Mapiyo bang’ ka nosebatis Yesu, Jachien ne dwaro ni oketh winjruokne gi Nyasaye kata ka pok nochako tije mar yalo e piny. Ee, Jachien nokelo ne Yesu tembe nyadinwoya. Bang’e, Yesu nowuoyo e wi ja akwedeno kama: “Jaloch mar pinyni biro, to oonge gi teko kuoma.”​—Johana 14:30.

Jaote Johana noneno e fweny gima ne dhi timore ne ‘thuol mang’ongo ma en thuol machon, miluongo ni Jachien kendo Satan.’ Jawasik dhano magerno ne idhi wit oko mar polo “ka en gi mirima mager, kong’eyo ni odong’ mana gi kinde manok.” (Fweny 12:9, 12) Jokristo ong’eyo maler ni gidak e ndalo miluongo ni ‘kinde manokno,’ kendo ni kinde okayo ma ‘thuol mang’ongo, ma en thuol machon’ ibiro wit e abiso mi lorne kuro mondo kik ochand ji kuom higni 1,000 ma Yesu biro lochogo e Pinyruodh Nyasaye.​—Fweny 20:1, 2.

Kuom kindeno duto, piny mwadakieni biro bedo nade? Jomage ma biro dak e iye, to piny biro chalo nade e kindeno? Yesu owuon nonyisowa weche ma konyowa ng’eyo dwoko mag penjogo. E ngero ma nogoyo mar rombe gi diek, nonyiso gima biro timore ne joma kare ma gin kaka rombe ma tiyo kanyachiel gi owete Yesu kendo timonegi maber. Bende, nonyiso maler gima biro timore ne jo akwede ma gin kaka diek. Yesu nowacho kuomgi niya: “Jogi [ma gin kaka diek] biro dhi e kethruok mochwere to joma kare [ma gin kaka rombe] biro donjo e ngima ma nyaka chieng’.”​—Mathayo 25:46.

Mano konyowa winjo tiend weche ma Yesu nonyiso achiel kuom jomecho ma ne ogur e bathe. Yesu ok ne sing ne ng’atno ni en bende ne odhi locho kode e Pinyruodh polo kaka ne osesingo ne jootene ma ne omakore kode motegno. Kar mano, Yesu ne singo ne jaricho ma  ne oseloko chunyeno niya: “Adier awachoni kawuononi, inibed koda e Paradiso.” (Luka 23:43) Kuom mano, ng’atno koro ne nigi geno mar dak e Paradiso, ma tiende ni puodho ma jaber ahinya. Kamano bende, jogo ma ndalogi gin kaka rombe ma “donjo e ngima ma nyaka chieng’” biro dak e Paradisono.

Weche Yesugo tudore maber gi weche ma jaote Johana nowacho konyisogo kaka piny biro chalo e kindeno. Jaoteno nowacho kama: “Hema mar Nyasaye koro nigi dhano, kendo obiro dak kodgi, mi ginibed joge. Mi Nyasaye owuon nobed kodgi. Kendo obiro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”​—Fweny 21:3, 4.

Mondo jamechono obi odag e Paradiso e piny, biro chuno ni nyaka chiere oa kuom joma otho. To jomamoko bende ibiro chier kode. Yesu nonyiso mano maler ka nowacho niya: “Sa biro ma ji duto manie liete nowinj dwonde mi giniwuog oko, joma notimo gik mabeyo e chier mar ngima, to joma notimo gik maricho e chier mar bura.”​—Johana 5:28, 29.

To nade joote ma nochung’ motegno gi Yesu kod kwan manok mar jomamoko ma biro bedo gi Yesu e polo? Muma dwokowa kama: “Ginibed jodolo mag Nyasaye kod mag Kristo, kendo giniloch kaka ruodhi kanyachiel kode kuom higni 1,000.” (Fweny 20:6) Joma biro locho kanyachiel gi Kristogo nobed joma chon nosedak e piny ka gin chwo kod mon. Omiyo, e kinde ma giniloch e wi piny, onge kiawa ni ginikech dhano nikech ging’eyo dwachgi.​—Fweny 5:10.

Misango ma Yesu nochiwo biro miyo okony dhano modak e piny kogolonegi kuong’ mar richo ma ne onyuolgigo. Yesu kaachiel gi joma locho kode biro konyo dhano morito winjruokgi gi Nyasaye nyaka chop kama gibedo joma kare chuth ma onge richo. Ee, kindeno dhano nodag kaka Nyasaye ne dwaro ni gidag kar chakruok kane ochiko Adam gi Hawa ni ginyuolre kendo gipong’ piny. Kata mana tho ma ne obiro nikech richo Adam koro ok bi betie kendo!

Chop kanyo biro yudo ka Yesu osechopo duto ma Jehova ne dwaro ni otim. E giko Lochne mar Higni Aluf Achiel, Yesu biro dwoko Pinyruoth ne Wuon mare kendo keto e lwete oganda dhano ma koro osebedo joma kare ma onge richo. Jaote Paulo nowuoyo kuom okang’ ma nyiso bolruok ma Yesu biro kawono. Paulo nondiko kama: “Bang’ ka gik moko duto oseket e bwo Wuowi, eka Wuowi bende biro bolore e bwo Jalo ma noketo gik moko duto e bwo Kristo, mondo Nyasaye obed gik moko duto ne ji duto.”​—1 Jo-Korintho 15:28.

Onge kiawa ni migawo ma Yesu nigo e chopo dwaro mabeyo mag Nyasaye duong’ ahinya. To kaka dwaro mag Nyasaye biro medo fwenyore kendo chopo kuom kinde duto nyaka chieng’, e kaka biro medo nenore maler ni kuom adier Yesu ‘e yo, kendo e adiera, kendo e ngima’ mana kaka owuon nosewacho.​—Johana 14:6.