1. Ang’o ma Ezekiel ne oneno e fweny ma mako dhowa?

 PAR ane ni ineno gik ma janabi Ezekiel noneno e higni moko mang’eny mosekalo. Ichomo hekalu moro maduong’ ma rieny ahinya. Malaika moro ma ratego ni kanyo kendo oikore wuotho kodi e hekaluno mondo ine kaka iye chalo. Igoyo ondamo abiriyo kiidho nyaka e achiel kuom rangeye adek midonjogo e hekaluno. Yo molosgo rangeyego omako dhogi. Borgi ka dhi malo en mita 30 kama. Kigoyo wang’i iye, ineno kuonde moyang ne jorit. E kuonde moyang ne joritgo, nitie sirni mabeyo beyo mochong wigi ka yiend othith.—Eze. 40:1-4, 10, 14, 16, 22; 41:20.

2. (a) Hekalu ma ne Ezekiel oneno e fweny ochung’ ne ang’o? (Ne bende weche momedore.) (b) Yo molosgo rangeye midonjogo e hekalu puonjowa ang’o?

² Mano e kaka hekalu ma ne Ezekiel oneno e fweny ne chalo. Ezekiel ne olero gimoro amora e wi fwenyno kendo wechenego opong’o sula mar 40 nyaka 48 e buk ma ne ondiko. Hekaluno ochung’ ne chenro ma Jehova oketo mar lamo madier. Gimoro amora monyiswa kanyo nigi gima ochung’ne e lamo madier e kinde mag gikogi. a Bedo ni dho udigo ne boyo ahinya ka dhi malo nyiso ang’o? Giparonwa ni joma donjo e lamo maler nyaka dag ka luwore gi puonj mag Jehova ma ni e rang’iny ma malo ahinya. Othidhe mochong e sirni bende jiwo mana wach achiel achielno nikech kinde mang’eny Muma tiyoga gi othith sama owuoyo kuom bedo gi timbe maler. (Zab. 92:12) To nade kuonde moyang ne jorit? Gin ginyiso ni joma odagi luwo chike kod puonj mag lamo maler ok yienegi donjo e lamo madier ma kelo ngima.—Eze. 44:9.

3. Ang’o momiyo ne dwarore ni opiedh jolup Kristo kinde ka kinde?

³ Ere kaka fweny ma ne Ezekiel oneno osebedo ka chopo kare? Mana kaka ne waseneno e Sula mar 2 e bugni, Jehova ne otiyo gi Yesu mondo opiedh joge chakre higa mar 1914 nyaka e chak higa mar 1919. Be dibed ni tij piedho ji norumo gi kanyo? Ooyo! Kuom higni mang’eny mosekalo, Kristo osebedo ka dhi nyime siro chike ma tayo timbe maler ma Jehova oketo. Omiyo, ne dwarore ni omed piedho jolupne mondo gibed gi timbe mabeyo. Ang’o momiyo? En nikech Yesu osebedo ka  temo ahinya mondo ochok jolupne mondo oa e piny Satan mopong’ gi timbe marichoni. Kata kamano, Satan bende osebedo ka ywayogi mondo gidog e timbegi maricho machon. (Som 2 Petro 2:20-22.) We wanon ane yore moko adek ma osebed ka ipiedhogo Jokristo madier mondo gibed gi timbe maler. Mokwongo, wabiro nono kaka osekonywa bedo gi timbe maler. Kae to wabiro neno yo mosekonywago ng’eyo kaka wanyalo keto kanyakla obed maler. To mogik, wabiro neno kaka osekonywa mondo ngimawa mar joot obed mamor.

4, 5. Satan osebedo ka tiyo gi yo mane mondo orwak ji e richo, to ere kaka yoreno osetiyone maber?

⁴ Jo Jehova osebedo ka dwaro ng’eyo ahinya kaka ginyalo bedo gi timbe maler. Omiyo, gisetemo matek ahinya mondo giti gi weche mosechikgi e wi timbe maler. We wane ane ranyisi moko.

⁵ Terruok. Jehova nochano ni weche mag nindruok e kind dichwo gi chiege obed maler kendo okelnegi mor. Kata kamano, Satan osetiyo gi mich maberno mondo orwak jotich Nyasaye e richo ma nyalo miyo Nyasaye ok yie kodgi. Mano e gima ne otimo e ndalo Balam, kendo pod odhi nyime timo gima kamano e ndalo mag gikogi.—Kwan 25:1-3, 9; Fwe. 2:14.

6. En singruok mane ma ne ogo e gaset mar Watch Tower, to ne itiyo kode nade, kendo ang’o momiyo ne owe ti kode bang’e? (Ne bende weche momedore.)

⁶ Watch Tower ma Jun 15, 1908 ne ogoyo weche moko ma ji ne tiyogo e timo singruok mondo kik gidonj e timbe mag terruok. Wechego ne wacho kama: “Kinde duto kendo kuonde te, gimoro amora ma abiro timo ne [ng’ama ok jaoda] e lela biro chalore gi ma atimone kama ji ok newae.” b Kata obedo ni ne ok ochun ji gi timo singruogno, ji mang’eny notime ma gitero nyingegi mondo ogo e gaset mar Zion’s Watch Tower. Higni moko bang’e, ne ofweny ni kata obedo ni singruogno ne konyo ji mang’eny e kindeno, ne ochak kawe kaka gima pile ma ng’ato timo to ae, to mano ne omiyo owe ti kode. Kata kamano, singruogno pod nokonyo ahinya e siro timbe makare.

7. E higa mar 1935, The Watchtower ne owuoyo e wi chandruok mane ma ne ochako bedoe, kendo en wach mane ma gasedno nowacho ayanga ma ok opando?

⁷ Monj mag Satan ne omedore ameda. E dwe mar Mach 1, 1935, gaset mar The Watchtower ne owacho ayanga chandruok moro ma koro ne chako bedoe e kind jo Nyasaye. Jomoko ne paro ni tek ateka ni gitimo tij lendo gi kinda, ne ok ochuno ni giluw chike makare mag Jehova e ngimagi. Gaset mar The Watchtower nowacho kama ayanga: “Ng’ato kik par ni dhi e tij lendo kende e gima Nyasaye dwaro kuom ng’ato. Joneno mag Jehova tiyo e lo Jehova kod Pinyruodhe, omiyo, gin gi ting’ mar timo kamano e yo mowinjore.” Sulano ne ochiwo siem ma achiel kachiel e wi ngima mar joot kod timbe mag terruok, to mano ne okonyo jo Nyasaye ‘ringo terruok.’—1 Kor. 6:18.

8. Ang’o momiyo The Watchtower osebedo ka nwoyo kinde ka kinde tiend wach motigo e dho Grik ni por·neiʹa ma ilokoga ni terruok?

⁸ E higni machiegnigi, gaset mar The Watchtower osebedo  ka nwoyo kinde ka kinde tiend wach motigo e dho Grik ni por·neiʹa ma ilokoga ni terruok. Wachno ok en mana nindruok e kind dhako gi dichwo ma ok okendore kende. Oting’o weche mang’eny; oriwo timbe duto modwanyore ma jochode timo. Omiyo, oserit jolup Kristo mondo kik gidonj e timbe mag terruok ma onya e pinyni.—Som Jo-Efeso 4:17-19.

9, 10. (a) The Watchtower ma 1935 nowuoyo e wi wach mane motudore gi bedo gi timbe maler? (b) En paro mane mowinjore ma Muma chiwo e wi madho kong’o?

⁹ Mer. The Watchtower ma Mach 1, 1935 ne owuoyo e wi wach moro motudore gi bedo gi timbe maler. Nowacho niya: “Osefwenyore ni nitie jomoko ma dhi e tij lendo, kata timo weche moko motudore gi lamo ka gisemadho [kong’o]. Gin kinde mage ma Ndiko wacho ni ok rach ka Jakristo omadho kong’o? Be nyalo bedo gima ber adier ka ng’ato omadho kong’o e okang’ ma koro timo tije Nyasaye bedone matek?”

¹⁰ Dwoko ma ne ochiw ne wuoyo e wi puonj ma ni e Wach Nyasaye ma wuoyo e wi paro ma ng’ato onego obedgo sama otiyo gi kong’o. Muma ok kwed madho divai kata kong’o matin, to okwedo matek wach mer. (Zab. 104:14, 15; 1 Kor. 6:9, 10) Kodok korka timo tije Nyasaye sama ng’ato osemadho kong’o, oseparnega jotich Nyasaye kaka Nyasaye nonego yawuot Harun nikech ne gichiwo mach ma wendo e kendo mar misango. Kinde machuok bang’ tho yawuot Harun, chik ma ne omi jodolo ma ne wacho ni kik gimadh kong’o sama gitimo tije hekalu konyowa ng’eyo gima ne nyalo miyo chwogo otim gima ok owinjoreno. (Lawi 10:1, 2, 8-11) Jolup Kristo me kindewagi tiyo gi puonjno kuom temo matek ahinya mondo giwere gi madho kong’o sama gitimo gik motudore gi lamo.

11. En ber mane ma jotich Nyasaye oseyudo nikech giseng’eyo gik mang’eny e wi madho kong’o?

¹¹ E higni machiegnigi, jolup Kristo oseng’eyo gik mang’eny e wi wach mer, moriwo madho kong’o e okang’ ma ok inyal weye. Gima ber en ni chiemb chuny mosebed kimiyowa e kinde mowinjore osekonyo ji mang’eny mondo giwere gi timno. Osekony ji mang’eny mondo gibed gi paro mowinjore e wi kong’o. Onge ng’ato ang’ata ma onego oyie mondo wach mer omi ji ochaye, ocha joode, kendo omaye thuolo mar timo gik motudore gi lamo madier.

12. Jolup Kristo ne neno nade wach madho ndawa kata ka ndalo mag giko ne pok ochakore?

¹² Madho ndawa. Jolup Kristo ne ochako kwero madho ndawa kata ka ndalo mag giko ne pok ochakore. Higni moko mosekalo, owadwa moro moseti miluongo ni Charles Capen nowuoyo kuom chieng’ ma ne okwongo romo gi Owadwa Charles Taze Russell. Gie kindeno, Capen ne jahigni 13 kendo en kaachiel gi owetene adek ne gin e stairs mar Bible House ma ne nitie Allegheny, Pennsylvania. Ka ne Russell okadho butgi, ne openjogi niya: “Numadho ndawa koso? Awinjo tik moro ma chal gi mar ndawa kae.” Ne ginyise ni gin ok gimadhga ndawa. Onge kiawa ni ne gia kanyo ka ging’eyo paro  ma Russell ne nigo e wi madho ndawa. Owadwa Russell ne owuoyo e wi ndiko mar 2 Jo-Korintho 7:1 e gaset mar Watch Tower ma Agost 1, 1895. Nowacho kama: “Ok ane kaka madho ndawa nyalo miyo Nyasaye duong’ kata nyalo miyo Jakristo ohala moro . . . Ruodhwa ok nyal fuong’o ndawa kata keto gimoro amora mochido e dhoge.”

13. Ere kaka ne omed piedh Jokristo e higa mar 1973?

¹³ The Watchtower ma 1935 ne oluongo ndawa ni “buya mochido” kendo ne owacho ni ng’ato ang’ata ma madho ndawa kata nyame ok nyal yiene mondo obed Ja-Bethel, japainia, kata jarit-alwora. E higa mar 1973 nomed piedh jo Nyasaye mondo gibed gi timbe maler moloyo. The Watchtower ma Jun 1 ne olero ni onge Janeno mar Jehova moro mora ma nyalo dong’ e kanyakla ka koni to omadho ndawa, ma en tim ma kelo tho, tim molil, kendo tim ma ok nyis hera. Joma ne otamore weyo madho ndawa ne igolo e kanyakla. c Kristo ne osekawo okang’ maduong’ mar piedho joge.

14. En paro mane ma Nyasaye nigo e wi remo, to ere kaka tim mar medo ne ji remo ne ochako nya ahinya?

¹⁴ Remo. E kinde Noa, Nyasaye ne owacho maler ni ok onego cham remo. Ne omedo jiwo wachno e Chike ma ne omiyo oganda mar Israel, kendo ne ochiko kanyakla mar Jokristo ni “giwere gi . . . remo.” (Tich 15:20, 29; Chak. 9:4; Lawi 7:26) Ok en gima kawowa gi wuoro ni Satan nofwenyo yo manyien ma onyalo tiyogo mondo omi ji oketh chik ma Nyasaye ne oketono. E higni mag 1800, lakteche nochako temo ka be nyalore mondo omed ne ng’ato remo. Kata kamano, bang’ ka ne gisefwenyo ni nitie grube mopogore opogore mag remo kendo ni medo ne ng’ato remo en gima nyalore, timno ne ochako nya ahinya. E higa mar 1937, ne ochak gol remb ji mondo okan-gi kae to obi oti kodgi e kinde mabiro. Lweny mar Ariyo mar Piny Ngima ne omiyo timno omedo nya moloyo. Bang’ mano, medo remo nochako bedo gima pile e piny ngima.

15, 16. (a) En paro mane ma Joneno mag Jehova nigo e wi medo remo? (b) En kony mane ma jolup Kristo osebedo ka yudo e weche mag thieth ma ok tiye gi remo, to mano osekelo nyak mage?

¹⁵ The Watchtower nowacho chon e higa mar 1944 ni medo remo en yo machielo mar chamo remo. E higa ma ne oluwo, ne ochak ojiw wachno kimedo lere e yo maber moloyo kitiyo gi Muma. Ka higa mar 1951 ne ochopo, ne ogo penjo moko kod dwokogi mondo okony jotich Nyasaye wuoyo gi lakteche e wi wachno. Jolup Kristo e piny ngima osechung’ motegno kata obedo ni ijarogi, ikwedogi, kata isandogi achiel kachiel. Kata kamano, Kristo ne odhi nyime konyo jolupne kochiwo kony mowinjore. Nitie sula mang’eny kaachiel gi brosua ma ne ogo mondo okony e lero wach remo e yo mong’ith.

¹⁶ E higa mar 1979, jodong-kanyakla moko ne ochako dhi e osiptende mondo ginyis lakteche paro ma wan-go e wi remo, ndiko ma lero gimomiyo wamakore gi parono, kendo nyisogi yore mamoko ma nitie ma ginyalo tiyogo mopogore gi tiyo gi  remo. E higa mar 1980, jodongo moko ma wuok e taonde 39 ma ni Amerka ne oyudo tiegruok e wi kaka ne ginyalo tiyo tich mar wuoyo gi lakteche. Bang’ kinde, Bura Matayo ne oyie mondo olos Komiti Matudore gi Osiptende kuonde mopogore opogore e piny ngima. Be kinda mosetimgi osebedo gi nyak? Ee. Tinde lakteche mang’eny osebedo ka thiedho Joneno mag Jehova kendo gimiyo luor yiero margi ma gitimo mar koso tiyo gi remo e thieth. Osiptende mang’eny sani oyie weyo tiyo gi remo e thieth ka ng’ato dwaro kamano, kendo gineno ni mano e yor thieth ma ni e rang’iny ma malo ahinya. Donge wabedo mamor ka waneno yore ma Yesu osebedo ka tiyogo e rito jolupne mondo Satan kik mien-gi gi chilo?—Som Jo-Efeso 5:25-27.

17. Wanyalo nyiso nade ni wakawo mapek yo ma Kristo piedhogo jolupne?

¹⁷ Penjo ma koro onego wapenjre en ma: ‘Be wakawo mapek yo ma Kristo osebedo ka piedhogo jolupne kotiegogi mondo gimakre gi puonj mag Jehova ma ni e rang’iny ma malo?’ Nyaka wang’e ni Satan dwaro ahinya pogowa gi Jehova kod Yesu kuom wuondowa mondo wacha chike ma giketo e wi timbe makare. Riwruok mar oganda Jehova osebedo ka miyowa  siem kod puonj mabeyo kinde ka kinde mondo watang’ gi timbe ma ok kare ma nitie e piny sani. Omiyo, weuru mondo waduto wasik ka watang’ ka watiyo gi siem mabeyo ma imiyowago.—Nge. 19:20.

18. Fweny ma ne Ezekiel oneno paronwa ang’o e wi joma obalo ne chike makare ma Nyasaye oketo?

¹⁸ Yo mar ariyo ma Nyasaye piedhogo joge mondo gibed gi timbe maler oriwo nyaka okenge mikawoga mondo orit ler mar kanyakla. Gima lit en ni moko kuom joma chiworega ne Nyasaye kendo ma wachoga ni gibiro luwo chikene ok timga kamano. Jomoko osebalo mi gitamore luwo chike makare moket. Joma kamago itimo nade? Wanyalo yudo dwoko ka wanono achiel kuom gik ma ne Ezekiel oneno e fweny ma ne wasewuoye e chak sulani. Be iparo rangeyeka? E moro ka moro kuom rangeyego, ne nitie kuonde moyang ne jorit. Joritgo ne rito hekalu mondo joma “chunygi . . . ok oter nyangu” kik donji. (Eze. 44:9) Mano paronwa ni joma Jehova omiyo thuolo mar tiyone gin mana joma temo matek luwo chike makare moketo. E yo ma chalo kamano, thuolo mar lalruok gi Jokristo wetewa ok en thuolo ma omi ji duto e kindewagi.

19, 20. (a) Ere kaka Kristo osebedo ka konyo jolupne mondo omed bero yo ma giyalogo buche mag joma otimo richo madongo? (b) Gik moko adek ma nyalo miyo ogol jaricho e kanyakla gin mage?

¹⁹ E higa mar 1892, gaset mar Watch Tower nowacho ni “nyaka wagol oko Jokristo ma kwedo misango ma Yesu nochiwo, bed ni gitimo kamano ayanga kata e yore mamoko.” (Som 2 Johana 10.) E higa mar 1904, buk miluongo ni The New Creation nolero ni joma siko ka timo gik maricho kelo chandruok nikech ginyalo nyoso chuny joma ni e kanyakla. E kindeno, kanyakla mangima ne betie sama niyalo ng’at motimo richo maduong’. Kesgo niluongo ni “church trials,” ma tiende ni “yalo ng’ato e nyim kanisa.” Kata kamano, kes ma kamago ne ok thor timorega. E higa mar 1944, The Watchtower nowacho ni owete ma tayo kende e ma koro ne onego owinj kes ma kamago. E higa mar 1952, gaset mar The Watchtower ne ogoyo sula moro ma ne nyiso okenge ma onego okaw sama iyalo ng’at motimo richo, kendo ne onyiso ni gima duong’ ma miyo igolo joma otamore lokore oko e kanyakla en ni mondo kanyakla odong’ ka ler.

²⁰ E higni mang’eny ma noluwo, Kristo ne omedo konyo jolupne mondo gimed bero yo ma giyalogo buche mag joma otimo richo madongo. Osetieg jodong-kanyakla mondo ging’e kaka ginyalo yalo buche mokel e nyimgi e yo ma Jehova dwaro, kendo osekonygi ng’eyo kaka ginyalo ng’ado bura kare kendo nyiso ng’wono. E kindewagi, gik moko adek ma nyalo miyo ogol oko jaricho motamore lokore gin: (1) mondo nying Jehova kik kethre, (2) mondo orit ler mar kanyakla (3) mondo okony jaricho loko chunye ka nyalore.

21. Chenro mar golo oko joma otamore lokore e kanyakla osekelo ber mage?

 ²¹ Be ineno kaka chenro mar golo oko joma otamore lokore e kanyakla osekonyo kama duong’ e kindewagi? E piny Israel, joma richo ne ketho joma beyo e ogandano, to mano ne miyo seche moko joma richo bedo mang’eny moloyo joma ohero Jehova kendo ma dwaro timo dwache. Omiyo, kinde ka kinde ogandano ne ketho nying Jehova ma gilal winjruok maber ma ne gin-go kode. (Yer. 7:23-28) Kata kamano, e kindewagi nitie chwo gi mon mang’eny ma dhi nyime tiyo ne Jehova nikech gihere. Nikech joma otamore lokore igolo oko e kanyakla, Satan ok nyal dhi nyime tiyo kodgi mondo gimed ketho ler mar kanyakla. Kuom mano, igeng’o rach ma joma kamago nyalo kelo ne kanyakla. Mano miyo wabedo gadier ni Jehova oyie kodwa kaka oganda. Par kinde duto ni Jehova nosingo ni, ‘onge gir lweny mothedh ma kedo kodwa ma dinyal timo gimoro.’ (Isa. 54:17) Be wariwoga jodongwa lwedo e ting’ mapek ma gin-go mar yalo joma otimo richo?

22, 23. Ang’o momiyo wamor gi Jokristo ma ne odak e higni mag 1900, to ang’o momiyo nonego gimed bedo gi paro mowinjore e wi ngima joot?

²² Yo mar adek ma osebed ka ipiedhogo jolup Kristo en kodok korka wach kend kod ngima mar joot. Be osepiedh yo ma wanenogo ngima joot? Ee. Kuom ranyisi, sama wasomo sigand jotich Nyasaye ma ne odak e higni mag 1900 e bugewa, wabedoga mamor kendo wawuoroga ahinya chuny mar chiwruok ma ne ginyiso. Wamorga nikech ne giketo tiyo ne Nyasaye obedo mokwongo moloyo gimoro amora e ngimagi. Kata obedo ni kindagi morowa, pod ne dwarore ni gimed bedo gi paro mowinjore e wi kaka ne onego otim gik moko. E yo mane?

²³ Owete ne nyaloga dhi mabor gi dala kuom dweche moko mondo gitim migepe momigi mag lendo kata e tij lworo. Seche moko ne ithiro wach donjo e kend, ka koni to gik ma ne nyalo tego ngima mar joot ne ok wuoye ahinya. Be gima kamano timore e kindewagi? Ooyo!

24. Ere kaka Kristo osebedo ka konyo jolupne mondo gibed gi paro mowinjore e wi kend kod ngima joot?

²⁴ E kindewagi, ng’ato ok onego okasre gi timo migepe momiye e tij Jehova ka koni to ojwang’o ting’ ma en-go e ot. (Som 1 Timotheo 5:8.) Kristo osebedo ka miyo jolupne puonj kod siem moa e Ndiko ma nyalo konyogi bedo gi paro mowinjore e wi kend kod ngima joot. (Efe. 3:14, 15) E higa mar 1978, ne ogo buk miluongo ni Kufanya Maisha ya Jamaa Yako Yawe Yenye Furaha. Bang’ higni 18 kama, ne ogo buk miluongo ni, Be Ing’eyo Gima Kelo Mor mar Joot? E wi mano, The Watchtower osebedo gi sula mang’eny molos mondo okony joma okendore ong’e kaka ginyalo tiyo gi puonj mag Muma e ngimagi.

25-27. Ere kaka osebed ka ikonyo joma tindo ma hikgi opogore opogore?

²⁵ To nade joma tindo? Osebed ka idewogi ahinya. Riwruok mar oganda Jehova osebedo ka chiwo puonj mabeyo ne joma tindo. Kata obedo ni puonjgo nochak chiw matin-matin, sani  gidhuro ndi! Kuom ranyisi, kochakore gi higa mar 1919 nyaka 1921, gaset mar The Golden Age ne nigi sula ma wiye ne wacho ni, “Juvenile Bible Study” (“Puonjo Nyithindo Matindo Muma”). Bang’ mano, e higa mar 1920 ne ogo brosua mar The Golden Age ABC, kendo e higa mar 1941 ne ogo buk miluongo ni Children (Nyithindo). E higni mag 1970, ne ogo buge miluongo ni Listening to the Great Teacher, Your Youth—Getting the Best out of It, kod Buga Moting’o Sigendini mag Muma. E higa mar 1982, gaset mar Awake! nochako bedo gi sula ma wiye wacho ni “Young People Ask,” kendo e higa mar 1989, ne oti gi sulago e loso buk miluongo ni Maswali Ambayo Vijana Huuliza—Majibu Yafanyayo Kazi.

²⁶ Sani wan-gi buge ariyo mag Vijana Huuliza, kendo nitie sula moko mimedo kinde ka kinde e websaitwa mar jw.org. Bende, wan gi buk miluongo ni Jifunze Kutoka kwa Mwalimu Mkuu. Websaitwa nigi gige tiegruok mang’eny molos ne nyithindo matindo gi nyithindo ma bet dito, kaka kad mag joma  iwuoyo kuomgi e Muma, pichni migoro kod mibuko, vidio, sigendni mag Muma moket e yor pichni, kod sula mag “Gik ma Apuonjora e Muma” milosoga ne nyithindo ma johigni adek ka dok chien. Ka ne Yesu ni e piny, noluongo nyithindo mondo obi ire mokwakogi. Nenore maler ni paro ma ne en-gono pok olokore. (Mar. 10:13-16) Odwaro ni joma tindo owinj ni ohergi kendo ni chiemb chuny mimiyogi konyogi.

²⁷ Yesu dwaro ni orit nyithindo mondo kik gimoro amora marach hinygi. Kaka timbe mag pinyni dhi nyime bedo motop, e kaka imedo tim ne nyithindo gik maricho moloyo. Omiyo, nitie buge moselos mondo okony jonyuol rito nyithindgi mondo kik timnegi timbe ma kamago. d

28. (a) Ka luwore gi fweny ma ne Ezekiel oneno, en ang’o ma nyaka watim mondo wadonj e hekalu mar Jehova? (b) Ing’ado e chunyi ni ibiro timo ang’o?

²⁸ Donge wamor ahinya neno kaka Kristo osebedo ka piedho joge kendo tiegogi mondo gidag ka luwore gi chike makare mag Jehova kendo yudo ber kuom luwogi? Par ane kendo kuom hekalu ma ne Ezekiel oneno e fweny. Be iparo rangeyeka? En adier ni hekaluno ne ok en hekalu masie, to ne en mana mar ranyisi. Kata kamano, be wanene kaka gima nitie adier? Ok wadonj adonja e hekaluno kuom dhi e Od Romo, somo Muma, kod dhi e tij lendo. Mago gin mana gik mineno gi wang’. Ng’at ma wuondore nyalo timo gigo duto ma ok odonjo e hekalu mar Jehova. Kata kamano, ka watimo gigo duto kendo wadhi nyime makore gi chike makare mag Jehova ka watiyone gi chuny maler, mano nyiso ni wasedonjo e hekalu kendo watiyone e kama ler mogik ma en chenro ma Jehova Nyasaye oketo mar lamo madier! Weuru wamak matek thuolo makende ma wan-gono. Bende, weuru wadhi nyime timo matek mondo wabed maler kaka Nyasaye kuom mako chike makare moketo!