PARIE odiechieng’ ma ne imorie moloyo e ngimani. Dibed ni ne en odiechieng’ ma nukendorue koso ma nuyudoe nyathiu makayo? Koso dobed odiechieng’ ma nobatisie kinyisogo ni isechiwori ne Jehova? Nyalo bedo ni odiechiengno e ma ne duong’nie mogik kendo e ma nokeloni mor mogundho. To mano kaka nyaka bed ni owete gi nyimine ne mor ka ninyiso e lela ni ihero Nyasaye gi chunyi duto, gi ngimani duto, pachi duto, kod tekoni duto!—Mar. 12:30.

Nyaka bed ni isemedo bedo mamor tiyo ne Jehova chakre batisi. Kata kamano, mor ma joland wach Pinyruoth moko ne nigo osedok chien. Nikech ang’o? Gin gik mage ma nyalo konyowa dhi nyime tiyo ne Jehova ka wamor?

Wach Pinyruoth ma singonwa kaka Jehova chiegni ketho piny marachni kendo kelo piny manyien, en gima miyo wabedo mamor sidang’. E wi mano, Zefania 1:14 jiwowa niya: ‘Ndalo maduong’ mar Jehova chiegni, ochiegni kendo oruyore piyo.’ Kata kamano, rito aming’a moloyo kaka ne waparo nyalo miyo mor ma ne wan-go chon odog chien kendo miyo kinda ma ne wan-go e tiyo ne Nyasaye bende odog chien.—Nge. 13:12.

Bedo kanyachiel gi jotich Nyasaye wetewa bende miyowa mijing’o mar dhi nyime tiyo ne Jehova ka wamor. Nyalo bedo ni timbe mabeyo mag jotich Jehova e ma noywayowa ma wadonjo e lamo madier kendo e ma nokonyowa ma wachako tiyo ne Nyasaye gi mor. (1 Pet. 2:12) To ang’o ma nyalo timore ka Jakristo wadwa omi siem nikech obalo gi chike Nyasaye? E chal ma kamano, moko kuom joma nobiro e adiera nikech timbe mabeyo mag jotich Jehova, chunygi nyalo jok mi mor ma ne gin-go lal nono.

Lendo mag ohala miwuondogo ji e piny marach mar Satanni, nyalo mayowa mor. Jachien tiyoga gi pinye marachni mondo omi wapar ni onego wabed gi gik mathoth to king’iyo mos, ibiro ifwenyo ni kare ok ochuno ni wabed kodgi. Kata kamano, ber mondo wapar weche ma Yesu nowacho niya: “Onge ng’at ma nyalo bedo misumba ruodhi ariyo; nimar obiro sin gi moro to ohero machielo, kata obiro makore gi moro to ochayo machielo. Ok unyal bedo wasumbni mag Nyasaye kendo wasumbni mag Mwandu.” (Mat. 6:24) Ok wanyal tiyo  ne Jehova ka wamor ka gie sechego bende wadwaro bedo gi mwandu mag pinyni.

Tiyo ne Jehova ok en ting’ mapek ne joma ohere. (1 Joh. 5:3) Par ni Yesu nowacho kama: “Biuru ira, un duto mujony kendo ma ting’ turou, to anamiu yueyo. Keturu jok mara kuomu kendo puonjreuru kuoma, nimar adembora kendo chunya muol, to ununwang’ yueyo. Nikech jok mara yom kendo ting’na yot.” (Mat. 11:28-30) Ting’o jok mar bedo japuonjre Kristo en gima duogo chunywa kendo kelonwa mor. To e wi mano, wan gi gik modhuro ma miyowa mor mang’eny e tij Jehova. Koro weuru wanon ane gik moko adek madongo ma nyalo miyo wabed ‘mamor kuom Nyasach konyruokwa.’—Hab. 3:18.

Watiyo ne Nyasaye mamor kendo ma Jachiw Ngima. (Tich 17:28; 1 Tim. 1:11) Wang’eyo maler ni Jachuechwa e ma nomiyowa ngima. Omiyo wadhi nyime tiyone ka wamor kata bed ni wasetiyone kuom higni ma romo nade chakre ne batiswa.

Ne ane ranyisi mar Héctor, ma nosetiyo ne Jehova ka en jarit-alwora kuom higni 40. ‘Kata oseti’ kamano, pod odhi nyime tiyo ne Jehova gi ilo. (Zab. 92:12-14) Tuwo chiege osemone timo gik mathoth e tij Nyasaye. Kata kamano, pok omone bedo mamor. Owacho niya: “Kata obedo ni en gima lit neno kaka ngima jaoda medo bedo marach, kendo rite osebedo matek, mano ok osemona tiyo ne Nyasaye madier ka amor. To nikech ang’eyo ni Jehova e ma nomiya ngima kendo en e ma nochueyo dhano gi gimomiyo, mano kende oromo miyo ahere kendo tiyone gi chunya duto. Atemo kar nyalona mondo abed gi kinda e tij lendo, mondo geno mar Pinyruoth obed mokwongo e pacha e ka mor ma an-go kik lal.”

Jehova osechiwonwa rawar, komiyowa thuolo mar bedo mamor e ngimawa. Adier, “Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.” (Joh. 3:16) Inyalo wenwa richowa kendo wanyalo yudo ngima mochwere kuom bedo gi yie e chenro ma nyiso hera ma Nyasaye noketo ka nochiwo Yesu obed kaka misango mar rawar. Donge mano en gima ber ahinya ma miyo onego wabed mamor? To donge mor ma wan-go nikech rawar ma ne ochiwno onego ochwalwa wati ne Jehova ka wamor?

Owadwa moro miluongo ni Jesús man Mexico, nowacho niya: “Chon tich ma ne atiyo noloka misumbane. Seche moko nanyalo tiyo kuom seche mathoth e odiechieng’ kata obedo ni ok nochuno mondo atim kamano. Ne atimoga kamano mana  mondo alos pesa mathoth. Kae to napuonjora e wi Jehova kod kaka nochiwo wuode mohero ne dhano. Nabedo gi siso ahinya mar tiyo ne Jehova. Omiyo nachiwo ngimana ne Jehova, to bang’ tiyo e kambino kuom higni 28, nayiero mar weyo tijno kae to achako tiyo ne Nyasaye gi thuolona duto.” Mano e kaka nochako tiyo ne Nyasaye gi mor kuom higni mang’eny.

Ber ma wayudo kelo mana mor to ok lit. Be inyalo paro kaka ngimani ne chalo kane pok ing’eyo Jehova? Jaote Paulo noparo ne Jokristo ma ne ni Rumi ni chon ne gin “wasumbni mag richo” to koro ne gisebedo “wasumbni mag tim makare.” Ne ginyago olemo ma kelo “nyak kuom tim maler,” ma ne dhi miyo giyud ngima mosiko nyaka chieng’. (Rumi 6:17-22) Wan bende wadak e kit ngima maler ma onge lit ma yudo ji nikech timbe ma ok ler kendo mag gero. Mano kaka wachno miyowa mor!

Ne ane ranyisi mar Jaime ma ne ok oyie ni Nyasaye nitie. Ne oyie ni gik moko nosieko kendgi kendo nohero tuk adhong’. Jaime nochako dhi e chokruoge mag Jokristo kendo ne omor gi hera ma ji ne nigo kuno. Mondo owe yorene machon, nokwayo Jehova mondo okonye obed gi yie kuome. Jaime wacho kamaendi: “Mos mos, nafwenyo ni nitiere Wuoro ma jahera ma en Nyasaye ma kecho ji. Mako chike mag Jehova ma tayo timbe makare oserito ngimana ahinya. Dine bed ni ok alokora, dikoro nosenega, mana kaka moko kuom osiepena ma ne watugogo tuke mag adhong’. Higni ma asebedoe mamor ahinya e ngimana gin ma asetiyonego Jehova.”

Iparo ni onego wabed gi paro mane sama warito giko mar piny marachni? Ng’e ni wan ‘joma chuoyo kichiko gi roho’ kendo wabiro ‘kayo ngima ma nyaka chieng’.’ Omiyo, “kik waol gi timo gik mabeyo, nimar wabiro keyo e kinde mowinjore ka ok waol.” (Gal. 6:8, 9) Gi kony ma Jehova miyowa, wadhiuru nyime tiyo matek e nyago kido ma dwarore mondo wabi watony e “masira maduong’,” kendo wadhi nyime tiyo ne Jehova ka wamor kata ka sani waromo gi tembe.—Fwe. 7:9, 13, 14; Jak. 1:2-4.

Wanyalo bedo gadier ni sinani ma watimo sani ok bi dhi nono nimar Nyasaye ong’eyo maber tijwa kod hera ma waherego kod ma waherogo nyinge. Ka wadhi nyime tiyo ne Jehova ka wamor, wabiro chalo gi Daudi jandik-zaburi ma nowacho niya: “Aseketo Jehova e nyima ndalo duto: nikech en e bada korachwich, ok anayiengini. E momiyo chunya mor, kendo ayil ahinya kuom duong’ ma an go. Denda bende nodag ka mokuwe.”—Zab. 16:8, 9.