INYALO pim joma ohero puonjore Muma gi joma manyo dhahabu. Jopuonjre ma kamago onego otim kinda kendo gidhi nyime nono Wach Nyasaye e yo matut mondo giyud rieko. En ang’o ma wanyalo puonjore kuom yore adek ma imanyogo dhahabu?

Wawach ni iwuotho e bath aora kae to ineno kidi moro matin ma nyilni. Ikulori kae to ikwanye kimor sama ifwenyo ni kare en dhahabu. Otin maloyo wi kibrit kendo yude tek moloyo diamond ma beche ni malo. Ibedo mamor ahinya kendo ichako manyo kabe diyud mamoko machiegni kanyo.

E yo machalo kamano, samoro inyalo paro chieng’ ma Janeno mar Jehova moro ne olimi ma owuoyo kodi e wi geno ma yudore e Muma. Samoro inyalo kata paro adiera ma nikwongo puonjori ma inyalo mana pim gi dhahabu. Samoro mano notimore ka nikwongo neno e Muma ni Nyasaye nyinge Jehova. (Zab. 83:18) Kata samoro ka nipuonjori ni inyalo bedo osiep Jehova. (Jak. 2:23) Ne ifwenyo ni iyudo gimoro maber moloyo dhahabu! Samoro mago duto nomiyo igombo yudo weche momedore.

Ng’injo mag dhahabu seche moko chokorega e bath aoche matindo kata aoche madongo. Ng’injo mag dhahabu ma kamago kikorega gi chuodho. Higa ka higa, joma manyo dhahabu gi kinda yudo kilo modhuro mag dhahabu ma ka giuso to giyudo pesa mang’eny.

Ka ne ichako puonjori Muma gi Joneno mag Jehova, ne ichal ng’at ma yaro chuodho moting’o dhahabu mang’eny. Kaka ne imedo paro matut kuom ndiko ma nipuonjori, mano nomiyo imedo ng’eyo wach Nyasaye e yo matut. Kaka ne imedo winjo tiend adiera ma nipuonjorigo, nimedo sudo machiegni gi Jehova kendo here kigeno yudo ngima mochwere.—Jak. 4:8; Juda 20, 21.

Mana kaka joma manyo dhahabu e chuodho, in bende nitimo kinda kimanyo adiera  manie Muma. Bang’ puonjori adiera madongo, mano nochwali ichiwri ne Jehova mondo obatisi.—Mat. 28:19, 20.

Ng’at ma manyo dhahabu nyalo yudo ng’injo mag dhahabu e kite ma noleny chon mokuwe. Moko kuom kitego ka oto moregi to inyalo yud dhahabu e igi. King’iyo kitego gi oko, ok yot neno dhahabu e igi. Nikech ang’o? Mano en nikech kite ma kamago ma romo kilo 1000, nyalo ting’o dhahabu ma romo gram 10 kende! Kata kamano, ng’at ma manyo dhahabu to biro timo kinda mondo ogol dhahabu ei kitego.

E yo ma kamano, kinda dwarore bang’ ka ng’ato oseyudo “puonj ma gin mana mise mag ng’eyo Kristo.” (Hib. 6:1, 2) Pod dwarore ni itim kinda mondo imed puonjori gik manyien sama inono Muma. Kuom mano, inyalo timo ang’o mondo puonjruok ma mari omed konyi, kata obedo ni samoro isebedo ka ipuonjori Muma kuom higni mogwaro?

Dhi nyime bedo gi siso mar puonjruok. Med nono kata mana weche matindo tindo ma tiendgi ok yot winjo. Kidhi nyime timo kinda, ibiro yudo rieko ma yudore e Ndiko ma ipimo mana gi dhahabu, kendo riekono biro tayi. (Rumi 11:33) Ti maber gi gige timo nonro ma yudore e dhou mondo imed ng’eyo Ndiko e yo matut. Many dwoko mag penjo ma in-go e Ndiko ma ok iwe. Penj jomamoko mondo onyisie Ndiko kod sula ma osekonyogi kendo jiwogi. Nyis jomoko weche mabeyo ma iseyudo sama ipuonjori Wach Nyasaye.

En adier ni gima duong’ ma miyo ipuonjori ok en mana medo ng’eyo mari e wi Ndiko kende. Jaote Paulo nochiwo siem ni “ng’eyo kelo sunga.” (1 Kor. 8:1) Omiyo, tim kinda mondo imed bolori kendo ibed gi yie motegno. Timo lamo mar joot kod puonjruok Muma ma ok bare biro miyo idag kaluwore gi chike mag Jehova kendo biro chwali mondo ikony jomamoko. E wi mago duto, ibiro bedo mamor nikech iseyudo gimoro maber moloyo dhahabu.—Nge. 3:13, 14.