1. Gin ber mage ma wayudoga sama wagoyo mbaka gi Jokristo wetewa e wi kaka ne wapuonjore adiera?

 “ERE kaka ne ipuonjori adiera?” Onge kiawa ni osepenji penjono nyading’eny. Mano en achiel kuom penjo ma owete gi nyimine jopenjoga Jokristo wetegi sama gihango romo kodgi. Wawinjoga ka wamor ahinya sama owetewa gi nyiminewa nyisowa kaka ne gichako ng’eyo Jehova kendo here, to bende wamorga sama wanyisogi kaka wahero adiera. (Rumi 1:11) Mbaka ma kamano konyowaga neno kaka adiera en gima duong’. Bende, mbakano konyowaga “dhi nyime wuotho e adiera,” tiende ni, dak e ngima ma biro miyo Jehova obed mamor kodwa kendo oguedhwa.​—3 Joh. 4.

2. Ang’o mwabiro nono e sulani?

² E sulani, wabiro nono moko kuom gik momiyo wahero adiera. Kae to wabiro nono kaka wanyalo dhi nyime nyiso ni waneno adiera kaka gima duong’. Wan gadier ni sulani biro konyowa medo goyo erokamano ne Jehova kuom ywayowa e adiera. (Joh. 6:44) Sulani bende biro konyowa medo siso ma wan-go mar puonjo jomamoko adiera.

3. Wach maduong’ momiyo wahero Jehova en mane?

³ Nitie gik mang’eny momiyo wahero adiera, to maduong’ moloyo en ni wahero Jehova Nyasaye ma e Soko mar adiera. Kokalo kuom Wachne ma en Muma, wasepuonjore ni Jehova en Jachuech ma nigi teko, ma nochueyo polo gi piny, kendo ni en Wuonwa manie polo ma dewowa ahinya. (1 Pet. 5:7) Wang’eyo ni Jehova Nyasachwa en “Nyasaye mang’won kendo ma kecho ji, ma iye ok wang’ piyo, kendo mogundho gi hera mosiko kod adiera.” (Wuok 34:6) Jehova ohero bura makare. (Isa. 61:8) Owinjoga malit  ahinya sama oneno kaka wachandore, kendo e kinde moseketo, obiro golonwa chandruoge duto nikech ogombo timo kamano. (Jer. 29:11) Warito gi siso neno ka mano timore! To mano en achiel kuom gik momiyo wahero Jehova ahinya!

4-5. Ang’o momiyo jaote Paulo nopimo adiera gi nanga?

⁴ Wach machielo momiyo wahero adiera en mane? Adiera kelonwaga ber mang’eny. Ne ane ranyisini. Adiera mag Muma oriwo geno ma wan-go mar kinde mabiro. Jaote Paulo nonyiso kaka genono en geno makende ka nondiko niya: “Wan gi genoni ma chalnwa kaka nanga mar meli mosiro ngimawa; en geno madier, kendo motegno.” (Hib. 6:19) Mana kaka nanga miyoga meli chung’ kar tiende, geno ma wan-go mar Muma nyalo miyo wachung’ motegno sama waromo gi tembe.

⁵ E ndikono, Paulo ne wuoyo e wi geno ma Jokristo mowal nigo mar dhi e polo. Kata kamano, wechego nyalo konyo bende Jokristo ma nigi geno mar dak e paradiso e piny kae nyaka chieng’. (Joh. 3:16) Kuom adier, puonjruok e wi geno mar dak e piny kae nyaka chieng’ osemiyo wadak e ngima maber.

6-7. Gin ber mage ma Yvonne oseyudo nikech nopuonjore adiera e wi kinde mabiro?

⁶ Ne ane ranyisi mar nyaminwa moro miluongo ni Yvonne. Ne ok odongo e adiera, kendo ka ne pod otin, ne oluoro tho ahinya. Pod oparo kaka chieng’ moro nosomo weche moko ma wiye ok di wilgo. Wechego ne wacho niya: “Chieng’ moro ji biro nindo gotieno to ok gibi chiewo kinyne.” Owacho kama: “Wechego nomiyo ne ok anindga maber gotieno nikech naparora ahinya e wi ngimana ma kinde mabiro. Ne ok ang’eyo gimomiyo nochuewa. Kata kamano, ne ok adwar tho!”

⁷ E higni ma bang’e ka Yvonne nosebedo rawera, noromo gi Joneno mag Jehova. Owacho kama: “Napuonjora ni nanyalo bedo gi geno mar dak e paradiso ma biro bedo e piny kae.” Ere kaka puonjruok adiera osekonyo nyaminwano? Omedo wacho kama: “Tinde anindoga maber gotieno nikech ok aluoro tho, kendo ok aluoro gik ma biro timore e kinde mabiro.” Mana kaka wanyalo neno, Yvonne okawo adiera kaka gima duong’, kendo olandoga ne jomamoko geno ma en-go mar kinde mabiro.​—1 Tim. 4:16.

8-9. (a) E ngero moro ma Yesu nogoyo, ere kaka ng’at moro nonyiso ni nogeno mwandu ma noyudo? (b) Ere kaka in iwuon inenoga adiera?

⁸ Adiera mag Muma oriwo bende wach maber e wi Pinyruodh Nyasaye. Yesu nopimo adiera e wi Pinyruoth gi mwandu mopandi. E Mathayo 13:44, nowacho kama: “Pinyruodh polo chal gi mwandu mopandi e puodho, ma ng’ato noyudo mi opando; to nikech mor ma ne en-go, nodhi mi ouso gigene duto kae to ong’iewo puodhono.” Ne ni ng’atno ne ok many mwanduno. Kata kamano, ka noyudo mwanduno, nouso gik moko duto ma ne en-go mondo ong’iewe. Ang’o momiyo notimo kamano? En nikech nong’eyo kaka mwanduno ne duong’ ahinya. Mwanduno ne ok nyal pim gi gimoro amora ma noikore chiwo.

⁹ Be mano e kaka inenoga adiera? Onge kiawa ni in bende ineno adiera kamano! Wang’eyo ni onge gimoro amora ma pinyni nyalo chiwo minyalo pim gi mor ma wabedogo sama watiyo ne Jehova, kod geno ma wan-go mar ngima mochwere e bwo loch mar Pinyruodh Nyasaye. Thuolo makende  ma wan-go mar bedo machiegni gi Jehova ok nyal pim gi gimoro amora ma wanyalo tuonore e pinyni. Wabedoga mamor ahinya ng’eyo ni Nyasaye kwanowa kaka joma long’o.​—Kol. 1:10.

10-11. Ang’o ma nochwalo Michael mondo otim lokruoge e ngimane?

¹⁰ Thothwa wasetuonore gik mopogore opogore mondo wamor Jehova. Moko kuomwa oseweyo tije madongo. Moko to oseweyo lawo mwandu. Moko bende osetimo lokruoge madongo e ngimagi bang’ puonjore adiera e wi Jehova. Mano e gima Michael notimo. Ne ok odongo e adiera. Ka ne orawera, nochako puonjore karate. Owacho kama: “Namorga ahinya ka ne atiegora mondo denda obed mojing’. Nitie kinde ma naparoga ni onge ng’ato ang’ata ma ne nyalo loya. Kata kamano, ka ne Michael ochako puonjore adiera, noneno kaka Jehova osin gi timbe gero. (Zab. 11:5) Michael wacho kama e wi owadwa moro gi jaode ma nopuonje adiera: “Onge chieng’ moro amora ma ne ginyisa ni awe karate, kar mano, ne gipuonja mana adiera mag Muma.”

¹¹ Kaka Michael ne medo puonjore e wi Jehova, e kaka nomedo hero Jehova. Gima nomulo chunye ahinya ne en neno kaka Jehova kechoga jotichne. Bang’ kinde, nofwenyo ni ne dwarore ni otim lokruok maduong’ ahinya e ngimane. Owacho kama: “Nang’eyo ni weyo karate ne en lokruok maduong’ ma nonego atim. Kata kamano, mano e gima ne dhi moro chuny Jehova, kendo ne an gadier ni onge gimoro amora minyalo pim gi chiwruok ne Nyasaye.” Michael nong’eyo ni adiera en gima duong’ ahinya, kendo wachno nochwale mondo otim lokruoge madongo e ngimane.​—Jak. 1:25.

12-13. Ere kaka adiera mag Muma nokonyo Mayli?

¹² Muma konyowaga neno kaka adiera en gima duong’ kuom pimo adiera gi taya ma rieny e mudho. (Zab. 119:105; Efe. 5:8) Nyaminwa Mayli ma wuok e piny Azerbaijan morga ahinya sama oparo kaka Wach Nyasaye osekonye. Nodongo e ot ma ji ne lemo e dinde mopogore opogore. Wuon-gi ne en Ja-Islam, to min-gi ne lemo e din mar Jo-Yahudi. Owacho kama: “Kata obedo ni ne an gadier ni Nyasaye nitie, pod ne nitie penjo moko ma ne chando chunya ahinya. Napenjoraga ni, ‘Ang’o momiyo Nyasaye nochueyo dhano? Ang’o momiyo ng’ato onego ochandre achanda e ngimane duto kae to bang’e iwang’e e mach nyaka chieng’?’ To nikech jomoko wachoga ni gik moko duto timorega nikech dwach Nyasaye, napenjoraga ni, ‘Be Nyasaye e ma miyoga gik maricho timore, kae to bang’e obedo mamor sama oneno kaka ji chandore?’”

¹³ Mayli nodhi nyime manyo dwoko mag penjo ma ne chandego. Bang’ kinde, noyie puonjore Muma mobedo Janeno mar Jehova. Owacho kama: “Gik ma napuonjora e Muma nomiyo achako bedo mamor gadier. Adiera mag Muma ma nolerna nomiyo abedo gi chuny mokue.” Mana kaka Mayli, waduto dwarore ni wapak Jehova, ma en Nyasaye ma ‘noluongowa kogolowa e mudho kendo rwakowa e ler mare miwuoro.’​—1 Pet. 2:9.

14. Ere kaka wanyalo medo hero adiera? (Ne sanduk ma wiye wacho ni “ Gik Mamoko Mipimogo Adiera mag Muma.”)

¹⁴ Mago gin mana moko kuom ranyisi matin ma nyiso kaka adiera en gima duong’. Samoro inyalo paro ranyisi mamoko ma jiwo wachno. Donge inyalo timo chenro mondo e  puonjruok ma mari iwuon imed nono weche mamoko momiyo onego waher adiera? Kaka wamedo hero adiera, e kaka wabiro medo bedo gi gik mang’eny momiyo wahero adiera.

15. Achiel kuom yore ma wanyalo nyisogo ni wahero adiera en mane?

¹⁵ Wanyalo nyiso ni wahero adiera kuom puonjruok Muma pile, kendo somo bugewa ma lero Muma. Kata bed ni wasebedo e adiera kuom higni adi, pod wan gi gik mang’eny ma wanyalo puonjore. Ohinga mar Jarito mokwongo ma nogo e dho Kisungu nopimo adiera gi maua ma jaber manie kind buya mang’eny. Mondo ng’ato oyud maua kaka mano, chuno ni nyaka omanye gi kinda e kind buyago. To ka oyude, ok onego omor mana gi maua achielno, to dwarore ni odhi nyime manyo maupe mamoko. Puonjruok dwaro kinda, kata kamano, ber ma ng’ato yudo ok nyal pim gi kinda motimono.

16. En yo mane ma iseyudo ka tiyoni maber sama itimo puonjruok ma mari? (Ngeche 2:4-6)

¹⁶ Thothwa ok oheroga somo kata puonjruok. Kata kamano, Jehova nyisowa ni wasik  ka ‘wamanyo adiera kendo wamanye gi kinda,’ mondo wamed winjo tiend adiera e yo matut. (Som Ngeche 2:4-6.) Sama watimo kinda kamano, wan e ma wayudoga ber. Owadwa moro ma nyinge Corey wacho ni sama osomo Muma, oketoga pache duto e wes achiel ka pok odhi e wes machielo. Owacho kama: “Asomoga weche moler piny, ndiko motudore gi wes ma asomono, kendo atimoga nonro momedore. Puonjruok e yo ma kamano miyo apuonjoraga weche mathoth ahinya!” Bed ni watiyo gi yo kaka mano e puonjruok kata watiyo gi yo machielo, sama waketo thuolo tenge kendo watimo kinda mondo wapuonjre adiera e yo matut, wanyiso ni waneno adiera kaka gima duong’.​—Zab. 1:1-3.

17. Tiend dak ka luwore gi adiera en ang’o? (Jakobo 1:25)

¹⁷ En adier ni puonjruok adiera kende ok oromo. Mondo adiera okonywa, nyaka wadag ka luwore gi adiera, tiende ni, nyaka wati gi adiera e ngimawa. Mano e ka adiera biro miyo wabed mamor. (Som Jakobo 1:25.) Ere kaka wanyalo nyiso ni wadak ka luwore gi adiera mwapuonjore? Owadwa moro nowacho ni achiel kuom yore ma nyalo konyowa timo kamano en nonore wawegi mondo wang’e kuonde ma watimoe maber kod kuonde ma nyalo dwarore ni watimie dongruok. Jaote Paulo nowacho niya: “Kata bed mana ni wasetimo dongruok e okang’ marom nade, wadhiuru nyime wuotho kaka dwarore e yo achielno.”​—Fil. 3:16.

18. Ang’o momiyo dwarore ni watim kinda mondo ‘wadhi nyime wuotho e adiera’?

¹⁸ Temie paro ber ma wayudoga sama watimo kinda mondo ‘wadhi nyime wuotho e adiera”! Ok wadagga adaga e ngima maber kende, to wamiyoga nyaka chuny Jehova mor. (Nge. 27:11; 3 Joh. 4) Kuom adier, donge wan gi gik mang’eny ma miyo onego waher adiera kendo dak ka luwore gi adierano?