Nyasaye gwelo ji duto mondo osud ire kokalo kuom lamo. (Zaburi 65:2) Kata kamano, ok owinj kata rwako lamo duto. Kuom ranyisi, onyalo tamore winjo lamo mar dichwo ma sando chiege. (1 Petro 3:7) E kinde ma Jo-Israel nosiko ka timo richo, Nyasaye notamore winjo lamo maggi. Kata kamano, Nyasaye oyie gi lamo mag joricho moloko chunygi. Kuom adier, wuoyo gi Nyasaye e lamo en thuolo makende monego wagen ahinya.​—Som Isaya 1:15; 55:7.

Ne vidioni: Be Nyasaye Winjo Lemo Duto?

Wuoyo gi Nyasaye e lamo en yo achiel ma watiyonego. Omiyo, lamo duto onego odhi ne Jachuechwa, Jehova. (Mathayo 4:10; 6:9) Bende, nikech onyuolwa e richo, onego walem kokalo kuom Yesu nimar ne otho ne richowa. (Johana 14:6) Jehova ok dwar ni wanwo lamo ma wamako e wiya kata lamo mosendik chuth. Odwaro ni walem kowuok e chunywa.​—Som Mathayo 6:7; Jo-Filipi 4:6, 7.

Jachuechwa nyalo winjo kata ka walemo gi chunywa. (1 Samuel 1:12, 13) Ojiwowa mondo walem sa asaya, kaka gokinyi kata godhiambo, ka pok wachiemo, kod seche ma wan-gi chandruok.​—Som Zaburi 55:22; Mathayo 15:36.

Sudo machiegni gi Nyasaye ok yot nikech wadak e kind joma ok oyie kuom Nyasaye kendo ma jaro singone mar kelo kuwe e piny. (2 Timotheo 3:1, 4; 2 Petro 3:3, 13) Omiyo, dwarore ni wajiwre gi Jokristo wetewa.​—Som Jo-Hibrania 10:24, 25.

 Riwruok gi joma ohero Nyasaye konyowa sudo machiegni kode. Sama wadhi e chokruoge mag Joneno mag Jehova, wajiwore kendo watego yiewa.​—Som Jo-Rumi 1:11, 12.

Inyalo sudo machiegni gi Jehova kuom paro matut e wi gik misepuonjori e Wachne. Par ahinya kuom gik mosetimo, puonjge, kod singoge. Paro matut kod lamo miyo waneno hera kod rieko mar Nyasaye e yo maber moloyo.​—Som Joshua 1:8; Zaburi 1:1-3.

Inyalo sudo machiegni gi Nyasaye mana ka igene kendo iyie kuome. Kata kamano, nyaka warit yiewa. Wanyalo timo kamano ka waparo matut kuom gik ma wayiego.​—Som Mathayo 4:4; Jo-Hibrania 11:1, 6.

Jehova dewo joma ohere. Onyalo geng’onegi gimoro amora ma nyalo ketho yiegi kod geno margi mar ngima mochwere. (Zaburi 91:1, 2, 7-10) Okonyowa mondo watang’ gi gik ma nyalo ketho ngimawa kendo mayowa mor. Jehova puonjowa dak e ngima maber moloyo.​—Som Zaburi 73:27, 28; Jakobo 4:4, 8.