Inyalo puonjori weche Jehova ka isomo Muma. Chon Nyasaye ne oyiero jomoko mondo ondik wechene. Ndikogo iluongo ni Muma. Ndalogi, wapuonjore weche Nyasaye ka wasomo Muma. Nikech Muma oting’o wach Jehova, kata otene, iluonge bende ni Wach Nyasaye. Wanyalo yie gi gima Muma wacho nikech Jehova ok riambga. ‘Nyasaye ok nyal riambo.’ (Jo Hibrania 6:18) Wach Nyasaye oting’o adiera.​—Johana 17:17.

Muma en achiel kuom mich Nyasaye maber ahinya momiyowa. Ochalo gi barua ma wuoro majahera ooro ni nyithinde. Onyisowa singo mar Nyasaye mar loko piny obed kama ber ahinya mar dak​—paradis. Onyisowa gik mosetimo endalo mosekalo, gik motimo sani, kod gik mobiro timo ni nyithinde man gi yie e ndalo mabiro. Bende okonyowa loyo chandruok kod kaka wanyalo yudo mor.​—2 Timotheo 3:16, 17.

 Joneno mag Jehova gin osiepe Nyasaye; gibiro konyi winjo gik ma Muma puonjo. Nyis gi anyisa ni idwaro puonjori Muma. Ok bi kwayi chudo kuom puonji Muma. (Mathayo 10:8) Ewi mano, inyalo dhi e chokruok mar Jokristo. Magi itimo kuonde lamo miluongo ni Ute mag Pinyruoth. Ka idhi e chokruok mar Jokristo, ng’eyoni weche Nyasaye biro medore.

Kaka inyalo puonjori weche Nyasaye e chwechne. Kaka ranyisi, Muma wacho kama: “Nyasaye nochweyo polo gi piny.” (Chakruok 1:1) Kane Jehova ochweyo “polo,” ne oloso wang’chieng’. Mano nyisowa ang’o kuom Nyasaye? Onyisowa ni Jehova nigi teko maduong’. En kende ema onyalo loso gima nigi teko kaka wang’chieng’. Onyisowa bende ni Jehova riek, nikech rieko dwarore mondo olos wang’chieng’, machiwo liet gi ler to ok owang’ morum duto.

Chwech Jehova nyiso ni oherowa. Parie olembe mopogore-opogore mantie e piny. Jehova ne nyalo miyowa mana kit olemo achiel kende​—kata ne onyalo yiero ni kik omiwa kata olemo achiel kende. To Jehova nomiyowa olembe mang’eny mopogore-opogore e chwech, duong’ kata tin, kido gi mit. Mano nyiso ni Jehova en Nyasaye majahera, jachiwo, jang’wono kendo japaro.​—Zaburi 104:24.