Ne Jaland Wach Pinyruoth Wadwa:

TEM ane paro ni in Ja-Bethel ma ni Brooklyn e higa mar 1914. En chieng’ Tich Abich moro gokinyi, tarik 2 dwe mar Oktoba. Ibet e kombi mapile kama umethoega gokinyi. Urito mondo Owadwa C. T. Russel odonji. Piyo-piyo, dhoot yawore, kendo Owadwa Russel donjo. Mana kaka ojatimoga, omoso Jo-Bethel duto gi mor ka pok obet niya: “Oyaworeuru uduto.” Kae to, kar bet e kombe, opamo lwete kendo olando wach moro ma miyo ji duto bedo gi ilo. Olando kama: “Ndalo mag Ogendni oserumo, ruodhigi osemi thuolo moromo.” Lendono miyo chunyi pong’ gi ilo nikech mano en gima isebedo kirito aming’a! Uduto upamo ka umor gi mor ma tamre gi nono.

 Higni mang’eny osekalo nyaka ne Owadwa Russell land wach maberno. Ang’o ma Pinyruoth osebedo ka timo chakre kindeno? Osetimo gik madongo miwuoro! Kokalo kuom Pinyruodhno, Jehova osebedo ka konyo joge mondo gimed bedo maler, kendo osebedo ka otiegogi. Kwan mar joge ne tin e higa mar 1914, to sani gin milion aboro kama. Tiegruok ma Pinyruodhno chiwo osekonyi e yore mage?

E ndalowagi, owete ohero wacho ni riwruok mar oganda Jehova tinde dhi ng’wech ahinya, to mano adier. Kata kamano, riwruok mar oganda Jehova osebedo ka dhi ng’wech kuom kinde malach, to ahinya-ahinya chakre higa mar 1914, mana kaka bugni biro lero. Mondo jolendo mag Pinyruoth olend e piny mangima, gisetiyo gi yore mopogore opogore kaka gasede mag piny, wuotho ka gin e grup ka gilendo, sinembe, kad mag chiwo neno (testimony cards), thumbe san (phonograghs), redio, kod Intanet.

Jehova oseguedho tijwa ahinya. Sani wagoyo bugewa ma lero Muma e dhok mokalo 670, kendo ok wausgi. Owete gi nyimine mang’eny ochiwore e tij gero Ute Romo, Ute Chokruok mag Alwora, kod ofisewa. Gitimo mano e pinje momewo kod pinje ma yutogi tin. Sama masira moro otimore, owete gi nyimine chiwoga kony mapiyo ne joma masirano oyudo ka ginyisogo maler ni gihero owete kendo giikore konyo e kinde mag chandruok.—Nge. 17:17.

Nitie kinde ma jotend dinde kod jo akwede moko oseriwore gi “ruodhi maricho” mondo giti marach gi chike mag sirkal e thagowa kata kelonwa chandruok. Kata kamano, en gima jiwowa ahinya ka waneno kaka kinde ka kinde, gik maricho ma gitimonwago konyo mana e ‘miyo wach maber omed landore.’—Zab. 94:20; Fil. 1:12.

Wamor ahinya tiyo kanyachiel kodu ka waduto wan “jood” Ruodhwa. (Mat. 24:45) Beduru gadier ni waherou sidang’. Wan gi geno ni weche ma ni e bugni biro konyou medo hero sigandwa kaka jotich Jehova.

Wan oweteni,

Bura Matayo Joneno mag Jehova