Yesu Kristo en Wuod Jehova kendo osiepne machiegni, mohero chutho. Kane pok nodak kaka dhano e piny, Yesu ne odak e polo ka en chwech mar roho maduong’. (Johana 17:5) Bang’e nobiro e piny mondo opuonj ji adiera Nyasaye. (Johana 18:37) Kendo nochiwo ngimane mar dhano mondo owar ji man gi yie kuom richo kod tho. (Jo Rumi 6:23) Sani Yesu en Ruoth mar Pinyruodh Nyasaye, loch mar polo ma biro kelo Paradis e piny.​—Fweny 19:16.

Malaika bende gin osiepe Nyasaye. Malaika ne ok ochako ngimagi kaka dhano e piny. Ne ochwegi e polo kane Nyasaye pok ochweyo piny. (Ayub 38:4-7) Nitiere malaika gana gi gana. (Daniel 7:10) Osiepegi mag Nyasaye manie polo dwaro ni ji opuonjre adiera Jehova.​—Fweny 14:6, 7.

Nyasaye bende nigi osiepene e piny; oluongogi ni joneno mage. E od bura, janeno wacho gima ong’eyo kuom ng’ato kata gimoro. Joneno mag Jehova nyiso jomoko gik ma ging’eyo kuom Jehova kod chenro mage. (Isaiah 43:10) Kaka malaika, Joneno dwaro konyi mondo ipuonjri adiera Jehova. Gidwaro mondo in bende ibed osiep Nyasaye.