E odhiamboni, Yesu oa lwoko tiende jootene kopuonjogigo wach bedo gi kido mar bolruok. Koro, onwoyo weche ma Daudi nokoro kendo nenore ni otimo kamano bang’ chamo Pasaka. Onwoyo wechego kama: “Osiepna ma lalore koda awuon, ma nageno, ma nochamo chiemba, oseting’o ofunj tiende kuoma.” Kae to olero niya: “Ng’at achiel kuomu biro ndhoga.”​—Zaburi 41:9; Johana 13:18, 21.

Jootego ng’iyore giwegi kendo giduto gipenjore niya: “Ruoth, dobed an, koso?” To kata Judas Iskariot bende penjo kamano. Nikech Johana obet but Yesu, Petro kwaye mondo openj Yesu ni ja andhogano en ng’a. Omiyo, Johana yiengore e kor Yesu kendo openje kama: “Ruoth, en ng’a?”​—Mathayo 26:22; Johana 13:25.

Yesu dwoko niya: “En ng’atno ma abiro miyo bath makate ma aseluto e bakul.” Bang’ luto bath makate e bakul manie mesa, Yesu kawo makateno kae to omiyo Judas kowacho kama: “Wuod dhano dhi tho mana kaka nondik kuome, to yaye nobed malit ne ng’atno ma Wuod dhano indhogo kokalo kuome! Dine obedo maber moloyo ka dine ok onyuol ng’atno.” (Johana 13:26; Mathayo 26:24) Kae to Satan donjo kuom Judas. Nikech Judas en ja mibadhi, koro ochiwore mondo otim dwach Jachien kendo mano miyo obedo “wuod kethruok.”​—Johana 6:64, 70; 12:4; 17:12.

Yesu wacho ne Judas niya: “Gima itimo, time mapiyo moloyo.” Nikech Judas e ma ting’oga sandug pesa, joote mamokogo paro ni Yesu wachone ni: “‘Ng’iew gik ma dwarore ni watigo e sawo,’ kata ni onego omi joma odhier gimoro.” (Johana 13:27-30) Kare gima ok ging’eyo en ni Judas wuok mondo odhi ondhog Yesu.

E odhiambo nogono ka Pasaka dhi nyime, Yesu chako nyasi moro manyien mopogore kabisa.  Okawo makate, olemo kogoyo erokamano, ong’ingo makateno kae to omiyo jootene mondo ocham. Owachonegi kama: “Mani ochung’ ne ringra ma idhi chiw nikech un. Sikuru ka utimo ma mondo uparago.” (Luka 22:19) Ng’ato ka ng’ato kuom jootego kawo bath makate moseng’ingno kendo gichame.

Yesu kawo okombe bende moting’o divai, olemo kogoyo erokamano, kendo omiyo jootene. Giduto gimetho gi okombe achielno kendo Yesu wachonegi niya: “Okombeni ochung’ ne singruok manyien kokalo kuom remba, ma biro chuer nikech un.”​—Luka 22:20.

Omiyo, nyasi ma Yesu ochakono nyiso ni odwaro ni jolupne oparga thone higa ka higa chieng’ Nisan 14. Timo kamano biro paro ne jolupne duto gima Yesu kod Wuon mare osetimo mondo gires oganda dhano ma nyiso yie kuom kuong’ mar richo kod tho. Nyasi mar paro tho Yesu nyiso kaka oganda dhano ma nyiso yie biro yudo resruok madier chuth. To mano oloyo gima sap Pasaka ne chopo ne Jo-Yahudi.

Yesu nyiso ni rembe “biro chuer mondo owe ne ji mang’eny richogi.” Jootene mohere kaachiel gi jomamoko ma chalo kodgi gin moko kuom ji mang’eny mibiro wenegi richogi. Gin e joma biro bedo kode e Pinyruodh Wuon mare.​—Mathayo 26:28, 29.