Un Rowere—Unyalo Timo Ang’o Mondo Uikru ne Batiso?
“A Nyasacha, amor ahinya timo gi midwaro.”—ZAB. 40:8.
1, 2. (a) Ler ane gimomiyo batiso en gima onego okaw mapek. (b) En ang’o ma ng’ato nyaka bedgo gadier kapok obatise, to nikech ang’o?
BE IN rawera ma gombo mondo obatise? Ka en kamano, to ng’e ni in gi thuolo ma jaber ahinya e ngimani. Kata kamano, mana kaka sula motelo nonyiso, batiso en okang’ ma ng’ato onego okaw mapek. Batiso nyiso ni ne isechiwori ne Jehova kendo nisesingori ni ibiro tiyone nyaka chieng’ kiketo dwache mokwongo e ngimani. Onego obatisi kiseromo timo yiero ma kamano in iwuon, ka in gi gombono, kendo king’eyo tiend chiwruok ne Nyasaye.
2 To nade kapo ni ok in gadier ni iikori ne batiso? To nade kapo ni idwaro ni obatisi to jonyuol pod neno ni onego irit mondi e ka imed ng’eyo kaka ngima Jakristo onego obed? Ka en kamano, to kik chunyi nyosre. Kar mano, ti gi thuolono e timo dongruok mondo obatisi ka kinde malach pok okalo. Ka in gi wachni e pachi, tim chenro mondo itim dongruok e yore adekgi (1) med bedo gadier gi gik misepuonjori, (2) non kaka timbeni chalo, kendo (3) nyis ni igoyo ne Jehova erokamano.
BED GADIER GI GIK MISEPUONJORI
3, 4. Ranyisi mar Timotheo puonjo rowere ang’o?
3 Par ane kaka inyalo dwoko penjo ma luwogi: Ang’o momiyo an gadier ni Nyasaye nitie? Ang’o momiyo an gadier ni Muma en Wach Nyasaye mondik kokalo kuom rohone? Ang’o momiyo aneno ni dak kaluwore gi chike Nyasaye ber moloyo luwo kit ngima mar pinyni? Penjogo ok oket mondo omi ibed gi kiawa. Kar mano, ginyalo konyi luwo weche ma jaote Paulo nojiwowago niya: “Ung’e gadier dwaro maber mar Nyasaye, dwaro mowinjore, kendo malong’o chuth e wang’e.” (Rumi 12:2) To ang’o momiyo Jokristo ma nodak Rumi ne dwarore obed gadier gi gik ma ne giseyiego?
4 Ne ane ranyisi manie Muma. Timotheo nong’eyo puonj manie Ndiko e yo malong’o. Min-gi kod da mare noyudo osepuonje wach Nyasaye chakre kinde ma ne en “nyathi matin ahinya.” Kata kamano, Paulo nojiwe niya: “Sik kuom weche misepuonjori kendo ma ne okonyi yie kuomgi chuth.” (2 Tim. 3:14, 15) Kaluwore gi buk moro, tiend konyo ng’ato mondo oyie gi puonj moro en konye obed gadier chuth ni wach moro monyise ni kare. Timotheo nokawo adiera kaka mare owuon. Norwako adiera, ok nikech min kata da mare nonyise ni otim kamano, to nikech noparo matut e wi wechego ma oyie ni gin adiera chuth.—Som Jo-Rumi 12:1.
5, 6. Ang’o momiyo dwarore ni ipuonjri ‘tiyo gi nyaloni mar paro’ ka pod itin?
5 To nade in? Nyalo bedo ni iseng’eyo adiera mag Muma kuom kinde mogwaro. Ka en kamano, donge nyalo bedo maber kiketo chenro mar nono adimba gik momiyo iyie gi adierago? Timo kamano biro konyi medo bedo gadier kuom gik miyiegogo kendo biro konyi mondo mbeseni, paro maricho mag pinyni, kata mana chunyi iwuon kik wuondi.
6 Ka upuonjoru chon tiyo gi “nyalou mar paro” ka pod utindo, mano biro konyou ng’eyo kaka unyalo chiwo dwoko mowinjore ne mbeseu sama gipenjou penjo kaka: ‘In ing’eyo nade ni Nyasaye nitie? Ka Nyasaye en jahera, kare ang’o momiyo oweyo richo mondo obedie? Nyalore nade ni Nyasaye osebedoe kuom kinde duto?’ Sama iikori maber, penjo kaka mago ok bi nyoso yie mari. Kar mano gibiro miyi siso mar medo puonjori Muma gi kinda.
7-9. Ler ane kaka sula ma yudore e websaitwa ma wiye wacho ni “Biblia Inafundisha Nini?” nyalo konyi mondo imed bedo gadier kuom gik misepuonjori e Muma.
7 Puonjruok Muma gi kinda biro konyi chiwo dwoko mag penjo miromogo, golo kiawa minyalo bedogo, kendo tego yie mari. (Tich 17:11) Osemiwa gik mopogore opogore ma nyalo konyi timo kamano. Ji mang’eny oseyudo kony kuom nono brosua mar Maswali Matano Muhimu Kuhusu Chanzo cha Uhai kaachiel gi buk miluongo ni Je, Kuna Muumba Anayekujali? E wi mago, rowere mathoth oseyudo ber kuom tiyo gi sula moro ma yudorega e websaitwa ma wachoga ni “Biblia Inafundisha Nini?” Sulago inyalo yud e jw.org/sw. Ng’i kama wacho ni MAFUNDISHO YA BIBLIA kae to idi kama wacho ni MATINEJA. Moro ka moro kuom wiye matindo ma yudore kanyo, olos mondo okonyi tego yie mari kuom weche ma Muma wuoyoe.
8 Gie sani ilony gi puonj moko manie Muma, omiyo inyalo dwoko mapiyo moko kuom penjo ma yudore kanyo. To ang’o momiyo in gadier gi dwoko michiwogo? Wiye mag puonjruok moket kanyo miyi thuolo mar nono ndiko moko mathoth kae to indiko paro ma in-go e wi ndikogo. Mano biro konyi chano kaka ibiro lero ne jomoko puonj mag Muma miyiego. Sula ma wiye wacho ni “Biblia Inafundisha Nini?” konyo rowere mathoth mondo obed gadier gi puonj mag Muma. Kapo ni inyalo donjo e Intanet, donge inyalo tiyo gi wiye matindogo sama itimo puonjruok ma mari iwuon?
9 Sama imedo tego yie mari mondo imed bedo gadier, mano en okang’ maduong’ ma konyi ikori ne batiso. Nyaminwa moro ma pod rawera nowacho kama: “Kane pok ang’ado e chunya mondo obatisa, napuonjora Muma ma aneno adier ni mae e din madier. Kendo pile ka pile amedo bedo gadier kuom wachno.”
TIMBENI
10. Ang’o momiyo en gima owinjore mondo Jakristo mosebatisi obed gi timbe ma luwore gi yiene?
10 Muma wacho niya: “Yie bende, ka en kende, ma onge tim, otho.” (Jak. 2:17) Ka in gadier gi gik misepuonjori, mano biro nenore maler e timbeni. Timbego gin kaka mage? Muma wacho ni gin ‘timbe maler kod timbe ma nyiso luoro Nyasaye.’—Som 2 Petro 3:11.
11. Bedo gi “timbe maler” tiende en ang’o?
11 Mondo ibed gi “timbe maler,” nyaka ibed gi timbe mabeyo e wang’ Nyasaye. In iwuon kaka rawera timbeni chalo nade? Kuom ranyisi, timbeni osebedo kachalo nade kuom dweche auchiel mosekalo. Isenyiso nade ni in gi nyalo mar ‘pogo gik ma kare kod gik ma ok kare’? (Hib. 5:14) Be inyalo paro kinde moko sie ma nichung’ motegno e bwo akwede kata sama mbeseni ne dwaro ni itim gik maok kare? Be timbeni e skul nyiso ni in Jakristo madier? Be ichung’ motegno sama dwarore ni itim kamano kar temo timo gik ma joklas weteni timo mondo kik gijari? (1 Pet. 4:3, 4) En adier ni wan dhano morem. Seche moko kata mana jotich Jehova mosetiyone aming’a nyalo bedo ma luor wuoyo e lela e wi yie ma gin-go. Kata kamano, ng’at mochiwore ne Jehova biro nyiso ni omor bedo ng’at miluongo gi nying Jehova, kendo mano biro nenore e timbene.
12. Moko kuom ‘timbe ma nyiso luoro Nyasaye’ gin kaka mage, to onego inegi nade?
12 To nade ‘timbe ma nyiso luoro Nyasaye’? Timbego oriwo gik ma in iwuon itimo e kanyakla, ma chalo kaka dhi e chokruoge kendo dhi lendo. E wi mano, nitie kata mamoko ma ng’ato ok bi ng’eyo ka itimo kata ok itimo, kaka lemo kod timo puonjruok ma mari iwuon. Ng’at mochiwore ne Jehova ok bi neno wechegi kaka ting’ mapek. Kar mano, obiro nyiso chuny ma Ruoth Daudi ne nigo ka nowacho niya: “A Nyasacha, amor ahinya timo gi midwaro; ee, chikni ni e i chunya.”—Zab. 40:8.
13, 14. En ang’o mosemiwa ma nyalo konyi timo ‘timbe ma nyiso luoro Nyasaye,’ to ere kaka tiyo kode osekonyo rowere moko?
13 Mondo ibed gi chenro mar gik midwaro timo, bug Maswali Ambayo Vijana Huuliza—Majibu Yafanyayo Kazi, buk mar 2 e ite mar 308 kod 309 nigi kama inyalo ndikoe gigo. Kama indikeno miyi thuolo mar ndiko dwoko mag penjo kaka, “Be inyisoga Jehova gik manie chunyi achiel kachiel seche milemo, to lamo magi nyiso ni ihero Jehova e okang’ ma romo nade?” “Puonjruok ma mari iwuon oriwoga timo ang’o?” “Be idhiga lendo kata ka po ni jonyuolni ok dhi?” Nitie bende kama inyalo ndikoe chenro ma diher bedogo motudore gi lamo, puonjruok ma mari iwuon, kod tij lendo.
14 Thoth rowere mosedwaro ni obatisgi osefwenyo ni kuonde mindikoe e bugno konyo ahinya. Nyaminwa moro ma rawera miluongo ni Tilda nowacho kama: “Natiyo gi ite moyangno mondo aket chenro ma nadwaro chopo. Nachopo chenrogo duto, kendo bang’ higa achiel naikora ne batiso.” Owadwa moro miluongo ni Patrick bende noyudo ber mar timo kamano. Owacho niya: “Noyudo aseng’eyo gik ma nadwaro chopo, mak mana ni ndikogi piny nokonya tiyo matek mondo achopgi.”
Be ibiro dhi nyime tiyo ne Jehova kata kapo ni jonyuolni ok tim kamano? (Ne paragraf mar 15)
15. Ler ane gimomiyo chiwruok ne Nyasaye onego obed yiero mar ng’ato owuon.
15 Achiel kuom penjo ma nyalo miyo ng’ato opar matut en ma: “Be ibiro dhi nyime tiyo ne Jehova kata kapo ni jonyuolni kod osiepeni oweyo tiyone?” Par ni nikech koro in Jakristo mochiwore ne Jehova kendo mosebatisi, ibiro chung’ e nyime in iwuon. Ok onego itine mana nikech jomoko kata jonyuolni timo kamano. Timbeni maler kendo ma nyiso ni iluoro Nyasaye nyiso ayanga ni iseketo adiera obedo mari iwuon kendo ni itimo dongruok mondo obatisi.
GO NE NYASAYE EROKAMANO
16, 17. (a) Ang’o monego ochwal ng’ato mondo obed Jakristo? (b) Inyalo tiyo gi ranyisi mane e lero gimomiyo onego wago erokamano nikech rawar?
16 Ng’at moro ma nolony ahinya e Chik Musa nopenjo Yesu niya: “En chik mane maduong’ie moloyo e Chik duto?” Yesu nodwoke kama: “Nyaka iher Jehova Nyasachi gi chunyi duto, kendo gi ngimani duto, kendo gi pachi duto.” (Mat. 22:35-37) E ndikono, Yesu nonyiso gima duong’ ma chwalo ng’ato otim gik ma nyiso ni en Jakristo moriwo nyaka batiso. Nowacho ni ng’ato nyaka her Jehova gi chunye duto. Achiel kuom yore maberie mogik minyalo medo herogo Jehova, en paro matut kuom mich ma jaber miwuoro ma nomiyowa ma en chiwonwa Wuode obed rawar. (Som 2 Jo-Korintho 5:14, 15; 1 Johana 4:9, 19.) Paro kuom rawarno kod ber mokelo, biro miyo igo ne Nyasaye erokamano.
17 Yo minenogo rawar kaka gima duong’ inyalo ler kitiyo gi ranyisini: Kaw ane ni inimo e pi to ng’ato obiro moresi. Be ibiro dhi adhiya dala kae to irwako lewni motuo to bang’e wiyi wil gi ng’at ma noresicha? Mano ok nyalre! Ibiro neno ni in gi gop ng’at moresino. Adier, dine ng’atno onge, dine itho! Gowi ma wan-go ne Jehova Nyasaye kod Yesu Kristo duong’ moloyo. Ka dine onge rawar, waduto dine wanimo e richo kod tho. To nikech nonyiswa hera e yo maduong’ kama, wan gi geno mar dak nyaka chieng’ e paradiso ma biro bet e piny!
18, 19. (a) Ang’o momiyo ok onego iluor chiwori ne Jehova? (b) Ere kaka tiyo ne Jehova medo bero ngimani?
18 Be imor adier gi gima Jehova osetimoni? Kare, nyalo bedo maber kichiwori ne Jehova mondo obatisi. Par ni chiwruok ne Jehova nyiso ni isingori ni ibiro timo dwache nyaka chieng’, kata ang’o ma timre. Be onego iluor timo kamano? Ooyo ng’ang! Ng’e maber ni Jehova oheri, kendo ni en “jachiw-mich ne joma manye gi kinda.” (Hib. 11:6) Kichiwori ne Jehova ma obatisi, mano ok bi miyo ngimani opong’ gi lit. Kar mano, tiyo ne Jehova biro miyo ngimani omed bedo maber. Owadwa moro ma jahigni 24 ma nobatis ka pok ochopo higni 13, wacho kama: “Samoro dibed ni ok nawinj tiend weche moko maber nikech pod ne atin. Kata kamano, yiero ma natimo mar chiwora ne Jehova osekonya mondo kik aluw yore mag piny.”
19 Jehova opogore gi Satan nimar onge ber moro amora ma Satan nyalo miyi! Onge gimoro amora ma siko ma Satan nyalo singo ne joma riwe lwedo. Dosingnegi adier ka en owuon to oonge gi geno ma jaber mar kinde ma biro? Ere kaka onyalo miyi gima en owuon oongego? Onge gima ber ma Satan nyalo singoni mopogore gi lit mochome!—Fwe. 20:10.
20. En ang’o ma rawera nyalo timo mondo otim dongruok ma chop kama ochiwore ne Nyasaye ma batise? (Ne sanduku ma wiye wacho ni “ Sula ma Nyalo Konyi Timo Dongruok.”)
20 Nenore maler ni chiwo ngimani ne Jehova e yiero maberie mogik minyalo timo. Be iikori timo kamano? Ka en kamano, to kare kik iluor. Komachielo, ka dwarore ni ikaw kinde komondi, to ti gi paro mochiw e sulani mondo okonyi timo dongruok. Paulo nondiko ne Jo-Filipi kowacho kama: “Kata bed mana ni wasetimo dongruok e okang’ marom nade, wadhiuru nyime wuotho kaka dwarore e yo achielno.” (Fil. 3:16) Kiluwo gima Paulo nowachono, ok bi budho ka pok igombo chiwori ne Jehova mondo obatisi.
