HIGA ka higa, ji mokalo milion auchiel dhiga kamoro moyang ma yudore e bungu moro man e piny Japan. Gidhiga nyaka kama iluongo ni Grand Shrine of Ise, kama nyasach chieng’ ma dhako mar din mar Shinto miluongo ni Amaterasu Omikami yudoree, kendo ji osebedo ka lame kuom higni ma dirom aluf ariyo. Joma dhiga lemo kanyo pwodhorega mokwongo kuom luoko lwetegi kod dhogi. Kae to sama gichung’ e nyim haiden ma en ot maduong’ mileme, gikulorega, gipamo, kendo gilamo nyasaye ma dhakono. * Din mar Shinto oyie ne joge mondo odhi e dinde mamoko, kendo nitie Jo-Budha, Jokristo, kod jomamoko ma nenoga ni onge richo moro amora ka gidhi lamo kama oyangno.

Thoth dinde madongo e piny niga gi kuonde ma giyango kaka kuonde maler mag lamo, * kendo ji mathoth dhiga kuondego. E pinje ma ji mathoth gin Jokristo, nitiere kanise kod kuonde moyang milamoe Yesu, Maria, kod joma iluongo ni jotakatifu. Kuonde moko to yudorega kama gimoro notimore e Muma, kata miwacho ni “hono moro osetimoree” e kindegi, kata kama okanie gik din machon. Ji mathoth dhiga kuonde moyang ne lamogo nikech gin gi yie ni ibiro winj kwayo maggi mana ka gidhi kuonde malergo. Jomoko neno ni chopo kuondego e yo maduong’ie mogik mar nyiso kaka gichiwore ne weche mag din.

Be en adier ni nyaka ng’ato odhi olem kuonde moyanggo ni e ka owinj kwayo mage? Be Nyasaye oyie gi joma dhi mabor mondo olame kuonde moyanggo? To penjo maduong’ en ni, be owinjore mondo Jokristo odhi olem kuonde ma kamago? Dwoko mag penjogi biro konyowa ng’eyo kaka onego wane kuonde moyang ne lamogo, kendo konyowa ng’eyo kit lamo ma Nyasaye oyiego.

Mbaka ma Yesu nogoyo kod Nya-Samaria moro nonyiso paro ma Nyasaye nigo e wi kuonde moyang kaka kuonde maler. Ka ne Yesu kalo e dala mar Samaria noyueyo matin e soko moro ma ne chiegni gi taon mar Sika. Nochako mbaka gi dhako moro ma nobiro tuomo pi e sokono. E mbakagino, dhakono nowacho pogruok moro maduong’ ma ne nie kind Jo-Yahudi kod Jo-Samaria. Nowacho kama: “Kwerewa ne lemo e godni, to un uwacho ni Jerusalem e kama ji onego olemie.”—Johana 4:5-9, 20.

Dhakono ne wuoyo e wi got miluongo ni Gerizim, ma ne yudore kilomita 50 kama yo nyandwat  mar Jerusalem. E kinde machon, Jo-Samaria ne nigi hekalu kuno kama ne gitimie nyasi moko kaka Pasaka. Kata kamano, kar mondo Yesu oket pache e wi pogruok ma ne nie kind ogendni ariyogo, nonyiso dhakono kama: “Adier awachoni ni, sa biro ma ok ubi lamo Wuoro e godni kata e Jerusalem.” (Johana 4:21) To mano doko wach miwuoro, ahinya ahinya ka wach ma kamano owuok kuom Ja-Yahudi! Ang’o momiyo lamo Nyasaye e hekalu ma ne ni Jerusalem ne dhi rumo?

Yesu nodhi nyime wacho niya: “Sa biro, kendo en sani, ma jolemo madier biro lamo Wuoro kuom roho kod adiera, nimar joma kamago e ma Wuoro manyo mondo olame.” (Johana 4:23) Kuom higni mang’eny, Jo-Yahudi ne neno hekalu ma jaber ma ne ni Jerusalem kaka kama ji nonego olemie. Ne gidhiga kuno nyadidek e higa mondo gichiw misango ne Jehova Nyasachgi. (Wuok 23:14-17) Kata kamano, Yesu nowacho ni mano ne dhi lokore nikech “jolemo madier” ne dhi lemo “kuom roho kod adiera.”

Hekalu mar Jo-Yahudi ne en ot moger ma ne ji nyalo neno kendo ne en kamoro ma ne ji nyalo dhiye. Kata kamano, roho gi adiera ok gin gik mineno, kendo ok gin kamoro sie. Omiyo, Yesu ne temo wacho ni ne ok dhi chuno Jokristo madier lamo kamoro sie kaka e got ma ne ni Gerizim, hekalu ma ne ni Jerusalem, kata kamoro ma noyang ni kama ler.

Sama Yesu ne wuoyo gi Nya-Samariano, nonyise ni, “sa” ne dhi “biro” ma lokruok e yo ma ilamogo Nyasaye ne dhi timore. Mano ne dhi timore karang’o? Kindeno nochopo ka ne Yesu ochiwo ngimane obedo misango, kendo mano notieko yo ma ne Jo-Yahudi lemogo kitayogi gi Chik Musa. (Jo-Rumi 10:4) To par ni Yesu nowacho ni sano “en sani.” Ang’o momiyo nowacho kamano? Mano ne en nikech en kaka Mesia, nosechako choko jopuonjre ma ne dhi luwo chik ma nochiwoni: “Nyasaye en Roho kendo joma lame nyaka lame kuom roho kod adiera.” (Johana 4:24) To kare lamo Nyasaye kuom roho kod adiera tiende en ang’o?

Ka ne Yesu wuoyo e wi lamo Nyasaye kuom roho, nowuoyo e wi joma itayo gi roho maler mar Nyasaye, to achiel kuom gima rohono konyowago en winjo tiend weche manie Ndiko. (1 Jo-Korintho 2:9-12) Adiera ma Yesu ne wuoyoe, en ng’eyo adiera ma yudore e Muma. Kuom mano, Nyasaye  biro yie gi kit lamowa mana ka owinjore gi puonj manie Muma kendo kitayowa gi roho maler, to ok ni ka walemo ka wan kamoro sie moyang ne lamo.

To kare Jokristo onego one nade wach dhi lemo kamoro moyang ne lamo ma ji neno kaka kama ler? Paro chik ma ne Yesu ogolo ni onego olam Nyasaye kuom roho gi adiera, nyiso maler ni lemo kuonde moyang ma ineno ni ler ok en gima lich ne Wuonwa manie polo. E wi mano, Muma nyisowa paro ma Nyasaye nigo kodok korka tiyo gi sanamu e lamo. Muma wacho kama: “Ringuru ua e lamo mar sanamu,” kendo ni “tang’uru gi nyiseche manono.” (1 Jo-Korintho 10:14; 1 Johana 5:21) Omiyo, Jakristo madier ok bi dhi lemo kuonde mikawo kaka kuonde maler kata ma nyalo miyo ng’ato olam sanamu. Kuom mano, ka luwore gi kaka ji okawo kuondego, Jokristo madier ok onego odhi olam kuondego.

Kata kamano, ma koro ok nyis ni Wach Nyasaye okwero ni ng’ato ok nyal bedo gi kamoro molemoe, opuonjoree, kata moparoe matut. Kama ji chokoree mondo opuonjre kendo owuo e weche Nyasaye ber ka en kama ochanore ma long’o kendo momi luor. Bende, ok rach muono liend ng’at motho. Mano nyalo bedo mana yo ma waparogo ng’at mothono. Kata kamano, kawo kuondego kaka kuonde maler, kata loso sanamu moro kuondego, biro kwedo weche ma Yesu nowacho.

Omiyo, ok owinjore mondo Jakristo odhi kama oyang ne lamo kogeno ni Nyasaye biro winje moloyo kodhi mana kuno. Bende kik ipar ni Nyasaye mor kata biro guedhi e yo makende, sama idhi mabor mondo ilem kuondego. Muma wacho ni Jehova Nyasaye ‘Ruodh polo gi piny, ok odak ei hekalu molos gi lwet dhano.’ To ma ok mi Nyasaye obed mabor kodwa. Wanyalo kwaye e lamo kendo obiro winjowa kamoro amora ma wantie nikech “ok obor gi ng’ato ka ng’ato kuomwa.”—Tich Joote 17:24-27.