1. Ji oyie gi bilo, tim juok, kod ndagla marom nade?

YESU nowacho: “Donjuru e rangach madiny; nikech rangano duong’, kendo yorno lach ma dhi e kethruok, kendo ging’eny ma donjoe. To rangano tin, kendo yorno diny ma dhi e ngima, kendo ginok ma nwang’e.” (Mathayo 7:​13, 14) Kaluwore gi Wach Nyasaye, nitiere dinde ariyo kende: Achiel maradier, achiel mar miriambo; achiel maber, achiel marach; achiel materi e ngima, achiel materi e kethruok.

2. Ndiko nyiso nade ni dinde duto ok mor Nyasaye?

² Jomoko paro ni dinde duto moro Nyasaye. Ndiko maluwo gi nyiso ni mano ok en adier:

• “Kendo nyithind Israel nochako timo marach kendo e wang’ Jehova, ma gitiyo ni Baal gi Ashteroth gi nyiseche mag Suria, gi nyiseche mag Zidon, gi nyiseche mag Moab, gi nyiseche mag nyithind Ammon, gi nyiseche mag Jo-Filistia; ne giweyo Jehova, ma ok gitiyone. Kendo mirimb Jehova nobedo mager kuom Israel.” (Jobura 10:​6, 7) Ka walamo nyiseche moko ma ok Nyasaye mar adier, Jehova ok nyal yie kodwa.

• “Ogandani paka gi dhogi, to chunygi bor koda. Gilama kayiem, ka gipuonjo chik dhano ka puonj mag Nyasaye.” (Mariko 7:​6, 7) Ka ji ma wacho ni gilamo Nyasaye puonjo mana pachgi giwegi kar puonjo weche Muma, lamo mar gi en kayiem nono. Nyasaye ok oyie kode.

• ‘Nyasaye en Roho, kendo jo ma lame onego gilame e chuny kendo e adiera.’ (Johana 4:​24) Lamo marwa nyaka lu adiera mar Wach Nyasaye.

3. Ere yoo achiel mar pogo din maradier kod ma miriambo?

³ Ere kaka wanyalo ng’eyo ka din moro Nyasaye kata ok more? Yesu nowacho: “Yien mabeyo duto nyago mana olemo mabeyo, to yien maricho nyago mana olemo maricho . . . Olembgi e ma unung’egigo.” Mano tiende ni, ka din en mar Nyasaye, obiro nyago olemo maber; to ka en din mar Satan, obiro nyago olemo maricho.​—Mathayo 7:​15-20.

4. Jo malamo Jehova nyiso kido mage?

⁴ Din maradier miyo joge herore giwegi kendo nyiso jomoko bende hera. En kamano nikech Jehova en Nyasaye ma jahera. Yesu nowacho: “Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.” Bende nitie herani e dinde?​—Johana 13:35; Luka 10:27; 1 Johana 4:8.

5. Buk moro wacho ang’o kuom ohand wasumbni e Afrika?

⁵ Par ane ohand wasumbni e Afrika. Buk miluongoni The New Encyclopædia Britannica wacho: “Wasumbni madirom 18,000,000 e Afrika ne ousi ne jo ohala ma Jo-Islam mane loko e Sahara gi mane loko e Nam Indian Ocean e kind higa mar 650 kod 1905. Kane higni 1400 dhi rumo Wasungu nochako ohalano e nam mar Afrika ma yimbo. Kane ochopo higa mar 1867, kwan wasumbni  mani e kind 7,000,000 gi 10,000,000 e Afrika nousi e pinje mag Amerka.”

6. Din notimo ang’o endalo mag ohand wasumbni?

⁶ Ang’o mane din otimo e kinde mane Afrika ne nigi thagruok mar ohand wasumbni? Ka chwo, mon, gi nyithindo nigolo e miechgi githuon, kitweyogi, kiketo nigi alama gi nyinyo maliet, king’iewo gi kendo iusogi kaka dhok? Bethwel Ogot nowacho kama e gaset miluongo ni Daily Nation, man Nairobi, Kenya: “Jokristo gi Jo-Islam puonjo riwruok mar ogendini duto, to kata kamano gin ema nene gichako ohand wasumbni kendo gin e ma gipong’ kod akwede mag oganda moko. . . . Nyaka wayie ni Jokristo gi Jo-Islam duto noketho, Wasungu gi Joarabu noketho, kendo nyaka wayie ni timbe marichogi nokelo chandruok maduong’ ahinya ne Joafrika.”

7. Jotend din osebedo ka timo ang’o e lwenje?

⁷ Din ma miriambo osenyiso olembe motop e yore mamoko. Kuom ranyisi, Muma wacho ni mondo ‘iher wadu kaka iherori iwuon,’ to jotend dinde e piny ngima osebedo ka thuwo kendo konyo lweny ahinya.​—Mathayo 22:39.

8. (a) Jotend dinde nojiwo nade negruok e lwenje e Afrika? (b) Pasta moro nowacho ang’o kuom jotend dinde kane ji gore e Nigeria?

⁸ En gima ong’ere ahinya ni e higa mar 1994, sista gi jopuonj kanisa noriwore gi jonek mane nego ji e piny Rwanda. Din bende osethuwo lwenje moko mang’eny e Afrika. Kuom ranyisi, e kinde ma Jo Nigeria negore kendgi, dinde  nene jiwoji mondo gigore. Ka lwenyno ne pod dhi nyime, pasta moro nowacho ni jotend kanisa “oseweyo tich mane Nyasaye omiyogi.” Kendo nowacho kama: “Waluongore ni jotich Nyasaye, to wasebedo jotich Satan.”

9. Muma wacho ang’o kuom jotich Satan?

⁹ Kamano e kaka Muma wacho: “Satan owuon timore ka malaika mar ler. Omiyo ok en wach maduong’ ka jotichne bende timore ka jotich mag wach makare.” (2 Jo Korintho 11:​14, 15) Mana kaka ji mang’eny wuondore ni gibeyo, Satan wuondoji gi jotich manenore ni gin jomabeyo, to timbegi to richo kendo olembe ma ginyago otop.

10. Jotelo mag dinde osekwedo nade Nyasaye?

¹⁰ E piny ngima, jotend Din osebedo ka lando hera, kwe, kod ber, to gin giwegi gisebedo gi achaya, donjo e lwenje, kod timbe ma ok mor Nyasaye. Muma wacho kuomgi kama: “Giwacho ni ging’eyo Nyasaye, to gik ma gitimo nyiso ni gidage.”​—Tito 1:16.

11. Muma wacho ang’o kuom din ma miriambo?

¹¹ Wanyalo neno pach Jehova kuom din ma miriambo e Muma e buk mar Fweny. E Fweny din ma miriambo ipimo kod dhako mar ranyisi, “Babulon maduong’.” (Fweny 17:5) Nyasaye wacho kama kuome:

• ‘Jaterruok maduong’ ma ruodhi mag piny oseterorego.’ (Fweny 17:​1, 2) Kar bedo ratiro e nyim Nyasaye, din ma miriambo osebedo ka donjo e siasa, kaginyiso sirikande gik ma onego otim.

• ‘Nimar remb jonabi duto, gi jo maler, gi ji duto ma nonegi e piny, nonwang’e iye.’ (Fweny 18:24) Din ma miriambo osesando kendo nego jotich Nyasaye makare kendo osemiyo ji mang’eny ahinya otho e lwenje.

• ‘Omiyore duong’ owuon, kendo otimo ndhaga.’ (Fweny 18:7) Din ma miriambo ni kod mwandu mang’eny ma jotelo mage konyorego e dak ngima modhialore.

• ‘Kendo nowuondo ogendini duto gi jwogi.’ (Fweny 18:23) Kuom puonjo ni chuny ok tho, din mar miriambo osekelo timbe mag juok gi bilo, luoro ahinya jo motho, kendo lamo kwere machon.

12. Muma wachonwa ni watim ang’o kuom din ma miriambo?

¹² Ka osiemo ji mondo oa e din ma miriambo, Muma wacho: “Auru kuome, un joga; mondo kik uriwru e richone, kendo kik unwang’ masichene.”​—Fweny 18:​4, 5.

13. Ang’o mabiro timore ni din ma miriambo gi jo ma luwe?

¹³ E kinde machiegni, ibiro keth Babulon maduong’, ma gin dinde duto mag miriambo e piny ngima. Muma wacho: ‘Chieng’ achiel masichene nopoye: Tho, ywagruok, gi kech; kendo nowang’e gi mach, nikech Ruoth Nyasaye ma ng’adone bura en wuon teko.’ (Fweny 18:8) Mondo kik masichene moko nwang’wa, nyaka wawere chutho kod din ma miriambo, timbegi, nyasi, gi puonj ma ok mor Nyasaye. Ma en gima onego watim piyo ahinya. Ngima wa ni kama rach!​—2 Jo Korintho 6:​14-​18.