1. Ang’o mabiro timore ka wasudo machiegni gi Nyasaye?

YEHOVA ohero jogo matiyone. Ka itiyo ni Jehova, onyalo gwedhi sani gi kinde mabiro bende. Muma wacho niya: “Suduru ir Nyasaye, to nosud iru.”​—Jakobo 4:8.

2. Ere kaka wanyalo sudo machiegni gi Nyasaye, to ma nyalo timo ang’o ni lemo marwa?

² Mondo isud machiegni gi Nyasaye onego ipuonjri kendo iti gi wachne. Kapo ni ilemo ka oluwore gi dwaro mare, Jehova biro winjo lemo mari kendo duoki. Jaote Johana ma Jakristo ne ondiko niya: “Ma eri e chir ma wan go [kuom Nyasaye], ni kwakwayo gimoro kaka dwaro mare obet, to owinjowa. To kwang’eyo ni owinjowa kuom gi manadi mwakwaye, wang’eyo ni wasenwang’o gigo ma ne wakwaye.”​—1 Johana 5:​14, 15.

3-7. Ere kaka wanyalo yudo rieko moa kuom Nyasaye, to riekoni biro konyowa nade?

³ Machielo bende, ka isudo machiegni gi Nyasaye, obiro miyi rieko manyalo konyi e ngimani ma kinde duto. Muma wacho niya: “Ka ng’ato kuomu ochando rieko, ber mondo okwa Nyasaye.”​—Jakobo 1:5.

⁴ Rieko moa kuom Nyasaye nyalo konyi nade? Mokuongo onyalo konyi mondo ing’e gigo ma Jehova ok mor go. Bende inyalo puonjri gima omiyo gigo ok ni kare, kendo gima owinjore itim mondo kik idonj e timbe machalo kamano. Rieko machalo kama bende nyalo geng’oni chandruok ma ji mang’eny yudo. Kuom ranyisi, rito chik Nyasaye madwaro mondo wabed gi timbe mabeyo, nyalo geng’o jo Nyasaye mondo kik giyud ich ma ok gidwar, tuoche mayudore kuom tim chode, to kod kendruok ma onge mor kata makethore.

⁵ Rieko mawuok kuom Nyasaye nyalo timoni ang’o kendo? Riekono nyalo miyo idag maber. Nyalo konyi ng’ado paro makare e gigo matimore pile machalo kaka yoo maber minyalo tiyogo gi pesa. Inyalo bedo bende kod paro man kod kony kendo inyalo kwedo paro ma ok nyal konyo ng’ato.

⁶ Rieko moa kuom Nyasaye bende nyalo konyi mondo ibed e winjruok gi ji mamoko. Inyalo bedo kod ngima mamor mar joot. Inyalo bedo kod osiep makare kod ji mamoko, bende mano nyalo miyo kata mana jogo ma ok ti ni Nyasaye miyi luor.

⁷ To moloyo mano, bedo kod rieko moa kuom Nyasaye nyalo loso kit ngimani. Onyalo konyi bende ing’e kaka inyalo dhach gi gigo makelo kuyo e ngima. Bende inyalo bedo kendo neno kinde mabiro e yoo makare. Rango gik moko e yoo makare kamano nyalo medi bedo gi paro kata ngima mar del maber.​—Ngeche 14:30; Isaiah 48:17.

8. Ang’o ma ok ibi luoro ka itiyo ni Nyasaye?

⁸ Ka itiyo ni Nyasaye, to ibiro bedo thuolo koa kuom luoro mago machando jogo ma ok ti ne. Nikech ing’eyo ni jo motho onge kod ngima e bur, ok ibi  luoro jo motho. Nikech in kod geno kuom singruok mar Nyasaye ni obiro chiero jo motho, in bende ok ibi luoro tho. To nikech ing’eyo ni Nyasaye en wuon nyalo duto, ok ibi luoro juok kata bilo.​—Johana 8:​32.

9-11. Ng’a gini mabiro dak e Paradis to ng’a ma ok nodagi?

⁹ Ka isudo machiegni gi Nyasaye, ok iniluoro kinde mabiro. Waseneno ni muma nene owuoyo kuom chandruok mang’eny ma waneno e piny kawuono. Jehova nyisowa ni magi gin mana gik makadho. Machiegni Pinyruodh Nyasaye biro loso piny bedo paradis.​—Luka 21:​10, 11, 31; 23:43.

¹⁰ Jogo masudo machiegni gi Nyasaye kende ema nodagi e Paradis. Muma wacho niya: “Nimar podi kinde matin, kendo ng’a marach obiro onge: Ee, iniket chunyi kuom paro kar bet mare, kendo obiro onge. To jo mamuol ginicham piny: kendo ginimor moloyo kuom kwe mang’eny.”​—Zaburi 37:​10, 11.

¹¹ Jogo matamore rito chike Nyasaye makare, gi wich matek, gin to ginilal ngimagi nyakachieng’. (2 Jo Thessalonika 1:​8, 9) Ginilal nono. Giniriwre gi Satan kod jochiende e kethruok ma nyakachieng’. (Fweny 20:​10, 14) To jogo mong’eyo Jehova kendo ma tiyone to nobed gimor e piny Paradis.

12. Muma wacho ang’o kuom ndalo mabiro?

¹² Jehova oseketo gik mabeyo miwuoro ni jogo mohere! Rangane kaka wach ne wuoyo kuom ngima e piny mar Paradis:

• Chiemo mang’eny michamo: “Bel nobedi mang’eny e piny e wi gode madongo.”​—Zaburi 72:16.

• Kuonde dak maber: “Giniger udi, ginidagie.”​—Isaiah 65:21.

• Tich mamoro ji: “Jogo, mayiedho nomor gi tich luetegi ndalo mang’eny. Ni mar ok giniti nono.”​—Isaiah 65:​22, 23.

• Onge tuoche: “Japiny ok nowachi, atuwo.”​—Isaiah 33:24.

• Onge joma ok nyal: “Eka wang’ mwofini noyepi, kendo it jo ma itgi odinore noyaure. Eka ng’ato ma rang’ol nochikre ka ngau, mi duond jamomo nower.”​—Isaiah 35:​5, 6.

• Onge rem, kuyo, kata, tho: “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.”​—Fweny 21:​3, 4.

• Onge lweny: ‘Nyasaye biro tieko iwenje nyaka giko piny.’​—Zaburi 46:9.

• Ngima mochwere: “Jo matir ginicham piny, mi ginidagie nyaka chieng’.”​—Zaburi 37:29.

13. Ng’a kende ma nyalo loso pinyni obed paradis, to nikech ang’o?

¹³ Dhano ok nyal kelo magi duto, Jehova to ni kod teko mar timo gimoro amora mowacho ni obiro timo. Onge gima dimone timo gimoro amora modwaro timo. Muma wacho niya: “Onge wach ma nyalo tamo Nyasaye.”​—Luka 1:37.

14. Ere kaka inyalo yudo yoo madhi e ngima mochwere?

¹⁴ Kokalo kuom Joneno mage, Jehova koro miyo ji thuolo kamoro amora ma gintie mondo ‘gidonj e rangach madiny’ kendo giwuoth e yoo madhi e ngima mochwere. Bedi achiel kuom jogo man gi mor, moseyie luongno. Bedi e din mar adiera kendo ibed mamor gi gweth mag Jehova nyakachieng’!​—Mathayo 7:​13, 14.