo, to puonjne ne gin mag ng’a?

¹⁶ Yesu ne ong’ere ahinya kaka “Japuonj.” (Johana 1:38; 13:13) Ang’o ma ne opuonjo? Wach maduong’ ma ne opuonjo ne en “Wach Maber mar pinyruoth”—tiende ni, Pinyruodh Nyasaye, ma en sirkand polo ma biro locho e wi piny duto, kendo sirkandno biro kelo gweth ma nyaka chieng’ ne dhano maluwo chik. (Mathayo 4:23) Wach ma ne opuonjono ne en mar ng’a? Yesu owuon ne owacho kama: “Puonjna ok mara, to mar Jal ma noora,” tiende ni, Jehova. (Johana 7:16) Yesu ne ong’eyo ni Wuon mare dwaro mondo dhano owinj wach Pinyruoth. E Sula mar 8, wabiro puonjore wach Pinyruodh Nyasaye kod gigo ma Pinyruodhno biro timo.

17. Yesu ne puonjo ji kuonde kaka mage, to ang’o momiyo ne otimo kinda ahinya mondo opuonj ji?

¹⁷ Yesu ne puonjo kuonde kaka mage? Kamoro amora ma ji ne yudore—e mier madongo gi matindo, e chirni gi kuonde duto ma ji ne odakie. Yesu ne ok rit ji mondo obi ire. En ema ne odhi irgi. (Mariko 6:56; Luka 19:5, 6) Ang’o momiyo Yesu ne timo kinda ahinya mar lando wach kopuonjo ji? Nikech Nyasaye ne dwaro mondo otim kamano. Kinde duto Yesu ne timo dwaro mar Wuon mare. (Johana 8:28, 29) Kata kamano, nitie gima chielo ma ne miyo olendo. Ne owinjo lit ne oganda mag ji ma ne biro mondo onene. (Mathayo 9:35, 36) Jogi ne ojwang’ gi jotend din ma ne onego bed ni puonjogi adiera kuom Nyasaye kaachiel kod dwaro mage. Yesu ne ong’eyo kaka ji ne dwaro ahinya winjo wach Pinyruoth.

18. Kido mage mabeyo mag Yesu ma mori ahinya?

 ¹⁸ Yesu ne en ng’at ma jahera kendo ne ong’eyo lit ma ji ne nigo. Kuom mano, ji mang’eny ne dhi ire ma onge luoro nikech ne omuol. Kata mana nyithindo ne mor bedo machiegini kode. (Mariko 10:13-16) Yesu ne en ja ratiro. Ne osin kod mibadhi koda timbe ma ok kare. (Mathayo 21:12, 13) Kata obedo ni kindeno ji ne ok mi mon luor ahinya, Yesu to ne miyogi luor. (Johana 4:9, 27) Yesu ne en ng’at ma obolore kuom adier. Chieng’ moro, ne oluoko tiende jootene, tich ma pile ne itimo gi jatich.

19. En ranyisi mane ma nyiso ni Yesu ne winjo lit nikech chandruoge mag ji?

¹⁹ Yesu ne winjo lit mar ji ahinya. Mani ne onenore maler e kinde ma ne otimo honni mag chango ji kokalo kuom kony mar roho mar Nyasaye. (Mathayo 14:14) Kuom ranyisi, ng’at moro ma ne nikod tuwo mar dhoho ne odhi ir Yesu mowachone niya: “Kiyie, inyalo pwodha.” Yesu ne owinjo rem gi chandruok mag ng’atno en owuon. Kuom mano, ne orieyo lwete “momule, kowachone  ni, ‘Ayie; pwodhri.’ ” Kendo jatuwono ne ochango! (Mariko 1:40-42) Be inyalo paro mor ma ng’atno nyaka bed ni ne owinjo e chunye?

20, 21. Yesu ne onyiso nade ranyisi mar chung’ motegno e luwo chik Nyasaye?

²⁰ Yesu ne oketo ranyisi maber maloyo moro amora mar bedo ng’at maluwo chik Nyasaye kinde duto. Ne ochung’ motegno e luwo chik Wuon mare manie polo kinde duto kata mana e bwo sand duto ma ne oyudo. Yesu ne ochung’ motegno e bwo tem duto mag Satan. (Mathayo 4:1-11) E kinde moro, wede Yesu moko ne ok oyie kuome, ka giwacho bende ni “neko omake.” (Mariko 3:21) Kata kamano, Yesu ne ok oweyo weche kaka mago mondo onyos chunye; ne odhi mana nyime gi tiyo ne Nyasaye. E kinde ma ne iyanye kata iwacho weche maricho kuome, Yesu ne hore mos, kendo ne ok otem ni mondo ohiny jogo ma ne kwede.—1 Petro 2:21-23.

 ²¹ Yesu ne ochung’ motegno e adiera nyaka e thone—tho malit e lwet wasike. (Jo Filipi 2:8) Par ane gik ma ne otimorene e odiechieng’ mogik mar ngimane kaka dhano. Ne omake ma odonjne gi joneno mawacho miriambo, ne oyale gi jong’ad bura ma ohero mibadhi, ne ojare gi ji, kendo ne osande gi askeche. Ne ogure e yath, kendo kane ogamo muya mogik, ne oywak kowacho: “Orumo”! (Johana 19:30; Tich Joote 5:30) Kata kamano, e odiechieng’ mar adek bang’ thone, Wuon mare manie polo ne ochiere e ngima mar roho. (1 Jo Korintho 15:44, 45, Bible in Luo 1976) Jumbe matin bang’e, ne odok e polo. Ka en kuno, ne obet “piny e bad Nyasaye korachwich” korito yudo duong’ mar pinyruoth.—Jo Hibrania 10:12, 13.

22. Nikech chung’ mare motegno nyaka e thone, Yesu ne oyawo thuolo mane?

²² Nikech chung’ mare motegno nyaka e thone, Yesu ne oyawo thuolo mane? Tho mar Yesu yawonwa thuolo mar yudo ngima mochwere e paradis e piny, kaluwore gi dwaro mar Jehova mokwongo. Kaka tho mar Yesu nyalo miyo mano timre, ibiro wuoye e sula maluwe.