TIJWA mar lendo en tich maduong’ ahinya kendo ma wakawo mapek. Kata kamano, moko kuom joma walendonegi ok nene kamano. Kata obedo ni jomoko nyiso ni girwako ote mar Muma, seche moko ok ginyal neno gimomiyo onego gipuonjre kodwa Muma.

Mano e paro ma jago moro miluongo ni Gavin ma nochako biro e chokruogewa ne nigo. Kata kamano ok nodwar puonjore Muma. Gavin wacho kama: “Ne ok ang’eyo Muma ahinya kendo ne ok adwar mondo ji ong’e ni ok alony gi Muma. Ne aluor ni inyalo wuonda kendo ok nadwar gima biro diya.” In ineno nade? Be iparo ni Gavin ne en ng’at ma ok nyal puonjore chuth? Ooyo! Nitie nyak maber ma nyalo betie sama ng’ato opuonjore Muma. Jehova nonyiso oganda Jo-Israel niya: “Wuoyo mara noton mosmos kaka tho mar okinyi; machal gi koth mang’idho kuom lum mayom.” (Rap. 31:19, 30; 32:2) We wanon ane kaka wanyalo konyo ji mopogore opogore e yo maber ka watiyo gi ranyisi mar tho.—1 Tim. 2:3, 4.

Tho ton mos. Tho losorega mos mos, kae to ochokore matin matin kowuok e muya manie kor lwasi. Sama Muma wacho ni weche Jehova ‘noton mos mos ka tho,’ mano tiende ni nowuoyoga e yo mang’won, mos, kendo ma nyiso ni odewo ogandane. Waluwo ranyisi mare sama wachiwo luor ne paro ma jomoko nigo. Wajiwo ji mondo oti gi pachgi kendo gin giwegi e ma ging’ad paro mogik. Sama wanyiso ni wadewo jomoko, gibiro rwako wechewa e yo mayot kendo wanyalo yudo nyak e tij lendo.

Tho duogo chuny. Ka waparo matut yo maber mwanyalo konyogo jomoko, tijwa mar lendo biro duogo chunygi. Gavin, ma ne owuo kuome motelocha, ne ok ochun mondo opuonjre Muma. Owadwa miluongo ni Chris, ma nokwongo kwayo Gavin mondo gipuonjre Muma, notemo manyo yore mopogore opogore ma ne nyalo miyo Gavin obed thuolo puonjore Muma. Chris nolero ne Gavin ni Muma nigi wach maduong’ mowuoye ma kofwenyo to biro konye winjo tiend weche mowinjoga e chokruoge. Kae to Chris nowachone ni weche mokor e Muma e ma nokonye en owuon ma oyie ni kare Muma wacho adier. Mano nomiyo gichako goyo mbaka e wi weche mopogore opogore ma nokor e Muma kendo kaka ne gichopo. Gavin nowinjo ka chunye oduogo ma gikone oyie mondo opuonjre Muma.

Tho en gima siro ngima. Piny ma Jo-Israel nodakie, ne jabedo gi oro kuom dweche mang’eny. Ka ne onge ng’ich ma wuokga kuom tho, cham ne nyalo ner ma two. Kech mar winjo wach Nyasaye sani okwako piny mana kaka Jehova nokoro. (Amos 8:11) Nosingo ni joland wach maber mowal gi roho ne dhi bedo kaka “tho me lum moa kuom Jehova” sama gilando ote mar Pinyruoth, ka iriwogi lwedo gi jowetegi ma gin “rombe mamoko.” (Mika 5:7; Joh. 10:16) Be wakawo otewa mar lando wach Pinyruoth kaka achiel kuom yore ma Jehova sirogo kendo duogogo chuny joma nigi riyo mar ng’eyo adiera?

Tho en gueth ma wuok kuom Jehova. (Rap. 33:13) Tijwa mar lendo nyalo konyo jogo marwako wach. Gavin noyudo gueth machalo kamano. Kokalo kuom puonjruok Muma, noyudo dwoko mag penjo duto ma ne chande. Mapiyo nono notimo dongruok ma obatise, kendo sani en kaachiel gi Joyce jaode gilando wach maber mar Pinyruoth gi kinda.

Paro ranyisi mar tho nyalo konyowa mondo wang’e ni kinda ma waduto watimo e tij lendo duong’ ahinya. E yo mane? Tho ma ton achiel achiel nyalo nenore ka gima ok kony gimoro, kata kamano ka gichokore mang’eny, ginyalo miyo lowo obed mang’ich. Kamano bende, tij lendo ma watimo ng’ato achiel achiel nyalo nenorenwa kaka gima tin. Kata kamano, ka oket kanyachiel kinda ma jotich Jehova duto timo, mano konyo e chiwo neno “e piny mangima.” (Mat. 24:14) Be tijwa mar lendo biro bedo gueth mowuok kuom Jehova ne jomamoko? Obiro bedo kamano ka yo ma walendogo chalo gi tho ma ton mos, ma duogo chuny, kendo ma miyo ji ngima!