1. En ang’o ma waduto wagomboga ne wedewa?

NYAMINWA moro ma nyinge Pauline * wacho kama: “Chakre kinde ma nachako puonjora adiera, asebedo ka agombo ahinya ni jodalawa bende chieng’ moro odag e Paradiso. To ahinya-ahinya, nadwaro ni Wayne jaoda kod wuodwa oti ne Jehova.” Be in gi wede ma pok ong’eyo Jehova? Ka en kamano, nyaka bed ni in be gima chando Pauline chandiga.

2. Gin penjo mage ma wadwaro nono e sulani?

² En adier ni ok wanyal chuno wedewa mondo orwak wach maber mondo gibi giyud ngima ma nyaka chieng’, kata kamano, wanyalo jiwogi mondo giyaw chunygi ne wach maber. (2 Tim. 3:14, 15) Ang’o momiyo onego walend ne wedewa? Ang’o momiyo onego watem ng’eyo kaka giwinjo e chunygi? Ang’o ma wanyalo timo mondo wakony wedewa mi giher Jehova mana kaka wan be wahere? To ere kaka jo kanyaklawa nyalo konyowa timo mano?

3. Ka luwore gi 2 Petro 3:9, ang’o momiyo onego walend ne wedewa?

³ Machiegnini, Jehova biro tieko piny marachni. Joma ‘chunygi ni kare ne ngima mochwere’ kende e ma ibiro resi. (Tich 13:48) Watimoga kinda ahinya e lendo ne ji e alworawa, moriwo nyaka joma wakia. Koro nade wedewa ma gin joma wang’eyo maber? Donge gin be onego walendnegi?  Jehova Wuonwa ma jahera ‘ok dwar ni oketh ng’ato ang’ata, to odwaro ni ji duto ochop kama gilokoe chunygi gia e richo.’​—Som 2 Petro 3:9.

4. En ang’o marach ma wanyalo po ka watimo sama walendo ne wedewa?

⁴ Ber ng’eyo ni nitie yo maber mar lendo kod yo marach mar timo kamano. Kata obedo ni watiyoga gi rieko ahinya sama walendo ne joma wakia, wanyalo po ka wamwomore sama walendo ne wedewa.

5. En ang’o monego wapar seche duto ma wadwaro lendo ne wedewa?

⁵ Ng’enywa ywagoga ang’e sama waparo chieng’ ma ne wahango lendo ne wedewa. Jaote Paulo nonyiso Jokristo kama: “Kinde duto, wecheu mondo obed mang’won, ma nigi ndhadhu ka gima otwonie chumbi, mondo ung’e kaka onego uchiw dwoko ne ng’ato ka ng’ato.” (Kol. 4:5, 6) Ber mondo wapar puonjno seche duto ma wadwaro lendo ne wedewa, nono to wanyalo paro ni wakonyogi to kare wakeyogi akeya.

6-7. Chiw ane ranyisi ma lero gimomiyo ber ka Janeno odewo jaode ma ok Janeno kendo temo ng’eyo kaka owinjo e chunye.

⁶ Tem ng’eyo kaka giwinjo e chunygi. Pauline ma ne wasewuoyo kuome motelo wacho niya: “Mokwongo okwongo, nasiko ka awuoyo gi jaoda mana e wi Nyasaye kod Muma. Ne ok wagoga mbekni mamoko ahinya.” Wayne chwore to ne okia weche Muma, omiyo, gik ma Pauline ne siko wuoyego ne ok donjne kata matin. En noneno ni chiege noketo pache mana kuom weche dinne sa te. Chunye ne chandore ni mita ka chiege nodonjo e din moro ma galagala kendo ni ne iwuonde.

 ⁷ Pauline wacho ni kuom adier, notiyoga gi thuolo mang’eny gi owete gi nyimine, obed e chokruok, tij lendo, kata budho kanyachiel. Owacho kama: “Kinde mang’eny, Wayne ne yudoga ka ot ni kende, kendo noneno ni ojwang’e.” Kuom adier, Wayne ne ni mana kare ka nodwaro ni jaode kod wuode kik sik ka weye e ot kende. Ne okia joma ne budhoga gi jaode, kendo noneno ni jogo e ma koro jaode ne dewo moloye. Wayne nonyiso Pauline ni nodwaro ni giketh kend margi chuth. Be inyalo neno yore ma Pauline ne nyalo nyisogo ni odewo chwore kendo ong’eyo kaka chwore winjo e chunye?

8. Ka luwore gi 1 Petro 3:1, 2, en ang’o ma nyalo ywayo wedewa moloyo?

⁸ Ywagi kokalo kuom timbeni. Gima nyaloga ywayo wedewa moloyo en timbewa to ok mana weche ma wawachonegi. (Som 1 Petro 3:1, 2.) Mano e gima Pauline noduogo ofwenyo. Owacho kama: “Ang’eyo ni Wayne ne ohera, kendo e chunye ne ok odwar ni waketh kend marwa. Kata kamano, bedo ni nowacho ni noparo gima kamano nomiyo aneno ni nonego achak timo gik moko kaka Jehova dwaro. Kar wuoyo mang’eny e weche Muma, nonego aket ranyisi maber kokalo kuom timbena.” Pauline noweyo keto Wayne gi weche Muma sa te sa te, kendo nochako goyo kode mbekni mapile. Wayne nochako neno ka jaode medo bedo mang’won kode, kendo wuode be nomedo bedo gi timbe mabeyo. (Nge. 31:18, 27, 28) Ka Wayne noneno kaka puonj mag Muma ne konyo joode, en be nochako rwako Wach Nyasaye.​—1 Kor. 7:12-14, 16.

9. Ang’o momiyo ok onego waol gi konyo wedewa?

 ⁹ Kik iol kodgi. Jehova ketonwa ranyisi maber e wachno. Jehova miyo ji thuolo “nyadinwoya” mondo girwak wach maber mi giyud ngima. (Yer. 44:4, NW) Jaote Paulo bende nojiwo Timotheo ni onan sama nopuonjo ji adiera. Nikech ang’o? Timo kamano ne dhi miyo oresre kaachiel gi joma noyie winje. (1 Tim. 4:16) Wahero wedewa ahinya; omiyo, dwaher ni ging’e adiera ma ni e Wach Nyasaye. Gikone, weche ma ne Pauline wacho kaachiel gi timbene nokonyo joode. Sani chwore bende tiyo ne Jehova. Giduto gin jopainia, kendo Wayne en jaduong’-kanyakla.

10. Ang’o momiyo onego wahore gi wedewa?

¹⁰ Hori. Sama wadhi nyime loko kit ngimawa oluwre gi puonj mag Nyasaye, lokruok ma watimogo nyalo chando wedewa moko. Thothne, gima gikwongo fwenyoga piyo en ni ok wariwre kodgi e nyasi mag din kendo ok wadonjre e siasa. Igi nyalo wang’ kodwa. (Mat. 10:35, 36) To mano ok onego omi wawe konyogi. Ka waweyo wachonegi gik ma wayiego, mano nyiso ni waseng’adonegi bura ni ok giwinjore yudo ngima ma nyaka chieng’. Jehova ok omiyowa tij ng’ado bura; mano en tich moketo e lwet Yesu. (Joh. 5:22) Ka wahore, wedewa moko bang’e nyalo yie rwako wach ma walando.​—Ne sanduk ma wiye wacho ni, “ Ti gi Websaitwa e Puonjo.”

11-13. Yo ma Alice notemo konyogo jonyuolne puonji ang’o?

¹¹ Kik imbek adiera, to ti gi rieko. (Nge. 15:2) Ne ane ranyisi mar Alice. Jonyuolne ne ok oyie kuom Nyasaye kendo ne gihero siasa ahinya. Nopuonjore adiera ka nodak mabor kodgi. Nofwenyo ni nonego onyis jonyuolne gik mabeyo ma nopuonjore mapiyo kaka nyalore. Owacho kama: “Kiweyo kinde okalo mang’eny ahinya ka pok inyiso wedeni lokruok mitimo nikech adiera mipuonjori, gibiro bwok moloyo ka di ne iwachonegi chon.” Alice nondiko ne jonyuolne barupe kopenjogi paro ma ne gin-go e wi puonj moko mag Muma ma ne nyalo morogi, kuom ranyisi, puonj ma wuoyo e wi hera. (1 Kor. 13:1-13) E barupenego, nogoyonegiga erokamano kuom pidhe maber, kendo nooronegiga mich. Sa asaya ma nolimogi, nokonyoga min-gi e tije mag ot moloyo kaka notimoga chon. Ka nonyisogi wach dinne, wachno ne ok omorogi.

¹² Kinde duto ma ne en ir jonyuolne, ne ok oweyo chenrone mar somo Muma pile. Owacho kama: “Luwo chenrono nokonyo minwa ng’eyo kaka ageno Muma ahinya.” Wuon Alice nong’ado ni nodwaro nono weche moko e Muma mondo ong’e gima noloko pach nyare, kendo nodwaro ni oyud gimoro marach e Muma ma nonyalo tiyogo e kwede. Alice wacho kama: “Ka nokwaya Muma, namiye, kendo nandiko barua moro machuok mi aketone e i Mumano.” Weche nodhi nade? Kar yudo gimoro marach e Muma kaka noparo, weche ma nosomo e Muma nomulo chunye ahinya.

¹³ Kata mana sama wakalo e tembe kod akwede, pod ok onego wambek adiera. Kar mano, onego wadhi nyime tiyo gi rieko. (1 Kor. 4:12b) Kuom ranyisi, Alice ne nyaka nan ahinya nikech min-gi ne kwede. Owacho kama: “Ka ne obatisa, mamawa nowacho ni an ‘nyathi ma wiye tek.’” Alice nokawo wachno nade? Olero kama: “Ne ok aweyo wuoyo e wi dinna; kar mano, nalero ne mamawa e yor luor ni aseng’ado e chunya ni abiro dhi  nyime bedo Janeno mar Jehova. Nanyiso mamawa ni ahere ahinya. Wachno nomiyo waduto waywak. Bang’ ywak malit, natedone chiemo moro mamit. Chakre chieng’no, mamawa nochako fwenyo ni weche ma napuonjora e Muma ne miyo amedo bedo ng’at maber.”

14. Ang’o momiyo ok onego wambek adiera?

¹⁴ Nyalo kawo kinde malach mondo wedewa ofweny ni ok wanyal weyo Jehova kata gitim ang’o. Kuom ranyisi, bang’ kinde ka ne Alice oyiero bedo painia kar dhi somo tich ma ne jonyuolne dwaro ni otim, mamagi noywak ahinya. Kata kamano, Alice nochung’ kar tiende. Owacho niya: “Ka imbeko kata mana wach achiel, joodu biroga dwaro mondo imbek weche mamoko bende. To kichung’ kar tiendi kendo ibedo mang’won kodgi, moko kuomgi biro winji sama ilendonegi kendo ginyalo rwako adiera.” Mano e gima notimore ne Alice. Jonyuolne duto sani gin jopainia, kendo wuon-gi en jaduong’-kanyakla.

15. Ka luwore gi Mathayo 5:14-16 kod 1 Petro 2:12, ere kaka ‘timbewa mabeyo’ nyalo miyo wedewa orwak adiera?

¹⁵ Jehova ywayo ji ire kokalo kuom ‘timbe mabeyo’ ma jo kanyakla nigo. (Som Mathayo 5:14-16; 1 Petro 2:12.) Ka po ni jaodi ok en Janeno mar Jehova, be osegaromo gi jo kanyaklau moko? Pauline ma ne wasewuoyo kuomecha nogwelo owete gi nyimine e ode mondo Wayne ong’egi. Wayne paro kaka owadwa moro nomiyo ochako neno Joneno mag Jehova  e yo mopogore. Owacho kama: “Owadwano nokwayo rusa e tich mondo wane kode opira. Nawacho e chunya ni, ‘Kare en be gik ma kamagi nyalo more!’”

16. Ang’o momiyo onego wagwel wedewa e chokruok?

¹⁶ Achiel kuom yore mabeyo ma wanyalo konyogo wedewa en gwelogi e chokruok. (1 Kor. 14:24, 25) Chokruok ma Wayne nokwongo dhiye ne en mar Rapar nikech nitime bang’ tich kendo nochuok. Owacho kama: “Kata obedo ni ne ok awinjo tiend gik ma nopuonj chieng’no, namor gi kaka norwaka maber. Ji ne mor koda kendo ne gimosa gi ilo. Ne nenore maler ni ne gin joma beyo.” Ne nitiere dichwo moro gi chiege ma nosebedo ka konyoga Pauline ng’iyo wuode e chokruok kod e tij lendo. Omiyo, ka nochopo kama Wayne ne dwaro puonjore Muma, Wayne nokwayo mondo dichwono e ma opuonjre kode.

17. En ketho mane ma ok onego waket kuomwa, to ang’o momiyo ok onego waol gi konyo wedewa?

¹⁷ Ng’ato ka ng’ato kuomwa geno ni wedene duto chieng’ moro nyalo tiyo ne Jehova. Kata kamano, gima wang’eyo en ni moko kuomgi samoro ok bi kawo okang’ ma kamano kata wakonygi ma romo nade. Omiyo, sama moko kuomgi odagi rwako adiera, kik waket ketho kuomwa kata matin. Mano yiero margi! Ok wanyal chuno ng’ato ang’ata mondo orwak adiera. To gima wiyi kik wilgo en ni ranyisi maber miketo sama itiyo ne Jehova kimor nyalo mulo chuny wedeni mi gilok pachgi. Lemnegi. Ti gi rieko sama itemo lendonegi. Kik iol kodgi! (Tich 20:20) Bed gadier ni Jehova biro guedho kinda mitimo e temo konyogi. To ng’ato ang’ata kuomgi moyie winji mi orwako adiera ibiro resi!