Bang’ ka Yesu oseromo gi Maritha kod Maria e alwora mar Bethania, giduto gidhi nyaka e liend Lazaro. Liendno en rogo moum dhoge gi kidi. Yesu chiko niya: “Ng’ieluru kidino oko.” Maritha to chunye chandore nikech ok ong’eyo gima Yesu dwaro timo. Owacho ne Yesu kama: “Ruoth, sani nyaka bed ni koro ong’ue marach, nimar koro ndalo ang’wen osekadho.” Kata kamano, Yesu dwoke niya: “Donge asewachoni ni ka iyie to inine duong’ mar Nyasaye?”​—Johana 11:39, 40.

Kuom mano, ging’ielo kidi oko. Kae to Yesu ting’o wang’e e polo kolemo niya: “Wuora, agoyoni erokamano nikech isewinja. Adier, ang’eyo ni iwinja kinde duto; to awuoyo nikech oganda ma sani ochung’ kolworo kae mondo eka giyie ni ne iora.” Yesu lemo e lela kamano mondo joma ni kanyo ong’e ni gima ochiegni timono odhi  timo gi teko Nyasaye. Kae to Yesu kok gi dwol maduong’ kama: “Lazaro, wuog oko!” To mano e ma timore. Lazaro wuok oko ka onal tiendene kod lwetene gi lep yik, kendo ka wang’e obo gi nanga. Yesu wacho niya: “Gonyeuru kendo uweye odhi.” ​—Johana 11:41-44.

Thoth Jo-Yahudi mobiro hoyo Maria kod Maritha neno honono kendo giketo yie kuom Yesu. Kata kamano, jomamoko to dhi ir Jo-Farisai mondo ginyisgi gima Yesu osetimono. Jo-Farisai gi jodong-jodolo bedo gi romo mar od ng’ado bura maduong’ mar Jo-Yahudi, miluongo ni buch Sanhedrin. Jadolo maduong’ miluongo ni Kayafa bende en jakanyo mar burano. Moko kuomgi ywagore niya: “Watim nang’o, nimar ng’atni timo ranyisi madongo mang’eny? Ka waweye kamae, to ji duto biro keto yie kuome, kendo Jo-Rumi nobi mi ginikaw karwa kod ogandawa.” (Johana 11:47, 48) Kata obedo ni gisewinjo kuom joma ne oneno gi wengegi “ranyisi madongo mang’eny” ma Yesu osetimo, jogi to ok mor gi gik ma Nyasaye timo kokalo kuom Yesu. Gima gidichgo ruok en kargi kod teko ma gin-go e kind oganda.

Jo-Sadukai gin joma ok oyie kuom chier. Omiyo, nyaka bed ni dhogi omoko nikech Yesu ochiero Lazaro! Kayafa ma bende en Ja-Sadukai yawo dhoge kowacho niya: “Ok ung’eyo gimoro amora kata matin, kendo pok ufwenyo ni ber ka ng’at achiel otho ne ji kar mondo oketh oganda duto.”​—Johana 11:49, 50; Tich Joote 5:17; 23:8.

Nikech Kayafa ni e tij dolo ma en tich ma Nyasaye e ma oketee, ok owach wechego “kuom dwache owuon,” to otimo kamano kuom teko mar Nyasaye. Gima Kayafa wacho en ni dwarore ni oneg Yesu mondo kik odhi nyime mayo jotend din mar Jo-Yahudi teko ma gin-go e wi oganda. Kata kamano, weche ma Kayafa okorogo nyiso ni tho Yesu biro waro ‘nyithind Nyasaye duto mosekere kuonde mopogore opogore,’ to ok mana Jo-Yahudi kendgi.​—Johana 11:51, 52.

Gima Kayafa owachono miyo buch Sanhedrin riwo paro kanyachiel mondo gineg Yesu. Nikodemo ma bende en jakanyo mar buch Sanhedrin to mor gi gik ma Yesu osebedo ka timo. Nikech mano, be dibed ni en e ma ohulo ne Yesu paro ma jo burano nigo mar nege? Bed ni mano e gima otimore kata ooyo, Yesu wuok e alwora machiegni gi Jerusalem mondo kik otho ka kinde ma Nyasaye oketo pok ochopo.