Pod Yesu ni e yo ma kadho Perea kochomo Jerusalem. Rawera moro ma jamwandu ringo nyaka ir Yesu kae to ogoyo chonge piny e nyime. Ng’atno en “achiel kuom jotelo.” Nyalo bedo ni en achiel kuom jotelo ma tayo e sunagogi, kata en jakanyo mar buch Sanhedrin. Openjo Yesu niya: “Japuonj Maber, en ang’o ma nyaka atim eka ayud ngima mochwere?”​—Luka 8:41; 18:18; 24:20.

Yesu dwoke kama: “Ang’o momiyo iluonga ni ng’at maber? Onge ng’at maber mak mana ng’at achiel, ma en Nyasaye.” Nenore ni rawerano luongo Yesu kamano, nikech kata jorabi bende luongoga jotelo ni ‘joma beyo.’ Kata obedo ni Yesu ong’eyo puonjo maber, odwaro ni ng’atno ong’e ni Nyasaye kende e ma inyalo luong ni “Maber.”

Yesu jiwe kama: “Kata kamano, kidwaro donjo e ngima, dhi nyime mako chike.” Omiyo, rawerano penje niya: “Chike mage?” Yesu hulone abich kuom Chike Apar. Chike abich mowuoyoego gin neko, chode, kwelo, chiwo neno ma miriambo, kod chayo jonyuol. Kae to omedo machielo ma dwarore ahinya niya: “Nyaka iher wadu kaka iherori iwuon.”​—Mathayo 19:17-19.

Ng’atno dwoko Yesu niya: “Aserito mago duto; ang’o kendo ma pod orema?” (Mathayo 19:20) Nyalo bedo ni nitiere gimoro maber ahinya moparo ni pod oreme ma kotimo, to onyalo yudo ngima mochwere. Yesu ‘here’ nikech kinda moneno ka jalo nyiso e kwayoneno. (Mariko 10:21) Kata kamano, nitiere gimoro ma dhi bedo matek ne jalno timo.

Ng’atno ohero mwandune ahinya, omiyo Yesu wachone kama: “Gimoro achiel oremi: Dhi ius gik ma in-go kendo imigi joma odhier eka inibed gi mwandu e polo; kae to ibi ibed jalupna.” Ee, ng’atno onego opog pesane ne joma odhier ma onge gi nyalo mar chule. Bang’ timo kamano  to onyalo bedo japuonjre Yesu. Kata kamano, sama ng’atno wuok kanyo ka okuyo, nenore ni Yesu nenone lit. Makruok ma ng’atno omakorego ahinya gi “mwandu mang’eny” ma en-go, mone neno mwandu madier motudore gi wach Pinyruoth. (Mariko 10:21, 22) Yesu wacho niya: “Mano kaka donjo e Pinyruodh Nyasaye nobed matek ne joma nigi pesa!”​—Luka 18:24.

Jopuonjre bwok ahinya gi weche ma Yesu owachogo. Kata kamano, weche ma luwogi bende bwogogi. Yesu medo kama: “Kuom adier, yot mondo ngamia okal e wang’ sandan mar tweng’o moloyo jamwandu donjo e Pinyruodh Nyasaye.” Wechego miyo jopuonjre penje kama: “Kare inyalo res ng’a?” Be mano nyiso ni onge ng’at minyalo res? Yesu ng’iyogi tir kae to odwokogi niya: “Gik ma ok nyalre kuom dhano, nyalore kuom Nyasaye.”​—Luka 18:25-27.

Petro nyiso ni gin gisetimo yiero maber mopogore gi mar ng’at ma jamwanduno. Owacho kama: “Ne! Waseweyo gik moko duto mi waluwi; kare wan to en ang’o ma wanayud?” Yesu nyiso ber ma biro betie achien nikech yiero ma gisetimono. Owachonegi niya: “E kinde chueyo gik moko manyien, ma Wuod dhano nobedi e kom-lochne ma nigi duong’, un museluwa, ubiro bet e kombe 12 mag loch kung’ado bura ne dhoudi 12 mag Israel.”​—Mathayo 19:27, 28.

Adier en ni chuech ma Yesu wuoyoe en ni ibiro los gik manie piny obed manyien kendo maber kaka ne gin e puodho mar Eden. Petro kaachiel gi jopuonjre mamoko biro yudo gueth mar locho e wi piny moselos mobedo Paradiso. Gibiro locho kanyachiel gi Yesu. To mano en gueth makende ma ok nyal pim gi gimoro amora ma ng’ato nyalo weyo chien!

Kata kamano, guethgo ok gin mana mag kinde ma biro kende. Jopuonjrene yudo gueth moko kata mana gie sani. Yesu lero kama: “Onge ng’at moseweyo ode, kata chiege, kata owetene, kata jonyuolne, kata nyithinde nikech Pinyruodh Nyasaye, ma ok nonwang’ nyading’eny momedore gie ndalogi, kendo e ndalo ma biro, ngima mochwere.”​—Luka 18:29, 30.

Ee, kamoro amora ma jopuonjrene odhiye, ginyalo bedo gi winjruok maber gi joma oherogi kendo ma gilamogo Nyasaye kanyachiel. Winjruok ma kamano oloyo kata mano manie kindgi gi wedegi. Bedo gi winjruok ma kamano en gima nyalore ne jopuonjrego. Gima lit en ni rawera ma jamwanduno to ok bi yudo gueth ma kamano, to bende ok obi yudo mich mar ngima e Pinyruodh Nyasaye e polo.

Yesu medo wacho kama: “To thoth joma okwongo nobed ma achien, to joma achien nobed mokwongo.” (Mathayo 19:30) Mano tiende ang’o?

Rawera ma jamwandu kendo ma jatelono en achiel kuom jo “mokwongo” nikech en achiel kuom jotelo mag Jo-Yahudi. Nikech en ng’at molony gi chike Nyasaye, onego obed ni ong’eyo weche mowinjore obed motelo e ngimane, to e ma pod ohero mwandune moloyo gimoro amora e ngimane. Mopogore kode, nitie ji mang’eny ma ok gin jotelo to fwenyo ni Yesu puonjo adiera kendo okonyo ji ng’eyo yo ma tero ji e ngima. Gisebedo ‘joma achien,’ to koro sani gibedo ‘joma okwongo.’ Joma kamago nigi geno mar bedo e kombe mag loch e polo kanyachiel gi Yesu ka gilocho e wi piny moselok mobedo Paradiso.