1-3. (a) Jokristo osenyiso nade ni gigeno chokruoge? (Ne picha man malo.) (b) Gin ang’o ma wabiro nono e sulani?

KA NE nyaminwa miluongo ni Corinna jahigni 17, ne omak min-gi moter e kambi moro mar Jo-Soviet kama joma otue nisando gi tich matek. Bang’e, Corinna bende ne oter Siberia, mabor ahinya gi kama min mare ne nitie. Ne isando Corinna ka misumba, kichune mondo oti e koyo mang’ich ka oonge kata gi lewni ma dogeng’go koyo. Kata obedo ni weche ne tek malich kamano, chieng’ moro Corinna gi nyaminwa machielo nong’ado mar dhi e chokruok.

² Corinna wacho kama: “Ne wawuok e tich godhiambo kae to wawuotho kilomita 25 nyaka kama ne iidhoe gach reru. Gari ne wuok sa aboro otieno, kendo noringo kuom seche auchiel, kae to walor kendo wawuotho kilomita moko 10 nyaka kama ne wachokoree.” Be kindagino nokonyogi? Owacho niya: “Ka ne wan e chokruok ne wapuonjore Ohinga mar Jarito kendo ne wawero wende mag Pinyruoth. Mano nojiwowa kendo notego yiewa.” Kata obedo ni ne gidok e tich bang’ ndalo adek, jatendgi ok nofwenyo ni Corinna gi nyawadgi ne onge.

 ³ Jotich Jehova osebedo ka kawo mapek chokruoge. Mapiyo bang’ ka kanyakla mar Jokristo nosechakore, jolup Yesu noketo kinda ahinya mondo gisik “e lalruok kaachiel.” (Tich 2:42, Luo, 1968) Nyalo bedo ni in bende igombo dhi e chokruoge ma ok ibari kaka jolup Yesu notimo. Kata kamano, Jokristo duto romoga gi pek mopogore opogore. Kuom ranyisi, dhi e chokruoge nyalo bedo matek nikech tije andika, bedo modich ahinya, kod olo ma tije mapile ka pile kelo. Ang’o ma nyalo jiwowa mondo wanyagre gi pekgi duto kendo wasik ka wan joma ok bare ne chokruogewa? ^[1] Ere kaka wanyalo konyo jopuonjrewa mag Muma kaachiel gi jomamoko mondo one ni dhi e chokruoge en wach monego okaw mapek? E sulani, wabiro nono gik moko aboro ma konyowa ng’eyo gimomiyo onego wachokrega kanyachiel ne lamo. Wanyalo pogo wechego e kidienje adek: kaka chokruoge konyi iwuon, kaka jomoko yudo ber sama wadhi e chokruoge, kod kaka Jehova winjoga sama wadhi e chokruok. ^[2]

4. Ere kaka chokruogewa miyowaga thuolo mag puonjore e wi Jehova?

⁴ Chokruoge puonjowa. Chokruoge duto mag kanyakla miyowaga thuolo mag puonjore e wi Jehova Nyasachwa. Kuom ranyisi, kuom higni madirom ariyo kama, kanyakla mang’eny nopuonjore bug Sud Machiegni gi Jehova e Puonjruok Muma e Kanyakla. Onge kiawa ni puonjruok kido mabeyo ma Nyasaye nigo kendo winjo paro mabeyo ma owete gi nyimine ne golo nomiyo ji mang’eny omedo hero Wuonwa manie polo. Wan bende wamedo ng’eyo Wach Nyasaye kuom chiko itwa malong’o sama igolo twege, itimo ranyisi, kendo sama isomo Muma. (Neh. 8:8) Kuom ranyisi, par ane puonj mabeyo ma wayudo juma ka juma sama waiko somo mar Muma kendo chiko itwa sama owadwa moro timo migawono.

5. Chokruoge mag Jokristo osekonyi nade tiyo gi puonj mag Muma kendo konyi bero tiji mar lendo?

⁵ Chokruoge konyowaga ng’eyo kaka wanyalo tiyo gi puonj mag Muma e ngimawa. (1 The. 4:9, 10) Kuom ranyisi, Ohinga mar Jarito ma wapuonjorega e chokruok, oting’o weche mabeyo ma mulo ngima jotich Nyasaye. Be nitie puonjruok moro mar Ohinga mar Jarito ma nojiwi mondo inon kendo gik michano timo, ing’wonne Jakristo wadu, kata imed bero lamo magi? Chokruoge ma watimo e kor juma puonjowaga kaka onego walendi. Wapuonjorega kaka wanyalo lando wach maber kendo puonjo ji e yo mong’ith kaka ginyalo tiyo gi puonj manie Ndiko.—Mat. 28:19, 20.

6. Gin gik mage ma jajiwowa kendo tegowa e chokruogewa mag Jokristo?

⁶ Chokruoge jiwowaga. Gik ma timore e piny mwadakieni nyalo nyoso chunywa e yore mang’eny. Mopogore gi mano, chokruogewa to jiwowaga kendo tego yiewa. (Som Tich Joote 15:30-32.) E chokruogewa mang’eny wanonoga kaka weche ma nokor e Muma chopo. Mano miyo wamedo bedo gadier ni singo duto mag Jehova biro chopo. Ok joma gologa twege kende e ma jiwowaga, to Jokristo wetewa ma gologa paro kendo werga gi chunygi duto bende jiwowaga. (1 Kor. 14:26) E wi mano, sama wawuoyo gi owetewa gi nyiminewa ka pok chokruok ochakore kata bang’ chokruok, wawinjo ni oherwa kendo chunywa duogo.—1 Kor. 16:17, 18.

7. Ang’o momiyo dwarore ahinya ni wadhi e chokruoge?

⁷ Dhi e chokruoge miyo wayudo roho mar Nyasaye. Bang’ ka Yesu Kristo nosedok e polo nowacho kama: ‘Ng’at ma nigi it  mondo owinj gima roho wacho ne kanyakla.’ (Fwe. 2:7) Yesu e ma tayo kanyakla mar Jokristo kotiyo gi roho maler. Dwarore ni roho maler otawa mondo walo tembe, wabed gi chir, waikre ne tij lendo, kendo watim yiero mowinjore. Donge ber ka watiyo gi thuolo duto ma nyalo yudore moriwo nyaka dhi e chokruoge mag kanyakla mondo wayud rohono?

8. Ere kaka bedowa e chokruoge, paro ma wagolo, kod wer ma wawergo konyo Jokristo wetewa? (Ne bende sanduku ma wiye wacho ni “Ojawuok Kowinjo Maber.”)

⁸ Chokruoge miyowa thuolo mar nyiso owete gi nyiminewa ni waherogi. Tem ane paro moko kuom pek ma owete gi nyimine manie kanyaklau nyaka timie sinani. Mano e momiyo jaote Paulo nondiko niya: “Wadewreuru e kindwa”! Paulo nomedo wacho bang’e ni ‘kik wawe chokore kanyachiel,’ mondo wanyis ni wadewo jomoko. (Hib. 10:24, 25) Sama in e chokruoge, mano nyiso Jokristo weteni ni idewogi, igenogi, kendo iikori wuoyo kodgi. E wi mano, sama ichiwo paro mowuok e chunyi e kanyakla kendo sama iwer, ijiwo Joneno weteni.—Kol. 3:16.

9, 10. (a) Ler ane kaka weche ma Yesu nowacho e bug Johana 10:16 jiwowa mondo wachokre gi owetewa. (b) Ka wadhi e chokruok ma ok wabare, mano nyalo konyo nade Jokristo wetewa ma joodgi ok Joneno?

⁹ Chokruoge riwowaga gi Jokristo wetewa. (Som Johana 10:16.) Yesu nowacho ni ochalo gi jakwath, to jolupne nopimo gi kueth mar rombe. Par ane wachni: Sama rombe ariyo nie got, rombe mamoko ariyo to nie hoho, kae to rombo machielo kwayo kende kamachielo, be inyalo wach ni rombe abichgo nie kueth achiel? Kinde mang’eny kueth bedoga kanyachiel e bwo jakwadhgi. E yo ma chalo kamano, ok wanyal wacho ni waluwo Jakwadhwa ka waweyo goyiem chokore gi jowetewa. Onego wachokre kanyachiel gi Jokristo wetewa eka wabed “kueth achiel” manie bwo “jakwath achiel.”

¹⁰ Sama wadhi e chokruoge, wamiyo winjruok manie kindwa kaka owete bedo motegno. (Zab. 133:1) Moko kuom Jokristo wetewa osekwed gi jonyuolgi kod nyithindgi monyuolgigo e ich achiel. Kata kamano, Yesu nosingo ni ne odhi miyogi joot ma ne dhi herogi kendo dewogi. (Mar. 10:29, 30) Sama wadhi e chokruoge ma ok wabare, wanyalo bedo ne Jokristogo kaka wuone, mine, owete, kata nyiminegi! Donge mano jiwowa mondo watem kar nyalowa wabed e chokruok?

11. Ere kaka dhi e chokruoge chiwonwa thuolo mar miyo Jehova gima owinjore oyudi?

 ¹¹ Sama wadhi e chokruok, wamiyo Jehova gima owinjore oyudi. Nikech Jehova en Jachuechwa, onego wamiye duong’, wagone erokamano, kendo wamiye luor matut. (Som Fweny 7:12.) Sama walemo, wawer, kendo wawuoyo e wi Jehova ka wan e chokruogewa, wamiye gima owinjore oyudi, ma en lamo. Wamor ahinya gi thuolo ma wan-go mar chiwo luor ne Jal momiyowa gik mathoth ahinya.

12. Jehova winjoga nade sama waluwo chik momiyowa mar dhi e chokruoge?

¹² Owinjore bende waluw gik ma Jehova nyisowa. Ochikowa ni kik wawe chokore kanyachiel, to ahinya ahinya e ndalo gikogi. Sama waluwo chik ma Jehova omiyowano, obedo mamor. (1 Joh. 3:22) Onenoga kinda ma watimo mondo wadhi e chokruoge kendo ogeno kindawano.—Hib. 6:10.

13, 14. Wasudoga machiegni gi Jehova kod Yesu sama wan e chokruogewa e yo mane?

¹³ Sama wadhi e chokruoge, wanyiso Jehova ni wadwaro sudo machiegni kode kaachiel gi Wuode. Ka wan e chokruoge, Japuonjwa Maduong’ tayowa kotiyo gi Wachne ma en Muma. (Isa. 30:20, 21) Kata joma ok lem kodwa nyalo hum nono ma giwach ni, “Adier Nyasaye ni e kindu.” (1 Kor. 14:23-25) Jehova guedhoga chokruogewa kuom miyowa rohone maler kendo en e ma otayoga puonj duto mowuok e Ndiko ma wajayudo kuno. Omiyo, sama wan e chokruogewa wawinjo dwond Jehova kendo wafwenyo ni oherowa gadier. Mano miyo wamedo sudo machiegni kode.

¹⁴ Yesu nowacho niya: “Kama ji ariyo kata adek ochokoree e nyinga, kanyo antie e diergi.” (Mat. 18:20) Wach ma Yesu nowachono, inyalo wach ni otudore gi chokruogewa. Nikech Kristo e wi kanyakla, ‘owuotho e dier’ kanyakla mag oganda Nyasaye. (Fwe. 1:20–2:1) Par ane wachno! Jehova gi Yesu chopo migawo maduong’ ahinya mar jiwowa e chokruogewa mag Jokristo. Iparo ni Jehova winjo nade sama oneno kaka wan gi siso mar sudo machiegni kode kaachiel gi Wuode?

15. Ler ane kaka dhi e chokruoge nyiso ni wariwo lwedo loch mar Nyasaye.

¹⁵ Dhi e chokruoge nyiso ni wariwo lwedo loch mar Nyasaye. Kata obedo ni Jehova chikowa ni wadhi e chokruoge, ok ochunwa timo kamano. (Isa. 43:23) Omiyo, wan e ma wan gi ting’ mar nyiso Jehova ka be wahere gi chunywa duto kendo ni wariwo lwedo lochne. (Rumi 6:17) Kuom ranyisi, nyalo bedo ni ng’at mondikowa tich chunowa mondo wabare ne chokruoge. Seche moko sirkal nyalo bwogowa ni ka wachokore ne lamo, to ibiro gowa fain, ibiro tuewa, kata ni ibiro timnwa gimoro marach. Kata seche moko wanyalo bedo e tem mar manyo mor kar dhi e chokruoge. E moro ka moro kuom wechegi, nyaka wayier ni en ng’ano ma wabiro tiyone. (Tich 5:29) Sama wayiero riwo lwedo loch mar Jehova, wamiyo chunye bedo mamor.—Nge. 27:11.

16, 17. (a) Ere kaka Jokristo mokwongo nochiwore chuth mar dhi e chokruoge? (b) Owadwa George Gangas ne neno nade chokruoge mag Jokristo?

¹⁶ Bang’ neno hono maduong’ ma notimore chieng’ Pentekost mar 33, Jokristo mokwongo ne ok oweyo chokore kanyachiel ne lamo. ‘Ne gisiko e puonj joote, kendo e lalruok kaachiel.’ (Tich 2:42, Luo, 1968) Wach ma notigo e dho Grik molok ni “jogi nosiko” oting’o paro mar timo sinani kata nyagore e chal moro matek. Jokristogo ne ok oyudo ka dhi e chokruoge en gima  nyamonge, nikech loch Rumi kaachiel gi jotend din mag Jo-Yahudi ne kwedogi. Kata kamano, ne ginano.

¹⁷ Jotich Jehova mathoth e kindegi osebedo ka nyiso ni gigeno ahinya chokruoge. George Gangas, ma ne en achiel kuom owete manie Bura Matayo kuom higni mokalo 22, nowacho niya: “Romo gi owete en achiel kuom gik ma miya mor mogundho e ngima kendo jiwaga malich. Ahero bedo achiel kuom joma kwongo chopo e Od Romo, kendo wuok mogik ka nyalore. Awinjoga ka amor ahinya sama awuoyo gi owete gi nyimine. Bedo kodgi miyo awinjo ka an thuolo e paradiso mar ranyisi.” Omedo wacho kama: “Mana kaka kinde duto kompas ochomoga yor nyandwat, kamano e kaka kinde duto pacha gi chunya niga e chokruoge.”

18. Ineno nade wach dhi e chokruoge, to ing’ado mar timo ang’o?

¹⁸ Be in be iwinjoga kamano e wi chokruoge ma wabedogago mondo walam Jehova? Ka en kamano, to ng’ad e chunyi mar timo kinda mondo idhi e chokruoge ma ok ibari. Timo kamano biro nyiso ni iyie gi weche ma Ruoth Daudi nowacho ni: “Jehova, ahero kar dak mar odi, kendo ka ma duong’ni maler obetie.”—Zab. 26:8.