1. Ang’o ma wang’eyo ni wabiro romogo, to wanyalo bedo gadier gi wach mane?

 WANG’EYO ni wabiro romo gi akwede sama watimo tijwa ma lendo. Bende, wang’eyo ni akwedego nyalo medore ahinya e kinde mabiro. (Dan. 11:44; 2 Tim. 3:12; Fwe. 16:21) Kata kamano, wanyalo bedo gadier ni Jehova biro konyowa timo tijno. Nikech ang’o? Nikech kinde duto, Jehova osebedo ka konyo jotichne chopo migepegi mopogore opogore kata sama weche tek manade. Mondo wane wachno, wadwa nono gik ma notimore ne Ezekiel e kinde ma nolendo ne Jo-Yahudi ma ne nie tuech Babulon.

2. Jehova nowacho ni Ezekiel ne dhi lendo ne joma chalo nade, to ang’o ma wabiro nono e sulani? (Ezekiel 2:3-6)

² Ezekiel ne lendo ne joma chalo nade? Jehova nowacho ni jogo ne gin joma ‘oseng’anyone,’ “ma wigi tek kendo ma tokgi tek.” Gik ma ne gitimo ne richo ma ne nyalo hinyo ng’ato mana ka kuthe, kendo kecho ka thomoni. Mano e momiyo Jehova nonyiso Ezekiel nyading’eny niya: “Kik iluor”! (Som Ezekiel 2:3-6.) Ezekiel notimo migawone mar lendo e yo maber nikech (1) Jehova e ma noore, (2) roho mar Nyasaye nomiye teko, kendo (3) weche Nyasaye notego yiene. Ere kaka weche adekgo nokonyo Ezekiel? To ere kaka wechego nyalo konyowa e kindegi?

3. Gin weche mage ma nyaka bed ni notego Ezekiel, kendo ere kaka Jehova nomiyo obedo gadier ni nodhi sire?

³ Jehova nonyiso Ezekiel niya: “Aori ir Jo-Israel.” (Eze. 2:3, 4) Nyaka bed ni wechego nojiwo Ezekiel. Nikech ang’o? Onge kiawa ni noparo kaka Jehova nosetiyo gi weche  kaka mago ka noketo Musa kod Isaya mondo gibed jonabine. (Wuok 3:10; Isa. 6:8) Ezekiel nong’eyo kaka Jehova nokonyo jonabi ariyogo loyo pek ma ne giromogo. Omiyo, ka ne Jehova onyiso Ezekiel nyadiriyo ni “aori,” nonyalo bedo gadier ni Jehova ne dhi konye. Bende, e bug Ezekiel onwo wechegi nyading’eny: “Wach Jehova ne obirona.” (Eze. 3:16) E wi mano, weche ma wacho ni, “Wach Jehova nobirona kendo” yudore nyadinwoya e bugno. (Eze. 6:1) Wechego nomiyo Ezekiel obedo gadier ni Jehova e ma noore. To nikech wuon-gi ne en jadolo, nyalo bedo ni wuon-gi nosepuonje kaka Jehova nosebedo ka siro jonabine e kinde mokalo. Jehova nowuoyo gi Isaka, Jakobo, kod Jeremia, kendo nonyiso moro ka moro kuomgi niya: “An kodi.”​—Cha. 26:24; 28:15; Jer. 1:8.

4. Gin weche mage ma nyaka bed ni nojiwo Ezekiel?

⁴ Jo-Israel ne dhi rwako nade ote ma Ezekiel ne lando? Jehova nonyiso Ezekiel kama: “Jo-Israel ok nowinji nikech ok gidwar winja.” (Eze. 3:7) Ka ne Jo-Israel otamore winjo Ezekiel, mano ne nyiso ni ne gitamore winjo Jehova. Wechego nokonyo Ezekiel bedo gadier ni bedo ni jogo notamore winje, mano ne ok nyis ni ok otim migawone e yo maber kaka janabi. Bende, Jehova nonyiso Ezekiel ni kinde ma nodhi ng’adoe bura ne ogandano, ne gidhi “ng’eyo ni kare janabi ne nie kindgi adier.” (Eze. 2:5; 33:33) Onge kiawa ni wechego nojiwe kendo tege mondo ochop migawone.

5. Ka luwore gi Isaya 44:8, ang’o ma miyowaga teko?

⁵ Ng’eyo ni Jehova e ma oorowa mondo watine miyowaga teko. Omiyowaga duong’  kuom luongowa ni ‘jonenone.’ (Isa. 43:10) To mano kaka odhialowa! Mana kaka Jehova nonyiso Ezekiel ni, “Kik iluor,” wan bende Jehova nyisowa e kindegi niya: “Kik ubed maluor.” Ang’o momiyo ok onego waluor jo akwede? Mana kaka Ezekiel, wan bende Jehova e ma oorowa kendo en e mosirowa.​—Som Isaya 44:8.

6. (a) Jehova singo ni obiro konyowa nade e tijwa mar lendo? (b) En ang’o ma hoyowaga kendo tegowa?

⁶ Jehova singo ni obiro konyowa. Kuom ranyisi, ka pok nowacho ni, “Un jonenona,” nowacho kama: “Anabed kodi sa ma ikalo e pi, kendo sa ma ikalo e aoche pi ok [noimi,] sa ma ikalo e mach, mach ok bi rewi, ee, majno ok bi wang’i.” (Isa. 43:2) Sama wan e tijwa mar lendo, nitie kinde ma waromoga gi tembe kod akwede ma chalo ka pi aora kod mach. Kata kamano, Jehova konyowaga mondo wadhi nyime lendo. (Isa. 41:13) Mana kaka e ndalo mag Ezekiel, ji mang’eny e kindegi bende ok rwak ote ma walandonegi. Wang’eyo ni bedo ni ok girwak wach mwalando, mano ok nyis ni ok wati tijwa kaka Jonenone e yo maber. Gima hoyowa kendo tegowa en ng’eyo ni Jehova bedoga mamor sama wadhi nyime lando ote momiyowa gi kinda. Jaote Paulo nowacho kama: “Ng’ato ka ng’ato noyud pokne kaluwore gi tichne owuon.” (1 Kor. 3:8; 4:1, 2) Nyaminwa moro mosebedo painia kuom higni mang’eny nowacho kama: “Awinjoga ka amor ahinya nikech ang’eyo ni Jehova biro guedho kindawa.”

7. Nyaka bed ni Ezekiel ne winjoga nade kinde moro amora ma noparo matut kuom fweny ma noneno? (Ne picha manie nyim gaset.)

⁷ Ezekiel noneno kaka roho mar Nyasaye nigi teko mang’eny. E fweny moro, noneno kaka roho maler konyo malaike ma roteke, kendo kaka rohono ne miyo tielo madongo mag gach Jehova ringo. (Eze. 1:20, 21) Ezekiel notimo ang’o bang’ neno fwenyno? Nondiko kama: “Ka ne anene, ne apodho piny auma.” Ee, fwenyno ne lich miwuoro mi Ezekiel nopodho mana piny. (Eze. 1:28) Kinde moro amora ma noparo matut kuom fwenyno, nyaka bed ni nomedo bedo gadier ni roho maler mar Nyasaye ne dhi konye chopo migawone.

8-9. (a) Ka ne Jehova onyiso Ezekiel ni ochung’ malo, ang’o ma notimore ne janabino? (b) Ere kaka Jehova nomedo tego Ezekiel mondo olend e alwora ma ji ne ok dhi rwakoe wach?

⁸ Jehova nonyiso Ezekiel niya: “Wuod dhano, chung’ malo awuo kodi.” Weche ma Jehova nowachogo kod rohone maler, notego Ezekiel moa malo. Nondiko kama: “Roho nobiro kuoma mi ne achung’.” (Eze. 2:1, 2) Bang’e, roho mar Nyasaye kata lwet Nyasaye notayo Ezekiel e tije mar lendo. (Eze. 3:22; 8:1; 33:22; 37:1; 40:1) Roho maler mar Nyasaye notego Ezekiel mi olando wach ne joma wigi tek kendo ma tokgi tek. (Eze. 3:7) Jehova nonyiso Ezekiel niya: “Asemiyo wang’i obedo matek ka maggi, kendo pat wiyi bende obedo matek ka maggi. Asemiyo pat wiyi obed matek ka almasi kendo ka kidi matek. Kik iluorgi kendo kik iluor wengegi nimar gin jo ma wigi tek.” (Eze. 3:8, 9) Ne chalo ka gima Jehova ne nyiso Ezekiel niya: ‘Kik iyie wich teko mar jogo onyos chunyi. Abiro tegi.’

⁹ Bang’ mano, roho mar Nyasaye noting’o Ezekiel motere e alwora ma nodhi lendoe. Nondiko niya: “Lwet Jehova ne ni kuoma.” Nokawo janabino juma achiel koparo matut kuom ote ma nodhi landono mondo olande ka en gadier. (Eze. 3:14, 15) Kae to Jehova  nonyise ni odhi e hoho moro, kendo ka nochopo kanyo ‘roho ne obiro kuome.’ (Eze. 3:23, 24) Ezekiel koro noseikore maber ne chako tije mar lendo.

10. En ang’o ma konyowaga dhi nyime gi tijwa mar lendo, to ang’o momiyo dwarore ni okonywa?

¹⁰ Ang’o ma nyalo konyowa timo tijwa mar lendo? Mondo wadwok penjono, temie paro gik ma notimore ne Ezekiel. Ka ne pok ochako tije mar lendo, roho mar Nyasaye notege. E kindewagi bende, roho mar Nyasaye e ma nyalo konyowa timo tijwa mar lendo mana kaka nokonyo Ezekiel. Ang’o momiyo mano dwarore? En nikech Satan kedo kodwa matek mondo wawe lendo. (Fwe. 12:17) E wang’ dhano, nenore maler ni ok wanyal kedo gi Satan mi waloye. Kata kamano, kokalo kuom tijwa mar lendo wasebedo ka waloye! (Fwe. 12:9-11) Wasetimo kamano e yo mane? Sama walendo, wanyisoga maler ni ok waluoro akwede mag Satan. Sa asaya ma walendo, waloyoga Satan. Kuom mano, en ang’o ma nenore maler sama wadhi nyime lendo kata obedo ni jowasikwa kwedowa? Nenore maler ni roho maler e ma tegowa kendo wamiyo chuny Jehova mor.​—Mat. 5:10-12; 1 Pet. 4:14.

11. Roho mar Nyasaye nyalo konyowa nade, to ang’o monego watim mondo wadhi nyime yudo rohono?

¹¹ En wach mane machielo ma wapuonjore kuom yo ma Jehova notegogo Ezekiel mondo odhi nyime gi tije mar lendo? Roho mar Nyasaye nyalo konyowa nyagore gi pek moro amora ma wanyalo romogo e tijwa mar lendo. (2 Kor. 4:7-9) Ang’o ma wanyalo timo mondo wadhi nyime yudo roho maler mar Nyasaye? Dwarore ni wakwa Nyasaye rohone gi kinda ka wan gadier ni obiro dwoko lamowa. Yesu nonyiso jopuonjrene niya: “Sikuru ka ukwayo, . . . sikuru ka umanyo, . . . sikuru ka udwong’o.” Ee, Jehova biro chiwo roho maler “ne joma kwaye.”​—Luka 11:9, 13; Tich 1:14; 2:4.

12. Ka luwore gi Ezekiel 2:9–3:3, buk modol noa kanye, to ang’o ma nondik e iye?

¹² Mopogore gi roho maler ma notego Ezekiel, weche Nyasaye bende notego yiene. E fweny moro, Ezekiel noneno lwedo moro koting’o buk modol. (Som Ezekiel 2:9–3:3.) Bugno noa kanye? Noting’o weche mage? Ere kaka notego yie mar Ezekiel? We wane ane. Bugno noa e kom-loch mar Nyasaye. Nyalo bedo ni Jehova notiyo gi achiel kuom malaike ang’wen ma Ezekiel noneno motelo mondo omi Ezekiel bugno. (Eze. 1:8; 10:7, 20) Bugno noting’o weche Nyasaye ma ne gin ote mag kum ma Ezekiel nonego oland ne Jo-Israel ma noseng’anyo ne Nyasaye kendo ma ne nie tuech. (Eze. 2:7) Wechego nondiki e buk ma nodolno koni gi koni.

13. En ang’o ma Jehova nonyiso Ezekiel ni otim gi buk modol, to ang’o momiyo bugno ne mit e dhoge?

¹³ Jehova nonyiso janabineno ni ‘ocham buk modolno mi oyieng’.’ Ezekiel notimo mana kamano. Nochamo buk modolno duto. Tiend fwenyno ne en ang’o? Ne dwarore ni Ezekiel owinj tiend siem ma nodhi lando kendo obed gadier gi weche ma nodhi landogo mondo oyud mijing’o mar landogi. Ezekiel nofwenyo gimoro miwuoro bang’ chamo bugno! Nofwenyo ni bugno ‘ne mit ka mor kich e dhoge.’ (Eze. 3:3) Nikech ang’o? Ezekiel noneno migawo mar wuoyo e lo Jehova kaka migawo maduong’ ahinya, kendo ma mit timo. (Zab. 19:8-11) Nomor ni Jehova nosemiye migawo mar bedo janabine.

14. Ang’o ma nokonyo Ezekiel bedo moikore maber ne migawone mar lendo?

¹⁴ Bang’e, Jehova nonyiso Ezekiel kama: “Winj weche duto ma anyisigi kendo irwakgi e chunyi.” (Eze. 3:10) Wechego ne nyiso maler ni Ezekiel nonego omak gik ma nondik e buk modolno e pache kendo opar matut kuomgi. Timo kamano notego yiene. Bende, mano nokonye ng’eyo weche mag kum ma nodhi lando ne ji. (Eze. 3:11) Nikech weche Nyasaye koro ne nie chunye kendo e dhoge, Ezekiel koro noikore maber lando weche Nyasaye.​—Pim gi Zaburi 19:14.

15. Ka wadwaro nano e tijwa mar lendo, en ang’o monego ‘warwak e chunywa’?

¹⁵ Mondo wadhi nyime nano e tijwa mar lendo, wan bende nyaka wayie mondo weche Nyasaye osik ka tego yiewa. Dwarore ni ‘warwak e chunywa’ weche duto ma Jehova nyisowa. E kindegi, Jehova wuoyoga kodwa kotiyo gi Muma. Ere kaka wanyalo yie mondo weche Nyasaye ota pachwa, kaka wawinjo e chunywa, kod timbewa?

16. En ang’o ma nyaka watim gi Wach Nyasaye, to ere kaka wanyalo rwake e chunywa?

¹⁶ Mana kaka chiemo ma wachamo miyoga dendwa teko, e kaka somo Wach Nyasaye kendo paro matut kuom weche mwasomo tegowaga e yor chuny. Dwarore ni wapar kuom puonj ma wayudo e fweny mar buk modol ma Ezekiel noneno. Jehova dwaro ni wacham wechene e yor ranyisi ‘mi wayieng’.’ Wanyalo timo kamano kokalo kuom lamo, somo Wach Nyasaye, kendo paro matut kuom gik ma wasomo. Mokwongo, walamoga nikech lamo iko chunywa mondo warwak weche Nyasaye. Kae to, wasomo kamoro e Muma. Mogik, waling’ kendo paro matut kuom weche ma wasomogo. Timo kamano konyowa nade? Kaka wamedo paro  matut kuom weche Nyasaye, e kaka wabiro medo winjo tiendgi, kendo gibiro tego yiewa.

17. Ang’o momiyo dwarore ni wapar matut kuom gik mwasomo e Muma?

¹⁷ Ang’o momiyo dwarore ni wasom Muma kendo paro matut kuom weche mwasomo? Timo kamano miyowa teko mar lando ote mar Pinyruoth e kindegi, kendo ikowa ne lando ote mag kum ma samoro wabiro lando e kinde mabiro. Bende, sama waparo matut kuom kido mag Jehova, winjruokwa kode medo bedo motegno. Mano miyo wachalo joma chamo gimoro mamit, tiende ni wabedo gi chuny mokuwe.​—Zab. 119:103.

18. En wach mane ma joma walendonegi e alworawa biro fwenyo, to nikech ang’o?

¹⁸ Ezekiel ne en janabi, wan to ok wan jonabi. Kata kamano, waseng’ado e chunywa ni wabiro dhi nyime lando ote ma Jehova ondikonwa e Wachne nyaka chop kinde mobiro nyisowae ni oromo. Ka kinde mag ng’ado bura ochopo, joma nie alworawa ok bi wacho ni ne ok giwinjo siem mag Nyasaye, kata ni Nyasaye nojwang’ogi. (Eze. 3:19; 18:23) Kar mano, gibiro fwenyo ni ote ma ne walando ne owuok kuom Nyasaye.

19. Ang’o ma biro miyowa teko mar dhi nyime timo tijwa mar lendo?

¹⁹ Ang’o ma biro miyowa teko mondo wadhi nyime gi tijwa mar lendo? Mana gik moko adek ma notego Ezekiel. Wadhi nyime lendo nikech wang’eyo ni Jehova e ma oorowa, rohone miyowa teko, kendo wechene tego yiewa. Wan gadier ni wabiro dhi nyime timo kinda “nyaka giko” nikech Jehova konyowa.​—Mat. 24:13.