1. Ang’o momiyo Yesu nokwayo Jehova mondo orit jolupne?

 E OTIENO mogik ka ne pok Yesu otho, nokwayo Wuon-gi wach moro makende. Nokwayo Jehova mondo orit jolupne. (Joh. 17:15, 20) En adier ni Jehova osebedo ka rito joge kinde duto. Kata kamano, Yesu nong’eyo ni jolupne ne dhi yudo akwede mager koa kuom Satan. Yesu nong’eyo bende ni ne dhi dwarore ni jolupne okwa Jehova mondo okonygi kedo gi monj mag Satan.

2. Ka luwore gi Zaburi 33:18-20, ang’o momiyo ok onego waluor chandruoge?

² Piny marach ma Satan lochoeni osebedo ka kelo chandruoge mang’eny ne Jokristo madier e kindegi. Waromoga gi gik ma nyalo nyoso chunywa kendo ma nyalo temo yie ma wan-go kuom Jehova. To mana kaka wabiro neno e sulani, ok onego waluor gimoro amora. Jehova ritowa. Oneno chandruoge ma waromogo, kendo oikore konyowa nyagore kodgi kinde duto. Wanonuru ane ranyisi moko ariyo manie Muma ma nyiso kaka “wang’ Jehova ng’iyo jo moluore.”​—Som Zaburi 33:18-20.

3. Gin kinde kaka mage ma wanyaloga winjo ka wan kendwa?

³ Kata obedo ni wan gi owete gi nyimine mang’eny molworowa, nitie sama wanyalo winjoga ka wan kendwa. Kuom ranyisi, rowere nyaloga winjo ka gin kendgi sama gilero yiegi e nyim jo klasgi e skul, kata sama gidar ma gidhi e kanyakla manyien. Moko kuomwa winjoga ka piny ochamogi. Nitie seche ma wanyalo bedo gi parruok ahinya mi wachak neno ni wan e ma onego waked mondo wagol gik ma miyowa parruokgo. Wanyalo luor nyiso jomamoko kaka wawinjo e chunywa nikech samoro waparo ni ok ginyal ng’eyo kaka wawinjo. Bende, nitie sama wanyalo parore ka be nitie ng’at ma dewowa  kuom adier. Winjo ka wan kendwa nyalo miyo wapar ni wan joma nono ahinya, kendo mano nyalo medonwa parruok mang’eny. Jehova ok dwarga ni wapar ni wan kendwa. Ang’o momiyo wawacho kamano?

4. Ang’o momiyo janabi Elija nowacho ni en kende e ma nodong’?

⁴ Ne ane ranyisi mar jatich Jehova machon ma niluongo ni Elija. Noringo kuom odiechienge mokalo 40 nikech Jezebel noramo ni nodhi nege. (1 Ru. 19:1-9) E gikone, ka ne en kende e rogo moro, noywak ne Jehova niya: ‘An kenda e janabi modong’.’ (1 Ru. 19:10) Kata kamano, pod ne nitie jonabi mamoko ma nodong’ e piny Israel. Kuom ranyisi, Obadia noyudo osereso jonabi 100 mondo kik Jezebel oneggi. (1 Ru. 18:7, 13) Kare ang’o momiyo Elija ne winjo ka en kende? Dibed ni noparo ni jonabi duto ma Obadia noreso nosetho? Dibed ni nowinjo ka en kende nikech onge ng’ato ang’ata ma ne oseriwo lwedo lamo mar Jehova, kata bang’ ka Jehova nosenyiso e Got Karmel ni en e Nyasaye madier, to ok Baal? Dibed ni noparo ni onge ng’ato ang’ata ma nong’eyo kaka ngimane ne ni kama rach, kata ni onge ng’at ma ne dewe? Muma ok nyiswa weche duto ma ne chando pach Elija e kindego. Kata kamano, gima wan-go gadier en ni Jehova nong’eyo gimomiyo Elija ne winjo ka en kende, kendo ni Jehova nong’eyo yo maber ma nonyalo konyogo Elija.

5. Ang’o ma Jehova notimo ne Elija ma nokonye neno ni ok ne en kende?

⁵ Jehova notiyo gi yore mopogore opogore e konyo Elija. Nojiwo Elija mondo owach gima ne nie chunye. Nopenjo Elija nyadiriyo niya: “Itimo ang’o ka?” (1 Ru. 19:9, 13) Sa asaya ma Elija ne wuoyo, Jehova ne chikone ite. Jehova nodwoko Elija kuom nyise ni ne en kode kendo ni en Nyasaye ma nigi teko. Bende, nonyiso Elija ni pod ne nitie jotichne mang’eny e piny Israel. (1 Ru. 19:11, 12, 18) Onge kiawa ni Elija nowinjo ka ofuong’ore bang’ nyiso Jehova weche duto ma ne chando chunye kendo neno kaka Jehova  nodwoke. Jehova nomiyo Elija migepe mamoko makende. Nonyise ni odhi owal Hazael obed ruodh Siria, owal Jehu obed ruodh Israel, kendo owal Elisha obed janabi. (1 Ru. 19:15, 16) Kuom miyo Elija migepego, Jehova nokonye keto pache kuom gik mabeyo. Bende, Jehova nomiye Elisha mondo okonye. Ere kaka Jehova nyalo konyi sama iwinjo ka in kendi?

6. Gin ang’o minyalo kwayo Jehova sama iwinjo ka in kendi? (Zaburi 62:8)

⁶ Jehova kwayi mondo iwuo kode e lamo. Oneno gik moko duto ma inyagorigo kendo odwaro ni ibed gadier ni obiro winji sa asaya ma iwuoyo kode. (1 The. 5:17) Obedoga mamor ahinya sama jotichne wuoyo kode. (Nge. 15:8) En ang’o minyalo kwaye sama iwinjo ka in kendi? Olne gik moko duto manie chunyi mana kaka Elija notimo. (Som Zaburi 62:8.) Nyise gik ma chando pachi, kendo inyise kaka gigo miyo iwinjo. Kwaye mondo okonyi nyagori maber gi parruok ma in-go. Kuom ranyisi, ka po ni iwinjoga ka in kendi kendo kiluor sama idwa lendo e skul, kwa Jehova mondo omiyi chir mar lendo. Inyalo kata kwaye mondo omiyi rieko mar lero yieni e yo maber. (Luka 21:14, 15) Ka po ni samoro ikedo gi paro moko ma miyo iwinjo e chunyi ni in ng’at manono, kwa Jehova mondo okonyi iwuo gi Jakristo moro motegno e wi wachno. Inyalo kwayo Jehova mondo okony Jakristo ma idhi wuoyogono mondo owinj tiend gik ma idhi nyise. Ol ne Jehova weche duto manie chunyi kendo ine kaka odwoko lamogi, kae to yie mondo jomamoko okonyi. Timo kamano biro konyi neno ni ok in kendi.

7. En ang’o ma ipuonjori kuom ranyisi mar Mauricio?

⁷ Jehova osemiyo jotichne duto tich maber mondo gitim. Inyalo bedo gadier ni omorga ahinya sama oneno ka watimo kinda mondo wachop migepewa e kanyakla kod e tij lendo. (Zab. 110:3) Ere kaka bedo modich e tich ma Jehova omiyowa nyalo konyowa sama wawinjo ka wan kendwa? Ne ane ranyisi mar owadwa moro ma rawera miluongo ni Mauricio. * Mana mapiyo bang’ ka nosebatis Mauricio, achiel kuom osiepene machiegni ahinya nochako weyo adiera mosmos. Mauricio wacho kama: “Neno ka osiepnano weyo adiera nomiyo an bende achako parora ka be nadhi siko ka atiyo ne Jehova kendo dak ka luwore gi kaka nasesingorane. Nawinjo ka an kenda kendo naparo ni onge ng’ato ang’ata ma ne nyalo ng’eyo gik ma ne chando chunya.” En ang’o ma nokonyo Mauricio? Owacho kama: “Nachako tiyo gi thuolo momedore e tij lendo. Mano nokonya mondo kik aket pacha kuom paro maricho ma ne chandago.  Sa asaya ma nalendo gi Jokristo wetena, nawinjo ka amor kendo neno ni ok an kenda. Kata obedo ni seche moko ok wanyal lendo gi Jokristo wetewa aching’, pod ginyalo jiwowa ahinya sama walendo kodgi e yor simu kata barupe.” En ang’o machielo ma nokonyo Mauricio? Omedo wacho kama: “Nabedo modich bende e timo tije mag kanyakla. Naikoga maber migepe ma ne imiyaga mag jopuonjre e chokruok ma kor juma. Migepego nokonya neno kaka Jehova kod Jokristo wetena nogena.”

8. Chandruoge nyalo miyo wawinj nade?

⁸ Waseromo gi chandruoge mang’eny e ndalo mag gikogi. (2 Tim. 3:1) Kata kamano, nitie chandruoge moko ma nyaloga yudowa apoya. Wanyalo po ka weche yuto obedonwa matek, tuo moro ogoyowa, kata walalo osiepwa kata watwa moro e tho. Sama chandruoge ma kamago oyudowa, chunywa nyalo nyosore ahinya, to moloyo ka po ni chandruogego obironwa moluwore oluwore, kata gibironwa mang’eny dichiel. Kata kamano, ng’e ni Jehova ritowa kendo onyalo konyowa kedo gi chandruok moro amora mwanyalo romogo.

9. Wach ane moko kuom chandruoge ma ne Ayub oromogo.

⁹ Ne ane kaka Jehova nokonyo Ayub jatichne machon. Noromo gi chandruoge mang’eny, mana kuom kinde machuok. E odiechieng’ achiel kende, Ayub nolalo jambe duto, noneg jotichne, to marachie moloyo, nyithinde duto notho. (Ayub 1:13-19) Mapiyo nono, ka ne pod okuyo kuom gik ma nosetimorego, tuo moro marach nogoye. (Ayub 2:7) Ayub noromo gi chandruoge madongo mochopo kama noywak niya: “Ajok gi ngimanani; ok adwar bedo mangima kendo.”​—Ayub 7:16.

10. Ere kaka Jehova nomiyo Ayub gik ma ne dhi konye nano e bwo chandruoge? (Ne picha manie nyim gaset.)

¹⁰ Jehova ne ok oweyo Ayub. Nomiyo Ayub gik moko duto ma ne nyalo konye nano e bwo chandruoge ma noromogo. Jehova nowuoyo gi Ayub, moparone kaka en Nyasaye ma riekone tut kendo ma dewoga chuechne duto. Nowuoyo kode e wi le moko ma nigi teko mang’eny ahinya. (Ayub 38:1, 2; 39:9, 13, 19, 27; 40:15; 41:1, 2) Bende, notiyo gi Elihu ma ne hike pod tin e jiwo Ayub kendo hoye. Elihu noparo ne Ayub ni kinde duto Jehova guedhoga jotichne mochung’ motegno e bwo sand. Jehova notiyo gi Elihu e rieyo Ayub. Elihu nokonyo Ayub golo pache kuome owuon, kendo nokonye neno ni Jehova ma en Jachuech mar polo gi piny, ne duong’ moloyo Ayub. (Ayub 37:14) Bende, Jehova nomiyo Ayub migawo moro. Nonyise ni olem ne osiepene adek ma notimo richo. (Ayub 42:8-10) Ere kaka Jehova tegowaga e kindegi sama waromo gi chandruoge?

11. Muma hoyowaga nade sama wan e bwo tembe?

¹¹ E kindegi, Jehova ok wuoga kodwa achiel kachiel kaka notimo gi Ayub, to owuoyoga kodwa kokalo kuom Wachne ma en Muma. (Rumi 15:4) Ohoyowaga kuom miyowa geno maber mar kinde mabiro. Ne ane moko kuom ndiko ma hoyowaga sama waromo gi chandruoge. E Muma, Jehova jiwowaga ni onge gimoro amora kata chandruok moro amora ma nyalo ‘pogowa gi hera mare.’ (Rumi 8:38, 39) Bende, onyisowaga ni en ‘machiegni gi ji duto ma luonge’ e lamo. (Zab. 145:18) Jehova nyisowaga ni ka wageno kuome, to wanyalo chung’ motegno e bwo chandruok moro amora, kendo wabiro siko ka wamor kata sama wan e bwo tem.  (1 Kor. 10:13; Jak. 1:2, 12) Wach Nyasaye bende paronwa ni tembe ma waromogo gin mana mag kinde machuok kopim gi ngima mochwere ma Nyasaye osingonwa. (2 Kor. 4:16-18) Bende, Jehova osenyisowa ni obiro golo gik ma kelonwa chandruok, tiende ni Satan Jachien kod lange. (Zab. 37:10) Be isemako ndiko moko ma nyalo hoyi sama iromo gi chandruoge e kinde mabiro?

12. Ang’o ma Jehova dwaro ni watim mondo Muma okonywa?

¹² Jehova dwaro ni waket thuolo moro tenge mar puonjruok Muma pile, kendo paro matut kuom gik ma wapuonjore. Sama watiyo gi gik ma wapuonjore, yiewa medo bedo motegno, kendo wamedo sudo machiegni gi Wuonwa manie polo. Mano miyowa teko mar nano sama waromo gi tembe. Bende, Jehova miyoga joma ogeno Wachne roho maler. Rohono nyalo miyowa “teko mokalo ma pile” mondo wanan e bwo tem moro amora.​—2 Kor. 4:7-10.

13. Ere kaka chiemb chuny ma “jatich mogen kendo mariek” miyowa konyowaga nano e bwo tembe?

¹³ Jehova osebedo ka konyo “jatich mogen kendo mariek” mondo olosnwa buge, vidio, kod thumbe ma nyalo konyowa bedo gi yie motegno kendo siko ka waneno. (Mat. 24:45) Dwarore ni wati maber gi chiemb chuny ma wayudo. Nyaminwa moro modak e piny Amerka yande owacho kaka omor gi chiemb chuny mogundho ma wan-go. Nowacho kama: “Kuom higni 40 ma asebedo ka atiyonego Jehova, aseromo gi weche mopogore opogore mosetemo yiena.” Kuom ranyisi, nyaminwano nowacho ni dereva moro momer nonego kwargi, tuo moro marach nonego jonyuolne, kendo en owuon osekedo nyadiriyo gi tuo mar kansa. Ang’o ma nokonye nano e bwo chandruogego duto? Owacho kama: “Jehova osebedo ka nyisa ng’wono kinde duto. Chiemb chuny mosebedo komiya kokalo kuom jatich mogen kendo mariek osekonya ahinya. Chiemb chunyno miyo awinjo e chunya mana kaka Ayub nowinjo, ka nowacho niya: ‘Nyaka thona, abiro siko ka an ng’at matir!’”​—Ayub 27:5.

14. Ere kaka Jehova tiyoga gi owete gi nyimine e konyowa sama waromo gi tembe? (1 Jo-Thesalonika 4:9)

¹⁴ Jehova osebedo ka tiego joge mondo ginyis jowetegi hera kendo gihogi sama gikalo e chandruoge. (2 Kor. 1:3, 4; som 1 Jo-Thesalonika 4:9.) Mana kaka Elihu ma nokonyo Ayub, owete gi nyimine osekonyowa siko ka  wamakore gi Jehova sama waromo gi chandruoge. (Tich 14:22) Kuom ranyisi, ne ane kaka owete gi nyimine ma ne ni e kanyakla achiel gi Nyaminwa Diane nojiwe ka ne oyud jaode gi tuo moro marach. Owacho kama: “Weche ne ok yotnwa ahinya. Kata kamano, ne waneno kaka Jehova nonyisowa herane kod tekone e kinde ma weche ne tekgo. Owete gi nyimine ma wuok e kanyaklawa nokonyowa ahinya. Ne gilimowa, ne gigoyonwa simbe, kendo ne gikwakowa, to mago e gik ma nokonyowa nano. Nikech aonge mtoka, owete gi nyimine ne temoga matek mondo achop e chokruoge kendo adhi e tij lendo sa asaya ma thuolo noneno.” To mano kaka en dhialro maduong’ bedo e kind owete gi nyimine ma nyiso hera ma kamano!

15. Ang’o momiyo wan gadier ni wanyalo nyagore gi tem moro amora ma wanyalo romogo?

¹⁵ Waduto wabiro romo gi tembe. Kata kamano, mana kaka wasepuonjore, Jehova ok bi weyowa sama itemowa. Kinde duto Jehova ritowaga mana kaka wuoro ma jahera ritoga nyithinde. En-ga machiegni kodwa, kendo oikore chikonwa ite kendo konyowa. (Isa. 43:2) Wan gadier ni wanyalo nyagore gi chandruok moro amora nikech Jehova osemiyowa gimoro amora ma wadwaro ma nyalo konyowa nano. Osemiyowa mich mar lamo, Muma, chiemb chuny mogundho, kod owete gi nyimine e piny ngima, moikore konyowa sama wachandore.

16. Ere kaka wanyalo siko e bwo arita mar Jehova?

¹⁶ To mano kaka wagoyo erokamano ne Wuonwa manie polo kuom ritowa! “Chunywa mor kode.” (Zab. 33:21) Wanyalo nyiso ni wamor gi hera mar Jehova kuom tiyo gi gik moko duto mosemiyowa mondo okonywa rito winjruokwa kode. Dwarore ni wan bende watim karwa mondo Jehova osik ka ritowa. E yo machielo, ka po ni wadhi nyime timo duto mwanyalo mondo wawinj Jehova kendo timo gik makare e wang’e, obiro ritowa nyaka chieng’!​—1 Pet. 3:12.