1. Onego watim ang’o mondo wamor Nyasaye?

MONDO hera obedi e kindwa gi Nyasaye, nyaka wawere chutho gi din ma miriambo. Nyaka wabed e din maradier. Ndalogi ji tara gi tara e piny mangima timo kamano.

2. Joneno mag Jehova yudore e pinje adi, to gitimo ang’o?

² Mana kaka Muma nokoro, jolamo maradier wuok ei oganda maduong’ “Moa e pinje duto, gi dhoudi duto, gi ogendini duto, gi dhok duto.” (Fweny 7:9) Joneno mag Jehova madirom tara gi tara e pinje 235 puonjo ji yore mag hera mag Jehova gi dwache.

3. Joneno lamo ng’a, to ok gitim lamo mane?

³ Joneno ong’eyo ni Jehova kende e ma onego olam. Ok giyie kulore ni gik molosi kata piche mag dinde. (1 Johana 5:21) Ok gi mi jomotho luor ma ok kare kaka budho liel nyaka okinyi, kendo ok gibedi gi nyasi maok kare mag puonj din ma miriambo gi “puonj mar jochiende.” (1 Timotheo 4:1) Kata kamano gi jiwo joma joggi otho ka gilero nigi singo mar Nyasaye manyiso ni jo motho nochier e piny paradis.​—Johana 5:​28, 29; Tich Joote 24:15.

4. Jo Nyasaye neno bilo nade?

⁴ Joneno ok ti kod bilo, juok, kata ndagla, nikech ging’eyo ni gigo a kuom Jachien. Ok gigeno bilo mondo oritgi, gin gigeno Jehova.​—Ngeche 18:10.

5. Joneno mag Jehova “ok gin mag piny” eyo mane?

⁵ Yesu nowacho ni jolupne “ok gin mag piny.” (Johana 17:16) E ndalone, Yesu owuon notamore donjo e siasa. (Johana 6:15) Kamano bende, Joneno ok donj e weche siasa, kedo ni piny, kod riwruok mag kedo e piny. Kata kamano, gichulo osuru kendo gimako chike mag sirkal mantie e pinje magidakie.​—Johana 15:19; Jo Rumi 13:​1, 7.

6. Jotich Nyasaye luwo chike mage kuom kend kod werruok?

⁶ Nikech giluwo chike mag sirkal, Joneno kendore kaka chik dwaro. (Tito 3:1) Giluwo chik Nyasaye, to ma ema miyo ok gibed jo doho. (1 Timotheo 3:2) Ok yot mondo giwere nikech giluwo chike Muma e kendruokgi.

7. Joneno oherore e yore mage?

⁷ Joneno oherore e kindgi. Herani, kaachiel gi hero Nyasaye, riwogi kaka owete kata ka gi a e ogendini mopogore-opogore. Ka nitie masira kata kony ma dwarore, Joneno temo konyo owetegi mapiyo. Joneno gin joma johera.​—Johana 13:35.

8. Timbe mage maricho ma jo Nyasaye ok tim?

⁸ Jog Jehova temo ahinya mondo gibed joma ratiro. Ok gikwel, ok giriambi, ok gi tim chode, ok gi mer, kendo ok gitim ohala e yo maok kare. Dichwo ok go chiege. Jomoko netimo timbegi to Jehova nokonyogi weyogi. ‘Noluokgi’ ma gibedo kare e nyim Nyasaye.​—1 Jo Korintho 6:​9-11.

9. Buk moro nowacho ang’o kuom dinde moko e Afrika?

⁹ Dinde mang’eny wacho ni gin kod adiera. Ginyalo nyiso ji gik mabeyo  magisetimo. Kuom ranyisi, buk moro wacho kama kuom dinde moko e Afrika: “[Dinde manyien mag Jokristo] timo ahinya tij ajuoke. . . . Giwacho ni gi koro kendo gitimo honini. Jonabi maggi neno fweny kendo loko tiend lek. Gitiyo gi pi hawi, mo mogwedhi, buru, musuma gi ubani e chango ji kod geng’o tuoche.”

10, 11. Ang’o momiyo honini matinde ok nyis ni Nyasaye oyie kod dindego?

¹⁰ Dindego wacho ni hono magitimo nyiso ni Nyasaye ni kodgi. Kata kamano, timo honni ok nyis ni dindno moro Jehova. Satan bende miyoga jolamo mag miriambo teko mar timo “honini mag miriasia.” (2 Jo Thessalonika 2:9) Kendo Muma nowacho ni mich moa kuom Nyasaye kaka koro wach, dhum e dhok mayore-yore, kata ng’eyo, “norum.”​—1 Jo Korintho 13:8.

¹¹ Yesu nowacho: “Ok ni ji duto ma luonga ni, ‘Ruoth, Ruoth’, e ma nodonji e pinyruodh polo, to mana ng’atno ma timo gi ma Wuora me polo dwaro. Ji mathoth nowachna chieng’ono niya, ‘Ruoth, Ruoth, ne ok wakoro wach e nyingi koso, kendo e nyingi ne ok wagolo jochiende, kendo e nyingi ne ok watiyo tije madongo mang’eny? ’ Eka anawachnigi niya, ‘Ok nang’eyou ngang’: auru kuoma, un jo ma timo richo.’”​—Mathayo 7:21-23.

12. Jo mage mane donji e Pinyruodh polo?

¹² Kara jo mage mane donji e Pinyruodh polo? Gin mana jo matimo dwach Jehova.

13. Tich mane ma Nyasaye chiko joge mondo otim ndalogi, to jomage matimo tijno?

¹³ Nyasaye dwaro ni joge otim ang’o ndalogi? Yesu nowacho “Kendo Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.” (Mathayo 24:14) Ma e tich ma Joneno mag Jehova timo gi kinda.

14. Pinyruodh Nyasaye en ang’o, to jomage mabiro locho e Pinyruodhno?

¹⁴ Kuonde duto e ‘piny ngima,’ Joneno mag Jehova lando Pinyruodh Nyasaye mabiro locho ewi piny e yoo makare. Gipuonjo ni Jehova oseketo Yesu Kristo Ruoth mar Pinyruodhno gi ji 144,000 mane oyier e kind dhano mondo okonye locho.​—Daniel 7:​14, 18; Fweny 14:​1, 4.

15. Pinyruoth biro ketho ang’o?

¹⁵ Joneno nyiso ji e Muma ni Pinyruodh Nyasaye biro ketho gik Satan duto. Din ma miriambo kod puonjne ma ok mor Nyasaye to miyo Jachien duong’ ok nobedi kendo. (Fweny 18:8) Sirkande mag dhano mapingo Nyasaye bende nolal nono.​—Daniel 2:44.

16. Jo mage mabiro dak e bwo Kristo Yesu, to gibiro dak kanye?

¹⁶ Ahinya wuon, Joneno mag Jehova lando ni Yesu Kristo biro kelo gweth mabeyo ahinya ni ji duto matimo dwach Nyasaye. Ginibed joge e piny. Muma wacho: “Nimar nogol jachan e chandrwok koywak; kendo ng’a modhier ma onge gi jakony. Nokech jo modhier kod jochan, mi nores chuny jochan.”​—Zaburi 72:​12, 13.

17. Jo mage kende malando Pinyruodh Nyasaye?

¹⁷ Onge din moro kendo ma timo dwach Nyasaye mar lando wach maber mar Pinyruoth. Joneno mag Jehova kende ema lando Pinyruodh Nyasaye e piny mangima.