1. En “riyo” mane ma dwarore ni walo, to ere kaka otudore gi bedowa mamor?

 MOR madier ok en mana bedo mamor kuom kinde moro matin, to en mor ma ng’ato sikogo e ngimane duto. E yo mane? E twak ma ne Yesu ogolo e got, nolero morno kowacho niya: “Jo mamor gin jo ma nigi riyo mar ng’eyo Nyasaye.” (Mat. 5:3) Yesu nong’eyo ni nochue dhano gi gombo mar dwaro ng’eyo Jehova ma en Jachuechgi kendo lame. Mano en “riyo” ma dwarore ni walo. To nikech Jehova en “Nyasaye mamor,” joma lame bende nyalo bedo mamor.​—1 Tim. 1:11.

2-3. (a) Ka luwore gi gima Yesu nowacho, gin jo mage bende nyalo bedo mamor? (b) En ang’o ma wabiro nono e sulani, to ang’o momiyo mano en gima duong’?

² Be ochuno ni wadag e ngima ma nyamonge e ka wabed mamor? Ooyo. E twak ma ne Yesu ogolo e got, nowacho gimoro ma nyalo kawo ng’ato gi wuoro. Nowacho ni kata mana “jo ma okuyo” nyalo bedo mamor. Nyalo bedo ni jogo okuyo nikech richo maggi kata nikech gikalo e chandruoge madongo e ngimagi. Mano bende e gima Yesu nowacho e wi “jo ma osesand nikech gik makare” kata jo ma ‘osekwed’ nikech bedo jolupne. (Mat. 5:4, 10, 11) Kata kamano, ere kaka ng’ato nyalo bedo mamor sama okalo e weche kaka mago?

³ Gima Yesu ne temo nyiso jolupne en ni mor madier ok bi nikech ng’ato onge gi chandruok moro amora, to morno biro sama ng’ato temo loyo riyo ma en-go mar sudo machiegni gi Nyasaye. (Jak. 4:8) Ere kaka wanyalo timo  kamano? E sulani, wadwaro wuoyo kuom okenge moko adek ma ka wakawo, to wanyalo bedo gi mor madier.

4. En okang’ mane mokwongo ma nyaka wakaw ka wadwaro bedo mamor gadier? (Zaburi 1:1-3)

⁴ OKANG’ MOKWONGO: Mondo wabed mamor gadier, nyaka wacham chiemb chuny. Dhano kod le nyaka chiem mondo gibed mangima. Kata kamano, dhano kende e ma nyalo chamo chiemb chuny. Chiemb chuny en gima duong’ ahinya e ngima dhano, to mano e gimomiyo Yesu nowacho niya: “Dhano ok bed mangima mana kuom chiemo kende, to kuom weche duto ma wuok e dho Jehova.” (Mat. 4:4) Kuom mano, ok onego wayie mondo odiechieng’ moro amora okal ma ok wasomo Wach Nyasaye ma en Muma. Jandik-zaburi nowacho ni ng’at mamor en ng’at mohero ‘chik Jehova kendo osome gi dwol ma piny odiechieng’ gotieno.’​—Som Zaburi 1:1-3.

5-6. (a) Gin ang’o ma wanyalo puonjore e Muma? (b) Gin yore mage ma puonjruok Muma nyalo konyowago?

⁵ E Muma, Jehova osemiyowa weche ma nyalo konyowa dak gi mor nikech oherowa. Muma nyisowa gimomiyo Jehova nochueyowa. Bende, onyisowa kaka wanyalo sudo machiegni gi Jehova kod gik ma wanyalo timo mondo owenwa richowa. Onyisowa nyaka geno ma jaber ma Nyasaye osesingonwa e kinde mabiro. (Jer. 29:11) Sama wapuonjore wechego e Muma, chunywa pong’ga gi mor!

 ⁶ Bende, Muma nigi puonj mabeyo ma nyalo konyowa e ngimawa ma pile. Sama watiyo gi puonjgo, wanyalo bedo mamor. Sama iwinjo ka chandruoge mag pinyni obembi, ti gi thuoloni mang’eny e somo Wach Nyasaye, kendo ipar matut kuom gik misomo. Yesu nowacho niya: “Jo mamor gin jogo ma winjo wach Nyasaye kendo timo!”​—Luka 11:28.

7. Ang’o ma nyalo konyi yudo ber sama isomo Wach Nyasaye?

⁷ Sama isomo Wach Nyasaye, tem mondo gik misomogo obedni mamit. Wati ane gi ranyisi moro e lero wachno. Be ng’ato osegatedonie chiemo moro mihero kae to irikni chame kata ichame ka pachi ni mabor? Nyaka bed ni ne ok iwinjo mit chiemono ahinya. Bang’ chame, samoro nichako paro kaka di ne iwinjo mitne ka di ne ichame mos kendo kiketo pachi e chiemono. E yo ma chalo kamano, kisomo Muma kirikni, inyalo tieko kama isomono ma ok ifwenyo puonj maduong’. Omiyo, sama isomo Wach Nyasaye, kik irikni. Tem mondo somo Muma obedni mamit. Tem goyo picha e pachi kuom gik miwuoyoe, koko man kanyo, kod dwond joma wuoyo, kendo tem paro matut kuom gik misomogo. Kitimo kamano, to ibiro medo bedo mamor.

8. Ere kaka “jatich mogen kendo mariek” osebedo ka chopo migawo ma nomiye? (Ne bende weche moler piny.)

⁸ Yesu noketo “jatich mogen kendo mariek” mondo omiwa chiemb chuny e kinde mowinjore, to kuom adier jatijno pidhowaga maber gi Wach Nyasaye. * (Mat. 24:45) Jatich mogen kendo mariek tiyoga gi Wach Nyasaye sama oloso chiemb chuny. (1 The. 2:13) Chiemb chunygo konyowaga ng’eyo pach Jehova kaka inyisowa e Muma. Mano e momiyo wasomoga gasede mag Ohinga mar Jarito kod Nenuru! (Amkeni!) kaachiel gi sula mopogore opogore ma yudore e jw.org. Waikorega bende ne chokruoge ma kor juma kod mag giko juma. Kendo watimoga kinda ahinya mondo wane program ma dwe ka dwe mar JW Broadcasting^®. Chamo chiemb chuny ma ok wabare biro konyowa kawo okang’ mar ariyo ma biro miyo wabed gi mor madier.

9. Okang’ mar ariyo monego wakaw ka wadwaro bedo gi mor madier en mane?

⁹ OKANG’ MAR ARIYO: Mondo wabed mamor gadier, dwarore ni waluw chike mag Jehova. Jandik-zaburi nowacho kama: “Ng’at mamor en ng’at moluoro Jehova, ma wuotho e yorene.” (Zab. 128:1) Wanyiso ni waluoro Jehova kuom temo matek mondo kik watim gik ma chwanye. (Nge. 16:6) Mano nyiso ni wabiro timo duto ma wanyalo mondo wadag ka luwore gi chike makare mag Nyasaye kaka inyisowa e Muma. (2 Kor. 7:1) Wabiro bedo mamor ka watimo gik ma Jehova ohero kendo kwedo gik mosin-go.​—Zab. 37:27; 97:10; Rumi 12:9.

10. Ka luwore gi Jo-Rumi 12:2, wan gi ting’ mane?

¹⁰ Som Jo-Rumi 12:2. Ng’ato nyalo ng’eyo ni Jehova nigi ratiro mar keto chike ma tayo weche makare, kata kamano, nyaka oyie luwo chikego. Kuom ranyisi, ng’ato nyalo ng’eyo ni sirkal nigi ratiro mar keto chik e wi spid ma derepe onego oriembgo mtokni e ndara. Kata kamano, samoro ng’atno ok oyie luwo chikego. Mano nyalo  miyo oriemb mtoke e spid ma malo moloyo monego oriembie. Wanyisoga kokalo kuom timbewa ni wan gadier ni luwo chike mag Jehova e ma nyalo miyo wadag e ngima maberie moloyo. (Nge. 12:28) Daudi noyie gi wechego kendo mano e momiyo nonyiso Jehova niya: “Isemiyo ang’eyo yo ma tera e ngima. Mor mogundho opong’o ka ma intie; lweti ma korachwich e ma mor mosiko nitieree.”​—Zab. 16:11.

11-12. (a) Sama nitie wach moro ma chandowa kata chunywa onyosore, en ang’o monego watang’go? (b) Ere kaka Jo-Filipi 4:8 nyalo konyowa sama wamanyo yore mag manyo mor mowinjore?

¹¹ Sama nitie gimoro ma chandowa kata ma nyoso chunywa, wanyalo gombo timo gimoro ma biro golonwa pekno. Mano ok en gima rach, kata kamano, onego watang’ mondo kik watem loyo pekno ka watiyo gi yo ma Jehova osin-go.​—Efe. 5:10-12, 15-17.

¹² E barua ma jaote Paulo nondiko ne Jo-Filipi, nojiwogi ni gimed paro matut kuom gik moko duto “makare, . . . maler, . . . ma jiwo hera, [kod] malong’o.” (Som Jo-Filipi 4:8.) Kata obedo ni Paulo ne ok wuo achiel kachiel e wi yore mag manyo mor, weche ma nondikogo nyalo konyowa timo yiero maber e yore ma wamanyogo mor. Tem ane timo kama: E ndikono, sa asaya mineno wach motigo kanyo ni “gik moko duto,” tem ane golo wachno kae to iket wechegi: “Thumbe,” “movies,” “buge,” kata “tuke mag vidio.” Timo kamano nyalo konyi ng’eyo gik ma Nyasaye oyiego kod ma ok oyiego. Wadwaro ni wadag ka luwore gi chike makare mag Jehova. (Zab. 119:1-3) Kae to ka wan gi chuny ma ok ng’adnwa bura, wanyalo kawo okang’ mar adek ma nyalo miyo wabed mamor gadier.​—Tich 23:1.

13. En okang’ mane mar adek monego wakaw ka wadwaro bedo gi mor madier? (Johana 4:23, 24)

¹³ OKANG’ MAR 3: Tem matek mondo lamo mar Jehova obed mokwongo e ngimani. Jehova e Jachuechwa kendo en e mowinjore walame. (Fwe. 4:11; 14:6, 7) Omiyo, dwarore ni waket lame obed mokwongo e ngimawa kendo walame e yo moyiego, ma en “kuom roho kod adiera.” (Som Johana 4:23, 24.) Wadwaro ni roho maler mar Jehova otawa sama walame mondo walame ka luwore gi adiera ma yudore e Wachne. Lamo marwa onego obed mokwongo e ngimawa kata ka po ni wadak e piny mogoye tijwa marfuk kata moketie chike moko ma monowa lamo ka wan thuolo. Gie sani, nitie owetewa gi nyiminewa mokalo 100 manie jela mana nikech bedo Joneno mag Jehova. * Kata kamano, giwinjoga ka gimor timo duto ma ginyalo mondo gilem, gipuonjre, kendo giwuo gi jomamoko e wi Nyasaye kod Pinyruodhe. Sama ikwedowa kata isandowa, wanyalo bedo mamor nikech wang’eyo ni Jehova ni kodwa kendo obiro guedhowa.​—Jak. 1:12; 1 Pet. 4:14.

14. En ang’o ma notimore ne owadwa moro e piny Tajikistan, to nikech ang’o?

¹⁴ Gik mosetimore ne owetewa gi nyiminewa nyiso ni sama wakawo okenge adekgo, wanyalo bedo mamor kata bed ni wan e chal mane. Ne ane gima notimore ne Owadwa Jovidon Bobojonov ma jahigni 19 ma a e piny Tajikistan. Nidwaro in odhi e lweny to notamore. Nikech mano, tarik 4 dwe mar Oktoba 2019, nomake ka en e  ode motueye kuom dweche moko, kendo notimne gik maricho ahinya. Ute mag fwambo gi keyo e pinje mang’eny nolando gik maricho ma notimnego. Noland ni nogoye kitemo chune mondo okuong’re ni nodhi bedo jalweny kendo rwako unifom mar lweny. Bang’ mano, nong’adne buch tuech e jela nyaka nochopo kinde ma president mar pinyno nong’wonone kendo chiko ni ogonye. Kata sama nokalo e weche maricho kamano, Jovidon nomakore gi Jehova kendo nosiko komor. Nikech ang’o? Notemoga ahinya mondo olo riyo ma ne en-go mar Wach Nyasaye.

15. Ere kaka Jovidon ne yudoga chiemb chuny ka ne en e jela?

¹⁵ Ka ne Jovidon pod nie jela, nodhi nyime chamo chiemb chuny kata obedo ni noonge Muma kata bugwa moro amora. Ere kaka notimoga kamano? Owete gi nyimine ma nodak e alworano ne teronega chiemo kendo ne gindikonega ndiko modiechieng’ e bege ma ne giting’oe chiemo. Mano nomiye thuolo mar somo Muma kendo paro matut kuom gik ma nosomogo pile ka pile. Bang’ ka nosewuok e jela, nowacho wach moro ma nyalo jiwo ji duto ma pok okalo e chandruoge madongo kaka en. Nowacho  kama: “Dwarore ni iti gi thuolo moro amora ma in-go sani e medo ng’eyo Jehova kuom somo Wachne kod bugewa.”

16. Jovidon noketo pache kuom gik mage?

¹⁶ Owadwano noluwo chike mag Jehova. Kar keto pache e gombo maricho kata timo gimoro marach, noketo pache kuom Jehova kod chikege. Jovidon ne mor ahinya ng’iyo chuech mag Jehova kendo paro matut kuomgi. Okinyi kokinyi ka nochiewo, nomor winjo kaka winy wer. E seche mag otieno, nong’iyoga dwe kod sulwe. Owacho kama: “Ng’iyo gik ma Jehova nochueyogo ne miyaga mor kendo ne jiwaga ahinya.” Sama wamor gi yo ma Jehova ritowago e yor ringruok kod yor chuny, wabedoga mamor kendo morno nyalo tegowa mondo wanan sama isandowa.

17. Ere kaka weche ma yudore e 1 Petro 1:6, 7 nyalo jiwo ng’at ma kalo e chal ma Jovidon nokaloe?

¹⁷ Gimachielo ma Jovidon notimo en keto lamo Jehova obedo mokwongo e ngimane. Nong’eyo gimomiyo ne dwarore ni omakre gi Jehova. Yesu nowacho niya: “Jehova Nyasachu e ma onego ulam kendo en kende e ma onego utine.” (Luka 4:8) Jotend jolweny kod askeche ne dwaro ni Jovidon owe bedo Janeno mar Jehova. En to nosiko kolamo gi kinda odiechieng’ gotieno kokwayo Jehova mondo okonye siko komakore kode ma ok oketho yiene. Jovidon nochung’ motegno kata obedo ni nitimone gik ma ok kare. Kendo sani en gi mor maduong’ nikech nochung’ motegno ka notem yiene, ka nomake, ka nogoye, kendo ka notueye e jela.​—Som 1 Petro 1:6, 7.

18. Ere kaka wanyalo siko ka wamor?

¹⁸ Jehova ong’eyo gik ma wadwaro mondo wabed mamor gadier. Ka ikawo okenge adek ma wasewuoyoego, inyalo bedo gi mor madier kata bed mana ni ikalo e chandruoge madongo. To mano nyalo miyo in bende iwach niya: “Jo mamor gin jo ma Nyasachgi en Jehova!”​—Zab. 144:15.