Satan gi jochiendene ok dwar ni iti ne Nyasaye. Gidwaro loko ng’ato ka ng’ato owe Nyasaye ka ginyalo. Gitemo timo kamano nade? Yo achiel en din mar miriambo. (2 Jo Korintho 11:13-15) Din bedo mar miriambo ka ok opuonj adier moa e Muma. Din mar miriambo chalo gi pesa ma ok adiera​—onyalo nenore kaka gi maradier, to oonge tich. Onyalo kelo ni chandruok mang’eny.

Miriambo mag din ok nyal moro Jehova, Nyasaye mar adiera. Ndalo mane Yesu nitie e piny, ne nitie jo din ma ne dwaro nege. Ne gi paro ni lamo margi ni kare. Ne giwacho: “Wan gi Wuoro achiel, Nyasaye.” Bende Yesu noyie? Ooyo! Nowachonigi: “Un mag wuonu, Satan.” (Johana 8:41, 44) Ndalogi ji mathoth paro ni gi lamo Nyasaye, to kare gi tiyo mana ni Satan gi jochiendene!​—1 Jo Korintho 10:20.

 Kaka yien marach nywolo olemo maricho, din mar miriambo nywolo joma timo timbe maricho. Piny opong’ gi anjawo nikech gik maricho ma ji timo. Nitie chode, gorwok, kuo, diyoji, nek kod bambo. Ng’eny ji matimo gigi gin jodin; to dindegi ok mi gitim gik mabeyo. Ok gi nyal bedo osiepe Nyasaye mak mana ka gi weyo timo timbe maricho.​—Mathayo 7:17, 18.

Din mar miriambo puonjo ji lamo gik ma opa. Nyasaye wacho ni kik walam gik mopa. Mani owinjore. Bende inyalo bedo mamor ka kar wuoyo kodi ng’ato wuoyo mana gi pichani? Bende ng’atno nyalo bedo osiepni maradier? Ooyo, ok onyal. Jehova dwaro ni ji owuo kode, ok wuoyo gi gik mopa kata picha maonge gi ngima.​—Wuok 20:4, 5.

Din mar miriambo puonjo ni en gima kare nego ji ndalo lweny. Yesu nowacho ni osiepe Nyasaye nobed gi hera e kindgi giwegi. Ok wanyal nego joma wahero. (Johana 13:35) Bende ok onego waneg jo maricho. Ka ne jowasik Yesu nobiro make, ne ok oweyo jopuonjrene mondo okedne.​—Mathayo 26:51, 52.

Din mar miriambo puonjo ni jo maricho nochandre e mach ma ok tho. Muma to puonjo ni richo kelo tho. (Jo Rumi 6:23) Jehova en Nyasaye mar hera. Bende Nyasach hera nyalo sando ji nyakachieng’? Ok kamano! Ei Paradis, din achiel kende ma Jehova oyie go ema nobedie. (Fweny 15:4) Ibiro kethi dinde duto maluo miriambo mag Satan.