1. What are some of the religions practiced in Africa?

CHIEGNI ji duto mantiere Afrika ong’eyo ni onego walam Nyasaye. Kata kamano, ji ok winjre e yoo monego walamego. Jomoko lemo e muskiti to jomoko lemo e kuonde ma kweregi machon ne leme. To jomoko bende dhi e kanisa. Kata kamano dinde mantie Afrika ok gin adek kende. Jo-Islam nigi chike mopogore-opogore ekindgi giwegi. Dinde mag anywola bende opogore-opogore ahinya, kaluwore gi kuonde magintiere. Kanise maluongore ni mag Kristo ema opogore-opogore moloyo dinde moko te. Ka waweyo kanise madongo, nitiere kanise mang’eny ahinya matindo-tindo e Afrika mangima.

2. (a) Ang’o mamiyo ng’ato bedo e din moro? (b) Ang’o ma ok nyis ni Nyasaye oyie gi din marwa?

² Ang’o momiyo ji lemo e dinde mopogore? Ji mang’eny luwo din mar jonyuolgi. Gigo manene otimore chon bende noyuayo ji mondo obedi e din ma gintie­re kawuono. Kitabu miluongo ni The Africans​—A Triple Heritage wacho kama: “Din mar Jo-Islam nolandore e Sahara ma malo gi lweny, . . . Din mar Jokristo bende nolandore e pinje man mwalo mar Sahara gi lweny. Jo-Islam notiyo gi ligangla e lwenjgi e Sahara ma malo, to  Jokristo notiyo gi bunde e lwenjgi e pinje mantie mwalo mar Sahara.” Podi ji mang’eny paro ni dindewa moro Nyasaye. Kata kamano, bedo ni jonyuolwa ni e din moro, kata bedo ni loch moro nene ochuno kwerewa e din moro; mano kende ok nyis ni en din maradier.

3-5. Ranyisi mane ma konyowa ng’eyo ni dinde duto ok puonj adiera?

³ Kata ka dinde mang’eny wacho ni ginyiso ji yoo makare mar tiyo ni Nyasaye, puonjgi opogore-opogore. Gipuonjo weche mang’eny mopogore kuom Nyasaye, ni en ng’a to gi gima odwaro mondo watim. Parie: Wawach ni iyudo tich e kambi moro maduong’. Chieng’ mokuongo inyisi ni jatendi onge odhi e rusa. Koro ipenjo jotich adek tich ma onego itim. Jatich mokuongo nyisi ni jatelo dwaro ni mondo iywe dier ot. Jatich mar ariyo nyisi ni onego iwir ot. Jatich mar adek to nyisi ni imi ji barupegi mobiro.

⁴ Bang’ mano, ipenjo jotich mondo ginyisi kaka jatenduno chalo. Jatich mokuongo nyisi ni jatelo en ng’at ma rawera, mabor, to okwiny. Jatich mar ariyo nyisi ni jatelo en ng’at moti, ma nyadundo, to omuol. Jatich mar adek to nyisi ni jatelo ok en dichwo ngang’, en dhako. Inyalo ng’ado wach ni jotich adekgo ok wach adiera. Koro kidwaro mondo irit tich miyudono, dwarore itim nonro mondo ing’e jatendi, kendo ing’e gima odwaro mondo itim.

⁵ Din bende chalo kamano. Nikech nitie puonj mang’eny mopogore-opogore kuom Nyasaye, ni en ng’a to odwaro ni mondo watim ang’o, onego wang’e ratiro ni walame e yoo mowinjore gi adiera. Kata kamano, ere kaka wanyalo puonjore adiera mar Nyasaye?