Gichung’ ne malaike manie polo ma ne otigo e ketho Jerusalem kendo ma ibiro tigo e ketho piny marach mar Satanni e Har-Magedon. Ang’o momiyo oler puonjni mopogore gi kaka ne ilere chon?

Ka ne Ezekiel oseneno gik ma richo ma joma nong’anyo ne Nyasaye ne timo e Jerusalem ka pok okethe e higa mar 607 Ka Kristo Podi, ne oneno fweny ma nyiso gik ma ne dhi timore ka pok oketh Jerusalem. E fwenyno, noneno chwo auchiel moting’o ligangla mag nego ji. E kind jogo bende, noneno ng’at “moruakore gi bafta” kendo moting’o ‘tung’ ma jandiko kanoe wino.’ (Eze. 8:6-12; 9:2, 3) Nonyis ng’atno mondo odhi e dalano duto kendo ‘oket ranyisi e lela wang’ joma parore, kendo ma ywak nikech weche duto modwanyore ma timore e iye.’ Kae to, ne onyis chwo ma ne oting’o ligangla ni odonj e dalano mondo gineg ji duto ma ne ok oketnegi ranyisi kata alama e lela wang’gi. (Eze. 9:4-7) Fwenyni puonjowa ang’o, to ng’at ma oting’o tung’ ma jandiko kanoe wino en ng’a?

Wechego nokor e higa mar 612 Ka Kristo Podi, to ne gikwongo timore ka jolweny mag Babilon oketho Jerusalem. Mano notimore higni abich bang’e ka ne osekor wechego. Kata obedo ni Jo-Babilon ma ne lamo nyiseche manono e ma noketho Jerusalem, Jehova e ma notiyo kodgi. (Yer. 25:9, 15-18) Notiyo kodgi mondo gikel kum kuom jotichne ma nong’anyo. Kata kamano, kethruogno ne ok dhi tim abal ka imuomruok kuom ji. Ne ok dhi neg joma beyo kaachiel gi joma richo. Jehova noreso Jo-Yahudi ma ne ok odonjore e timbe modwanyore ma ne timore e dala mar Jerusalem.

Ezekiel ne ok otigo e keto alama e lela wang’ ji kata ketho ji. Kar mano, malaike e ma ne otayo nek ma ne otim Jerusalem. Kokalo kuom fwenyni, wanyalo neno kaka gik moko timore e polo. Jehova nonyiso malaikene mondo ochan kaka ne idhi keth Jerusalem kendo mondo gires joma kare. *

Chon, ka ne walero kaka wechego chopo e kindegi ne wawachoga ni ng’at ma oting’o tung’ mar wino ochung’ ne Jokristo mowal ma pod ni e piny. Ne waparo ni joma rwako wach ma walandonegi iketonegi alama ma biro miyo gitony. Kata kamano, higni matin mosekalo, osenenore maler ni onego waler puonjni e yo mopogore gi kaka ne walere chon. Kaluwore gi gima ondik e Mathayo 25:31-33, Yesu e ma ng’ado ne ji bura. Obiro ng’ado bura mogik e kinde masira maduong’ ka opogo joma beyo ma ipimo gi rombe ma biro tony, gi joma ibiro kethi ma ipimo gi diek.

Kaluwore gi kaka olernwa wachni, en ang’o ma wanyalo puonjore e fweny ma Ezekiel nonenono? Nitie puonj abich kama:

1.  Ka ne pok oketh Jerusalem, Ezekiel gi Jeremia ne ochiwo siem ka giwacho kum ma ne dhi biro e dalano, mana kaka Isaya bende ne osetimo motelonegi. E kindegi, Jehova tiyo gi owete moko manok manie kweth mar Jokristo mowal mondo opidh joge gi chiemb chuny kendo ochiw siem ne jomamoko ka pok masira maduong’ ochakore. Mano nyiso ni jood Kristo duto chiwo siem ne jomoko.—Mat. 24:45-47.

2.  Ezekiel ne ok oketo alama e lela wang’ joma ne dhi tony e ndalono, mana kaka jotich Jehova bende ok tim e kindegi. Gin gitero mana ote  mowuok kuom Jehova ne ji sama gin e tij lendo ka itayogi gi malaike.—Fwe. 14:6.

3.  E ndalo Ezekiel, onge ng’ama noketne alama mineno e lela wang’e, mana kaka e kindegi bende. Ang’o ma ji onego otim mondo oketnegi alama e yor ranyisi mondo gibi gitony? Onego girwak wach ma ilandonegi, gibed gi kido mag Jokristo, gichiw ngimagi ne Jehova, kendo gikony owete Kristo. (Mat. 25:35-40) Joma timo gigo biro yudo alama mar tony e kinde masira maduong’ ma koro okayo.

4.  E kindegi, jal ma nigi tung’ moting’o wino ochung’ ne Yesu Kristo ma keto alama kuom joma biro tony. Oganda mang’ongo biro yudo alama margi e kinde ma ibiro ng’adnegi bura ni gin rombe e kinde masira maduong’. Mano biro miyo giwinjre yudo ngima mochwere e piny ka.—Mat. 25:34, 46. *

5.  E kindegi, chwo auchiel ma nigi ligangla mag nego ji ochung’ ne jolweny mag Yesu manie polo ka Yesu owuon e jatendgi. Machiegnini, gibiro ketho ogendni kendo tieko gik maricho duto.—Eze. 9:2, 6, 7; Fwe. 19:11-21.

Ng’eyo puonj madongogi medo tego yiewa ni Jehova ok keth joma beyo sama oketho joma richo. (2 Pet. 2:9; 3:9) Puonjno bende paronwa gimomiyo tij lendo en gima duong’ ahinya e kindewagi. Dwarore ni ng’ato ka ng’ato omi siem ka giko pok ochopo.—Mat. 24:14.