1. Ere kaka onego wane yie ma Jokristo nigo?

BEDO gi yie en gima duong’ ahinya kuom Jokristo. Ok ji duto ma nigi yie. (2 The. 3:2) Kata kamano, Jehova osemiyo ng’ato ka ng’ato ma lame yie. (Rumi 12:3; Gal. 5:22) Jogo duto ma nigi yie onego obed mamor ni gin gi yie.

2, 3. (a) Gin gueth mage ma ng’at man gi yie nyalo yudo? (b) Gin penjo mage ma wadwaro nono?

² Yesu Kristo nowacho ni Wuon mare manie polo ywayo ji ire kokalo kuome. (Joh. 6:44, 65) Bedo gi yie kuom Yesu miyo inyalo wene ng’ato richone. Timo kamano miyo ng’ato thuolo mar bedo gi winjruok maber kendo mosiko gi Jehova. (Rumi 6:23) Be nitie gimoro amora ma maber ma ne watimo mondo wabed gi thuolo ma jaber kamano? Nikech wan dhano ma joricho, gima wawinjore yudo en mana tho. (Zab. 103:10) Kata kamano, Jehova noneno gimoro maber kuomwa. Nikech ng’wonone mogundho, ne oyawo chunywa mondo warwak wach maber. Omiyo ne wachako bedo gi yie  kuom Yesu ka wan gi geno mar yudo ngima mochwere.—Som 1 Johana 4:9, 10.

³ Kata kamano, yie en ang’o kuom adier? Be ng’eyo ang’eya gik ma Nyasaye osetimonwa kod mobiro timonwa kinde ma biro nyiso ni wan gi yie? To maduong’ie moloyo, gin yore mage ma wanyalo nyisogo ni wan gi yie?

4. Ler ane gimomiyo bedo gi yie ok en mana ng’eyo gik ma Nyasaye osetimo kod mobiro timo.

⁴ Bedo gi yie ok en mana ng’eyo gik ma Nyasaye osetimo kod mobiro timo. Kar mano, yie en gima chwalo ng’ato mondo otim gik moko kaluwore gi dwach Nyasaye. Bedo gi yie kuom yo ma Jehova biro resowago bende chwalowa mondo waland ne jomoko wach maber. Jaote Paulo nowacho niya: “Ka ihulo e lela wachno manie dhogi iwuon ni Yesu en Ruoth, kendo ka inyiso yie ei chunyi ni Nyasaye ne ochiere a kuom joma otho, to ibiro resi. Nikech gi chuny, ng’ato nyiso yie eka obedo makare e wang’ Nyasaye, to gi dhok, ng’ato hulo e lela wach yieno eka oyudo warruok.”—Rumi 10:9, 10; 2 Kor. 4:13.

5. Ang’o momiyo bedo gi yie en gima duong’, to wanyalo timo nang’o mondo yiewa osik kotegno? Chiw ane ranyisi.

⁵ Nenore maler ni mondo wayud ngima mochwere e piny manyien, nyaka wabed gi yie kendo nyaka wateg yiewano. Tego yiewa inyalo pim gi olo ne yien pi. Yien mopidhi siko ka lokore kinde duto. Yienno nyalo ner ka oonge gi pi, to komachielo, onyalo dongo mobed maber koyudoga pi pile. To ka pi onge moromo chuth, gikone yienno biro two. Kamano e kaka yie ma wan-go chalo. Ka ok warito yiewa maber, obiro dok chien ma olal nono. (Luka 22:32; Hib. 3:12) To ka warito yiewa kaka dwarore, obiro dhi nyime “dongo moloyo” kendo obiro siko kotegno.—2 The. 1:3; Tito 2:2.

6. Gin yore mage ariyo ma Jo-Hibrania 11:1 lerogo yie?

⁶ Muma leronwa gima yie en e ndiko mar Jo-Hibrania 11:1. (Som.) Yie otudore gi gik moko ariyo ma ok wanyal neno gi wengewa: (1) “Gik migeno” to mago oriwo gik mosing ni biro timore e kinde mabiro to pok otimore kaka tieko piny marachni kod kelo piny manyien. (2) ‘Neno gik ma ok ne gi wang’.’ Wang’eyo ni Jehova Nyasaye, Yesu Kristo, kod malaike nitie kata obedo ni ok wanyal nenogi gi wang’wa kendo wang’eyo ni Pinyruoth locho e polo kata obedo ni ok wanene. (Hib. 11:3) Ere kaka wanyalo nyiso ni wan gi geno madier kendo ni wayie gi gik ma ok wane ma ileronwa e Muma? Wanyiso mano kokalo kuom wechewa gi timbewa, ma ka onge, to yiewa chalo ka nono.

7. Ranyisi mar Noa konyowa nade ng’eyo tiend bedo gi yie? (Ne picha manie chak sulani.)

⁷ Ndiko mar Jo-Hibrania 11:7 wuoyo e wi yie ma Noa ne nigo Ka “noseyudo siem moa kuom Nyasaye e wi gik ma ne pok one gi wang’, nonyiso ni noluoro Nyasaye kuom gero yie mondo oresgo joode.” Noa nonyiso ni en gi yie motegno ka nogero yie ma rang’ongo. Onge kiawa ni jirendene nopenje gimomiyo nogero yie ma radhayi kamano. Be Noa noling’ aling’a ma ok odwokogi kata be nodwokogi konyisogi ni giwere kode?  Ooyo! Yie motegno ma ne en-go nomiyo oyalonegi gi chir konyisogi kum ma Nyasaye ne dhi kelo. Nyalo bedo nonyisogi konwoyo achiel ka achiel weche ma Jehova nowachone niya: “Asechano ni mondo atiek dhano . . . nikech piny opong’ gi timbegi ma richo. Abiro kelo pi e piny mondo oneg gik mangima duto. Gimoro amora manie piny biro tho.” Bende, Noa nonyisogi ni mondo gitony, nyaka ne gitim gima Nyasaye nowacho ma en ‘donjo e yie.’ Omiyo, Noa nonyiso yie motegno kuom “yalo wach makare.”—Cha. 6:13, 17, 18, The Bible in Luo, 1976; 2 Pet. 2:5.

8. Jakobo nolero nade tiend bedo gi yie madier?

⁸ Jakobo bende nowuoyo e wi yie ka nondiko barua mare. Nondiko baruano mapiyo bang’ ka ne jaote Paulo oselero gima yie en. Mana kaka Paulo en bende nolero ni yie madier ma Jakristo nigo ok en mana yie ayiea gi gimoro to en yie minyiso gi tim. Nondiko niya. “Nyisa ane yieni ma onge gi tim, to an abiro nyisi yiena ma nigi tim.” (Jak. 2:18) Jakobo nonyiso pogruok mantie e kind yie ayiea gi gimoro kod bedo gi yie madier. Jochiende oyie ni Nyasaye nitie, kata kamano, ok giketo yie margi  kuome nikech gikwedo dwache. (Jak. 2:19, 20) Jakobo nowuoyo e wi Ibrahim ma en jal ma ne nigi yie motegno ka nopenjo kama: “Donge ne okwan Ibrahim wuonwa kaka ng’at makare kokalo kuom gik ma notimo, nikech nochiwo Isaka wuode e kendo mar misango? Inyalo neno kaka yiene ne otiyo kanyachiel gi timne, kendo timne nomiyo yieneno obedo malong’o chuth.” Kae to, mondo onyis ni yie nyaka nenre e tim, nomedo niya: “Mana kaka ringruok ma onge gi much ngima otho, e kaka yie ma onge gi tim bende otho.”—Jak. 2:21-23, 26.

9, 10. Ere kaka jaote Johana konyowa ng’eyo gimomiyo dwarore ni wabed gi yie?

⁹ Bang’ higni mokalo 30, jaote Johana nondiko Injili mare kod barupe adek. Be noyie gi yo ma jondik Muma mamoko nolerogo tiend bedo gi yie madier? Kuom ji duto ma nondiko Muma, en ema notiyo nyading’eny gi wach ma yudore e dho Grik ma iloko tiende ni “bed gi yie.”

¹⁰ Kuom ranyisi, Johana nowacho niya: “Ng’at ma nyiso yie kuom Wuod Nyasaye nigi ngima ma nyaka chieng’; to ng’at ma ok winj Wuowi ok none ngima, to mirimb Nyasaye siko kuome.” (Joh. 3:36) Yie ma Jokristo bedogo oriwo luwo gik ma Yesu nochiko. Kinde mang’eny, Johana notiyo gi weche mag Yesu mondo onyis ni bedo gi yie en gima onego odhi nyime.—Joh. 3:16; 6:29, 40; 11:25, 26; 14:1, 12.

11. Ere kaka wanyalo nyiso ni wagoyo erokamano kuom ng’eyo adiera?

¹¹ Wamor ni Jehova notiyo gi rohone maler mondo oelnwago adiera kendo okonywa bedo gi yie kuom wach maber. (Som Luka 10:21.) Kinde duto, onego wago ne Jehova erokamano kuom ywayowa ire kotiyo gi Wuode ma en “Jatelo Maduong’ moseket mar yiewa.” (Hib. 12:2) Mondo wanyis ni wagoyo erokamano nikech ng’wono ma Jehova nonyisowano, onego wadhi nyime tego yiewa kokalo kuom lamo kod puonjruok Muma.—Efe. 6:18; 1 Pet. 2:2.

12. Gin yore mage ma wanyalo nyisogo ni wan gi yie?

¹² Onego wadhi nyime bedo gi yie kuom gik ma Jehova osingonwa. Nyaka watim kamano e yore ma jomoko bende nyalo neno ayanga. Kuom ranyisi, onego wadhi nyime lando Pinyruodh Nyasaye kendo konyo ji obed jopuonjre Yesu. Bende onego wadhi nyime timo “gik mabeyo ne ji duto, to moloyo, ne joma wan-go e yie.” (Gal. 6:10) E wi mano onego watem matek mondo ‘walony kit dhano machon kod timbene,’ kendo bedo motang’ gi gimoro amora ma nyalo miyo winjruokwa gi Nyasaye odog chien.—Kol. 3:5, 8-10.

13. Ang’o momiyo bedo gi “yie kuom Nyasaye,” en gima dwarore ahinya, to ipime gi ang’o, to nikech ang’o?

¹³ Muma wacho niya: “Ka ng’ato onge gi yie, ok onyal moro Nyasaye e yo malong’o, nimar ng’at ma sudo ir Nyasaye nyaka bed gi yie ni entiere, kendo ni en jachiw-mich ne joma manye gi kinda.” (Hib. 11:6) Muma wacho ni “yie kuom Nyasaye” en achiel kuom gik ma loso “mise” ne ng’at ma dwaro bedo Jakristo. (Hib. 6:1) E miseno, Jokristo nyaka med kido mamoko ma dwarore ‘e wi yie margi’ mondo ‘giritre e hera mar Nyasaye.’—Som 2 Petro 1:5-7; Juda 20, 21.

14, 15. Mana kaka hera, ang’o momiyo yie en gima duong’?

 ¹⁴ Joma nondiko Muma nojiwo ahinya gimomiyo bedo gi yie en gima duong’ nikech ne giwuoyo e wi kidono nyading’eny. Onge kido machielo ma iwuoyo kuome mathoth maloyo yie. Be mano nyiso ni yie e kido maduong’ie moloyo ma dwarore kuom Jokristo?

¹⁵ Paulo nopimo yie gi hera ka nondiko niya: “Ka an gi yie motegno ahinya ma anyalo kata mana daro gode, to aonge gi hera, an kayiem nono.” (1 Kor. 13:2) Yesu nojiwo gimomiyo hero Nyasaye en gima duong’ moloyo ka ne odwoko ng’at moro ma ne openje niya: “En chik mane maduong’ie moloyo e Chik duto?” (Mat. 22:35-40) Hera miyo wabedo gi kido mang’eny mag Jokristo moriwo nyaka yie. Muma wacho ni hera ‘yie weche duto.’ Bedo gi hera miyo wayie gi weche duto ma Nyasaye nyisowa e Muma.—1 Kor. 13:4, 7.

16, 17. Ndiko wuoyo nade e wi yie kod hera, to mane maduong’ie mogik e kindgi, to nikech ang’o?

¹⁶ Hera gi yie gin kido ma dwarore, mano e momiyo joma nondiko Muma nowuoyo kuomgi nyadinwoya ka gitiyo kodgi kanyachiel e sentens. Paulo nojiwo Jokristo wetene ni ‘girwak yie gi hera kaka rageng’ mar akor.’ (1 The. 5:8) Petro nondiko niya: “Kata obedo ni ne ok [uneno Yesu] ngang’, uhere. Kata obedo ni wang’u ok nene gie sani, pod unyiso yie kuome.” (1 Pet. 1:8) Jakobo nopenjo Jokristo wetene mowal niya: “Donge Nyasaye noyiero joma odhier ka luwore gi wang’ pinyni mondo gibed momewo e yie, kendo gibed joma noyud pok mar Pinyruoth ma nosingo ne joma ohere?” (Jak. 2:5) Johana nondiko kama: “Ma e [chik Nyasaye]: ni wabed gi yie e nying Wuode Yesu Kristo kendo ni waherre e kindwa mana kaka nomiyowa chik.”—1 Joh. 3:23.

¹⁷ Kata obedo ni yie en gima duong’, e piny manyien, ok bi dwarore ni wadhi nyime bedo gi yie kuom gik ma Nyasaye osingonwa nikech gigo biro bedo ni osetimore. Kata kamano, hero Nyasaye kaachiel gi jowetewa en gima biro dhi nyime nyaka chieng’. Mano e momiyo Paulo nondiko niya: “Koro adekgi e ma siko: yie, geno, kod hera; to maduong’ moloyogi en hera.”—1 Kor. 13:13.

18, 19. En ranyisi mane maber mar yie ma waneno e kindewagi, to ng’ano mowinjore opaki nikech mano?

¹⁸ E kindewagi, jotich Jehova osebedo ka nyiso yie kuom Pinyruodh Nyasaye ma sani locho. Mano osemiyo owete gi nyimine ma kwan-gi okalo milion aboro obedo gi kuwe kod winjruok e kindgi. Kendo gin gi kido mamoko ma gin nyak mar roho maler. (Gal. 5:22, 23) To mano kaka riwruokwa nyiso maber ni hera kod yie gin kido madongo e ngima Jokristo!

¹⁹ Onge ng’ato ang’ata ma nyalo pakore ni en e momiyo gima kamano timore. Nyasachwa e ma timo mago duto. Mano osemiyo ‘Jehova obedo gi huma ma ok nyal lal, kendo obedo gi rapar mosiko nyaka chieng’.’ (Isa. 55:13, Luo, 1976) Wamor ni Nyasaye oseloso yo mondo ‘osereswa nikech yie marwa.’ (Efe. 2:8) Jehova biro medo konyo ji momedore mondo obed gi yie kuome, ma chop kama piny duto pong’ gi joma kare, mamor, ma winje, kendo ma pake. Wadhiuru nyime bedo gi yie kuom gik ma Jehova osingo!