1, 2. Gin penjo mage ma wanyalo penjore kaluwore gi weche ma Yesu nowacho e Mathayo 24:14?

BED ni ji oyie kodwa kata gikwedowa, thothgi oyie ni Joneno mag Jehova ong’ere ahinya nikech tijgi mar lendo. Nyalo bedo ni iseromo gi joma wacho ni ok giyie gi puonj magwa to kata kamano, gimiyowa luor nikech tich ma watimo. Mana kaka wang’eyo, Yesu nokoro ni wach maber mar Pinyruoth ibiro land e piny duto. (Mat. 24:14) Kata kamano, ere kaka wang’eyo ni tich ma watimoni chopo weche ma Yesu nokoro? Be rach wacho ni wan kendwa e ma watiyo tich ma Yesu nokorono?

² Dinde mang’eny nenoga ni giyalo Injili kata wach maber. Kata kamano, giyaloga mana e kanisegi, e redio, TV, e Intanet ka ginyiso ji kaka ne giyudo warruok. Moko kuomgi to paroga ni giyalo sama gikonyo oganda e weche mag thieth kod gero skunde. Kata kamano, be gik ma gitimogo e tich ma Yesu nochiko jopuonjrene mondo otim?

3. Kaluwore gi Mathayo 28:19, 20, gin gik mage ang’wen ma jolup Yesu nyaka tim?

³ Be jopuonjre Yesu nonego obed abeda kamoro mos ka  girito ni ji e ma obi irgi? Ooyo ngang’. Bang’ chierne, Yesu nowuoyo gi jopuonjrene mang’eny konyisogi niya: “Dhiuru e ogendni duto mondo ulok ji obed jopuonjrena, kubatisogi . . . , kendo kupuonjogi rito weche duto ma asechikou.” (Mat. 28:19, 20) Omiyo dwarore ni watim gik moko ang’wen. Nyaka walok ji obed jopuonjre, wabatisogi, kendo wapuonjgi, kata kamano en ang’o monego watim mokwongo? Yesu nowacho ni: “Dhiuru”! Jasomo moro ma nono Muma nowacho ni wach ma Yesu notiyogo ni “dhiuru” ne nyiso ni Jakristo ka Jakristo omi ting’ mar lendo, bed ni otimo kamano e nderini kata kuonde maboyo ming’adoe nam.—Mat. 10:7; Luka 10:3.

4. Bedo “jolupo mag ji” tiende en ang’o?

⁴ Be Yesu ne wuoyo mana e kinda ma Jakristo ka Jakristo ne dhi timo, koso ne owuoyo e wi kampen mochan e yo mong’ith mar lando wach maber? Nikech ng’ato achiel ok ne nyal dhi lendo ne “ogendini duto,” ji mathoth mochan maber ne dhi dwarore mondo otim tijno. Yesu nonyiso mano ka nowacho ne jopuonjrene ni gibed “jolupo mag ji.” (Som Mathayo 4:18-22.) Tiend lupo ma Yesu ne wuoyo kuome ok en ma ng’ato achiel e ma mako rech, kobet abeta korito rech e ma obi. Kar mano, tijno ne oriwo tiyo gi net mag mako rech, to mano en tich matek ma kinde duto dwaro ni ji mang’eny onywakne e ka otime.—Luka 5:1-11.

5. Gin penjo mage ang’wen ma dwarore ni wayud dwokogi, to nikech ang’o?

⁵ Mondo wang’e ni gin jo mage ma lando wach maber kaka Yesu nokoro, dwarore ni wadwok penjo ang’wen ma luwogi:

• En ote mane monego waland?

• En ang’o monego ochwalwa timo tijni?

• Gin yore mage mag lendo monego otigo?

• Tij lendo onego otim e alwora ma romo nade kendo kuom thuolo maromo nade?

Yudo dwoko mag penjogi biro konyowa fwenyo joma tiyo tich ma reso ngima ji, kendo jiwowa mondo wadhi nyime timo tijni gi kinda.—1 Tim. 4:16.

6. Ang’o momiyo inyalo bedo gadier ni Joneno mag Jehova lando ote madier?

⁶ Som Luka 4:43. Yesu nolando ‘wach maber mar Pinyruoth,’ kendo odwaro ni jopuonjrene otim kamano. Gin jomage ma lando wach maberno ne “ogendni duto”? Gin mana Joneno mag Jehova kende. Kata mana moko kuom joma kwedowa ong’eyo wachni. Kuom ranyisi, padri moro ma en jamisonari nowacho ne Janeno moro ni osedak e pinje mathoth kendo osebedo kopenjo Joneno e pinjego ni en wach mane ma gilando. Be ing’eyo dwoko ma ne gimiyega? Padrino nowacho niya: “Giduto ne gifuwo nikech ne gimiya dwoko machal niya: ‘Wach maber mar Pinyruoth.’” Kata kamano, Jonenogo ok ne ‘ofuwo,’ nikech ne giwacho gimoro achiel mana kaka Jokristo madier onego otim. (1 Kor. 1:10) Ne gijiwo ote mantiere e gaset mar Ohinga mar Jarito Malando Pinyruodh Jehova. Gasedni yudore e dhok 254. Ilosoga gocho mar ji duto kod mar puonjruok, to moro ka moro kuom gochogo ilosoga kopi ma dirom milion 59, kendo  mano miyo obedo gaset mipogoga ahinya e piny mangima.

7. Wang’eyo nade ni jotend dinde ma luongore ni Jokristo ok land ote madier?

⁷ Jotend dinde mag miriambo ma luongore ni Jokristo ok land Pinyruodh Nyasaye. Sama giwuoyo e wi Pinyruoth, thothgi wacho ni Pinyruodhno en gima nie e chuny Jakristo. (Luka 17:21) Ok gikony ji mondo ong’e ni Pinyruodh Nyasaye en sirkal manie polo ma Yesu Kristo e Jaloch, ni pinyruodhno e ma biro tieko chandruoge duto mag dhano, kendo ni machiegnini obiro golo gik maricho duto e piny ka. (Fwe. 19:11-21) Kar mano, gihero mana paro Yesu chieng’ Krismas kod Ista. Ok ging’eyo gima Yesu biro timo kochako locho e piny ka. Nikech ok ging’eyo ote monego giland, be iparo ni ginyalo ng’eyo gima onego ochwalgi timo tijno?

8. En paro mane ma Jakristo ok onego obedgo sama otiyo tij lendo?

⁸ En ang’o maduong’ monego ochwal Jokristo madier mondo olend? Ok onego obed wach choko pesa kata gero udi madongo molichore. Yesu nonyiso jopuonjrene kama: “Nuyudo nono, omiyo chiwuru nono.” (Mat. 10:8) Wach Nyasaye ok onego olokgo ohala. (2 Kor. 2:17) Joma lando wach Nyasaye ok onego okwa osara kuom tich ma gitimo. (Som Tich Joote 20:33-35.) Kata bed ni Muma oketo wachno maler, thoth kanise odichga mana gi choko pesa kata manyo yore mamoko mag yudo pesa ka gitiyo gi nying din. Gichulo jotendgi kaachiel gi jotich mamoko osara. Thoth jotend kanise osechoko mwandu mang’eny miwuoro.—Fwe. 17:4, 5.

9. Ere kaka Joneno mag Jehova osenyiso ni gilando wach maber gi chuny mowinjore?

⁹ Joneno mag Jehova timoga nade kodok korka wach pesa? Tijgi isiro gi chiwo ma ji golo ma ok ochun-gi. (2 Kor. 9:7) Onge sadaka michokoga e Utewa mag Romo kata e chokruogewa madongo. Kata kamano, higa mokalo kende, Joneno mag Jehova notiyo gi seche ma dirom bilion ariyo e lando wach maber kendo dwe ka dwe ne gipuonjore Muma gi ji ma dirom milion 9 maonge chudo. Gima iwuoro en ni Joneno duto ok chulga osara, kata kamano, gimorga tiyo gi pesagi giwegi e tiyo tijno. Jatim nonro moro nowuoyo e wi tij Joneno mag Jehova kowacho kama: “Gima duong’ ma gitimo en lendo kod puonjo ji. . . . Onge jatelo michulo osara, to mano miyo garama maggi dok piny ahinya.” Kare ang’o ma chwalowa mondo watim tij lendo? Watiyo tijni ma ok ochunwa nikech wahero Jehova kod dhano wetewa. Chuny mar chiwruokni chopo weche ma nokor e Zaburi 110:3. (Som.)

10. Gin yore mage mag lendo ma Yesu gi jopuonjrene notiyogo?

¹⁰ Gin yore mage ma Yesu kaachiel gi jolupne notiyogo e lando wach maber? Ne gidhiga kamoro amora ma ji ne yudoree, obed e lela kata e miechgi. Tij lendo oriwo dhi ot ka ot ka wamanyo joma owinjore. (Mat. 10:11; Luka 8:1; Tich 5:42; 20:20) Tiyo gi yo mochanore kamano nyiso ni ne idhi lend ne ji duto te ma ok obuon ng’ato ang’ata.

11, 12. Kinda ma jotich Jehova nigo e tij lando wach maber, opogore nade gi ma dinde mamoko nigo?

 ¹¹ Dinde ma luongore ni Jokristo osetimo nade kuom wachni? Thothne, joma dhi e dindego oseweyo tij lendo mondo jotendgi e ma otim tijno nikech ichulogi. Kar bedo “jolupo mag ji,” gima gidichgo en mana neno ni joma ne giseyudo ok oweyogi. En adier ni seche moko jotend dindego temoga jiwo jolupgi olandie injili. Kuom ranyisi, ka ne higa mar 2001 chakore, Pop John Paul mar Ariyo nondiko e barua moro kama: “Kuom higini mang’eny, asebedo ka ajiwo ji mondo oland injili. Atimo kamano sani bende . . . Nyaka wachier kinda ma Paulo ne nigo ka nowacho niya: ‘Nodokna malit ka ok alando Injili.’” Pop nomedo wacho ni tijno “ok nyal wene mana joma olony kende, to mano en ting’ ma omi Jotich Nyasaye duto.” To ji adi mosekawo okang’ kaluwore gi wachno?

¹² Joneno mag Jehova to osedhi nade gi wach lendo? Gin kendgi e ma gilando ni Yesu osebedo ka locho kaka Ruoth chakre higa mar 1914. Mana kaka Yesu nochiko, tij lendo e ma giketo mokwongo e ngimagi. (Mar. 13:10) Buk miluongo ni Pillars of Faith—American Congregations and Their Partners wacho kama: “Kuom Joneno mag Jehova, tij lendo e gima duong’ie moloyo.” Bugno medo wacho niya kowuoyo e wi weche moko ma Janeno moro nowacho: “Sama giromo gi joma kech kayo, joma ojwang’, kata joma tuwore, gitemo konyogi . . . mak mana ni gima duong’ ma gitimo en chiwo ote e wi giko mar piny marachni, kod kaka ng’ato nyalo timo mondo obi orese.” Joneno mag Jehova dhi nyime lando wach maber ka gitiyo gi yo ma Yesu gi jopuonjrene notiyogo.

13. Tij lendo ne idhi tim e alwora ma romo nade?

¹³ Ka ne Yesu wuoyo e okang’ ma ne idhi landie wach maber, nowacho ni wach maber ne idhi land “e piny mangima.” (Mat. 24:14) Jopuonjrene ne dhi wuok e “ogendni duto.” (Mat. 28:19, 20) Mano nyiso ni tij lendo ne idhi tim e piny mangima.

14, 15. Ang’o ma nyiso ni Joneno mag Jehova osechopo wach ma Yesu nokoro kaluwore gi alwora ma tij lendo ne dhi kwako? (Ne picha manie chak sulani.)

¹⁴ Mondo wang’e kaka Joneno mag Jehova osechopo weche ma Yesu nokoro e wi alwora ma tijni ne dhi kwako, weuru wanon ane adiera moko kae. Nitie chiegni joyalo 600,000 e dinde mopogore opogore e piny Amerka, to Joneno mag Jehova 1,200,000 bende nitiere e pinyno. E piny mangima, Kanisa mar Katholik mar Roma nigi  padri mokalo 400,000. Koro pim ane kwan mar jogo, gi mar Joneno ma lando wach maber mar Pinyruoth. E piny mangima, nitie chiegni Joneno milion 8 mochiwore lando ne ji wach maber e pinje 240. Mano kaka en gima iwuoro ni tich maber ma kelone Jehova duong’ kod pak dhi nyime!—Zab. 34:1; 51:15.

¹⁵ Wan Joneno mag Jehova, wagombo ni waland wach maber ne ji mang’eny kaka nyalore ka pok giko ochopo. Nikech mano, tijwa mar loso buge e dhok mang’eny en tich makende ahinya. Buge, gasede, trakt kod otase mag gwelo ji e chokruoge madongo kod rapar, ipogoga ji nono kendo kwan-gi chopoga milionde. Wasegoyo buge mopogore opogore e dhok mokalo 700. Muma mar New World Translation of the Holy Scriptures ma kwan-gi okalo milion 200, osego e dhok mokalo 130 kama. Higa mokalo kende ne wagoyo buge, gasede gi trakt ma dirom bilion ang’wen gi nus. Websaitwa yudore e dhok mokalo 750. Ng’a gini e piny ngima ma tiyo tij lendo e yo machalo kama?

16. Wang’eyo nade ni Joneno mag Jehova nigi roho maler mar Nyasaye?

¹⁶ Tij lendo ma ne okorni biro dhi nyime nyaka karang’o? Yesu nowacho ni tijni ne idhi tim nyaka e ndalo mag giko, “eka giko [pinyni ne dhi biro].” En din mane mosedhi nyime lando wach maber e ndalo mag gikogi? Moko kuom joma waromogago sama walendo nyisowaga niya: “Wan, wan gi roho maler, un to ulendo alenda.” Kata kamano, bedo ni wanano e tij lendoni, donge mano nyiso ni wan gi roho maler mar Nyasaye? (Tich 1:8; 1 Pet. 4:14) Kinde ka kinde, dinde moko osetemo lendo kaka Joneno mag Jehova timo, to tijno osetamogi. Jomoko osetemo tiyo kaka jomisonari to bang’ kinde machuok gidokga mana e ngimagi mapile. To jomoko kuomgi nyalo temo dhi ot ka ot, to be gilando ote ma Yesu nochiko? Dwoko mar penjono nyiso ayanga ni ok gitim tich sie ma Kristo nochako.

17, 18. (a) Ang’o momiyo wanyalo bedo gadier chuth ni Joneno mag Jehova ema lando wach maber mar Pinyruoth e kindewagi? (b) Ang’o ma nyalo konyowa dhi nyime tiyo tijni?

¹⁷ To kare ng’a gini ma lando wach maber mar Pinyruoth e kindewagi? Wanyalo wacho ma onge kiawa ni gin “Joneno mag Jehova!” Ang’o momiyo wawacho kamano? Nikech walando ote madier, ma en wach maber mar Pinyruoth. Sama wadhi ir ji, mano nyiso ni watiyo gi yo makare mar lendo. Gima chwalowa timo tij lendo en hera to ok yudo ohala moro. Watiyo tijni e alwora malach moloyo ma miyo wachopo ne joma wuok e pinje duto gi dhok duto. Kendo wabiro dhi nyime tiyo tijni ma ok wawe nyaka giko nobi.

¹⁸ Kuom adier, wamor ahinya neno tich makende ma oganda Nyasaye tiyo e ndalo giko ma wadakiegi. To magi duto timore gi teko ng’a? Jaote Paulo chiwo dwoko e barua ma nondiko ne Jo-Filipi kowacho niya: “Nyasaye e ma tegou komiyou teko kod gombo mar timo duto mohero.” (Fil. 2:13) Waduto wadhiuru nyime yudo teko moa kuom Wuonwa ma jahera, sama wadhi nyime timo duto mwanyalo mondo wachop migawo marwa mar lendo.—2 Tim. 4:5.