1. Gin yore mage ma wanyalo tiyoe kanyachiel gi Jehova?

JACHUECHWA noseng’eyo chon ni dhano ma onge richo ne dhi tiyo kanyachiel kode e chopo dwache. To kata obedo ni dhano nodonjo e richo kendo sani girem, pod oyie ne joma oikore winje mondo oti kanyachiel kode pile ka pile. Kuom ranyisi, ‘watiyo kanyachiel gi Nyasaye’ sama walando wach maber mar Pinyruodhe kendo konyo ji obed jopuonjre. (1 Kor. 3:5-9) Parie thuolo ma jaber ma wan-go mar tiyo kanyachiel gi Jachuech ma nyalo giko moko duto e tich mokwano ni e tich maduong’ie moloyo tije mamoko duto! Kata kamano, lendo gi konyo ji obed jopuonjre Yesu ok e yore kende ma watiyoe kanyachiel gi Jehova. Sulani dwaro konyowa ng’eyo yore mamoko. Yorego gin: Konyo joodwa gi Jokristo wetewa, rwako welo, chiwruok e timo migepe momedore, kod medo thuolo ma watiyonego Jehova.—Kol. 3:23.

2. Ang’o momiyo ok ber ka wapimore gi jomamoko e yo ma watiyonego Jehova?

² Sama wanono sulani, tem kik ipim gik mitimo ne Jehova kod gik ma jomamoko timone. Ng’e ni ji opogore opogore ka luwore gi hikgi, midekre, dijegi, kod nyalo ma gin-go. Jaote Paulo nondiko kama: “Ng’ato ka ng’ato mondo onon timbene owuon, eka dobed gi gima dimi obed mamor, to ok kopimore gi ng’at machielo.”—Gal. 6:4.

3. Ang’o momiyo inyalo wach ni ng’ato ang’ata ma rito joodgi tiyo kanyachiel gi Nyasaye?

³ Jehova dwaro ni jotichne orit joodgi maber. Kuom ranyisi, samoro nyalo dwarore ni iti mondo joodu oyud pesa ma ginyalo konyorego. Mine mang’eny bedoga dala mondo girit nyithindgi ma pod tindo. Nyalo dwarore ni nyithindo mosebedo madongo orit jonyuolgi ma koro oseti kata ma tuore. Magi gin gik mochuno. Wach Nyasaye nyisowa kama: “Ka ng’ato ok chiw gik ma dwarore ne joma gin joge owuon, to moloyo joma gin joode, osekwedo yie kendo orach moloyo ng’at ma onge yie.” (1 Tim. 5:8) Kapo ni in gi ting’ ma kamago, nyalo bedo matek mondo ibed gi thuolo malach e tije Nyasaye kaka diher. To kik mano nyos chunyi! Jehova mor malich sama itimo kinda mondo irit joodi.—1 Kor. 10:31.

4. Ere kaka jonyuol nyalo keto dwach Nyasaye obed motelo ne dwachgi giwegi, to mano kelo ber mage?

⁴ Jonyuol ma Jokristo tiyo kanyachiel gi Jehova sama gikonyo nyithindgi mondo obed gi chenro mar tiyo ne Nyasaye e yo malach. Jonyuol mosetimo kamano oseneno ka nyithindgi yudo migepe momedore mag tiyo ne Nyasaye gi thuologi duto. Nyithindo moko osebedo jomisonari, moko gin jopainia ma tiyo kuonde ma jolendo dwaroree ahinya, to moko ni Bethel. Timo migepe kuonde maboyo kamano nyalo mono jonyuol gi nyithindgi bedo kanyachiel nyading’eny kaka de giher. Kata kamano, jonyuol mohero Jehova jiwo nyithindgi mondo onan anana e tije Jehova kuonde ma gintie. Nikech ang’o? Ng’eyo ni nyithindgi keto weche mag Pinyruoth obed motelo morogi ahinya. (3 Joh. 4) Jonyuol moko nyalo wacho gima Hanna nowacho ni nochiwo Samuel ne Jehova. Jonyuol ma kamago neno ni chiwo nyithindgi ne Jehova en gima ber ahinya. Mano gima giikore timo kinde duto.—1 Sa. 1:28.

5. Ere kaka inyalo konyo joma un-go e kanyaklau? (Ne picha ma ni e chak sulani.)

⁵ Ka po ni ionge gi ting’ mathoth ahinya mar rito joodu, donge inyalo konyo Jokristo weteni mamoko ma rito wedegi ma tuore, moti, kata mochando gik mamoko? Donge inyalo ng’iyo ane i kanyaklau ka po ni nitie joma inyalo konyo? Samoro inyalo konyo nyaminwa moro rito min-gi moti kata ma tuore sama en odich e weche mamoko. Kata, inyalo konyo joma diher ni okowgi e chokruok, odhinegi e chiro, okonygi e tije mag pacho, kata olimnegi jatuo e osiptal. Sama itimo kamano, nyalo bedo ni Jehova tiyo kanyachiel kodi e dwoko lamo mag jotichne.—Som 1 Jo-Korintho 10:24.

6. Rwako welo oriwo timo ang’o?

⁶ Joma tiyo kanyachiel gi Nyasaye oheroga rwako welo. E Ndiko mag Mathayo nyaka Fweny, wach miloko ni “rwako welo” tiende sie en “nyiso ng’wono ne joma wakia.” (Hib. 13:2) Muma oting’o ranyisi mathoth ma nyalo konyowa ng’eyo kaka wanyalo rwako welo. (Cha. 18:1-5) Onego wamany thuolo mag konyo jomamoko kinde duto, bed ni gin “joma wan-go e yie,” kata ooyo.—Gal. 6:10.

7. Ang’o momiyo onego warwak owete gi nyimine ma tiyo ne Nyasaye kuom thuologi duto?

⁷ Be inyalo tiyo kanyachiel gi Nyasaye kuom rwako owete gi nyimine ma tiyone gi thuologi duto e odu? (Som 3 Johana  5, 8.) Timo kamano miyowa thuolo mar jiwruok. (Rumi 1:11, 12) Ne ane ranyisi mar Olaf. Higni mang’eny mokalo ka ne pod otin, ne gin gi jarit-alwora moro ma ne pok okendo. Ne onge ng’ato ang’ata e kanyaklagi ma ne nyalo miye kar nindo. Olaf nokwayo jonyuolne ma ne ok gin Joneno mondo jarit-alworano odag e odgi sama olimo kanyaklagi. Ne giyie, kata kamano, ne ginyiso Olaf ni owe ne jarit-alwora kitanda mondo en onind e kom. Olaf mor ni notimo kamano. Owacho kama: “Jumano nodhi koda maber nyowuoyo! An kaachiel gi jarit-alwora ne wamondoga chiewo, kendo ne wagoyo mbaka mathoth sama wamadho chai. Mbakago nojiwa ma an be abedo gi gombo mar tiyo ne Jehova kuom thuolona duto.” Kuom higni 40 mokalo, Olaf osebedo jamisonari e pinje mopogore opogore.

8. Ang’o momiyo onego wanyis ji ng’wono kata bed ni seche moko joma wanyiso ng’wono ok ne mano? Chiw ane ranyisi.

⁸ Nitie yore mang’eny minyalo nyisogo ni ihero nyaka joma ikia kata bed ni seche moko joma inyiso ng’wono ok ne mano. Ne ane ranyisini. Chieng’ moro ka ne jalendo moro ma Spain puonjo Yesica ma Nya-Ecuador Muma, Yesica nochako ywak. Jalendono nopenje gimomiyo noywak. Nodwoko ni ka ne pok odar thurgi, ne odhier marach mochopo kama chieng’ moro noriyo kech. Pi modho kende e ma nonyalo miyo nyare ma pod ne tin. Notemo hoyo nyare mondo onindi ka e sechego bende nolemo. Mapiyo bang’ mano, nyiminewa ariyo nodwong’o dhoode to ne ok orwakogi maber, kendo noyiecho gaset ma ne gimiye. Nokok ne Jonenogo kama: “Mae e chiemo ma udwaro ni ami nyara?” Nyiminego notemo hoye, to ne ok ochikonegi ite. Bang’e, ne gikelone okapu mopong’ gi chiemo mi giweyone e dhoode. Timgino nomulo chuny Yesica ahinya mi ochako ywago ang’e gimomiyo ne ok oyie winjo joma Nyasaye ne tiyogo e dwoko lambe. Wang’ni to koro noramo ni nyaka oti ne Jehova. Donge ng’wono ma nyiminewago notimo ne Yesica nokelo ber!—Ekl. 11:1, 6.

9, 10. (a) E ndalo Jo-Israel machon, gin kinde mage ma ne dwarore ni jotich Jehova ochiwre e timo migepe mopogore opogore? (b) E kindewagi, gin migepe kaka mage ma owete nyalo chiwore mondo gitim e kanyakla?

⁹ E ndalo Jo-Israel machon, nitie kinde ma ne dwarore ni jotich Jehova ochiwre e timo tije mopogore opogore. (Wuok 36:2; 1 We. 29:5; Neh. 11:2) E kindewagi, inyalo chiwo thuoloni, mwanduni, kod lony ma in-go mondo ikony Jokristo weteni. Kitimo kamano, ibiro bedo ma mor kendo ibiro yudo gueth mang’eny.

¹⁰ Wach Nyasaye jiwo owete mondo oti kanyachiel gi Jehova kuom timo kinda mondo giyud migepe momedore moriwo nyaka tayo kanyakla. (1 Tim. 3:1, 8, 9; 1 Pet. 5:2, 3) Owete ma timo kamano konyo Jokristo wetegi e yor ringruok kod e yor chuny. (Tich 6:1-4) Be jodongo osekwayi ka be inyalo bedo jarwak ji e kanyaklau kata ka be inyalo konyo e rito buge, chano alwora milendee, rito Od Romo osik ka ber, kata tije mamoko ma kamago? Owete ma timo tijego nyalo pimoni kaka konyo jomamoko e yo ma kamano kelonegi mor.

11. Osiepe ma nyaminwa moro oseyudo sama otiyo tij gero Ute Romo osekonye nade?

¹¹ Joma chiworega mondo otim migepe momedore yudoga osiepe manyien mang’eny. Ne ane ranyisi mar  Nyaminwa Margie ma osechiwore e gero Ute Romo kuom higni 18. Kuom hignigo, osebedo kotiego nyimine mang’eny ma pod tindo mondo giti ne Nyasaye e yo momedore. Oneno ni tiyo tij gedo miye thuolo mang’eny mar jiwo jomamoko, to en be oyudo jip. (Rumi 1:12) Sa asaya ma oromoga gi tembe, osiepe ma oseyudogo jiwega ahinya. Be isegachiwori e tij gedo? Bed ni in gi lony e tij gedo kata ooyo, pod inyalo anyala chiwori.

12. Inyalo timo ang’o mondo ikony Jokristo weteni moyudo masira?

¹² Sama masira moro otimore, jotich Nyasaye yudoga thuolo mar tiyo kanyachiel gi Nyasaye e konyo owetegi ma oyudo masirano. Kuom ranyisi, gikowoga pesa ma owetego nyalo konyorego. (Joh. 13:34, 35; Tich 11:27-30) Bende, gikonyo e golo gik mokethore kendo gero udi manyien ne owetego. Nyaminwa Gabriela ma Nya-Poland ma ne ode okethore marach ka oula maduong’ noyweyo gweng’gi ne obedo ma mor ahinya ka ne owete oa e kanyakla mamoko ma ne ni machiegni mondo gikonye. Owacho kama: “Ok daher wuoyo ahinya e wi giga ma nokethore. Mago gin mana gige ringruok ma rumoga. Kar mano, ahero wuoyo kuom ber ma nayudo. Yo ma owete gi nyimine nokonyago nomedo jiwona ni bedo e kanyakla mar Jokristo en gima kende ahinya kendo ma kelo mor mogundho.” Ji mathoth mosekony bang’ masira wachoga ni gidong’ga ka gitegno moloyo kaka ne gin ka masirano pok notimore. To owete ma osetiyo kanyachiel gi Jehova e konyo Jokristo moyudo masira bende bedoga ma mor.—Som Tich Joote 20:35; 2 Jo-Korintho 9:6, 7.

13. Ere kaka chiwruok e konyo jomamoko nyalo miyo wamed hero Jehova? Chiw ane ranyisi.

¹³ Nyaminwa moro ma nyinge Stephanie kaachiel gi jolendo moko ne ochiwore konyo Joneno moko ma ne oringo thuchegi nikech tulo mi gidhi dak Amerka. Ne gikonyo owete gi nyiminego e yudo kuonde dak. Owacho niya: “Ka ne waneno mor ma ne gin-go nikech yo ma riwruokwa mar owete ne konyogigo, wan be ne wabedo ma mor sidang’.” Stephanie medo wacho niya: “Ne gineno  ni ne wakonyogi ahinya, to chutho-chutho gin e ma ne gikonyowa. Hera ma ne gin-go, yo ma ne giwinjorego, yie motegno ma ne gin-go, kod kaka ne gigeno kuom Jehova nomiyo wan be wamedo hero Jehova ahinya, kendo sani wakawo mapek ahinya gik ma Jehova timonwa kokalo kuom riwruok mar ogandane.”

14, 15. (a) En paro mane maber ma janabi Isaya ne nigo? (b) Ere kaka joyal wach Pinyruoth e kindewagi nyalo luwo ranyisi mar Isaya?

¹⁴ Be diher medo thuolo mitiyogo kanyachiel gi Jehova? Be inyalo chiwori mondo idhi ilend e alwora ma jolendo dwaroree ahinya? Ok ochuno ni jotich Jehova odhi olend kuonde maboyo ahinya e ka ginyis ni gichiwore; kata kamano, moko kuomgi to nigi nyalo mar dhi chiwore kuonde maboyo. Gin gi paro kaka ma janabi Isaya ne nigo. Ka ne Jehova openjo ni, “Naor ng’a, ng’a ma nodhinwa?” Isaya nodwoko ni: “An ka; ora.” (Isa. 6:8) Be igombo chiwori e yo ma kamano ka po ni chalni oyieni? Gin migepe kaka mage minyalo chiwori timo?

¹⁵ Ka ne Yesu wuoyo e wi tij yalo wach maber kendo konyo ji obed jopuonjre, nowacho niya: “Tij keyo duong’, to jotich e ma nok. Omiyo, kwauru Ruodh keyo mondo oor jotich e keyone.” (Mat. 9:37, 38) Donge inyalo dhi lendo e alwora ma jolendo dwaroree? Inyalo kata bedo painia! Ka po ni mano ok nyalreni gie sani, be inyalo konyo jalendo machielo mondo otim kamano? Owete gi nyimine mang’eny oseyudo ni yo maber mar nyiso ni gihero Nyasaye kod jowetegi en timo tij painia e alwora ma jokeyo dwaroree. Be inyalo paro yore mamoko momedore minyalo tiyoego kanyachiel gi Nyasaye? Ibiro yudo mor mogundho kitimo kamano.

16, 17. Gin yore mage mamoko minyalo tiyoego kanyachiel gi Jehova?

¹⁶ Be diher chiwori tiyo e Bethel kata e konyo tij gero ute mag lamo, kata mana kuom kinde? Riwruok mar oganda Jehova pod dwaro joma oikore tiyo ne Jehova kamoro amora ma omigie migawo, kendo moikore timo migawo moro amora momigi. Samoro nyalo dwarore ni gikony e timo tich moro sie ma dwarore kamoro kata ka po ni gionge gi lony e tijno. Jehova mor ahinya gi joma chiwore mondo gikony e timo tije ma dwarore ni otim.—Zab. 110:3.

¹⁷ Be dibed ni igombo yudo tiegruok momedore mondo imed lony e migawo ma Jehova omiyi? Ka en kamano, to kare inyalo yudo thuolo mar dhi e Skul mar Joland-Injili mar Pinyruoth. Skundno itiegoe owete gi nyimine ma tiyo ne Nyasaye kuom thuologi duto mondo gimed lony e migepegi. Joma kwayo mondo gidhi e skundno onego oikre timo migawo moro amora minyalo migi bang’ skul. Be diher timo kinda mondo iyud migepe momedore kokalo kuom dhi e skundno?—1 Kor. 9:23.

18. Gin ber mage miyudo kitiyo kanyachiel gi Jehova pile ka pile?

¹⁸ Nikech wan jo Jehova, wan jochiwo ahinya. Mano miyo wabedo gi kido kaka ber, ng’wono, kod hera. Kidogo miyo wakecho jomamoko, to mano miyo wabedo gi mor kod kue. (Gal. 5:22, 23) Kuom mano, bed ni kit ngimani chalo nade, bed gadier ni inyalo bedo ma mor kibedo jachiwo kaka Jehova kendo kitiyo kanyachiel kode pile ka pile!—Nge. 3:9, 10.