“NE OBATISA ka an jahigni 15 kae to dweche auchiel bang’e ne abedo painia makonyo. Bang’ higa achiel, nabedo painia mapile. Ka natieko skund sekondar, ne akwayo mondo adhi alend kama jolendo mag Pinyruoth dwaroree ahinya. Ne adwaro wuok e taondwa ma nonyuolae kendo weyo dak gi dawa ma ne ok en Janeno. Nawinjo malit ahinya ka ne jarit-alwora onyisa ni nanyalo mana lendo e taondwa kanyo. Natemo geng’o mondo kik ong’e ni gima nonyisano ne ok omora. Chunya nonyosore kendo nadhi ka paro gimomiyo jarit-alwora nonyisa kamano. Nanyiso nyaminwa ma ne walendogago niya: ‘Aparo ni atimora mana ka Jona. Kata kamano, gikone Jona nodhi Nineve. An bende abiro mana lendo kama osemiyani.’

“Asebedo painia kuom higni ang’wen e taondwa kae kendo sani aneno ber mar timo kaka jarit-alwora nonyisa. Chandruok maduong’ ma ne an-go ne en bedo gi paro ma ok owinjore. Sani amor matek. Nitie dwe moro ma natayo jopuonjre mag Muma 24. To gima mora moloyo en ni nachako puonjora Muma gi dawa ma chon ne kwedo.”

Japuonjre Muma moro e piny Fiji ne nyaka yier e kind dhi e chokruok maduong’ kod tero chwore e nyasi mar paro chieng’ nyuol watgi moro. Chwore noyiene dhi e chokruogno. Nonyiso chwore ni ne obiro dhi e nyasino bang’e. Kata kamano, ka ne osea e chokruok ne ok odhi e nyasino nikech nong’ado ni mano ne nyalo miyo otim gimoro ma nyalo ketho winjruokne gi Nyasaye.

Ka ne chwore nie nyasino, nonyiso wedene ni chiege ne dhi biro bang’e kosea e “Chokruok mar Joneno.” Wedenego nodwoke niya: “Ok obi biro; Joneno mag Jehova ok timga nyasi mag paro odiechieng nyuol!” *

Gima iwuoro en ni chwor japuonjreno ne mor ahinya ni chiege nomakore gi puonj ma noyiego. Chung’ne motegno nomiyo oyudo thuolo mar lendo ne chwore kod jomamoko. Mano nokelo ber mane? Chwore noyie puonjore Muma kendo nochako dhi kode e chokruoge.